Marcos 15

1Ndo' na jaawixuee ntyee na cwiluiitquiendye tjomndyena ñequio nn'aⁿ na cwiluiitquiendye naquii' tsjoom ñequio nn'aⁿ na cwit'mo̱o̱ⁿ ljeii na tqueⁿ Moisés ñequio cha'tso naⁿman'iaaⁿ cwentaa nn'aⁿ judíos. Jla'jndaa'ndyena. Jnda̱ jo' jla'tyeⁿna Jesús, ty'eñ'omna jom. Ty'ecatioona cwenta jom l'o̱ Pilato. 2Ndyeyu tax'ee Pilato nnoom, tso: —¿Aa 'u cwiluiindyu' rey cwentaa nn'aⁿ judíos? Ndo' t'o̱o̱ⁿ: —Majo'ndyo cha'xjeⁿ na matsu'. 3Ndo' ntyee na cwiluiitquiendye jndye jnaaⁿ'aⁿ tquiana. 4Quia jo' tax'eennda' Pilato nnoom, tso: —¿Aa maxjeⁿ meiⁿcwii ñ'oom xoc'o̱'? Queⁿ' cwenta na jndye jnaⁿ' cwiluena nacjo'. 5Sa̱a̱ tjaa na t'o̱ti Jesús hasta tquiaana' na jeeⁿ tyom'aaⁿ' ts'om Pilato. 6Ndo' ticwii chu na cwiwee' xuee pascua waa costumbre na matseicandyaañe Pilato meiⁿcwi'ñeeⁿcheⁿ pra̱so na l'ue n'om nn'aⁿ. 7Quia ljo'cheⁿ m'aaⁿ cwii ts'aⁿ na jndyu Barrabás w'aancjo ñequio nt'omcheⁿ pra̱so. Joona jla'wendyena nacjoo' gobiernom, ndo' jla'cwjeena nn'aⁿ. 8Ty'entyjaa' cwii tmaaⁿ' nn'aⁿ na m'aaⁿ Pilato. To̱'na na tyotaⁿna na cats'aaⁿ cha'xjeⁿ quich'eeⁿ na nntseicandyaañê cwii ts'aⁿ. 9Quia jo' tso Pilato nda̱a̱na: —¿Aa l'ue n'om'yo' na catseicandyaandyo̱ juu rey cwenta 'o nn'aⁿ judíos? 10Luaa' tsoom ee jnda̱ sei'no̱o̱ⁿ'o̱ⁿ na joo ntyee na cwiluiitquiendye ta̱a̱' n'omna Jesús, jo' na ty'ecatioona tsaⁿ'ñeeⁿ l'o̱o̱ⁿ. 11Ndo' joona tyola'jndo̱'na n'om nn'aⁿ na jndyendye na cataⁿna nnom Pilato na catseicandyaañê Barrabás, nchii Jesús. 12Quia jo' tax'eennda' Pilato nda̱a̱ nn'aⁿ na jndyendye, tsoom: —Ndo' ¿ljo' l'ue n'om'yo' na cats'aaya ñ'eⁿ juu ts'aⁿ na cwindu'yo' na cwiluiiñe rey cwenta' 'o nn'aⁿ judíos? 13Tacwaxua ndyueena, jluena: —Caty'iom' jom ts'oom'naaⁿ. 14Tax'ee Pilato nda̱a̱na: —¿Ljo' jeeⁿ tis'a s'aaⁿ nquiu'yo'? Sa̱a̱ joona ñe'quii'cheⁿ najndeii tyola'xuaana, jluena: —Caty'iom' jom ts'oom'naaⁿ. 15Quia jo' Pilato, cwe' ee na l'ue ts'oom na calue nn'aⁿ na ya ts'aⁿñê, jo' na seicandyaañê Barrabás. Ndo' sa̱'ntjoom na catjaa' sondaro Jesús ñ'eⁿ tjaⁿtsei'. Jnda̱ jo' tquiaaⁿ juu lueena na caty'ioomna juu ts'oom'naaⁿ. 16Ndo' ty'eñ'om sondaro'ñeeⁿ Jesús naquii'cheⁿ wats'iaaⁿ cwentaa' gobiernom. Jo' jo' tjomndye cha'tso nc'iaana. 17Jla'cweena cwii liaa colo catsioo' jom. Tyola'tyjoondyena l'o̱o̱ nioom, l'ana cwii tsei, tioomna juuna' xqueeⁿ. 18Jnda̱ jo' to̱'na, ndoo' na cwila't'maaⁿ'ndyena jom, jluena: —Catseit'maaⁿ'ñena' 'u na cwiluiindyu' rey cwentaa nn'aⁿ judíos. 19Ndo' tyotmeiiⁿ'na ts'oom xqueeⁿ. Tyojñomna ndaajnaⁿ' jom, tyota'na cantyena jo nnoom cha'cwijom cwila't'maaⁿ'ndyena jom. 20Quia na jnda̱ jla'jnaaⁿ'ñ'eⁿna jom, quia jo' tjeii'na liaa catsioo'. Jla'cweennda'na jom liaⁿ'aⁿ. Jnda̱ jo' ty'eñ'omna jom na nnty'ioomna jom ts'oom'naaⁿ. 21Xcwe na cwi'oocalui'na naquii' tsjoom ndo' tjomndyena ts'aⁿ tsjoom Cirene na jndyu Simón na jnaⁿ jnda̱a̱. Jom tsotye Alejandro ñequio Rufo. L'a sondaro na jndei'na' cjaañ'oom ts'oom na nñoom Jesús. 22Quia jo' ty'eñ'omna Jesús Gólgota. Ñ'oomwaa' ma'mo̱ⁿna' cwii ta na jndyuna' Tsei'xqueⁿ Ts'oo. 23Ndo' tquiana winom na nnc'om na tjoom'na' ñequio mirra. Sa̱a̱ jom tîco'ñoom juuna'. 24Jnda̱ chii ty'ioomna jom ts'oom'naaⁿ. Ndo' sondaro tyo'oona x'iaa, cha nnty'iaana cwaaⁿ liaⁿ'aⁿ nleijnoom' cwii cwii joona. Laa'ti' t'oomna liaⁿ'aⁿ. 25Jnda̱ tuee' cha'na ñjeeⁿ nacwitsjoom quia ty'ioomna jom ts'oom'naaⁿ. 26Ndo' jnaaⁿ'aⁿ na teiljeii luaa matsona': “Rey cwenta nn'aⁿ judíos.” 27Mati ty'ioomna we naⁿcanty'ue nacjoo noom'naaⁿ. Cwii tsaⁿ'ñeeⁿ ntyjaaⁿ'aⁿ ntyjaya ndo' cwiicheⁿ tsaⁿ'ñeeⁿ ntyjatymaaⁿ'. 28Ndo' na l'ana na ljo', seicanda̱a̱'ñena' na matso ljeii 'naaⁿ' Ty'o̱o̱ts'om: “Seicañ'eⁿyuuna' jom quii'ntaaⁿ nn'aⁿ na wi'ndye.” 29Nn'aⁿ na tyowinom jo' jo', tyola'jnaaⁿ'na jom. Tyola'caandyena nqueⁿna, tyoluena: —'U je', na nntseityui' wats'om t'maⁿ 'naaⁿyâ ndo' ñendyee xuee nntseiwe'nnda' juuna', 30cwji'n'maaⁿndyu' cheⁿnncu'. Candyo'cue' na ñoom' ts'oom'naaⁿwaa'. 31Mati ntyee na cwiluiitquiendye ñequio nn'aⁿ na cwit'mo̱o̱ⁿ ljeii na tqueⁿ Moisés malaa'ti' tyola'jnaaⁿ'na jom. Jluena: —Jeeⁿ ya ñetjei'n'maaⁿñe tsaⁿm'aaⁿ' nt'omcheⁿ nn'aⁿ sa̱a̱ tileicanda̱a̱ nncwji'n'maaⁿñe cheⁿnqueⁿ. 32Jom na matsoom na cwiluiiñê Cristo ndo' Rey cwentaa jaa nn'aⁿ Israel, cwa candyocueeⁿ na ñoom ts'oom'naaⁿ cha nnty'iaaya quia jo' nlayuu'a ñ'eⁿñê. Ndo' mati we nn'aⁿ na ñom noom'naaⁿ ñ'eⁿñê tyola'jnaaⁿ'na jom. 33Quia na jnda̱ tuee' na quiajmeiⁿ', teijaaⁿñe tsjoomnancue hasta na ndyee na matmaaⁿ. 34Juu xjeⁿ'ñeeⁿ jndeii seixuaa Jesús, tsoom: —Eloi, Eloi, ¿lama sabactani? (Ñ'oommeiiⁿ matsona': Ty'o̱o̱ts'omya, Ty'o̱o̱ts'omya, ¿chiuu na ma'ndii' ja?) 35Nt'om nn'aⁿ na meintyjee' nndyoo' nacañom'm, quia jndyena na seixuaⁿ, jluena: —Aa ndye'yo', macwaaⁿ profeta Elías. 36Quia jo' jleinom cwii ts'aⁿ'ñeeⁿ, jndyoñ'oom cwii 'naⁿ na ya maw'ana' ndaa. Nchjeeñê juuna' naquii' winom na ta̱. Tjaa'ñê juuna' nnom cwii ts'oom, chii ty'ioom juuna' 'ndyoo Jesús na cateii'ñe. Tsoom: —Cwa je' nnty'iaaya aa nncwjee'cañoom Elías na nncwjii'ñe jom na ñoom ts'oom'naaⁿ. 37Jnda̱ na seixuaa Jesús jndeii mana tueeⁿ'eⁿ. 38Ndo' liaa na ntyjaty'io na matseicu'na' yuu na lju'ti naquii'cheⁿ wats'om t'maⁿ, jndii'tcona' hasta xjeⁿ nomtyuaacheⁿ. 39Juu capeitaⁿ na meintyjee' ndyeyu jo nnom Jesús, quia jñeeⁿ na seixuaa ndo' nty'iaaⁿ'aⁿ na luaa' tuii na tue' tsaⁿ'ñeeⁿ, quia jo' tsoom: —Mayuu'cheⁿ tsaⁿm'aaⁿ' cwiluiiñê Jnda Ty'o̱o̱ts'om. 40Mati jo' jo' meintyjee'tquia nt'om yolcu na jeeⁿ cwinty'iaa na ljo' tuii. Quii'ntaaⁿ joona m'aaⁿ María Magdalena ñequio Salomé ñequio cwiicheⁿ María, tsondyee José ñ'eⁿ Jacobo, tsaⁿ na titquieñeti. 41Joo yolcum'aⁿ' tyocañ'eeⁿna ñ'eⁿ Jesús quia ñet'oom ts'o̱ndaa Galilea. Tyondye'ntjomna nnoom. Ndo' mati jo' jo' meintyjee' jndye nt'omcheⁿ yolcu na jnaⁿ Galilea na ñencwi tquiowana Jerusalén ñ'eⁿ Jesús. 42Tmaaⁿndye nn'aⁿ jo' jo'. Ndo' juu xjeⁿ'ñeeⁿ xuee na cwila'jndaa'ndye nn'aⁿ jndíos 'naⁿ na nlcaⁿna' joona ee jnda̱ jnaⁿna' xuee na nnta'jndyeena. 43Mati jo' jo' m'aaⁿ cwii ts'aⁿ tsjoom Arimatea na jndyu José. Jom t'maⁿ cwiluiiñê naquii' tmaaⁿ' naⁿman'iaaⁿ cwentaa nn'aⁿ judíos. Jeeⁿ meinom'm xuee na nnty'iaa'nnoom na matsa̱'ntjom Ty'o̱o̱ts'om. Ndo' nc'e na jnda̱ jaamaaⁿ chii tjaaⁿ na m'aaⁿ Pilato. Ty'oomt'maaⁿ'ñê ts'oom tjacaaⁿ sei'ts'o 'naaⁿ' Jesús nnom tsaⁿ'ñeeⁿ. 44Jeeⁿ seitsaⁿ'na' Pilato quia na jñeeⁿ na tyuaa' tue' Jesús. Ee ntyjeeⁿ yo cwiñom nn'aⁿ noom'naaⁿ ndo' cwiwjena. Jo' chii tqueeⁿ'ñê capeitaⁿ, tax'eeñê 'ndyoo tsaⁿ'ñeeⁿ aa maxjeⁿ jnda̱ tue' Jesús. 45Ndo' quia na jñeeⁿ ñ'oom 'ndyoo capeitaⁿ na mayuu' na ljo', quia jo' tquiaaⁿ ñ'oom'm na cjaañ'oom José sei'ts'o 'naaⁿ' Jesús. 46Quia jo' tjatseijnda José cwii sábana ya, jnda̱ jo' tjacatyjeeñê sei'ts'o 'naaⁿ' Jesús, seityjooñê liaa'ñeeⁿ juu, ndo' tjacaty'ioom juu naquii' tsue'tsjo̱' na tuiiya. Jnda̱ chii seicuu'ñê 'ndyoo tsue'tsjo̱' ñequio cwii tsjo̱' t'maⁿ. 47Ndo' María Magdalena ñequio María, tsondyee José, nty'iaana na tjacant'iuu'ñe Jesús.

will be added

X\