Mateo 7

1’Til'uee'ndyo' jnaaⁿ nn'aⁿ na cwe' xjeⁿto 'o cha ticu'xeⁿ Ty'o̱o̱ts'om 'o. 2Ee mañejuuti ñ'oom na cwil'ue'yo' nacjoo nc'iaa'yo', majuuna' nleil'uee'ñe Ty'o̱o̱ts'om na nncu'xeⁿna' 'o. Ndo' cha'xjeⁿ na cwitjei'yo' cwenta na cat'uiina' nc'iaa'yo', malaa'ti' nnts'aaⁿ ñ'eⁿndyo'. 3¿Chiuu na jeeⁿ maqueⁿ' cwenta meiiⁿ chjoowi' ljo' mach'ee x'ia'? Ndo' manncu'ti' tiqueⁿ' cwenta na t'maⁿ matsei'tjo̱o̱ndyu'. Mach'eena' cantyja 'naⁿ' cha'cwijom jeeⁿ ndo' ntquioo' jnda̱ na njom ts'omnnom x'ia', sa̱a̱ meiⁿchjoo tiqueⁿ' cwenta ts'oom tscaa' na njom ts'omnjom' nncu'. 4¿Aa nntsu'yu' nnom x'ia': “Cwa, quiaa' na nncwjii'a ntquioo' jnda̱ na njom ts'omnjom'”? Ndo' 'u je' ndicwaⁿ njom ts'oom tscaa' ts'omnjom'. 5'U ts'aⁿ na we waa na matseixmaⁿ' cwji'jndyee' ts'oom tscaa' na njom ts'omnjom' nncu' quia jo' tquio'ya' na nncwji' ntquioo' jnda̱ na njom ts'omnnom x'ia'. 6’Tiñe'quia'yo' 'naⁿ na lju' la'xmaⁿna' nda̱a̱ nn'aⁿ na ticala'ñ'oom'ndye Ty'o̱o̱ts'om na ticala'xmaⁿ na nnto'ñoom joona'. Ee xeⁿ na luaa' nl'a'yo' matseijomna' cha'cwijom cwiñe'quia'yo' 'naⁿ na ya na la'xmaⁿna' cwentaa' Ty'o̱o̱ts'om nda̱a̱ calue'. Ndo' calue'ñeeⁿ nnta'queⁿyo' na nntquiiyo' 'o. Meiⁿ tiñe'quia'yo' 'naⁿ na jnda nda̱a̱ naⁿ'ñeeⁿ, ee xeⁿ na ljo' nl'a'yo', matseijomna' cha'cwijom cwitue'yo' ts'uaa ta̱' na jeeⁿ jnda nda̱a̱ calcu. Ndo' calcu'ñeeⁿ cwe' nntyueyo' joona'. 7’Ñequii'cheⁿ cataⁿ'yo' nnom Ty'o̱o̱ts'om quia jo' nnda'yo' juu na cwitaⁿ'yo'. Ñequii'cheⁿ cal'ue'yo' chiuuya jo nnoom quia jo' nliu'yo'. Ñequii'cheⁿ ca'maⁿ'yo' jom quia jo' nnaaⁿ cha'cwijom 'ndyoots'a jo nda̱a̱'yo'. 8Ee cwii ts'aⁿ na waa na macaaⁿ nnom Ty'o̱o̱ts'om, maxjeⁿ nnco'ñoom juuna'. Ndo' mati ts'aⁿ na mal'ue yuu na l'ue ts'om Ty'o̱o̱ts'om, maxjeⁿ nljeiiⁿ. Ndo' juu ts'aⁿ na ma'maⁿ, maxjeⁿ nntseicanaaⁿñe Ty'o̱o̱ts'om cha'cwijom 'ndyoots'a jo nnom. 9’¿'Ñeeⁿ cwiindyo' 'o na m'aaⁿ yucachjoo jnda, ndo' xeⁿ macaaⁿ tyoo' njom', aa nñequiaa'yu' tsjo̱' nnoom? Tjaa'naⁿ 'ñeeⁿ nnts'aa na ljo'. 10Ndo' xeⁿ macaⁿ yucachjoo jnda' cwii catscaa njom', ¿aa nñequiaa'yu' catsuu nnoom? Xocatsa' na ljo'. 11Quia jo' 'o nn'aⁿ na tia nn'aⁿndyo', xeⁿ manquiu'yo' na nñe'quia'yo' 'naⁿ na ya nda̱a̱ nda'yo', majndeiiticheⁿ nquii Tsotye'yo' na m'aaⁿ cañoom'luee nñequiaaⁿ 'naⁿ na yaticheⁿ nda̱a̱ nn'aⁿ na cwitaⁿ nnoom. 12’Quia jo' meiⁿnquia na l'ue n'om'yo' na cal'a nn'aⁿ ñ'eⁿndyo' majo'ti cal'a' 'o ñ'eⁿndye joona. Ee laa'ti' matsa̱'ntjom ljeii na tqueⁿ Moisés ñequio ñ'oom' Ty'o̱o̱ts'om na tyoñe'quia profetas tandyo xuee. 13’'O catsaquie'yo' 'ndyoots'a cantuu na nnc'om'yo' natoo' Ty'o̱o̱ts'om. Ee waa 'ndyoots'a tmeiⁿ na matseicanaaⁿñena' nato t'maⁿ. Juuna' wjaañ'oomna' ts'aⁿ na nntsuuñe ndo' jndye nn'aⁿ cwi'ooquie' jo' jo'. 14Sa̱a̱ 'ndyoots'a cantuu matseicanaaⁿñena' nato cajneiⁿ. Nato'ñeeⁿ wjaañ'oomna' ts'aⁿ na ticantycwii na nncwando' sa̱a̱ tijndye nn'aⁿ cwiliu juuna'. 15’Cal'a'yo' cwenta ñequio joo nn'aⁿ na tiyuu' ñ'oom cwiñe'quia. Cwiquie'cañomna 'o na ndoo' jeeⁿ nioom' n'omna cha'na nioom' ts'om catsmaⁿ sa̱a̱ naquii' n'omna laxmaⁿna na wi'ndyena cha'cwijom lobo. 16Nnta'jnaⁿ'yo' 'ñeeⁿ joona quia cwiqueⁿ'yo' cwenta chiuu cwil'ana. ¿Aa nnts'aacheⁿna' na nntseicjoo ts'aⁿ ta̱uva l'o̱o̱nioom? Oo ¿aa nntseicjoo ts'aⁿ ta̱higos ts'oom nioom? Xocats'aana' na ljo'. 17Ee ticwii cwii ts'oom na ya, cwiwe' ta̱ na ya, ndo' ticwii cwii ts'oom na tis'a, cwiwe' ta̱ na tis'a. 18Ts'oom na ya xocue' ta̱ na tis'a, ndo' ts'oom na tis'a xocue' ta̱ na ya. 19Ticwii cwii ts'oom na ticats'aa ta̱ na ya, cwit'uana', jnda̱ chii cwituee' nn'aⁿ juuna' quii' chom. 20Luaa' waa na nnta'jnaⁿ'yo' naⁿ'ñeeⁿ, ee m'mo̱ⁿna' na tiyuu' ñ'oom na cwiñe'quiana quia na nleitquioo' chiuu waa na cwil'ana. 21’Majndye nn'aⁿ cwilue nno̱o̱ⁿ Ta, sa̱a̱ ticha'tsondyena nnc'ooquiee'ndyena cantyja na matsa̱'ntjom Ty'o̱o̱ts'om. Ñequii'cheⁿ joo nn'aⁿ na cwil'a ljo' na l'ue ts'om Tsotya̱ya na m'aaⁿ cañoom'luee, naⁿ'ñeeⁿ nnc'ooquiee'ndye cantyja na matsa̱'ntjoom. 22Xuee na nncue'ntyjo̱ na nntu'xeⁿndye nn'aⁿ, majndye nn'aⁿ nluena no̱o̱ⁿ: “Jeeⁿ 'u Ta, ¿aa nchii jnda̱ tquiaayâ ñ'oom naya 'naⁿ' ñequio najndeii na matsei'xmaⁿ' ndo' tjeii'â jndyetia naquii' n'om nn'aⁿ, ndo' l'aayâ jndye 'naaⁿ ñequio najndu' nncu' na tixocaluiina' cantyja najndeii na matseixmaⁿ ts'aⁿ?” 23Quia jo' nnc'o̱ya ndyuee naⁿ'ñeeⁿ, nntsjo̱o̱: “Meiⁿchjoo ticwajnaⁿ'a 'ñeeⁿ 'o. Quindyo̱'yo' nacañomya, 'o nn'aⁿ na tia nn'aⁿndyo'.” 24’Ticwii cwii ts'aⁿ na mandii ñ'oom na matsjo̱o̱ nmeiiⁿ ndo' matseicanda̱ joona', matseijomna' tsaⁿ'ñeeⁿ cha'na cwii ts'aⁿ na jndo̱' ts'om na s'aa waa' nacjoo' tsjo̱'t'maⁿ na tyeⁿ wacatyeeⁿ. 25Jnaⁿna' tua', tyjee' jndaa, tioo jndye jndeii, teicaljoona' w'aa'ñeeⁿ, sa̱a̱ tiquioona' ee na t'uiityeⁿna' nacjoo' tsjo̱'ñeeⁿ. 26Sa̱a̱ ticwii cwii ts'aⁿ na mandii ñ'oom na matsjo̱o̱ ndo' titseicanda̱ joona', matseijomna' tsaⁿ'ñeeⁿ cha'na cwii ts'aⁿ na tijndo̱' ts'om na s'aa waa' nacjoo' tei'. 27Jnaⁿna' tua', tyjee' jndaa, tioo jndye jndeii, teicaljoona' w'aa'ñeeⁿ, mana tioona'. Ndo' mat'maⁿ tsuu cantyja 'naaⁿ' w'aa'ñeeⁿ. 28Quia na jnda̱ jnda̱ seineiⁿ Jesús cha'tso ñ'oommeiⁿ', nn'aⁿ na jndyendye jeeⁿ tjawee' n'omna ñ'oom na t'mo̱o̱ⁿ nda̱a̱na. 29Ee tyo'mo̱o̱ⁿ na waa najndeii na matseixmaaⁿ, nchii cha'na cwit'mo̱o̱ⁿ nn'aⁿ na jndo̱' n'om cantyja 'naaⁿ' ljeii na tqueⁿ Moisés.

will be added

X\