Lucas 8

1Jnda̱ jo' tja Jesús cha'tso njoom nt'maⁿ ñequio njoom nch'u na tyoñequiaaⁿ ñ'oom. Tyotseicañeeⁿ nn'aⁿ ñ'oom naya cantyja na matsa̱'ntjom Ty'o̱o̱ts'om. Ndo' ñ'eeⁿ nn'aⁿ na canchoo'we ñ'eⁿñê. 2Mati ty'e ñ'eeⁿ yolcu na jnda̱ sein'maaⁿ na ñejleichuu jndyetia. Ndo' ñ'eeⁿ nt'omcheⁿ yolcu na jnda̱ sein'maaⁿ cwii cwii nnom ntycu na ñetjoom. Cwii joona jndyu María Magdalena, tsaⁿ na jnda̱ tjei' Jesús ntquiee' naⁿjndii naquii' ts'om. 3Ndo' ñ'eⁿ Juana, jom scuu' Chuza, ts'aⁿ na mando' ts'iaaⁿ 'naaⁿ' Herodes. Ndo' mati ñ'eⁿ Susana, ñequio jndyendye nt'omcheⁿ yolcu. Tyocaljondyena s'om na tyotei'jndeiina Jesús 'naⁿ na macaⁿna' jom ñ'eⁿ nn'aⁿ canchoo'we. 4Tjomndye cwii tmaaⁿ' t'maⁿ nn'aⁿ nacañoom' Jesús, na jnaⁿna cwii cwii njoom. Tyotseineiiⁿ ñ'oom na tjañoom' nda̱a̱na. 5Matsoom: —Tyom'aaⁿ cwii ts'aⁿ na tyoch'ee ts'iaaⁿ jnda̱a̱. Tjaaⁿ, tjacjoom'm lqueeⁿ trigo. Ndo' yocheⁿ na tyojoom'm lqueeⁿ'ñeeⁿ, nt'om jo' tquiaa ts'om nato. Joona' ndyue nn'aⁿ ndo' nt'om tcwa' cantsaa. 6Ndo' nt'om lqueeⁿ'ñeeⁿ tquiaana' yuu na jeeⁿ ljo̱'. Quia jnda̱ t'oomna', mantyja tjacaaⁿna' ee titeiiⁿ' tyuaa. 7Ndo' nt'om lqueeⁿ'ñeeⁿ tquiaana' yuu na too' nda' l'o̱o̱ nioom. Ñe'naaⁿ' ty'ewijnda̱na', sa̱a̱ l'o̱o̱ nioom'ñeeⁿ tco̱'na' joona'. 8Ndo' nt'om tsjaaⁿ lqueeⁿ'ñeeⁿ tquiaana' yuu na ya ts'o. T'oomna' ndo' l'ana' cwii cwii siaⁿnto lqueeⁿ na cwiina'. Jnda̱ na tsoom ñ'oommeiⁿ', seineiiⁿ na c'uaati, matsoom: —'Ñeeⁿ juu na niom lue' n'om lua'qui na nndii, candiiya. 9Ndo' nn'aⁿ na cwila'jomndye ñ'eⁿñê ta'x'eena nnoom chiuu ma'mo̱ⁿ ñ'oom tjañoom'waa'. 10T'o̱ Jesús matsoom: —Nda̱a̱' 'o mañequiaa Ty'o̱o̱ts'om na caliu'yo' ñ'oom wanty'iuu' cantyja 'naaⁿ' na matsa̱'ntjoom. Sa̱a̱ nda̱a̱ nt'omcheⁿ nn'aⁿ matseina̱ⁿya ñ'oom na wjaañoom', cha meiiⁿ na cwinty'iaa nda̱a̱na sa̱a̱ tixoqueⁿna cwenta ndo' meiiⁿ na cwindyena sa̱a̱ xocala'no̱ⁿ'na. 11’Luaa ma'mo̱ⁿ ñ'oom tjañoom'waa'. Lqueeⁿ trigo na tjacju' ts'aⁿ, ñ'oom' Ty'o̱o̱ts'om jo'. 12Lqueeⁿ na tquiaa ts'om nato, jo' jo' nn'aⁿ na cwindye ñ'oom' Ty'o̱o̱ts'om. Mantyja ndyo tsaⁿjndii, macwjeeⁿ'eⁿ ñ'oom'ñeeⁿ naquii' n'omna cha tila'yu'na, tilui'yana. 13Lqueeⁿ na tquiaa yuu na jeeⁿ ljo̱', jo' jo' nn'aⁿ na cwindye ñ'oom' Ty'o̱o̱ts'om. Cwila'yu'na cwantindyo xuee sa̱a̱ quia na mandyo cwii na maco'wi'na' joona, cwi'ndyena. 14Ndo' lqueeⁿ na tquiaa yuu na too' nda' l'o̱o̱ nioom, mati nn'aⁿ na cwindye ñ'oom' Ty'o̱o̱ts'om. Sa̱a̱ joona, jeeⁿ m'aⁿna ñ'omtiuu chiuu na cwii 'oom'aⁿtina. Ñe'cuaa 'naaⁿna, ndo' ñe'c'omna cantyja na neiⁿnco tsjoomnancue. Jo' chii tjaa'naⁿ cwii nnom na cwiwitquioo' cantyja 'naaⁿna na cwila'ñ'oom'ndyena ñ'oom' Ty'o̱o̱ts'om. 15Ndo' tsjaaⁿ na tquiaa yuu na ya ts'o, mant'omcheⁿ nn'aⁿ na cwindye ñ'oom' Ty'o̱o̱ts'om. Ñequio na xcwee' n'omna cwila'wena ñ'oom na cwindyena naquii' n'omna. Tica'ndyenc'uaa'ndyena meiiⁿ nawi' cwitjoomna. Cantyja na cwil'ana cwiwitquioo' na cwinaⁿndyena yuu na matsona'. 16Seineiⁿ Jesús cwiicheⁿ ñ'oom na tjañoom'. Tsoom nda̱a̱na: —Tjaa'naⁿ 'ñeeⁿ juu na nntseicw'aa lámpara jnda̱ chii nntseicoom'm juuna' ñ'eⁿ xuaa oo nncwjaa'ñê juuna' nacjee' jnduu. Maxjeⁿ nntseintyja ts'aⁿ juuna' cha na xuee nnty'iaa nn'aⁿ na nnc'ooquie'. 17Cha'tso na mats'aa je' na ticaliu cha'tsondye nn'aⁿ, mancjo'yo' nlacano̱o̱ⁿ'yo' joona' nda̱a̱na. Ndo' cwii cwii ñ'oom wjaañoom' na matseina̱ⁿya je' maxjeⁿ nncue'ntyjo̱ na meiⁿquiayuucheⁿ nla'no̱ⁿ' nn'aⁿ juuna'. Maxjeⁿ nncuaa tyenquiona'. 18’Jo' chii queⁿ'ya'yo' cwenta joo ñ'oommeiiⁿ na matseina̱ⁿya nda̱a̱'yo'. Ee juu ts'aⁿ na mamaleiñ'oom nlo'ñomti sa̱a̱ ts'aⁿ na tjaa ljo' coleiñ'oom, nlui'ñ'eⁿ mandiñ'eⁿ ljo' na matseitioom na niom naquii' l'o̱o̱ⁿ. 19Tsondyee Jesús ñequio ntyjeeⁿ tquie'cañomna, sa̱a̱ tîcanda̱a̱ nnc'oontyjaa'na jom ee jeeⁿ jndye nn'aⁿ. 20Ndo' seicandii ts'aⁿ jom, tso: —Ch'eⁿ m'aaⁿ tso'ndyo' ñequio nty'iu'. Ñe'cala'neiⁿna ñ'eⁿndyu'. 21T'o̱o̱ⁿ tsoom: —Joo nn'aⁿ na cwindye ñ'oom 'naaⁿ' Ty'o̱o̱ts'om ndo' cwila'canda̱ juuna', naⁿ'ñeeⁿ cwiluiindye tsondyo̱ya ndo' ntyjo̱ya. 22Cwii xuee'ñeeⁿ tuo̱ Jesús ts'om cwii w'aandaa ñequio nn'aⁿ na cwila'jomndye ñ'oom'm. Tsoom nda̱a̱na: —Cjaaya xndyaa' ndaaluee. Quia jo' jnaⁿna ts'o̱ndaa Galilea, to̱'na na 'oowity'ioo'na juuna'. 23Yocheⁿ na cwiwi'ty'ioo'na, tsoo Jesús. Ndo' jndeii tioo jndye nnom ndaaluee'ñeeⁿ. Tiomna' ndaa ts'om w'aandaa. Waa na teincuu' na nnc'u'na' juuna'. 24Ndo' ty'entyjaa'na jom, jla'nlcwina jom, jluena: —'U Maestro, manncwja̱a̱ya. Jnda̱ na lcweeⁿ, seitiaaⁿ'aⁿ jndye ñequio nmo̱ⁿ ndo' jla'cheⁿna'. S'aana' na wacheeⁿ nnom ndaaluee. 25Quia jo' tsoom nda̱a̱na: —¿Yuu waa na ma'mo̱ⁿna' na cwilayu'ya n'om'yo'? Sa̱a̱ joona jla'catyuendyena ndo' tjaawee' n'omna. Tyoluena nda̱a̱ nc'iaana: —¿'Ñeeⁿ cwiluiiñe tsaⁿm'aaⁿ na matsa̱'ntjoom meiiⁿ jndye, meiiⁿ ndaaluee ndo' cwila'canda̱na' ñ'oom na matsoom? 26Jnda̱ jo' jlui'na xndyaa' ndaaluee, ndyuaa tsjoom nn'aⁿ Gadara na waa ndyeyu ts'o̱ndaa Galilea. 27Jnda̱ na jlui' Jesús tyuaatcwii, jndyocatjomñe cwii ts'aⁿ tsjoom'ñeeⁿ jom. Tsaⁿ'ñeeⁿ jnda̱ s'aa xuee na matseixmaaⁿ naⁿjndii naquii' ts'oom. Tacocweⁿ liaa ndo' tacoc'eeⁿ na waa w'aa. Mac'eⁿyom yuu na cwijaacanty'iuu'ndye l'oo. 28Quia na nty'iaaⁿ'aⁿ Jesús, jndeii seixuaⁿ s'aa jndyetia. Tcoom'm xtyeeⁿ jo nc'ee Jesús. Jndeii seineiiⁿ, tsoom: —¿Ljo' nntsa' ñ'eⁿndyo̱, 'u Jesús, Jnda Ty'o̱o̱ts'om na m'aaⁿ nandyeticheⁿ? Mats'aaya ty'oo njom', na tilco'wi' ja. 29Tsoom ñ'oomwaa' ee jnda̱ sa̱'ntjom Jesús na calui' jndyetia naquii' ts'om tsaⁿ'ñeeⁿ. Teijndye xuee maleiñ'oom jndyetia juu. Tyolatyeⁿ nn'aⁿ l'uaancjo l'o̱o̱ⁿ ndo' nc'eeⁿ. Sa̱a̱ tyoc'ioo'ñê joona' ndo' tyowjaañ'oom jndyetia'ñeeⁿ jom yuu na tjaa nn'aⁿ c'oom. 30Quia jo' tax'ee Jesús nnom, matsoom: —¿Ljo' jndyu'? T'o̱ 'ñom, tso: —Ja jndyuya Jndye Meiⁿ. Luaa' tsoom ee jeeⁿ jndye naⁿjndii jnda̱ tuo̱ naquii' ts'oom. 31Ndo' tyola'ty'oondye naⁿjndii'ñeeⁿ nnom Jesús na ticajñoom joona yuu na wi' nntjoomna. 32Jo' jo' tyom'aⁿ cwii tmaaⁿ' calcu quii' jnda̱a̱ na cwicwa'. Naⁿjndii'ñeeⁿ tyol'ana ty'oo nnoom na quiaaⁿ na nnc'ooquie'na naquii' n'om calcu'ñeeⁿ. Quia jo' tquiaaⁿ na wanaaⁿ. 33Ndo' jnda̱ na jlui' jndyetia ñ'eⁿ naⁿjndii naquii' ts'om tsaⁿ'ñeeⁿ, ty'equie'na naquii' n'om calcu. Ndo' tmaaⁿ' calcu'ñeeⁿ jlei'nomyo', tei'tyu'yo' yuu na nty'a 'ndyoo ndaaluee'ñeeⁿ, mana nchjeeñena' jooyo' quii' ndaa. 34Nn'aⁿ na cwitei'x'ee calcu'ñeeⁿ, jnda̱ na nty'iaana na luaa' tuii, jlei'nomna, tyola'neiⁿna ñ'oomwaa' naquii' tsjoom ndo' jo jnda̱a̱. 35Quia jo' ty'e nn'aⁿ, ty'ecanty'iaa ljo' tuii. Tquie'cañomna Jesús ndo' jliuna ts'aⁿ na jnda̱ jlui' naⁿjndii naquii' ts'om, wacatyeeⁿ nacañoom' Jesús. Macweⁿ liaa ndo' jnda̱ tco'yañ'eⁿna' jom. Ndo' naⁿ'ñeeⁿ, jeeⁿ tyuena. 36Joo nn'aⁿ na jndoo' chiuu tuii na n'maⁿ ts'aⁿ na ñeseixmaⁿ naⁿjndii, jla'neiⁿna nda̱a̱ nn'aⁿ na ty'ecanty'iaa. 37Ndo' cha'tso nn'aⁿ na m'aⁿ cha'waa ndyuaa Gadara, l'ana ty'oo nnom Jesús na calueeⁿ'eⁿ quii'ntaaⁿna, ee joona jeeⁿ nquiaana. Jo' chii tuo̱nnda' Jesús ts'om w'aandaa mana tjalcweeⁿ'eⁿ ts'o̱ndaa Galilea. 38Juu ts'aⁿ na jnda̱ jlui' naⁿjndii naquii' ts'om, tyoch'ee ty'oo nnom Jesús na quiaa tsaⁿ'ñeeⁿ ñ'oom' na nñ'eⁿ ñ'eⁿñê, sa̱a̱ sa̱'ntjom Jesús na caljoo'ñê. 39Tsoom nnom: —Cja'lcwe' na waa wa', catseineiⁿ' nda̱a̱ nn'aⁿ cwanti t'maⁿ naya jnda̱ s'aa Ty'o̱o̱ts'om ñ'eⁿndyu'. Ndo' tja tsaⁿ'ñeeⁿ, tyotseineiiⁿ nda̱a̱ nn'aⁿ cha'waa quii' tsjoom na t'maⁿ naya s'aa Jesús ñ'eⁿñê. 40Teity'ionnda' Jesús ndaaluee. Quia na jlueeⁿ'eⁿ w'aandaa, jndyendye nn'aⁿ to'ñoomna jom ñequio na neiiⁿna, ee cha'tsondyena mamei'ndoo'na jom. 41Tyjee'cañoom cwii ts'aⁿ na jndyu Jairo. Jom cwiluiitquieñê naquii' wats'om 'naaⁿ nn'aⁿ judíos. Tcoom'm xtyeeⁿ jo nc'ee Jesús, s'aaⁿ ty'oo na cjaa tsaⁿ'ñeeⁿ waⁿ'aⁿ. 42Ee m'aaⁿ jnaaⁿ na yuscu, na macanda̱ juu. Cha'na canchoo'we chuu' yu'ñeeⁿ ndo' mañe'cue'. Yocheⁿ na njom Jesús nato na mawjaⁿ waa' tsaⁿ'ñeeⁿ, s'aana' na jeeⁿ tyeeⁿ nacañom'm na jeeⁿ jndye nn'aⁿ. 43Ndo' quii'ntaaⁿna m'aaⁿ cwii yuscu na jnda̱ canchoo'we chu wii' tycu na cwicaa nioom'. Jnda̱ seicatsoom cha'tso 'naaⁿ'aⁿ ñequio nn'aⁿ na cwil'a nasei. Sa̱a̱ meiⁿcwiindye joona tîcanda̱a̱ nntsein'maⁿ jom. 44Tjatseicandyoo'ñê jo naxeⁿ' Jesús ndo' tyenquioom'm 'ndyoo liaatco na cwee Jesús. Mañoom' tjameintyjee' na cwicaa nioom'm. 45Quia jo' tax'e Jesús, tsoom: —¿'Ñeeⁿ juu tyenquiuu' ja? Cha'tsondye nn'aⁿ jlue ticaliu. Ndo' tso Pedro ñequio nc'iaaⁿ'aⁿ: —Ta, jndyendye nn'aⁿ jnda̱ seicanto'na' nacañom' hasta manchjena' 'u cwil'ana, ndo' mawaxe': “¿'Ñeeⁿ juu tyenquiuu' ja?” 46T'o̱ Jesús, tsoom: —M'aaⁿ 'ñeeⁿ juu na wii' tyenquiuu' ja. Ee ntyjiiya na jnda̱ teil'ue juu najndeii na matseixmaⁿya na n'maⁿ ts'aⁿ. 47Jnda̱ na ljeii yuscu'ñeeⁿ na xocanda̱a̱ nncwanty'iuu'ñê, ñequio na cwiteiñê jndyocoom'm xtyeeⁿ jo nnom Jesús. Ndo' ñequio na ndye cha'tsondye nn'aⁿ tjei'yuu'ñê chiuu na tyenquioom'm liaa' Jesús ndo' na mañoom' n'maaⁿ. 48Quia jo' tso Jesús nnoom: —'U jndaaya, nc'e na matsei'yu'ya' ts'om' ñ'eⁿndyo̱ jo' na jnda̱ n'maⁿ'. Cja' na meiⁿncwii ñomtiuu tanc'oom'. 49Ndicwaⁿ matseineiiⁿ ndo' tyjee' ts'aⁿ na jnaⁿ waa' Jairo, ts'aⁿ na cwiluiitquieñe wats'om. Matso tsaⁿ'ñeeⁿ: —Tantseicachjuu'ti' Tam'aaⁿ' ee jnda̱ tue' nomjnda'. 50Jnda̱ na jndii Jesús ñ'oomwaa', tsoom nnom Jairo: —Tinty'ue', macanda̱ na catseiyu' ñ'eⁿndyo̱, quia jo' nn'maⁿ nomjnda'. 51Ndo' jnda̱ na tueⁿ'eⁿ na waa w'aa, meiⁿcwii ts'aⁿ tînquiaaⁿ na nncjaaquiee' ñ'eⁿñê, macanda̱ Pedro ñequio Juan ñequio Jacobo, ndo' tsotye yuscuchjoo ñ'eⁿ tsondyee. 52Cha'tso nn'aⁿ jndeii cwila'xuaana, cwityueena cantyja 'naaⁿ' ts'oochjoo. Sa̱a̱ matso Jesús nda̱a̱na: —Tantyuee'yo' ee tyooweeⁿ'eⁿ, cwe' watsom. 53Sa̱a̱ joona, cwe' tyoncona Jesús ee manquiuyana na jnda̱ tue' tsaⁿ'ñeeⁿ. 54Quia jo' t'ueeⁿ ts'o̱, seineiiⁿ jndeii, tsoom: —Yuscuchjoo, quicantyja'. 55Mantyja tando'nnda' ndo' mañoom' teicantyja. Sa̱'ntjom Jesús na quiana na nlcwa' yuscuchjoo'ñeeⁿ. 56Nn'aⁿ na nda tsaⁿ'ñeeⁿ t'omna na jeeⁿ t'maⁿ tjawee' n'omna, sa̱a̱ Jesús sa̱'ntjoom na ticaluena nnom meiⁿcwii ts'aⁿ chiuu tuii.

will be added

X\