Marcos 1

1Luaa waa na jnaⁿ ñ'oom naya cantyja 'naaⁿ' Jesucristo, Jnda Ty'o̱o̱ts'om. 2Jnda̱ seicanda̱a̱'ñena' ñ'oom na seiljeii profeta Isaías, matsona': Majño̱o̱ⁿñetya̱ya cwii moso 'naⁿya na wjaajndyee jo njom'. Jom nncwji'yuu'ñê cantyja 'naⁿ', cha mam'aⁿc'eendye nn'aⁿ quia na nncue'cañoom'. 3Jom ts'aⁿ na jndeii matseineiⁿ nda̱a̱ nn'aⁿ jo ndo' yuu tjaa nn'aⁿ c'om. Matsoom: “Calajndaa'ndyo' naquii' n'om'yo' cha'cwijom cwii nato na juu jo' nndyocwjee'cañoom nquii na nntsa̱'ntjom 'o. Cata'ndyo'xcwe'yo' cha'cwijom cwilayo̱'yo' nato na nñoom.” 4Ñ'oommeiⁿ' seicanda̱a̱'ñena' quia na to̱' Juan na tyotseits'oomñê nn'aⁿ ndyuaa yuu tjaa nn'aⁿ c'om. Tyoñequiaaⁿ ñ'oom na calcwe' n'omna jnaaⁿna cha nntseit'maⁿ ts'om Ty'o̱o̱ts'om joona ndo' nleits'oomndyena. 5Jndye nn'aⁿ ty'e na m'aaⁿ na jnaⁿna cha'waa ts'o̱ndaa Judea ñequio tsjoom Jerusalén. Jnda̱ na lcwe' n'omna jnaaⁿna, seits'oomñê joona ts'om jndaa Jordán. 6Juan'ñeeⁿ tyocweⁿ liaa na tuiina' ñ'eⁿ soo' camello. Chi'tyeⁿ xcweeⁿ'eⁿ cwii tjaⁿ. Tyocwaaⁿ'aⁿ calcaa ntyue' ndo' tyo'om tsiom' jnda̱a̱. 7Luaa ñ'oom na tyoñequiaaⁿ nda̱a̱ nn'aⁿ, tyotsoom: —Mandyontyjo̱ nqueⁿ na t'maⁿti tseixmaaⁿ, nchiiti ja. Ticatseixmaⁿya na cwe' ja nndi'ntjo̱ⁿya nnoom na nntseicanaⁿ'a lcoom'm. 8Ja matseits'oomndyo̱ 'o ñequio ndaatioo, sa̱a̱ nqueⁿ nntseits'oomñê 'o ñequio Espíritu Santo. 9Tiempo'ñeeⁿ jnaⁿ Jesús tsjoom Nazaret, ts'o̱ndaa Galilea. Tyje'cañoom Juan ndyuaa yuu na tjaa nn'aⁿ c'om. Ndo' seits'oomñe Juan jom ts'om jndaa Jordán. 10Quia na jlueeⁿ'eⁿ naquii' ndaa mantyjacheⁿ nty'iaaⁿ'aⁿ na seicanaaⁿñena' tsjo̱'luee. Jndyocue Espíritu Santo cha'cwijom catu'. Jndyocaljo nacjoom'm. 11Ndo' teic'uaa na seineiⁿ Ty'o̱o̱ts'om cañoom'luee. Matso: —'U cwiluiindyu' Jndaaya na jeeⁿ candya' ts'o̱o̱ⁿya. Cantyja 'naⁿ' 'u ñequii'cheⁿ mañequiaana' na neiⁿya. 12Ndo' mantyjacheⁿ tjañ'oom Espíritu Santo Jesús cwiicheⁿ ntyja yuu tjaa nn'aⁿ c'om. 13Jo' ljoo'ñê wen'aaⁿ xuee. Tyoqueⁿñe tsaⁿjndii na nlqueⁿ xjeⁿ jom. Mati tyom'aaⁿ Jesús quii'ntaaⁿ quioo' wjee. Ndo' tquie'cañom ángeles na tyondye'ntjomna nnoom. 14Jnda̱ na tju' Herodes Juan w'aancjo, quia jo' tja Jesús ts'o̱ndaa Galilea. Jo' jo' tyoñequiaaⁿ ñ'oom naya nda̱a̱ nn'aⁿ cantyja na matsa̱'ntjom Ty'o̱o̱ts'om. 15Tyotsoom: —Jnda̱ tue'ntyjo̱ xjeⁿ na nñe'quiandyo' na nntsa̱'ntjom Ty'o̱o̱ts'om 'o. Calayu'yo' ñ'oom naya 'naaⁿ'aⁿ ndo' calcwe' n'om'yo'. 16Yocheⁿ na mawinom Jesús 'ndyoo ndaaluee Galilea, nty'iaaⁿ'aⁿ Simón ñequio tyjee tsaⁿ'ñeeⁿ Andrés. Cwituee'na tsqui' 'naaⁿna ts'om ndaaluee ee joona ts'iaaⁿ 'naaⁿna na cwitjeii'na calcaa. 17Quia jo' tso Jesús nda̱a̱na: —Quio'yo' ñ'eⁿndyo̱ ndo' ja nnts'aa na nlatjom'yo' nn'aⁿ tachii cwe' calcaa. 18Joona mañoom' 'ndyena lqui' 'naaⁿna. Ty'ena ñ'eⁿñê. 19Tjatjatyeeⁿ chjoowi' 'ndyoo ndaaluee. Tuee'cañoom Jacobo ñ'eⁿ tyjee tsaⁿ'ñeeⁿ na jndyu Juan. Joona ntseinda Zebedeo. M'aⁿna ts'om w'aandaa, cwila'yo̱na lqui'tsaⁿ 'naaⁿna. 20Mantyja tqueeⁿ'ñê joona, quia jo' 'ndyena tsotyena Zebedeo ts'om w'aandaa ñequio naⁿntjoom'm. Ty'ena ñequio Jesús. 21Ty'ena tquiena tsjoom Capernaum. Quia na tue'ntyjo̱ xuee na cwita'jndyee nn'aⁿ judíos quia jo' tjaquiee' Jesús naquii' wats'om. To̱o̱ⁿ'o̱ⁿ na tyo'mo̱o̱ⁿ nda̱a̱ nn'aⁿ. 22Ndo' ñ'oom na tyoñequiaaⁿ, jeeⁿ tjawee' n'omna. T'mo̱ⁿna' nda̱a̱na na waa najndeii na matseixmaaⁿ, ee ñ'oom na tyo'mo̱o̱ⁿ cajndatina', nchii cwe' cha'na ñ'oom na cwit'mo̱o̱ⁿ nn'aⁿ na jndo̱' n'om chiuu t'maⁿ ljeii na tqueⁿ Moisés. 23Ndo' naquii' wats'om'ñeeⁿ tyje'cañoom cwii ts'aⁿ na maleiñ'oom jndyetia juu. Jndeii tyotseixuaa tsaⁿ'ñeeⁿ ñ'oom ndyuee jndyetia'ñeeⁿ. 24Tsoom nnom Jesús: —¿Ljo' l'ue ts'om' ñ'eⁿndyô̱ jâ, 'u Jesús na jnaⁿ' Nazaret? ¿Aa jndyo' na jndyo'tsei'tyui' na laxmaaⁿyâ najnda̱a̱yâ? Jâ macwitajnaaⁿ'â 'ñeeⁿ cwiluiindyu'. Nncu' cwiluiindyu' na lju' ts'om' na jnaⁿ' na m'aaⁿ Ty'o̱o̱ts'om. 25Quia jo' seitia' Jesús jndyetia'ñeeⁿ. Tsoom: —Catseicheⁿ'. Calui' naquii' ts'om tsaⁿm'aaⁿ'. 26Ndo' s'aa jndyetia'ñeeⁿ na seicantyeeⁿñe tsaⁿ'ñeeⁿ ndo' tyoteiñe. S'aaⁿ na seixuaa jndeii, jnda̱ jo' jlueeⁿ'eⁿ naquii' ts'om tsaⁿ'ñeeⁿ. 27Ndo' cha'tso nn'aⁿ na nty'iaa na luaa' tuii jeeⁿ tyuena. Tyota'x'eena nda̱a̱ nc'iaana, tyoluena: —¿Ljo' ma'mo̱ⁿna' na luaa' tuii? Cwa cwii ñ'oom xco cwindya̱a̱ya je'. Ee tsaⁿm'aaⁿ' waa najneiⁿ na matsa̱'ntjoom meiⁿ jndyetia ndo' cwila'canda̱na ñ'oom na matsoom. 28Mañoom' t'om ñ'oom cantyja 'naaⁿ' Jesús cha'waa ts'o̱ndaa Galilea. 29Ndo' jnda̱ na jlui'na wats'om, ty'ena waa' Simón ñ'eⁿ Andrés, ndi ñ'eⁿ Jacobo ñ'eⁿ Juan. 30Tquiena. Ndo' jo' jo' m'aaⁿ sta̱xeeⁿ' Simón. Waa cjoo' jnduu na matseicona' juu. Mañoom' jla'candii nn'aⁿ Jesús na wii' yuscu'ñeeⁿ. 31Quia jo' tjantyjaa' Jesús tsaⁿ'ñeeⁿ, t'ueeⁿ ts'o̱, seiweeⁿ juu. Mañoom' ntquiuuñe na matseicona' juu. Mana to̱' na mandintjom nda̱a̱na. 32Majuu tmaaⁿ'ñeeⁿ jnda̱ na tjacue ñe'quioom', tquie'cho nn'aⁿ nn'aⁿwii ñ'eⁿ nn'aⁿ na maleichuu jndyetia na m'aaⁿ Jesús. 33Manndyo ndyuendye nn'aⁿ tsjoom'ñeeⁿ na tquiena na cwe' 'ndyoots'a w'aa'ñeeⁿ. 34Xjeⁿ'ñeeⁿ sein'maaⁿ jndye nn'aⁿwii cha'tso nnom ntycu na cwitjoomna. Mati jndye jndyetia tjeiiⁿ'eⁿ naquii' n'om nn'aⁿ. Meiⁿ tînquiaaⁿ na nla'neiⁿ jndyetia'ñeeⁿ meiⁿcwii ñ'oom ee tical'ue ts'oom na nndye nn'aⁿ cantyja 'naaⁿ'aⁿ. Ee jndyetia'ñeeⁿ manquiuna 'ñeeⁿ cwiluiiñê. 35Teincoo cwiicheⁿ xuee ndicwaⁿ jaaⁿcheⁿ teicantyjaaⁿ, tjaaⁿ cwii joo yuu na ñenqueⁿ. Jo' jo' tyotseineiiⁿ nnom Ty'o̱o̱ts'om. 36Ndo' Simón ñequio nc'iaaⁿ'aⁿ ty'entyjo̱na naxeⁿ' Jesús na cwil'ueena jom. 37Jnda̱ na jliuna jom, jluena nnoom: —Jndye nn'aⁿ jeeⁿ cwil'uee 'u. 38Tsoom nda̱a̱na: —Cjaaya nt'omcheⁿ njoom na nndyoo' cha mati jo' nñequiaya ñ'oom naya na nndye nn'aⁿ. Ee maxjeⁿ ts'iaaⁿwaa' na qui na jndyo̱o̱ya. 39Quia jo' tyomanoom cha'waa ts'o̱ndaa Galilea. Tyoñequiaaⁿ ñ'oom naya naquii' lan'om 'naaⁿ naⁿ'ñeeⁿ cwii cwii joo. Ndo' tyocwjeeⁿ'eⁿ jndyetia naquii' n'om nn'aⁿ. 40Tyjee'cañoom cwii ts'aⁿ na m'aaⁿ Jesús na chuu tycu lepra. Tco'xtye jo nnoom, s'aa ty'oo, tso: —Ta, ntyjii 'u nnda̱a̱ nntsein'maⁿ' ja, xeⁿ wajnaⁿ' na maty'iomna'. 41Jesús t'oom na wi' ts'oom tsaⁿ'ñeeⁿ. Seilioom ts'o̱o̱ⁿ, tyeⁿnquioom'm juu. Tsoom nnom: —Maxjeⁿ maty'iomna' na ljo'. Can'maⁿ'. 42Mantyja tsu tycu lepra. Mana ljuu' tjaaⁿ'aⁿ cha'waañê. 43Jnda̱ jo' jñom Jesús tsaⁿ'ñeeⁿ, tyeⁿ ñ'oom tsoom nnom: 44—Meiⁿcwii ñ'oom ticatsu' nda̱a̱ nn'aⁿ chiuu tuii na n'maⁿ'. Sa̱a̱ cja', cja'tseica'mo̱ⁿndyu' nnom tyee. Ndo' quiaa' quioo' nnoom na matseit'maaⁿ'ndyu' Ty'o̱o̱ts'om cha'xjeⁿ na tyotsa̱'ntjom Moisés. Ee laa'ti' nncwji'yuu'ñena' nda̱a̱ nn'aⁿ na jnda̱ n'maⁿ'. 45Sa̱a̱ quia na tja tsaⁿ'ñeeⁿ, to̱o̱ⁿ'o̱ⁿ na tyotseineiiⁿ, tyotsoñ'eeⁿ chiuu waa na n'maaⁿ. Jo' chii mañoom' t'om ñ'oom ndiocheⁿ. Cwe' jo' seicu'na' na nncjaaquiee' Jesús meiⁿnquia tsjoom ee jeeⁿ jndye nn'aⁿ nnc'oontyjaa'na xeⁿ nliuna jom. Jo' chii ljoo'ñê yuu tjaa nn'aⁿ c'oom ndo' tquie'cañom nn'aⁿ na m'aaⁿ na jndye joo jnaⁿna.

will be added

X\