Mateo 14

1Majoo ncuee'ñeeⁿ tyom'aaⁿ Herodes ts'iaaⁿ ts'o̱ndaa Galilea. Jñeeⁿ ñ'oom cantyja 'naaⁿ' jndye nnom ts'iaaⁿ t'maⁿ na mach'ee Jesús. 2Tsoom nda̱a̱ nn'aⁿ na cwila'jomndye ñ'eⁿñê: —Tsaⁿm'aaⁿ, maxjeⁿ Juan, ts'aⁿ na tyotseits'oomñe nn'aⁿ. Jnda̱ wando'xcoom jo' chii cwiwitquioo' ts'iaaⁿ t'maⁿ na mach'eeⁿ. 3Ee luaa waa na tuii. Herodes tyom'aaⁿ ñequio Herodías, scuu' tyjeeⁿ Felipe. Ndo' tso Juan nnoom na ticaty'iomyana' na m'aaⁿ ñ'eⁿ scuu' tyjeeⁿ. Jo' chii sa̱'ntjoom na cala'tyeⁿna Juan, catuee'na juu w'aancjo. 5Ndo' Herodes, meiiⁿ na ñe'catseicueⁿ'eⁿ Juan sa̱a̱ nquiaⁿ'aⁿ nn'aⁿ. Ee jndye nn'aⁿ nquiuna na Juan cwiluiiñe ts'aⁿ na mañequiaa ñ'oom' Ty'o̱o̱ts'om. 6Quia na jla't'maaⁿ'ndye nn'aⁿ na tuee' xueechuu' Herodes, quia jo' yuscundyua jnda Herodías seijnom jo nda̱a̱ nn'aⁿ. Ndo' Herodes jeeⁿ tjawee' ts'oom cantyja na nty'iaaⁿ'aⁿ. 7Tjoom'm ñ'omtyeⁿ cjoom'm na tsoom nnom yuscundyua'ñeeⁿ na nñequiaaⁿ meiⁿquia ljo' na nlcaⁿ nnoom. 8Ndo' yuscundyua'ñeeⁿ seijndo̱' tsoñeeⁿ ts'oom na caaⁿ xqueⁿ Juan. Quia jo' tsoom nnom Herodes: —Luaa macaⁿ'a. Quiaa' cwii xio ñjaaⁿ na njom xqueⁿ Juan, tsaⁿ na ñeseits'oomñe nn'aⁿ. 9Ndo' na luaa' tsoom, seichjoo'na' ts'om Herodes, sa̱a̱ cwe' nc'e ñ'omtyeⁿ na tjoom'm nacjoom'm ndo' nc'e na ndyecheⁿ nn'aⁿ na cwila'jomndye ñ'eⁿñê, jo' chii tsoom na quiana ljo' na macaⁿ yuscundyua'ñeeⁿ. 10Quia jo' sa̱'ntjoom na cjaacano̱ⁿ xtyo' Juan naquii' w'aancjo. 11Jnda̱ tuii na ljo', jndyoñ'oom ts'aⁿ xqueⁿ Juan na njomna' ts'om xio. Chii tquiaa juuna' nnom yuscundyua'ñeeⁿ ndo' jom tjañ'oom jo' na m'aaⁿ tsoñeeⁿ. 12Jnda̱ jo' nn'aⁿ na cwila'jomndye ñ'oom na tyoñequiaa Juan tquie'cañomna, ty'eñ'omna sei'ts'o 'naaⁿ'aⁿ. Ty'ecaty'iuuna jom, jnda̱ chii ty'ela'candiina Jesús ñ'oommeiⁿ'. 13Jnda̱ na jndii Jesús na jnda̱ tue' Juan, jlueeⁿ'eⁿ jo', tuo̱o̱ⁿ ts'om w'aandaa ñ'eⁿ jâ nn'aⁿ na cwila'jomndyô̱ ñ'eⁿñê. Saayâ cwii joo yuu na tjaa'naⁿ nn'aⁿ. Quia jliu nn'aⁿ na jnda̱ tja Jesús na nncwity'ioom ndaaluee, quia jo' jlui'na njoomna, ty'eca'na, ty'enquiandyena 'ndyoo ndaaluee na ty'entyjo̱na naxeeⁿ'eⁿ. 14Quia na jnda̱ jluii'ñe w'aandaa ts'om ndaaLuee, ljeii Jesús na teijndyendye nn'aⁿ jnda̱ tquie'cañom jo' jo'. Tioo na jeeⁿ wi' ts'oom joona. Sein'maaⁿ nn'aⁿwii na tquiochona. 15Quia na jnda̱ tmaaⁿ, jâ nn'aⁿ na cwila'jomndyô̱ ñ'eⁿñê saantyjaa'â jom, l'uuyâ nnoom: —Jnda̱ tmaaⁿ je' ndo' yuu na m'aaⁿya ñjaaⁿñe cwe' jnda̱a̱. Cajñom' naⁿm'aⁿ' na c'oona njoom nch'u na nndyoo' na nla'jndana na nlcwa'na. 16Tso Jesús nda̱a̱yâ: —Meiⁿ ticaⁿna' na nnc'oona. 'O quia'yo' na nlcwa'na. 17T'o̱o̱yâ nnoom, l'uuyâ: —Tjaa'naⁿ na cwilei'ñ'o̱o̱ⁿyâ ñjaaⁿ, macanda̱ ñe'om taⁿ' tyoo' ñequio we catscaa. 18Tsoom nda̱a̱yâ: —Quiocho'yo' joona' ñjaaⁿñe. 19Sa̱'ntjoom na cwindyuaandye nn'aⁿ nacjoo' jnda̱ nch'u. Quia jo' t'ueeⁿ 'om taⁿ' tyoo' ñequio we catscaa'ñeeⁿ, nty'iaaⁿ'aⁿ cañoom'luee ndo' tquiaaⁿ na quianl'uaa' Ty'o̱o̱ts'om cantyja 'naaⁿ joona'. Jnda̱ chii tyjeeⁿ ndo' tquiaaⁿ joona' nda̱a̱ jâ nn'aⁿ na cwila'jomndyô̱ ñ'eⁿñê. Ndo' jâ tquiaayâ joona' nda̱a̱ nn'aⁿ na jndyendye. 20Ndo' cha'tsondye nn'aⁿ na jndyendye tcwa' tjacjoo. Jnda̱ chii jla'tjo̱o̱ⁿyâ ntaⁿ' ntyoo' ñequio calcaa na 'ndiina'. Too' canchoo'we tsquiee. 21Nn'aⁿ na tcwa' tue'ntyjo̱ cha'na 'om meiⁿ naⁿnom, meiⁿ tîcatu'nchondye naⁿlcu ñequio yocanch'u. 22Jnda̱ tuii na luaa' jñom Jesús jâ nn'aⁿ na cwila'jomndyô̱ ñ'eⁿñê na cuo̱nndaa'â ts'om w'aandaa, na cwity'io̱o̱'jndya̱a̱yâ na nntsquia̱a̱yâ xndyaa' ndaaluee. Sa̱a̱ jom ljoo'ñetyeeⁿ na njñoom nn'aⁿ na jndyendye. 23Ndo' jnda̱ na jñoom naⁿ'ñeeⁿ na c'oolcwee'na, quia jo' tjawaaⁿ cwii ta na ñenqueⁿ na nntseineiiⁿ nnom Ty'o̱o̱ts'om. Quia tjawijaaⁿ ndicwaⁿ m'aaⁿñê jo' jo' na ñenqueⁿ. 24Ndo' w'aandaa na ñjomndyô̱ jnda̱ tuee' xcwe na wjaana' sa̱a̱ leicjaana' ee na jndeii maqui'ljoo nmo̱ⁿ ndo' matseilcwe'tya' jndye juuna'. 25S'aana' cha'na ñequiee na cwitsjoom jndyotseicandyoo'ñe Jesús na m'aaⁿyâ, jndyocaⁿ nnom ndaaluee. 26Quia na nty'iaayâ na mandyocaⁿ nnoom ndaaluee, jeeⁿ ndyaa' tyua̱a̱yâ. Jlaxuaayâ na nquiaayâ, l'uuyâ: —Jeeⁿ sa, jndii luaa'. 27Sa̱a̱ mañoom' t'maⁿ Jesús jâ, tsoom: —C'om' t'maaⁿ'ndyo' n'om'yo'. Maja luaa. 28Ndo' t'o̱ Pedro 'ndyoo Jesús, tsoom: —Ta, xeⁿ na manncu'ti', cwe' catsu' na cjo̱ca nnom ndaatioo na jo̱catjomndyo̱ 'u. 29Tso Jesús nnoom: —Candyo'. Jo' chii jlui' Pedro ts'om w'aandaa, to̱o̱ⁿ'o̱ⁿ na mawjaacaⁿ nnom ndaatioo na mawjaacatjomñê Jesús. 30Sa̱a̱ quia na nty'iaaⁿ'aⁿ na jeeⁿ jndeii m'aaⁿ jndye, s'aana' na nquiaⁿ'aⁿ. Jnaⁿna' na nchjeeñena' jom. Quia jo' seixuaⁿ, tsoom: —Ta, cwji'n'maaⁿndyu' ja. 31Mañoom' seicjaa l'o̱ Jesús jom, tsoom nnom: —'U re, cwa tit'maⁿ matsei'yu'ya' ts'om', ¿chiuu na tiñecwii matsei'tiuu'? 32Ndo' quia jnda̱ tuo̱na ts'om w'aandaa, mañoom' teicheⁿ jndye. 33Ndo' jâ na maxjeⁿ ñjomndyô̱ ts'om w'aandaa'ñeeⁿ taa'â cantya̱a̱yâ, jla't'maaⁿ'ndyô̱ jom. L'uuyâ nnoom: —'U mayuu'cheⁿ cwiluiindyu' Jnda Ty'o̱o̱ts'om. 34Quia na jnda̱ tei'ty'io̱o̱'â, jluii'â ndyuaa Genesaret. 35Jnda̱ na ta'jnaaⁿ' nn'aⁿ ndyuaa'ñeeⁿ jom, jla'cwanomna ñ'oom cha'waa ndiocheⁿ ndyuaa'ñeeⁿ. Ndo' tquiocho nn'aⁿ cha'tso nn'aⁿwii na m'aaⁿ. 36Tyola'ty'oondyena nnoom na nñequiaaⁿ ñ'oom'm na nnt'uena meiiⁿ cwe' 'ndyoo liaⁿ'aⁿ. Ee ticwii cwii ts'aⁿ na tyenquiuu' liaⁿ'aⁿ, n'maⁿ.

will be added

X\