Filipenses 3

1Ndo' je' je' 'o nn'aⁿya na cwila'yu'yo', quiaana' na neiⁿ'yo' na cwiluiindyo' cwentaa' Ta Jesús. Ticjo̱meintyja̱a̱'a na nntsjo̱o̱nnda'a ñ'oom na jnda̱ seiljeiya nda̱a̱'yo' ndo' mateijndeiina' 'o. 2Cal'andyo' cwenta cantyja 'naaⁿ naⁿm'aⁿ na cha'cwijom calue' joona natia na cwil'ana na cwityjena seii' ts'aⁿ, 3ee jaa laxmaaⁿya nn'aⁿ na mayuu'cheⁿ tuii 'naaⁿ, jaa na cwila't'maaⁿ'ndyo̱ Ty'o̱o̱ts'om nc'e Espíritu Santo, na m'aaⁿya na neiiⁿya na laxmaaⁿya cantyja 'naaⁿ' Cristo Jesús meiⁿ ticantyjaa' n'o̱o̱ⁿya 'naaⁿ na tuii seii' ts'aⁿ. 4Cantyja 'naⁿ ja luaa, wanaaⁿ na nntseicantyjaa' ts'o̱o̱ⁿ cha'na ts'iaaⁿwaa'. Xeⁿ aa m'aaⁿ ts'aⁿ na matseitiuu wanaaⁿ na matseicantyjaa' ts'om ts'iaaⁿmeiⁿ', majndeiiticheⁿ ja, 5jnda̱ ñeeⁿ xuee na tuiindyo̱ tuii 'naaⁿ tjaaⁿya. Ts'aⁿ tsjaaⁿ nn'aⁿ Israel ja, tmaaⁿ' cwentaa' Benjamín, ts'aⁿ hebreo ja ndo' tsotya̱ tsondyo̱ mann'aⁿ hebreos joona. Cantyja 'naaⁿ' ljeii na tqueⁿ Moisés, ts'aⁿ tmaaⁿ' fariseo ja. 6Cantyja na tyojoo' ts'o̱o̱ⁿ naquii' ñ'oom cwilein'om nn'aⁿ judíos, tyontyjo̱ya tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ. Cantyja 'naaⁿ' na matseicanda̱a̱'ñe ts'aⁿ jo nnom ljeii na tqueⁿ Moisés, tjaa 'ñeeⁿ juu na nnda̱a̱ m'mo̱ⁿ na tyootseicanda̱a̱'ndyo̱ jo nnom juuna'. 7Sa̱a̱ cha'tso nmeiⁿ' na tandyo xuee tjeii'a cwenta na tjacantyja na jnda laxmaⁿna', je' nc'e na m'aaⁿya cantyja 'naaⁿ' Cristo macwjii'a cwenta na cwe' ts'iaaⁿ'ndyo laxmaⁿna', 8ndo' nchii macanda̱ luaa', tjaa'naⁿ cwiicheⁿ na jnda ntyjiiya quia na macwjii'a cwenta na tjacantyja naya tseixmaⁿna' na cwiluiindyo̱ cwentaa' Cristo Jesús na cwiluiiñê na matsa̱'ntjoom ja. Nc'e jom, cha'tso na ñetjeii'a cwenta na jnda laxmaⁿna', je' macwjaa'ndyo̱ cwenta na laxmaⁿna' cha'cwijom to' cha nnda̱a̱ nntseixmaⁿya cwentaaⁿ'aⁿ, 9ndo' na nleitquioo' na matseitjoom'na' ja cantyja 'naaⁿ'aⁿ. Nchii mal'ua̱ya na matseixmaⁿya ts'aⁿ na tjaa jnaaⁿ' nc'e matseicanda̱a̱'ndyo̱ ljeii na tqueⁿ Moisés sa̱a̱ nc'e na matseiyu'ya ts'o̱o̱ⁿ ñ'eⁿ Cristo. 10Ñe'catseiljeii'ndyo̱ cantyja 'naaⁿ' Cristo ndo' na nntseixmaⁿya juu najndeii na matseixmaⁿ Ty'o̱o̱ts'om na s'aa na tando'xcoom, ndo' na nntseijomndyo̱ ñequio joo nawi' na teinoom ndo' na nntseixmaⁿya cha'xjeⁿ na seixmaaⁿ xjeⁿ na tueeⁿ'eⁿ, 11ee na ntyjaa' ts'o̱o̱ⁿ na ñ'a̱ⁿ quia na nnta'ndo'xco nn'aⁿ na jnda̱ tja̱. 12Nchii ñe'catsjo̱o̱ na jnda̱ mamatseixmaⁿya cha'tso nmeiⁿ' meiⁿ nchii na canda̱a̱' matseixmaⁿya sa̱a̱ matseijndo̱ya ts'o̱o̱ⁿ na macantyjaa' ts'o̱o̱ⁿ na ntseixmaⁿya joona' nc'e nquii Cristo tjei'jñeeⁿ ja. 13'O nn'aⁿya na cwila'yu'yo', nchii matsjo̱o̱ya na mamatseixmaⁿya juuna', sa̱a̱ luaa mats'aa, cwitsuu'yaya ts'o̱o̱ⁿ ljo' ñeseixmaⁿya jaach'ee xuee ndo' matseijndo̱yaya na nncua̱'ntyjo̱ya juu na waa jo nno̱o̱ⁿ, 14cha nncua̱caño̱o̱ⁿya yuu na jnda̱ t'mo̱ⁿ Ty'o̱o̱ts'om no̱o̱ⁿ ndo' na nnto'ño̱o̱ⁿya naya na nñequiaa nqueⁿ na ma'maaⁿ jaa cantyja 'naaⁿ' Cristo Jesús. 15Cha'tsondyo̱ jaa na laxmaaⁿya na canda̱a̱' cwila'yu'ya n'o̱o̱ⁿya matsona' na laa'ti' c'oom' n'o̱o̱ⁿya. Ndo' xeⁿ waa cwiicheⁿ nnom na m'aaⁿ' n'om'yo' cantyja 'naaⁿ' ñ'oomwaa', nntseijndo̱' Ty'o̱o̱ts'om n'om'yo' cantyja 'naaⁿ'na'. 16Sa̱a̱ ñ'oom na mayuu'cheⁿ, macaⁿna' na tjoom' c'o̱o̱ⁿya cantyja 'naaⁿ ñ'oom na jnda̱ to'ño̱o̱ⁿya. 17'O nn'aⁿya na cwila'yu'yo', cala'ljeii'ndyo' cha'xjeⁿ na mats'aa. Ndo' mati queⁿ'yo' cwenta cwaaⁿ nc'iaa'yo' na cwila'ljeii'ndye cha'xjeⁿ na cwil'aayâ, caluii'ndyo' joona. 18Jndye ndii' jnda̱ ñetsjo̱o̱ya nda̱a̱'yo', ndo' ñequio na mat'io̱o̱ya matsjo̱o̱nnda'a, jndye nn'aⁿ m'aⁿ na jndoo ñ'oom cantyja 'naaⁿ' na tue' Cristo nacjoo' ts'oom'naaⁿ, 19sa̱a̱ na macanda̱ maxjeⁿ nntsuundyena. Ñequii'cheⁿ cwila't'maaⁿ'ndyena juu na l'ue n'om seiina. Matsona' na c'omna na jnaaⁿna cantyja 'naaⁿ'na' sa̱a̱ juu na matsona' na c'omna na jnaaⁿna, cwitjeii's'andyena cantyja 'naaⁿ'na'. 20Sa̱a̱ jaa nmeiiⁿ la'xmaaⁿya cantyja 'naaⁿ' cañoom'luee, juu jo' tseixmaⁿna' tsjoomya, ndo' cwimeiⁿndo̱'nty'iaandyo̱ na jo' jo' nnaⁿ nquii na macwji'n'maaⁿñe jaa, juu Jesucristo. 21Jom nntseichueeⁿ'eⁿ seii'a na jeeⁿ cje tseixmaⁿna' na nntseijomna' joona' cha'na seiiⁿ'eⁿ na xocwi'ndaa' na matseixmaaⁿ jnda̱ na wando'xcoom. Nnts'aaⁿ na ljo' nc'e najndeii na tseixmaaⁿ na nlqueeⁿ xjeⁿ cha'tso na niom.

will be added

X\