Marcos 14

1We xuee cwii tjo̱o̱ na nncuee' xuee pascua ñequio xuee na cwicwa' nn'aⁿ ntyoo' na tjaa ndaaljo' tjaquiee'. Ndo' ntyee na cwiluiitquiendye ñequio nn'aⁿ na cwit'mo̱o̱ⁿ ljeii na tqueⁿ Moisés, tyol'ueendyena chiuu nl'ayoona na nñe'quio'nn'aⁿna Jesús cha nnt'uena jom, ndo' na nla'cuee'na jom. 2Jla'tiuuna, jluena nda̱a̱ ntyjeena: —Sa̱a̱ ticat'ua̱a̱ya jom xcwe ncuee, tints'aana' na nla'wendye nn'aⁿ nacjooya. 3Tyom'aaⁿ Jesús tsjoom Betania, waa' Simón, ts'aⁿ na ñechuu tycu lepra. Yocheⁿ na meindyuaandyena nacañoom' meiⁿsa, tue'cañoom cwii yuscu na malei'ñ'oom cwii tsioo na tuii ñ'eⁿ tsjo̱' canchii' na jndyu alabastro. Ñjom ncheⁿ' na jndyu nardo na jeeⁿ cachi, ndo' jeeⁿ jndana'. Tyjeeⁿ yuu na ta̱'tyeⁿ tsioo'ñeeⁿ, chii tu'nquioom ncheⁿ'ñeeⁿ xqueⁿ Jesús. 4Nt'om nn'aⁿ na m'aⁿ jo' jo' jla'lioo'ndyena nacjoo' yuscu'ñeeⁿ. Jluena nda̱a̱ ntyjeena: —Jeeⁿ ndya' cwe'chi ncheⁿ' 'naaⁿ'aⁿ na seicatsoom. 5Yati xeⁿ teil'uana' ee nncwinom ndyee siaⁿnto denarios nncwji'na'. S'om'ñeeⁿ nnluii naya ndyeñeeⁿ'. Jnaaⁿ' luaa' na tyola'wjeena yuscu'ñeeⁿ. 6Sa̱a̱ tso Jesús: —Ca'ndye'yo' tsaⁿm'aaⁿ'. ¿Chiuu na cwila'lioo'ndyo' ñ'eⁿñê? Ee jeeⁿ tjacañjoom' nayawaa' na s'aaⁿ ñ'eⁿndyo̱. 7Ee ja nchii ñequii'cheⁿ nnc'o̱o̱ⁿya ñ'eⁿndyo'. Sa̱a̱ ndyeñeeⁿ' ñequii'cheⁿ na m'aⁿna quii'ntaaⁿ'yo' ndo' quia na ñe'cal'a'yo' naya joona, wanaaⁿ. 8Yuscum'aaⁿ' s'aaⁿ cwanti na nnda̱a̱ nnts'aaⁿ. Jom tu'nquioom ncheⁿ' nacjoya cwii tjo̱o̱cheⁿ na nnt'iuu nn'aⁿ ja. 9Na mayuu'cheⁿ nndye'yo' nntsjo̱o̱, meiⁿyuucheⁿ na nñe'quia nn'aⁿ ñ'oom cha'waa tsjoomnancue na macwji'n'maaⁿñe Ty'o̱o̱ts'om nn'aⁿ, maxjeⁿ nla'neiⁿna cantyja 'naaⁿ' naya na s'aa yuscum'aaⁿ' cha ticatsuu ñ'oom cantyja 'naaⁿ'aⁿ. 10Jnda̱ tuii na luaa', quia jo' Judas Iscariote, cwindye nn'aⁿ na canchoo'wendye, tjaaⁿ na m'aⁿ ntyee na cwiluiitquiendye na nntseijndaa'ñê ñequio joona na nñequiaaⁿ cwenta Jesús lueena. 11Jnda̱ na jndye naⁿ'ñeeⁿ na ljo' nnts'aaⁿ tquiaana' na jeeⁿ neiiⁿna. T'maⁿna na nñe'quiana s'om nnoom. Quia jo' Judas tyol'uee'ñetyeeⁿ chiuu ya nnts'aaⁿ na nñequiaaⁿ cwenta Jesús lueena. 12Quia jo' xuee na cwiwityeⁿ ncuee na cwicwa' nn'aⁿ judíos tyoo' na tjaa ndaaljo' tjaquiee', mañejuu xuee na cwila'cwjeena canmaⁿ nch'u, nn'aⁿ na cwila'jomndye ñ'eⁿ Jesús ta'x'eena nnoom, jluena: —¿Yuu l'ue ts'om' na nntsaalajndaa'ndyô̱ cantyja 'naaⁿ' xuee pascua, na nleiñ'oom' na nlqui' catsmaⁿ chjoo? 13Ndo' jñoom we nn'aⁿ na cwila'jomndye ñ'eⁿñê cwii l'aa. Tsoom nda̱a̱na: —Catsa'quie'yo' quii' tsjoom. Jo' jo' nliu'yo' cwii tsaⁿs'a na maleiñ'oom cwii tsjoo ndaatioo. Catsaantyjo̱'yo' naxeeⁿ'eⁿ. 14Yuu na nncjaaqueⁿ'eⁿ candu'yo' nnom ts'aⁿ na waa': “Luaa matso nqueⁿ na matsa̱'ntjoom jaa: ¿yuu waa cuarto na nlcwaa'a na nntseit'maaⁿ'ndyo̱ xuee pascua ñequio nn'aⁿ na cwila'jomndye ñ'eⁿndyo̱?” 15Juu tsaⁿ'ñeeⁿ m'mo̱o̱ⁿ cwii cuarto t'maⁿ w'aa nandye teicantyjoo'. Maniom canda̱a̱' 'naⁿ na macaⁿna' na nncuaa xuee. Jo' calajndaa'ndyo' nantquie na nlcwaa'a ñ'eⁿndyo'. 16Ndo' ty'e we naⁿ'ñeeⁿ. Quia na tquiena tsjoom'ñeeⁿ jliuna cha'xjeⁿ na jnda̱ tsoom nda̱a̱na. Jo' jo' jla'jndaa'ndyena nantquie na nlcwa'na na nla't'maaⁿ'ndyena xuee pascua. 17Cwe' tmaaⁿya, xjeⁿ na tyje'cañoom Jesús ñequio nn'aⁿ canchoo'we na cwila'jomndye ñ'eⁿñê. 18Yocheⁿ na meindyuaandyena nacañoom' meiⁿsa na cwicwa'na, tso Jesús nda̱a̱na: —Mayuu'cheⁿ candye'yo' nntsjo̱o̱, cwiindyo' 'o na macwa' ñ'eⁿndyo̱ nñequiaa cwenta ja luee nn'aⁿ. 19Ñ'oomwaa' jeeⁿ ndya' seichjoo'na' n'omna. To̱'na cwii ndo' cwiindyena ta'x'eena nnoom, jluena: —¿Aa ndya' nnts'aana' na ja? 20Quia jo' tsoom nda̱a̱na: —Cwii 'o na canchoo'wendyo', cwii ts'aⁿ na cwinchjeendyô̱ tyoo' ñ'eⁿñe ts'om xio jom nñequiaaⁿ cwenta ja. 21Ee na mayuu'cheⁿ, ja na cwiluiindyo̱ ts'aⁿ na jnaⁿ cañoom'luee, maxjeⁿ wjaañ'oomna' ja na nnc'io̱ cha'xjeⁿ na matso ljeii 'naaⁿ' Ty'o̱o̱ts'om. Sa̱a̱ jeeⁿ nty'iaa'ñe ts'aⁿ na mañequiaa cwenta ja, yaticheⁿ xeⁿ tîcaluiiñe tsaⁿ'ñeeⁿ. 22Yocheⁿ na cwicwa'na, to'ñom Jesús tyoo', tquiaaⁿ na quianl'uaa' Ty'o̱o̱ts'om. Jnda̱ jo' tyjeeⁿ juuna', tquiaaⁿ nda̱a̱na. Tsoom: —Cato'ñoom'yo', cwa'yo' tyoo'waa, ee cwiluiiñena' seii'a. 23Mati to'ñoom cwii waso na ñjom ndaa winom. Jnda̱ na tquiaaⁿ na quianl'uaa' Ty'o̱o̱ts'om, quia jo' tquiaaⁿ juuna' nda̱a̱na, cha'tsondyena ta̱na. 24Ndo' tsoom nda̱a̱na: —Ndaa winomwaa cwiluiiñena' nioom'a na nnquioo na nncwji'n'maaⁿndyo̱ jndyendye nn'aⁿ. Ñ'eⁿ juuna' maqua̱ⁿtya̱ⁿya ñ'oom xco. 25Candye'yo' nntsjo̱o̱ na mayuu'cheⁿ taxoc'uannda'a winom hasta juu xuee na nnc'uaxco̱ juuna' quia na nntsa̱'ntjom Ty'o̱o̱ts'om. 26Ndo' jnda̱ na tana luantsa, jlui'na jo' jo'. Ty'ena ta Olivos. 27Quia jo' tso Jesús nda̱a̱na: —Tsjom je' cha'tsondyo' 'o nntjei'ndyo' ñ'eⁿndyo̱. Ee ljeii 'naaⁿ' Ty'o̱o̱ts'om matsona': “Nntseicua̱'a ts'aⁿ na mach'ee cwenta canmaⁿ, ndo' canmaⁿ ntsmeiiⁿ'eⁿ nnt'oom'ndyeyo'.” 28Sa̱a̱ tso Jesús: —Ndo' ja quia jnda̱ na mawando̱'xco̱ nncjo̱jndya̱a̱ ts'o̱ndaa Galilea, xeⁿ jnda̱ nntsaantyjo̱'yo'. 29Quia jo' tso Pedro nnoom: —Meiiⁿ cha'tsondye naⁿm'aⁿ' nntjeii'ndyena ñ'eⁿndyu', sa̱a̱ ja tijoom cwji'ndyo̱ ñ'eⁿndyu'. 30T'o̱ Jesús, tsoom nnom: —Ñ'oom na mayuu' matsjo̱o̱ njom', tsjom je' cwii tjo̱o̱cheⁿ na nnda̱a̱' we ndii' na matseixuaa caxtijndyo, sa̱a̱ 'u xjeⁿ'ñeeⁿ jnda̱ ndyee ndii' jnda̱ tjei'ndyu' ñ'eⁿndyo̱. 31Sa̱a̱ Pedro yacheⁿ jndeii' ñ'oom t'o̱o̱ⁿ: —Meiiⁿ c'io̱ ñ'eⁿndyu', sa̱a̱ tijoom cwji'ndyo̱ cantyja 'naⁿ'. Ndo' cha'tso nc'iaaⁿ'aⁿ majo'ti jluena. 32Quia jo' tquiena cwii joo na jndyu Getsemaní. Tsoom nda̱a̱na: —Cwindyuaandyo' ñjaaⁿñe yocheⁿ na jo̱ luaa' na nntseina̱ⁿya nnom Ty'o̱o̱ts'om. 33Jo' chii tjatyeeⁿ, tjañ'oom Pedro ñ'eⁿ Jacobo ñ'eⁿ Juan. Ndo' jnaⁿna' na t'maⁿ matsei'ndaa'na' ntyjeeⁿ ndo' jeeⁿ matseichjoo'na' ts'oom. 34Tsoom nda̱a̱ naⁿ'ñeeⁿ: —Jeeⁿ matseichjoo'na' ts'o̱o̱ⁿ hasta jom ndyowe' ts'o̱o̱ⁿ. Caljoo'ndyo' ljooñe. C'om'c'eendyo', nchii cwinda'yo'. 35Quia jo' tjatjatyeeⁿcheⁿ, tjacwanquioom nomtyuaa. Tyocaaⁿ nnom Ty'o̱o̱ts'om xeⁿ wanaaⁿ tintjoom nawi' na meiⁿndoo'na' jom juu xjeⁿ'ñeeⁿ. 36Tsoom: —Tsotya̱ya, 'u cha'tso nnda̱a̱ nntsa'. Catseicandyaandyu' ja na ticwino̱o̱ⁿya nawi'waa. Sa̱a̱ catsa' cha'xjeⁿ na l'ue ts'om' nncu' nchii cha'xjeⁿ na l'ue ts'o̱o̱ⁿ ja. 37Quia jo' jndyolcwe' Jesús na m'aⁿ ndyee naⁿ'ñeeⁿ. Ndo' ljeiiⁿ na cwindana. Tsoom nnom Pedro: —Aa ndi' Simón, ¿aa wa'tsu'? ¿Aa maxjeⁿ tîcanda̱a̱ nntsa' na ticatsu' meiⁿ ñe'cwii hora? 38Ñequii'cheⁿ c'om'c'eendyo' na calaneiⁿ'yo' nnom Ty'o̱o̱ts'om cha ticjaachuuna' 'o quia na ñe'cats'aana' xjeⁿ 'o. Jeeⁿ m'aaⁿc'ee' ts'om ts'aⁿ na nnts'aa yuu na ya, sa̱a̱ nc'e na ts'aⁿ tseixmaⁿ, tileicanaaⁿñe na nnts'aa na ljo'. 39Jnda̱ jo' cwiicheⁿ ndii' tjannaaⁿ'aⁿ. Mañejooti ñ'oom seineiiⁿ nnom Ty'o̱o̱ts'om. 40Quia na jndyolcwe'nnaaⁿ'aⁿ na m'aⁿna, majo'ti ljeiiⁿ na cwindana, ee jeeⁿ tyeⁿ waa na maleichuu tsaⁿtsjom joona. Ndo' meiⁿ cwe' ticaliuna ljo' nluena nnoom. 41Tjannaaⁿ'aⁿ na nntseineiiⁿ nnom Ty'o̱o̱ts'om ndo' quia tyjeeⁿ'eⁿ na jnda̱ ndyee ndii' na m'aⁿna, tsoom nda̱a̱na: —Cwa ndicwaⁿ cwinda'yo' na cwita'jndyee'yo'. Malei'tyeⁿ. Jnda̱ tue'ntyjo̱ xjeⁿ 'naⁿya. Je' mannt'ue nn'aⁿ na wi'ndye ja na cwiluiindyo̱ ts'aⁿ na jnaⁿ cañoom'luee. 42Quicantyja'yo'. Cjaaya. Luaa' mandyocwjee'cañoom juu ts'aⁿ na tjacatio cwenta ja luee nn'aⁿ. 43Ndicwaⁿ matseineiⁿ Jesús ndo' tyjee'cañoom Judas, cwii joo nn'aⁿ na canchoo'wendye. Ñ'eeⁿ cwii tmaaⁿ' nn'aⁿ ñ'eⁿñê na cwilei'cho ncjo espadas ñequio n'oom nch'io. Naⁿ'ñeeⁿ nn'aⁿ 'naaⁿ ntyee na cwiluiitquiendye, ñequio nn'aⁿ na cwit'mo̱o̱ⁿ ljeii na tqueⁿ Moisés ñequio nn'aⁿ na cwiluiitquiendye naquii' tsjoom. 44Ndo' Judas, ts'aⁿ na tquiaa cwenta jom luee naⁿ'ñeeⁿ, jnda̱ t'mo̱o̱ⁿ 'naaⁿ nda̱a̱na chiuu nnts'aaⁿ. Tsoom: —Juu ts'aⁿ na nnc'ua ntsmaⁿ', majom jo'. Tyeⁿ cat'ue'yo' jom ndo' tsaañ'om'yo' jom. Cal'a'yo' cwenta na ticalacanom'yo' jom. 45Ndo' quia tquie'cañomna Jesús, mantyja seicandyoo'ñê, tsoom nnom Jesús: —Xmaⁿndyu' Maestro. Ndo' t'om ntsmaⁿ' tsaⁿ'ñeeⁿ. 46Quia jo' jla'cjaa lueena Jesús. Tyeⁿ t'uena jom. 47Cwii ts'aⁿ na matseijomñe ñ'eⁿ Jesús na meintyjee' jo' tjeiiⁿ'eⁿ xjo espada 'naaⁿ'aⁿ. Tioom juuna' mosoo' nquii tyee na cwiluiitquieñe. Jno̱ⁿ tsua'qui. 48Ndo' tso Jesús nda̱a̱na: —Jnda'jom tquio'cat'ue'yo' ja cha'cwijom tquio'yo' nacjoo' cwii tsaⁿcanch'ue na cho'yo' ncjo espadas ñ'eⁿ n'oom nch'io. 49'Io ndii 'io ñet'o̱o̱ⁿya quii'ntaaⁿ'yo' na ñet'mo̱o̱ⁿya nda̱a̱'yo' naquii' wats'om t'maⁿ sa̱a̱ tîcat'ue'yo' ja. Ñecuaa ee cwiluii na luaa' cha catseicanda̱a̱'ñena' ljeii 'naaⁿ' Ty'o̱o̱ts'om na waa. 50Quia jo' cha'tsondye nn'aⁿ na cwila'jomndye ñ'eⁿ Jesús, jlei'nomna, 'ndyena jom na ñenqueⁿ. 51Ndo' jo' jo' m'aaⁿ cwii tsaⁿs'andyua na tjantyjo̱o̱ⁿ naxeⁿ' Jesús. Macanda̱ chu'tyjooñê cwii sábana. Mati jom t'ue naⁿ'ñeeⁿ. 52Sa̱a̱ jom je' jluii'ñê naquii' sábana 'naaⁿ'aⁿ, 'ñeeⁿ juuna', jlei'noom na ñecasei'ñê. 53Quia jo' ty'eñ'omna Jesús jo nnom nquii tyee na cwiluiitquieñe nda̱a̱ ntyjentyeeñe. Jo' jo' tjomndye cha'tsondye ntyee na cwiluiitquiendye ñequio nn'aⁿ na cwiluiitquiendye naquii' tsjoom ñequio nn'aⁿ na cwit'mo̱o̱ⁿ ljeii na tqueⁿ Moisés. 54Ndo' Pedro tquiacheⁿ tquia tjantyjo̱o̱ⁿ. Macanda̱ tuee'tyeeⁿ tach'eeⁿ' waa' tyee na cwiluiitquieñe. Jo' jo' tjacjom nacañoom nn'aⁿ na cwindye'ntjom wats'om t'maⁿ. Tyotseiwiñê 'ndyoo chom. 55Quia jo' ntyee na cwiluiitquiendye ñequio cha'tsondye naⁿman'iaaⁿ cwentaa nn'aⁿ judíos tyol'ueena nn'aⁿ na calue ñ'oom cantu nacjoo' Jesús cha nnda̱a̱ nleijndaa' jnaaⁿ'aⁿ na cueeⁿ'eⁿ. Sa̱a̱ tileicaliuna. 56Ee majndye nn'aⁿ ty'enquia ñ'oom na cwe' cantu sa̱a̱ tiñecwii ñ'oom tquiana jo' chii ticalui'yuu' ñ'oom'ñeeⁿ nacjoom'm. 57Jnda̱ jo' tei'cantyja nt'omcheⁿ nn'aⁿ na tquia cwiicheⁿ ñ'oom na tiyuu' nacjoom'm, jluena: 58—Jâ jndya̱a̱yâ na tso tsaⁿm'aaⁿ' na jom nntseityueeⁿ'eⁿ wats'om t'maⁿwaa na l'a nn'aⁿ, ndo' ñendyee xuee nnts'aaxcoom cwiicheⁿ na nchii nn'aⁿ nl'a. 59Sa̱a̱ meiiⁿ jluena ñ'oomwaa', maxjeⁿ ticatjoom' ñ'oom. 60Quia jo' teintyjee' nquii tyee na cwiluiitquieñe xcwe quii' ntaaⁿna, tax'eeⁿ 'ndyoo Jesús, tsoom: —¿Aa maxjeⁿ meiⁿcwii ñ'oom tic'o̱'? ¿Chiuu waayuu cantyja 'naaⁿ' ñ'oom na cwituee'na nacjo'? 61Sa̱a̱ Jesús ñemaaⁿ'cheeⁿ m'aaⁿ. Meiⁿcwii ñ'oom tic'o̱o̱ⁿ. Quia jo' juu tyee na cwiluiitquieñe tax'eeñennaaⁿ'aⁿ, tsoom: —¿Aa 'u cwiluiindyu' Cristo, Jnda nquii Ty'o̱o̱ts'om na cwila't'maaⁿ'ndyô̱? 62T'o̱ Jesús, tsoom: —Mayuu' na jo' ja. Ndo' nnty'ia'yo' ja na cwiluiindyo̱ ts'aⁿ na jnaⁿ cañoom'luee na nncwa'catya̱ⁿ ntyjaa' Ty'o̱o̱ts'om ntyjaya na jom matseixmaⁿñ'eeⁿ cha'tso nnom najnda̱ na nndyo̱cua̱ya, na nnaaⁿ cañoom'luee ñequio nchquiu. 63Quia jo' juu tyee na cwiluiitquieñe jndii'ñê tsca'nnoom na lioom'm, tsoom: —¿Aa cwimacaⁿtina' 'ñeeⁿ nñequiotjei'yuu'ndyeti jnaaⁿ'aⁿ? 64'O macwindye'yo' ñ'oom ntjeiⁿ na matseineiiⁿ nacjoo' Ty'o̱o̱ts'om. ¿Chiuu cwilatiuu'yo' ñ'eⁿñê? Ndo' cha'tsondyena ñe'cwii jla'jomndyena na waa jnaaⁿ'aⁿ ndo' tseixmaaⁿ na cueeⁿ'eⁿ. 65Cwantindyena to̱'na na tyojñomna ndaajnaⁿ' jom. Jla'cata̱'na nnoom, tyotmeiiⁿ'na nda' jom, jluena: —Cjaawee' 'ndyo' 'ñeeⁿ tquiaa 'u. Mati nn'aⁿ na cwil'a cwenta wats'om tyoñe'quiana nda' watmeiiⁿ nnoom. 66Yocheⁿ na m'aaⁿ Pedro jo nacje, tach'eⁿ w'aa'ñeeⁿ, tjantyjaa' cwii yuscu jom na mandi'ntjom nnom tyee na cwiluiitquieñe. 67Quia na ljeiiⁿ Pedro na matseiwiñe 'ndyoo chom, quiee tyonty'iaaⁿ'aⁿ tsaⁿ'ñeeⁿ. Tsoom: —'U mati ñeñ'eⁿ' ñ'eⁿ Jesús, ts'aⁿ tsjoom Nazaret. 68Sa̱a̱ tjei'ñe Pedro, tsoom: —Ja ticwajnaⁿ'a tsaⁿ'ñeeⁿ. Meiⁿchjoo ticaljeiiya ñ'oom na matsu' luaa'. Jnda̱ jo' teiño̱o̱ⁿ nacañoom nn'aⁿ, tjaaⁿ yuu waa 'ndyoots'atiom. Xjeⁿ'ñeeⁿ mana seixuaa caxtijndyo. 69Ndo' majuu yuscu na mandi'ntjom, cwiicheⁿ cwii ndii' nty'iaa'nnaaⁿ'aⁿ Pedro. To̱o̱ⁿ'o̱ⁿ na tsonnaaⁿ'aⁿ nda̱a̱ nn'aⁿ na m'aⁿ jo' jo': —Tsaⁿm'aaⁿ' maxjeⁿ cwiindye joona jom. 70Ndo' Pedro tjei'ñennaaⁿ'aⁿ. Ndo' tiyocheⁿ majluennda' nn'aⁿ na meintyjee' jo' jo' nnoom: —Mayuu'cheⁿ cwiluiindyu' cwii joona. Ts'aⁿ Galilea 'u ee ljo'yu ñ'oom na matsei'neiⁿ' cha'na cwila'neiⁿ joona. 71Quia jo' to̱o̱ⁿ'o̱ⁿ na tju' cheⁿnqueⁿ ñ'omwi' nacjoom'm, ndo' tsoom na ntyjiicheⁿ Ty'o̱o̱ts'om na mayom'm. Tsoom: —Meiⁿchjoo ticwajnaⁿ'a ts'aⁿ na cwindu'yo' luaa'. 72Ndo' mañoom' seixuaa caxtijndyo na jnda̱ we ndii'. Quia jo' tjañjoom' ts'om Pedro ñ'oom na tso Jesús nnoom: “Cwii tjo̱o̱cheⁿ na nntseixuaa caxtijndyo we ndii', sa̱a̱ 'u je' jnda̱ ndyee ndii' macwji'ndyu' cantyja 'naⁿya.” Ndo' quia tjañjoom' ts'oom ñ'oommeiⁿ', jeeⁿ ndya' tyoty'ioom.

will be added

X\