Lucas 3

1Chu na jnda̱ quin'oom na m'aaⁿ Tiberio César tsaⁿmaⁿts'iaaⁿ t'maⁿ tsjoom Roma, quia jo' tyom'aaⁿ Poncio Pilato gobiernom ts'o̱ndaa Judea. Ndo' Herodes tyom'aaⁿ gobiernom ts'o̱ndaa Galilea. Tyjeeⁿ Felipe tyom'aaⁿ gobiernom ts'o̱ndaa Iturea ñequio ts'o̱ndaa Traconite. Lisanias tyom'aaⁿ gobiernom ts'o̱ndaa Abilinia. 2Ndo' Anás ñequio Caifás, joona ntyee na tyoluiitquiendyena nda̱a̱ ntyee quia jo'. Ndo' Juan jnda Zacarías, xjeⁿ'ñeeⁿ tquiaa Ty'o̱o̱ts'om ñ'oom nnoom quia na m'aaⁿ yuu tjaa nn'aⁿ c'om. 3Tyomanoom cha'waa ndyuaa na nndyoo' jndaa Jordán. Tyoñequiaaⁿ ñ'oom na calcwe' n'om nn'aⁿ jnaaⁿna cha nntseit'maⁿ ts'om Ty'o̱o̱ts'om joona, ndo' nleits'oomndyena. 4Tuii na luaa' cha'xjeⁿ na matso ljeii libro na chuu ñ'oom 'ndyoo profeta Isaías. Matso ljeii'ñeeⁿ: M'aaⁿ ts'aⁿ na matseineiⁿ nda̱a̱ nn'aⁿ yuu tjaa nn'aⁿ c'om. Matso tsaⁿ'ñeeⁿ: “Cala'jndaa'ndyo' naquii' n'om'yo' cha'cwijom cwii nato na juu jo' nndyocwjee'cañoom nquii na nntsa̱'ntjom 'o. Cata'ndyo'xcwe'yo' cha'cwijom cwilayo̱'yo' nato na nñoom. 5Maxjeⁿ nntseicatoo'na' ticwii cwii cantmaⁿ' ndo' ticwii cwii sjo̱ ñequio ta nleisuna'. Nanto na canc'eeⁿ, nntseiliuuna', ndo' nanto na cwajndii nntseiyo̱na'. 6Quia jo' nnty'iaa cha'tsondye nn'aⁿ Nquii na maqueⁿ Ty'o̱o̱ts'om na nncwji'n'maaⁿñê joo.” 7Jndyendye nn'aⁿ tyo'oontyjaa'na Juan na nntseits'oomñê joona. Quia jo' tyotsoom nda̱a̱na: —'O tsjaaⁿ canduulja, ¿'ñeeⁿ t'mo̱ⁿ nda̱a̱'yo' na calei'nom'yo' na nndyocwjee'cañoom na nntseiw'ii Ty'o̱o̱ts'om 'o? 8C'om'yo' na ndyaandyo' cha m'mo̱ⁿna' na mayuu'cheⁿ cwilcwe' n'om'yo'. Ndo' ticala's'andyo' cheⁿncjo'yo' naquii' n'om'yo' na nndu'yo': “Jaa cwiluiindyo̱ tsjaaⁿ Abraham.” Nndye'yo' nntsjo̱o̱, meiiⁿ cwe' ljo̱'meiiⁿ nnda̱a̱ nntseicwaqueⁿ Ty'o̱o̱ts'om na nluiindyena' tsjaaⁿ Abraham, quia jo' n'ndiina' 'o. 9'O matseijomna' cha'cwijom n'oom na tis'a ta̱ cwil'a. Ndo' manquiu'yo' n'oom na tical'a ta̱ na ya, maxjeⁿ nnt'ua'na'. Ndo' xeⁿ jnda̱ nntioom nn'aⁿ joona' quii' chom. Maluaa' matseijomna' na nnts'aa Ty'o̱o̱ts'om ñ'eⁿndyo' 'o xeⁿ tical'a'yo' yuu na ya. 10Quia jo' ta'x'ee naⁿ'ñeeⁿ nnoom: —¿Chiuu macaⁿna' na cal'aayâ xeⁿ yuu' na ljo'? 11T'o̱o̱ⁿ nda̱a̱na, tsoom: —Ts'aⁿ na maleiñ'oom we cotom, quiaa cwii nnom ts'aⁿ na tjaa na cuaa. Ndo' 'ñeeⁿ na waa nantquie, cats'aa naya ts'aⁿ na tjaa'naⁿ chiuu ya. 12Mati nn'aⁿ na cwito'ñoom s'om cwentaa' gobiernom tquiona nam'aaⁿ na nleits'oomndyena. Jluena nnoom: —Ta, ¿chiuu macaⁿna' na cal'aayâ? 13T'o̱o̱ⁿ nda̱a̱na: —Tancwinom'yo' na cwitjei'yo' ts'iaaⁿnda̱a̱ nn'aⁿ. Cataⁿ'yo' tomti na matsona' na nntioomna. 14Mati ta'x'ee sondaro nnoom: —Ndo' jâ je', ¿chiuu macaⁿna' na cal'aayâ? T'o̱o̱ⁿ nda̱a̱na: —Talacaty'ue'yo' nn'aⁿ, ndo' talaco̱'yo' cantu joona cwe' cha na nnda̱a̱ nntjei'yo' s'om 'naaⁿna. Caljoya n'om'yo' cwanti na cwitantjom'yo'. 15Cha'tsondye nn'aⁿ jeeⁿ tyocantyjaa' n'omna na nncwjee' juu Cristo. Jo' chii tyom'aaⁿ' n'omna cantyja 'naaⁿ' Juan, ¿aa nnts'aacheⁿna' na jom cwiluiiñê Cristo? 16Jo' chii t'o̱o̱ⁿ nda̱a̱ cha'tsondyena, tsoom: —Ja matseits'o̱o̱ⁿndyo̱ 'o ñequio ndaatioo, sa̱a̱ mandyontyjo̱ nqueⁿ na nntseits'oomñê 'o na nñequiaaⁿ Espíritu Santo naquii' n'om'yo'. Sa̱a̱ nt'omndyo' 'o nnts'aana' cha'cwijom nntseits'oomñê 'o ñequio chom ee na nnt'uiityeⁿna' 'o cantyja jnaⁿ'yo'. Nqueⁿ t'maⁿti cwiluiiñê nchiiti ja. Meiⁿ ticatseixmaⁿya na cwe' ja na nntseicanaⁿ'a lcoom'm. 17Jnda̱ wjaawindyoo' na nntu'xeⁿndyo'. Ee 'o la'xmaⁿ'yo' cha'cwijom lqueeⁿ na ndicwaⁿ cwajndii. Luaa ts'iaaⁿ cantyja 'naaⁿ' lqueeⁿ. Matseicueeñe ts'aⁿ lqueeⁿ trigo, cha ya ya nlju'na'. Quia na jnda̱ lju'ya lqueeⁿ'ñeeⁿ, mana nntseiweeⁿ joona' ts'om tsa̱'. Sa̱a̱ lqueeⁿ lue' ñ'eⁿ to' njñoom chom jo'. Maluaa' matseijomna' na mach'ee Ty'o̱o̱ts'om. Nn'aⁿ na ya cwil'a maco'ñoom joona sa̱a̱ nn'aⁿ na tis'a cwil'a, nntseicoom joona ñequio chom na tijoom canduu'. 18Nmeiⁿ' ñ'oom na tyotseijndo̱' Juan n'om nn'aⁿ ñequio jndye nt'omcheⁿ ñ'oom na tyotseicañeeⁿ joona ñ'oom naya. 19Herodes, tsaⁿ na m'aaⁿ gobiernom ts'o̱ndaa Galilea, jom cwe' m'aaⁿyaaⁿ ñ'eⁿ Herodías, scuu' tyjeeⁿ Felipe. Jo' na seitia' Juan jom na ticatsa̱'ntjomna' na ljo' mach'eeⁿ ndo' ñequio cha'tso natia na jnda̱ ñes'aa tsaⁿ'ñeeⁿ. 20Luaa seicwaljoo'tyeeⁿ nacjoo cha'tso natia na s'aaⁿ, na tjoom'm Juan w'aancjo. 21Quia na jnda̱ teits'oomndye jndye nn'aⁿ, mati teits'oomñe Jesús, xcwe na matseineiiⁿ nnom Ty'o̱o̱ts'om ndo' seicanaaⁿñena' tsjo̱'luee. 22Jndyocue Espíritu Santo nacjoom'm cha'cwijom catu'. Ndo' teic'uaa na seineiⁿ Ty'o̱o̱ts'om cañoom'luee, matso: —'U cwiluiindyu' Jndaaya na candya' ts'o̱o̱ⁿya. Jeeⁿ neiⁿya 'u. 23Ndo' Jesús cha'na ntquiuu nchoo' qui choom'm quia na to̱o̱ⁿ'o̱ⁿ ts'iaaⁿ na jñom Ty'o̱o̱ts'om jom. Tyolue nn'aⁿ jnda José jom. Ndo' José jnda Elí, 24Elí jnda Matat, Matat jnda Leví, Leví jnda Melqui, Melqui jnda Jana, Jana jnda José, 25José jnda Matatías, Matatías jnda Amós, Amós jnda Nahum, Nahum jnda Esli, Esli jnda Nagai, 26Nagai jnda Maat, Maat jnda Matatías, Matatías jnda Semei, Semei jnda José, José jnda Judá, 27Judá jnda Joana, Joana jnda Resa, Resa jnda Zorobabel, Zorobabel jnda Salatiel, Salatiel jnda Neri, 28Neri jnda Melqui, Melqui jnda Adi, Adi jnda Cosam, Cosam jnda Elmodam, Elmodam jnda Er, 29Er jnda Josué, Josué jnda Eliezer, Eliezer jnda Jorim, Jorim jnda Matat, 30Matat jnda Leví, Leví jnda Simeón, Simeón jnda Judá, Judá jnda José, José jnda Jonán, Jonán jnda Eliaquim, 31Eliaquim jnda Melea, Melea jnda Mainán, Mainán jnda Matata, Matata jnda Natán, 32Natán jnda David, David jnda Isaí, Isaí jnda Obed, Obed jnda Booz, Booz jnda Salmón, Salmón jnda Naasón, 33Naasón jnda Aminadab, Aminadab jnda Aram, Aram jnda Esrom, Esrom jnda Fares, Fares jnda Judá, 34Judá jnda Jacob, Jacob jnda Isaac, Isaac jnda Abraham, Abraham jnda Taré, Taré jnda Nacor, 35Nacor jnda Serug, Serug jnda Ragau, Ragau jnda Peleg, Peleg jnda Heber, Heber jnda Sala, 36Sala jnda Cainán, Cainán jnda Arfaxad, Arfaxad jnda Sem, Sem jnda Noé, Noé jnda Lamec, 37Lamec jnda Matusalén, Matusalén jnda Enoc, Enoc jnda Jared, Jared jnda Mahalaleel, Mahalaleel jnda Cainán, 38Cainán jnda Enós, Enós jnda Set, Set jnda Adán, Adán jnda Ty'o̱o̱ts'om.

will be added

X\