Mateo 8

1Quia na jndyocue Jesús ta na tjaaⁿ, jndyendye nn'aⁿ tquiontyjo̱ naxeeⁿ'eⁿ. 2Tyjee'cañoom cwii ts'aⁿ na chuu tycu lepra, tjatseicandyoo'ñe, tco' xtye jo nnoom, tso: —Ta, ntyjii na 'u nnda̱a̱ nntsein'maⁿ' ja, xeⁿ l'ue ts'om'. 3Ndo' Jesús seintyjo̱o̱ⁿ ts'o̱o̱ⁿ, tyenquioom'm tsaⁿ'ñeeⁿ, matsoom nnom: —L'ue ts'o̱o̱ⁿ. Can'maⁿ'. Ndo' mañoom' n'maⁿ tsaⁿ'ñeeⁿ, mana tsu tycu lepra. 4Quia jo' tso Jesús nnoom: —Ndi' nntsjo̱o̱, meiⁿcwii ts'aⁿ ticatsu' nnom chiuu waa na tuii. Sa̱a̱ cja', cja'tseica'mo̱ⁿndyu' nnom tyee, ndo' quiaa' quioo' nnoom na tseixmaⁿ cwentaa' Ty'o̱o̱ts'om cha'xjeⁿ na sa̱'ntjom Moisés. Luaa' catsa' cha calui'yuu'na' nda̱a̱ nn'aⁿ na jnda̱ n'maⁿ'. 5Xjeⁿ na mawjaaquiee' Jesús tsjoom Capernaum, cwii capeitaⁿ na matsa̱'ntjom cwii siaⁿnto sondaro seicandyoo'ñe nacañom'm. S'aa ty'oo nnoom. 6Tso: —'U Ta, moso 'naⁿya macanda̱ cwe' waaⁿ na waa w'aya, tei'caljoo tycutqueeⁿ jom. Jeeⁿ cwajndii maquiina' jom. 7Tso Jesús nnom: —Nncjo̱, nntsein'maⁿya jom. 8Sa̱a̱ t'o̱ capeitaⁿ, tsoom: —'U Ta, ticatseixmaⁿya na nncja'quie' naquii' w'aya. Mantyjii meiiⁿ cwe' ñ'oom catsu', mana nn'maⁿ moso 'naⁿya. 9Ee mati ja m'aaⁿya nacje 'naaⁿ nn'aⁿ na cwitsa̱'ntjom. Ndo' mati nnco̱ m'aⁿ sondaro na matsa̱'ntjo̱ⁿ. Quitsjo̱o̱ nnom cwii joona: “Cja' luaa'”, ndo' wjaa. Quitsjo̱o̱ nnom cwiicheⁿ: “Candyo' luaa”, ndo' ndyo. Quitsjo̱o̱ nnom cwii cwii moso 'naⁿya: “Catsa' ts'iaaⁿwaa'”, ndo' nts'aa. 10Jeeⁿ tjawee' ts'om Jesús quia na jñeeⁿ ñ'oom 'ndyoo tsaⁿ'ñeeⁿ. Tsoom nda̱a̱ nn'aⁿ na cwi'oontyjo̱ naxeeⁿ'eⁿ: —Mayuu'cheⁿ nndye'yo' nntsjo̱o̱, meiⁿ quii'ntaaⁿ nn'aⁿ Israel tyooljei cwii ts'aⁿ na matseiyu'ya ts'om cha'na tsaⁿm'aaⁿ'. 11Candye'yo' nntsjo̱o̱, jndye nn'aⁿ na nchii nn'aⁿ Israel nnaⁿ naⁿ'ñeeⁿ jo ntyja na macalui' ñe'quioom' ñequio ntyja na mawjaacue ñe'quioom'. Ndo' yuu na m'aⁿ Abraham ñ'eⁿ Isaac ñ'eⁿ Jacob yuu na matsa̱'ntjom Ty'o̱o̱ts'om, ñequio na neiiⁿna nncwindyuaandyena na nlcwa'na ñ'eⁿ naⁿ'ñeeⁿ. 12Sa̱a̱ nquiee nn'aⁿ judíos na qui na cwentaana cantyja na matsa̱'ntjom Ty'o̱o̱ts'om, nncwji'na' joona jo' jo'. Nncju'na' joona yuu na tjacantyja na jaaⁿñe. Jo' jo' nnc'omna na nla'xuaana na matsei'ndaa'na' n'omna. Ndo' nnteinquiena ndei'n'omna na maquiina' joona. 13Quia jo' tso Jesús nnom capeitaⁿ'ñeeⁿ: —Cha'xjeⁿ na jnda̱ seiyu', maxjeⁿ jo' nluii. Cja'lcwe' na waa wa'. Ndo' mañejuu xjeⁿ'ñeeⁿ n'maⁿ mosoo' tsaⁿ'ñeeⁿ. 14Tjaquiee' Jesús waa' Pedro. Ljeiiⁿ na waa sta̱xeeⁿ' tsaⁿ'ñeeⁿ cjoo' jnduu. Matseicona' juu. 15Tyenquioom'm ts'o̱ tsaⁿ'ñeeⁿ ndo' mañoom' tjameintyjee' na matseicona' juu. Teicantyja, to̱' na mandi'ntjom nda̱a̱na. 16Quia na jnda̱ tmaaⁿya, tquiocho nn'aⁿ jndye nc'iaana na cwilei'cho jndyetia na m'aaⁿ Jesús. Ñe'cwii sa̱'ntjoom na calui' jndyetia, quia jo' jlui'na naquii' n'om naⁿ'ñeeⁿ. Ndo' sein'maaⁿ cha'tso nn'aⁿwii. 17Luaa' tuii cha calui'ljuu' ñ'oom' Ty'o̱o̱ts'om na tyoñequiaa profeta Isaías. Tso tsaⁿ'ñeeⁿ: “Manquiityeeⁿ teijneiⁿ jaa cantyja na tijndeii' n'o̱o̱ⁿya. Ndo' mati sein'maaⁿ jaa cha'tso ntycu na ñejleichuuna' jaa.” 18Quia na nty'iaa' Jesús na jndyendye nn'aⁿ m'aⁿ nacañom'm, tsoom nda̱a̱ nn'aⁿ na cwila'jomndye ñ'eⁿñê na cala'jndaa'ndyena w'aandaa na nnc'oona xndyaa' ndaaluee. 19Ndo' tjantyjaa' cwii ts'aⁿ na ma'mo̱ⁿ ljeii na tqueⁿ Moisés. Matso nnoom: —Maestro, nncjo̱ntyjo̱ naxeⁿ' meiⁿyuucheⁿ na wja'. 20T'o̱ Jesús nnom, tsoom: —Joo canndye maniom lue'w'aayo' ndo' cantsaa na cwima'ntyja mati maniom cantquiaayo', sa̱a̱ ja na cwiluiindyo̱ ts'aⁿ na jnaⁿ cañoom'luee meiⁿ yuu na nncwajndya̱, tjaa'naⁿ. 21Cwiicheⁿ ts'aⁿ na matseijomñe ñ'eⁿñê, matso nnoom: —Ta, quiaa' ñ'om' na nndi'ntjo̱ⁿtya̱ nnom tsotya̱, hasta xeⁿ jnda̱ ty'iuya jom, quia jo' yuu' je' nñ'a̱ⁿya ñ'eⁿndyu'. 22T'o̱ Jesús nnom, matsoom: —Jndye nn'aⁿ m'aⁿ na tyootando' cantyja 'naⁿya. M'aⁿna cha'cwijom l'oo. Ca'ndii' na joona caty'iuundye ntyjeena. Sa̱a̱ 'u je', candyo'tseijomndyu' ñ'eⁿndyo̱. 23Quia jo' tuo̱o̱ⁿ ts'om w'aandaa, mandi ñ'eeⁿ nn'aⁿ na cwila'jomndye ñ'eⁿñê. 24Luaa tuii, tyoowijndye 'oona, tioo cwii jndye t'maⁿ jndeii nnom ndaaluee, mawaa na wjaanchjeeñe nmo̱ⁿ w'aandaa. Ndo' jom watsom. 25Ndo' ty'entyjaa' nn'aⁿ na cwila'jomndye ñ'eⁿñê jla'nlcwina jom, jluena: —Jeeⁿ 'u Ta, cwji'n'maaⁿndyu' jaa, manncwja̱a̱ya. 26Quia jo' tsoom nda̱a̱na: —'O nn'aⁿ na ticala'yu'ya n'om'yo' ñ'eⁿ Ty'o̱o̱ts'om, ¿chiuu na cwilacatyuendyo'? Ndo' teicantyjaaⁿ, seitiaaⁿ'aⁿ jndye'ñeeⁿ ñequio ndaaluee, mana teicheⁿñ'eⁿna'. 27Cwe' seiñ'eeⁿ'tona' naⁿ'ñeeⁿ, jluena: —¿'Ñeeⁿ cwiluiiñe tsaⁿm'aaⁿ' na jeeⁿcheⁿ ndya' waljoo'? Jnda'jom meiiⁿ jndye, meiiⁿ ndaaluee cwila'canda̱na' ñ'oom na matsa̱'ntjoom. 28Jnda̱ jo' jlui'na cwiicheⁿ xndyaa' ndaaluee, ndyuaa nn'aⁿ gadarenos, we nn'aⁿ na la'xmaⁿ naⁿjndii ty'ecatjomndye jom. Jlui'na yuu niom ndei'luaa, jeeⁿcheⁿ ndya' wjeena hasta leicanda̱a̱ nncwinom ts'aⁿ nato'ñeeⁿ. 29Luaa tuii, jndeii jla'xuaana, jluena: —¿Ljo' nntsa' ñ'eⁿndyô̱, 'u Jesús, Jnda Ty'o̱o̱ts'om? ¿Aa jnda̱ jndyo' na nlco'wi' jâ, meiiⁿ tyoowe'ntyjo̱ xjeⁿ na nntu'xeⁿndyô̱? 30Jo' jo' chjooti matquio̱o̱'ti m'aⁿ cwii tmaaⁿ' t'maⁿ calcu na cwicwa'. 31Ndo' naⁿjndii'ñeeⁿ jla'ty'oondyena nnoom jluena: —Xeⁿ na nncwji' jâ naquii' n'om naⁿm'aⁿ, quiaa' ñ'om' na nntsaquia̱a̱'â naquii' n'om calcu na m'aⁿ luaa'. 32Quia jo' tsoom nda̱a̱na: —Cwa, catsa'yo'. Mana jlui'na, ty'equie'nomna naquii' n'om calcu'ñeeⁿ. Ndo' cha'waa tmaaⁿ' calcu'ñeeⁿ tmaⁿ'nquioyo', mana tei'tyu'yo' 'ndyoo ndaaluee. Tja̱yo' quii' ndaa. 33Ndo' nn'aⁿ na cwijndoo' jooyo', jlei'nomna, ty'equie'na quii' tsjoom. Tcuu tcuu tyola'candiina chiuu waa na tjoomna ñ'eⁿ calcu'ñeeⁿ ñequio chiuu waa na n'maaⁿ we naⁿ'ñeeⁿ na tyolei'cho naⁿjndii. 34Quia jo' cha'tso nn'aⁿ tsjoom'ñeeⁿ jlui'na, ty'ena na m'aaⁿ Jesús. Ndo' quia na tjomndyena jom, l'ana ty'oo nnoom na calueeⁿ'eⁿ ndyuaana.

will be added

X\