Mateo 26

1Jnda̱ na seineiⁿ Jesús cha'tso ñ'oommeiⁿ', seineiiⁿ nda̱a̱ jâ nn'aⁿ na cwilajomndyô̱ ñ'eⁿñê. 2Tsoom: —'O nquiu'yo' na we xuee cwii tjo̱o̱ ndo' nncuee' xuee pascua. Ndo' ja na cwiluiindyo̱ ts'aⁿ na jnaⁿ cañoom'luee maquialjo' nñe'quia nn'aⁿ cwenta ja luee nn'aⁿ na nnty'ioomna ja ts'oom'naaⁿ. 3Ndo' ntyee na cwiluiitquiendye ñequio nn'aⁿ na cwit'mo̱o̱ⁿ ljeii na tqueⁿ Moisés ñequio nn'aⁿ na cwiluiitquiendye naquii' tsjoom, mañejuu xjeⁿ'ñeeⁿ tjomndyena tach'eeⁿ' w'aa t'maⁿ, waa' tyee na cwiluiitquieñe na jndyu Caifás. 4Tyo'maⁿna ñ'eⁿ nc'iaana chiuu nl'ayoona na nñequio'nn'aⁿna Jesús cha nt'uena jom, ndo' na nla'cuee'na jom. 5Jla'tiuuna, jluena nda̱a̱ nc'iaana: —Sa̱a̱ ticat'ua̱a̱ya jom xcwe ncuee cha ticala'wendye nn'aⁿ nacjooya. 6Tyom'aaⁿ Jesús tsjoom Betania waa' Simón, tsaⁿ na ñechuu tycu lepra. 7Wacatyeeⁿ nacañoom' meiⁿsa ndo' tuee'cañoom cwii yuscu na maleiñ'oom cwii tsioo na tuiina' ñ'eⁿ tsjo̱' canchii' na jndyu alabastro. Tsioo'ñeeⁿ ñjom ncheⁿ' cachi na jeeⁿ jnda. Tu'nquioom joona' xqueⁿ Jesús. 8Ndo' jâ nn'aⁿ na cwilajomndyô̱ ñ'eⁿñê, quia na nty'iaayâ na luaA', jla'lioo'ndyô̱, l'uuyâ: —Jeeⁿcheⁿ ndyaa' cwe'chi tsuu ncheⁿ'. 9Yati xeⁿ teil'uana' ee jndye s'om nncwji'na' na nluii naya ndyeñeeⁿ'. 10Quia sei'no̱ⁿ' Jesús na luaa' cwil'uuyâ, tsoom nda̱a̱yâ: —¿Chiuu na cwila'lioo'ndyo' ñ'eⁿ yuscum'aaⁿ'? ee jeeⁿ tjacanjoom' nayawaa' na s'aaⁿ ñ'eⁿndyo̱. 11Ee ja nchii ñequii'cheⁿ nnc'o̱o̱ⁿya ñ'eⁿndyo' sa̱a̱ ndyeñeeⁿ' ñequii'cheⁿ m'aⁿna quii'ntaaⁿ'yo'. 12Yuscum'aaⁿ' na tu'nquioom ncheⁿ' nacjoya, matseijndaa'ñena' na nncjaacanty'iuu'ndyo̱. 13Mayuu'cheⁿ nndye'yo' nntsjo̱o̱, meiⁿyuucheⁿ na nñe'quia nn'aⁿ ñ'oom naya 'naaⁿ' Ty'o̱o̱ts'om na cha'waa tsjoomnancue, maxjeⁿ nla'neiⁿna cantyja 'naaⁿ' naya na s'aa yuscum'aaⁿ' cha ticatsuu ñ'oom cantyja 'naaⁿ'aⁿ. 14Ndo' cwii jâ nn'aⁿ na canchoo'wendyô̱, juu tsaⁿ na jndyu Judas Iscariote, tjaaⁿ na m'aⁿ ntyee na cwiluiitquiendye. 15Tsoom nda̱a̱na: —¿Cwanti nncwantjo̱ⁿ nl'a'yo', nñequia cwenta Jesús luee'yo'? Jla'jndaa'ndyena, tquiana ntquiuu nchoo' qui s'om xuee. 16Ndo' xjeⁿ'ñeeⁿ to̱o̱ⁿ'o̱ⁿ, tyol'uee'ñê chiuu ya nnts'aaⁿ na nñequiaaⁿ cwenta Jesús lueena. 17Tuee' xuee na cwiwityeⁿ ncuee na cwicwa' nn'aⁿ tyoo' na tjaa ndaaljo' tjaquiee'. Jâ nn'aⁿ na cwilajomndyô̱ ñ'eⁿ Jesús jla'candyoo'ndyô̱ na m'aaⁿ, l'uuyâ: —¿Yuu l'ue ts'om' na nntsalajndaa'ndyô̱ cantyja 'naaⁿ' xuee pascua na nleiñ'oom' na nlqui' catsmaⁿ? 18T'o̱o̱ⁿ nda̱a̱yâ, tsoom: —Catsaquie'yo' quii' tsjoom, candu'yo' nnom juu ts'aⁿ na nliu'yo': “Ndi' matso Maestro ts'aⁿ na ma'mo̱o̱ⁿ nda̱a̱yâ na majnda̱ jaawe'ntyjo̱ xjeⁿ na nlco'wi'na' jom. L'ue ts'oom na nnteijndei' wa' na nleijndaa' na nlcwaaⁿ'aⁿ, nlqueeⁿ catsmaⁿ na nntseit'maaⁿ'ñê xuee pascua ñequio jâ nn'aⁿ na cwilajomndyô̱ ñ'eⁿñê.” 19Ndo' l'aayâ cha'xjeⁿ na tsoom. Jlajndaa'ndyô̱ na nlcwaa'â natmaaⁿ xuee pascua. 20Jnda̱ na teinco̱o̱ⁿ' ncue, tjawacatyeeⁿ Jesús nacañoom' meiⁿsa ñequio jâ na canchoo'wendyô̱. 21Ndo' yocheⁿ na cwicwaa'â to̱o̱ⁿ'o̱ⁿ, seineiiⁿ nda̱a̱yâ, tsoom: —Mayuu'cheⁿ nndye'yo' nntsjo̱o̱, cwiindyo' 'o nñequiaa cwenta ja luee nn'aⁿ. 22Ñ'oomwaa' jeeⁿ ndyaa' seichjoo'na' n'o̱o̱ⁿyâ. To̱o̱'â cwii ndo' cwiindyô̱ ta'x'a̱a̱yâ nnoom, l'uuyâ: —Ta, ¿aa nnts'aacheⁿna' na ja? 23T'o̱o̱ⁿ nda̱a̱yâ, tsoom: —Cwii ts'aⁿ na jnda̱ tjoom xiowaa ñ'eⁿndyo̱, tsaⁿ'ñeeⁿ nñequiaaⁿ cwenta ja. 24Ndo' maxjeⁿ nlco'wi'na' ja na cwiluiindyo̱ ts'aⁿ na jnaⁿ cañoom'luee cha'xjeⁿ na matso ljeii 'naaⁿ' Ty'o̱o̱ts'om. Sa̱a̱ jeeⁿ nty'iaa'ñe juu ts'aⁿ na nñequiaa cwenta ja luee nn'aⁿ. Yati xeⁿ tîcaluiiñe tsaⁿ'ñeeⁿ. 25Quia jo' t'o̱ Judas, tsaⁿ na nñequiaa cwenta jom. Tso: —'U Maestro, ¿aa nnts'aacheⁿna' na ja? T'o̱ Jesús nnoom: —Majo'ndyo cha'xjeⁿ jnda̱ tsu'. 26Yocheⁿ na cwicwaa'â to'ñom Jesús tyoo', seit'maaⁿ'ñê Ty'o̱o̱ts'om cantyja 'naaⁿ'na'. Tyjeeⁿ juuna', tquiaaⁿ nda̱a̱yâ. Tsoom: —Cato'ñoom'yo' cwa'yo' tyoo'waa, ee cwiluiiñena' seii'a. 27Mati to'ñoom cwii waso na ñjom ndaa winom, tquiaaⁿ na quianl'uaa' Ty'o̱o̱ts'om. Jnda̱ chii tquiaaⁿ juuna' nda̱a̱yâ, tsoom: —Luaa cwe'yo'. Calui' cjaana'. 28Ndaa winomwaa cwiluiiñena' nioom'a na ñequio juuna' maqua̱ⁿtya̱ⁿya ñ'oom xco cha nnda̱a̱ ntseit'maⁿ ts'om Ty'o̱o̱ts'om jnaaⁿ jndyendye nn'aⁿ. 29Nndye'yo' nntsjo̱o̱, xuee na cwii wjaatina' taxoc'uannda'a ndaa winom hasta quia jnda̱ tue'ntyjo̱ na mamatsa̱'ntjom Tsotya̱. Quia ljo'cheⁿ nnc'uaxco̱ juuna' ñ'eⁿndyo' yuu na matsa̱'ntjoom. 30Taayâ cwii luantsa, jnda̱ chii jluii'â jo' jo'. Saayâ ta na jndyu Olivos. 31Quia jo' tso Jesús nda̱a̱yâ: —Tsjom je' cha'tsondyo' 'o nntjei'ndyo' ñ'eⁿndyo̱. Ee ljeii 'naaⁿ' Ty'o̱o̱ts'om matsona': “Nla'cuee' nn'aⁿ juu ts'aⁿ na mach'ee cwenta canmaⁿ. Ndo' canmaⁿ ntsmeiiⁿ'eⁿ nnt'oom'ndyeyo'.” 32Ndo' tsotyeeⁿ nda̱a̱yâ: —Ja quia na jnda̱ mawando̱'xco̱ na jnda̱ ty'io̱, nncjo̱jndya̱a̱ ts'o̱ndaa Galilea, xeⁿ jnda̱ nntsantyjo̱'yo'. 33Ndo' t'o̱ Pedro nnoom, tso: —Meiiⁿ cha'tsondye naⁿm'aⁿ' nntjeii'ndyena ñ'eⁿndyu' sa̱a̱ ja tijoom cwji'ndyo̱ ñ'eⁿndyu'. 34T'o̱ Jesús nnoom, tso: —Mayuu'cheⁿ matsjo̱o̱ njom', tsjom je', cwii tjo̱o̱cheⁿ na nntseixuaa caxtijndyo, sa̱a̱ 'u jnda̱ ndyee ndii' macwji'ndyu' ñ'eⁿndyo̱. 35Tso Pedro nnoom: —Meiiⁿ na nncju'na' na c'io̱ ñ'eⁿndyu' sa̱a̱ tijoom cwji'ndyo̱ cantyja 'naⁿ'. Ndo' majuu ñ'oom t'o̱o̱yâ na cha'tsondyô̱ na cwilajomndyô̱ ñ'eⁿ Jesús. 36Ndo' squia̱a̱yâ cwii joo na jndyuna' Getsemaní. Tsoom nda̱a̱yâ: —Cwindyuaandyo' ñjaaⁿñe yocheⁿ na jo̱ luaa' na nntseina̱ⁿya nnom Ty'o̱o̱ts'om. 37Quia jo' tjatyeeⁿ, tjañ'oom Pedro ñequio we ntseinda Zebedeo. Jnaⁿna' na t'maⁿ matsei'ndaa'na' ntyjeeⁿ, ndo' jeeⁿ matseichjoo'na' ts'oom. 38Tsoom nda̱a̱na: —Jeeⁿcheⁿ ndyaa' matseichjoo'na' ts'o̱o̱ⁿ hasta jom ndyowe' ts'o̱o̱ⁿ. Caljoo'ndyo' ljoo. C'om'c'eendyo', calajomndyo' ñ'eⁿndyo̱, nchii cwinda'yo'. 39Quia jo' tjatjatyeeⁿ chjoowi'. Tjawanquioom na matseit'maaⁿ'ñê Ty'o̱o̱ts'om. Tyoch'eeⁿ ty'oo nnom, tsoom: —Tsotya̱ya, xeⁿ aa waa na nnda̱a̱ nluii, quiaa' na tincwino̱o̱ⁿya nawi'waa na matseijomna' cwii na jeeⁿ ja. Sa̱a̱ meiiⁿ na luaa' macaⁿ'a, caluii cha'xjeⁿ na l'ue ts'om' nncu', nchii cha'xjeⁿ na l'ue ts'o̱o̱ⁿ ja. 40Jnda̱ jo' jndyolcweeⁿ'eⁿ na m'aⁿ ndyee naⁿ'ñeeⁿ na cwila'jomndye ñ'eⁿñê. Ljeiiⁿ na cwindana. Tsoom nnom Pedro: —'U Pedro, ¿aa tîcanda̱a̱ nlaquii n'om'yo' meiiⁿ ñe'cwii hora na ticanda'yo' na nlajomndyo' ñ'eⁿndyo̱? 41Cha'tsondyo' c'om'c'eendyo' na calaneiⁿ'yo' nnom Ty'o̱o̱ts'om cha ticjaachuuna' 'o xjeⁿ 'naaⁿ'na' quia wi' cwitjom'yo'. Mayuu', jeeⁿ m'aaⁿc'ee' ts'om ts'aⁿ na nnts'aa yuu na macaⁿna' sa̱a̱ nc'e na ts'aⁿ tseixmaaⁿ, tileicanaⁿñê. 42Jnda̱ jo' tjannaaⁿ'aⁿ na jnda̱ we ndii' na nntseineiiⁿ nnom Ty'o̱o̱ts'om. Tsoom: —Tsotya̱ya, xeⁿ xocanda̱a̱ na nncwinom'na' nawi' na nntjo̱ⁿya, ñecuaa, caluii cha'xjeⁿ na l'ue ts'om' nncu'. 43Jndyonnaaⁿ'aⁿ na m'aⁿ naⁿ'ñeeⁿ. Ljeiiⁿ maxjeⁿ cwindana, ee jeeⁿ tyeⁿ maleichuu tsaⁿtsjom joona. 44Quia jo' 'ñeeⁿ joona, tjannaaⁿ'aⁿ na seineiiⁿ nnom Ty'o̱o̱ts'om na jnda̱ ndyee ndii'. Mañejooti ñ'oom tyotseity'ooñê. 45Tyjee'cañoomnnaaⁿ'aⁿ naⁿ'ñeeⁿ, tsoom nda̱a̱na: —¿Aa maxjeⁿ ndicwaⁿ cwinda'yo'? Ya na mañjom cwita'jndyee'yo'. Cwa je' c'om'c'eendyo', ee jnda̱ tue'ntyjo̱ xjeⁿ cantyja 'naⁿya na cwiluiindyo̱ ts'aⁿ na jnaⁿ cañoom'luee. Je' mañequiaa ts'aⁿ cwenta ja luee nn'aⁿ na wi'ndye. 46Quicantyja'yo', cjaaya. Canty'ia'yo' luaa' mandyocwjee'cañoom juu ts'aⁿ na mañequiaa cwenta ja luee nn'aⁿ. 47Ndicwaⁿ matseineiⁿ Jesús ndo' tyjee'cañoom Judas, cwii jâ nn'aⁿ na canchoo'wendyô̱. Jndyochom jndye nn'aⁿ na m'aⁿ cantyja 'naaⁿ ntyee na cwiluiitquiendye ndo' cantyja 'naaⁿ nn'aⁿ na cwiluiitquiendye naquii' tsjoom. Cwilei'cho naⁿ'ñeeⁿ ncjo espadas ñequio n'oom nch'io. 48Ndo' Judas, tsaⁿ na tquiaa cwenta Jesús, jnda̱ t'mo̱o̱ⁿ 'naaⁿ chiuu waa na nnts'aaⁿ. Tsoom: —Ts'aⁿ na nnc'ua ntsmaⁿ' maxjeⁿ juu na cwil'ue'yo'. Mana cat'ue'yo' jom. 49Mañoom' tyjee'cañoom nacañoom' Jesús. Tsoom nnom: —Xmaⁿndyu' Maestro. Ndo' t'om ntsmaⁿ' Jesús. 50Tso Jesús nnoom: —Xmaⁿndyu'. Ts'iaaⁿ na jndyo', mana catseicanda̱a̱'ndyu'. Quia jo' tquie'cañom naⁿ'ñeeⁿ Jesús, t'uena jom. Jla'tyeⁿna jom. 51Ndo' cwiindyô̱ jâ na ñ'a̱a̱ⁿyâ ñ'eⁿ Jesús, tjei'ñoomñe xjoo'. Tyjee tsua'qui mosoo' tyee na cwiluiitquieñe. 52Quia jo' tso Jesús nnoom: —Cwjaa'ndyu'nnda' xjo' naquii' tjaⁿwaa'na'. Ee juu ts'aⁿ na mach'ee nata̱' quio xjo mañequio jo' nncueeⁿ'eⁿ. 53¿Aa ticatseitiuu' na nnda̱a̱ nlcaaⁿ'a nnom Tsotya̱ ndo' jom mañoom' njñoom meiⁿcheⁿ ntmaaⁿ' ángeles na nntei'jndeiina ja? 54Sa̱a̱ xeⁿ na nmeiⁿ' nnts'aa, ¿chiuu nntseicanda̱a̱'ñeyuuna' ljeii 'naaⁿ'aⁿ na matsona' na tseixmaⁿya na catjo̱ⁿya na luaa? 55Ndo' tso Jesús nda̱a̱ cha'tso nn'aⁿ: —Jnda'jom ñ'eⁿ ncjo espadas ñ'eⁿ n'oom nch'io tquiocat'ue'yo' ja cha'cwijom tquio'yo' nacjoo' cwii tsaⁿcanch'ue. 'Io ndii 'io ñeta'catya̱ⁿ naquii' wats'om t'maⁿ na ñet'mo̱o̱ⁿ nda̱a̱'yo', sa̱a̱ tîcat'ue'yo' ja. 56Sa̱a̱ cha'tso na matjo̱ⁿ nmeiiⁿ cwicalui'yuu' ñ'oom ndyuee profetas. Quia jo' cha'tsondyô̱ na cwilajomndyô̱ ñ'eⁿ Jesús jlei'no̱o̱ⁿyâ, 'ndya̱a̱yâ jom na ñenqueⁿ. 57Quia jo' nquiee nn'aⁿ na t'ue Jesús, ty'eñ'omna jom waa' Caifás, juu tyee na cwiluiitquieñe. Jo' jo' jnda̱ tjomndye nn'aⁿ na cwit'mo̱o̱ⁿ ljeii na tqueⁿ Moisés, ñequio nn'aⁿ na cwiluiitquiendye naquii' tsjoom. 58Ndo' Pedro tquiacheⁿ tquia tjantyjo̱o̱ⁿ naxeⁿ' Jesús. Tueⁿ'eⁿ waa' tyee na cwiluiitquieñe. Tjaqueⁿ'eⁿ tach'eeⁿ' w'aa'ñeeⁿ. Tjacjom quii'ntaaⁿ nn'aⁿ na cwil'a cwenta wats'om, cha nnty'iaaⁿ'aⁿ chiuu nncjaaju'yuuna' cantyja 'naaⁿ' Jesús. 59Ndo' ntyee na cwiluiitquiendye ñequio nn'aⁿ na cwiluiitquiendye naquii' tsjoom ñequio cha'tsondye nt'omcheⁿ nn'aⁿ na m'aⁿ n'iaaⁿ, tyol'ueena nn'aⁿ na calue ñ'oom cantu nacjoo' Jesús cha nnda̱a̱ nleijndaa' jnaaⁿ'aⁿ na cueeⁿ'eⁿ. 60Sa̱a̱ meiiⁿ na jndye nn'aⁿ jlue ñ'oom cantu nacjoom'm na waa jnaaⁿ'aⁿ maxjeⁿ ticalui'yuu' ñ'oom'ñeeⁿ. Jnda̱ chii wendye naⁿ'ñeeⁿ tjoom' cantu jluena: 61—Tsaⁿm'aaⁿ' ñetsoom jom nntseityueeⁿ'eⁿ wats'om t'maⁿ cwentaa' Ty'o̱o̱ts'om, ndo' ñendyee xuee na nnts'aaxcoom cwiicheⁿ. 62Quia jo' nquii tyee na cwiluiitquieñe teintyjeeⁿ'eⁿ, tsoom nnom Jesús: —¿Aa maxjeⁿ meiⁿcwii ñ'oom tic'o̱'? ¿Chiuu waayuu na nmeiiⁿ' ñ'oom cwitjei'yuu'ndye naⁿm'aⁿ' nacjo'? 63Sa̱a̱ Jesús meiⁿcwii ñ'oom tic'o̱o̱ⁿ. Quia jo' nquii tyee na cwiluiitquieñe tso nnoom: —Ñequio xuee' Ty'o̱o̱ts'om na wando', tyeⁿ matsa̱'ntjo̱ⁿya 'u, catsu' ñ'oom na mayuu'. Catsu'ndyeyu' nndya̱a̱yâ, ¿aa 'u cwiluiindyu' Cristo, Jnda Ty'o̱o̱ts'om? 64T'o̱ Jesús nnoom: —Majo'ndyo ñ'oom na matsu'. Ndo' mati matseicandiiya 'o na 'io cha xuee na cwii wjaatina' nnty'ia'nda̱a̱'yo' ja na cwiluiindyo̱ ts'aⁿ na jnaⁿ cañoom'luee na m'aaⁿndyo̱ yuu na matseit'maaⁿ'ñena' ja ntyjaa' Ty'o̱o̱ts'om ntyjaya. Jom tseixmaaⁿ cha'tso najnda̱. Ndo' nnty'ia'yo' ja na nnaaⁿ cañoom'luee na nndyo̱cua̱nnda'a ñequio nchquiu. 65Quia jo' tyee na cwiluiitquieñe jndii'ñê liaⁿ'aⁿ na lioom'm, tsoom: —Tsaⁿm'aaⁿ jnda̱ seineiiⁿ ñ'omntjeiⁿ nacjoo' Ty'o̱o̱ts'om. Ticaⁿtina' 'ñeeⁿ na nncwji'yuu'ñe nacjoom'm. 'O cwindye'yo' ñ'omntjeiⁿ na tsoom. 66¿Ljo' cwilatiuu'yo' je' ñ'eⁿñê? T'o̱o̱ nn'aⁿ nnoom, jluena: —Tsaⁿm'aaⁿ' maxjeⁿ tseixmaaⁿ na cueeⁿ'eⁿ. 67Ndo' tyojñomna ndaajnaⁿ' nnoom. Tyotioona nda' jom ndo' nt'om tyotmeiiⁿ' nda' watmeiⁿ nnoom. 68Ndo' jluena nnoom: —'U na cwiluiindyu' Cristo na jñom Ty'o̱o̱ts'om, cwa cjaawee' 'ndyo' 'ñeeⁿ tmeiⁿ' nda' 'u. 69Yocheⁿ na cwiluii na nmeiiⁿ', Pedro wacatyeeⁿ tach'eⁿ ndo' tyjee'cañoom cwii yuscu na mandi'ntjom jo' jo'. Tso tsaⁿ'ñeeⁿ nnoom: —'U maxjeⁿ ñeñ'eⁿ' ñ'eⁿ Jesús, tsaⁿ na jnaⁿ Galilea. 70Sa̱a̱ Pedro tjei'ñê ñequio na ndye cha'tsondye naⁿ'ñeeⁿ. Tsoom: —Meiⁿchjoo ticaljeii ñ'oom na matsu'. 71Jnda̱ chii tjaaⁿ na waa 'ndyoots'a t'maⁿ ndo' cwiicheⁿ yuscu na mandi'ntjom jo' jo' ljeii jom. Tso tsaⁿ'ñeeⁿ nda̱a̱ nn'aⁿ na m'aⁿ na nndyoo': —Tsaⁿm'aaⁿ maxjeⁿ ñeñ'eeⁿ ñ'eⁿ Jesús, tsaⁿ na jnaⁿ Nazaret. 72Cwiicheⁿ cwii ndii' tjei'ñe Pedro mana tjei'yom xuee' Ty'o̱o̱ts'om. Tsoom: —Ntyjii Ty'o̱o̱ts'om na ticwajnaⁿ'a tsaⁿm'aaⁿ'. 73Tyoowiquiuu' ndo' nt'omcheⁿ nn'aⁿ na meintyjee' jo' jo' ty'entyjaa'na jom. Jluena nnoom: —Mayuu'cheⁿ na 'u cwii joo nn'aⁿ na cwila'jomndye ñ'eⁿ tsaⁿm'aaⁿ'. Ee ñ'oom na matsei'neiⁿ' ma'mo̱ⁿna' na Galilea jnaⁿ'. 74Quia jo' to̱' Pedro na tju' cheⁿnqueⁿ ñ'omwi' nacjoom'm. Tsoom na ntyjiicheⁿ Ty'o̱o̱ts'om na mayom'm. Tsoom: —Ja maxjeⁿ ticwajnaⁿ'a tsaⁿm'aaⁿ'. Ndo' majo'to xjeⁿ'ñeeⁿ seixuaa caxtijndyo. 75Mañoom' tjañjoom' ts'om Pedro juu ñ'oom na jnda̱ tso Jesús nnoom: “Cwii tjo̱o̱cheⁿ na nntseixuaa caxtijndyo sa̱a̱ 'u jnda̱ ndyee ndii' macwji'ndyu' ñ'eⁿndyo̱.” Mana jlueeⁿ'eⁿ ch'eⁿ. Sei'ndaa'ñ'eⁿna' ntyjeeⁿ, tyoty'ioom.

will be added

X\