Lucas 22

1Majnda̱ jaawindyoo' nncuee' xuee pascua na cwicwa' nn'aⁿ judíos tyoo' na tjaa ndaaljo' tjaquiee'. 2Ndo' ntyee na cwiluiitquiendye nda̱a̱ ntyee ñequio nn'aⁿ na cwit'mo̱o̱ⁿ ljeii na tqueⁿ Moisés, cwe' nty'iu tyol'ueendyena chiuu ya cha nnda̱a̱ nla'cuee'na Jesús, ee nquiaana nn'aⁿ na neiiⁿ jom. 3Xjeⁿ'ñeeⁿ tuo̱ Satanás naquii' ts'om Judas, tsaⁿ na mati jndyu Iscariote. Jom cwii joo nn'aⁿ na canchoo'wendye. 4Tjaaⁿ na m'aⁿ ntyee na cwiluiitquiendye nda̱a̱ ntyee quii'ntaaⁿ nn'aⁿ judíos, ñ'eⁿ nn'aⁿ na cwijndoo' ts'iaaⁿ na cwiluii wats'om. Tjatseijndaa'ñê chiuu ya nnts'aaⁿ na nñequiaaⁿ cwenta Jesús lueena. 5Ndo' naⁿ'ñeeⁿ jeeⁿ jla'neiiⁿ'ndyena, tjoom' t'maⁿna na nñe'quiana s'om nnoom. 6Mati jom seijomñê na ljo'. Tyol'ueeⁿ cwaaⁿ nncju'naaⁿñena' na nñequiaaⁿ cwenta Jesús lueena xjeⁿ na ticajndoo' nn'aⁿ. 7Tue'ntyjo̱ ncuee na cwicwa' nn'aⁿ judíos tyoo' na tjaa ndaaljo' tjaquiee'. Ncuee'ñeeⁿ macaⁿna' na cala'cwjeena canmaⁿ cantyja 'naaⁿ' ncuee pascua. 8Ndo' jñom Jesús Pedro ñequio Juan, tsoom nda̱a̱na: —Catsa'yo', nlajndaa'ndyo' yuu na nlcwaa'a cantyja 'naaⁿ' ncuee pascua. 9Ta'x'eena nnoom: —¿Yuu l'ue ts'om' na nlajndaa'ndyô̱? 10T'o̱o̱ⁿ nda̱a̱na: —Quia na jnda̱ saaquie'yo' naquii' tsjoomwa'ñeⁿ, nntjomndyo' cwii tsaⁿs'a na ñ'oom tsjoo na ñjom ndaa. Catsaantyjo̱'yo' naxeeⁿ'eⁿ hasta na nncueⁿ'eⁿ w'aa yuu na nncjaaqueⁿ'eⁿ. 11Jo' jo' candu'yo' nnom ts'aⁿ na waa' w'aa'ñeeⁿ: “Nquii ts'aⁿ na ma'mo̱ⁿ nda̱a̱ya mawax'eeⁿ: ¿Yuu waa cuarto na nlcwaa'â cwentaa' xuee pascua ñequio nn'aⁿ na cwila'jomndye ñ'eⁿndyo̱?” 12Quia jo' juu tsaⁿ'ñeeⁿ m'mo̱o̱ⁿ nda̱a̱'yo' cwii cuarto t'maⁿ, w'aa nandye na maniomcanda̱a̱' 'naⁿ. Jo' jo' calajndaa'ndyo'ya'yo'. 13Ty'ena ndo' jliuna cha'xjeⁿ na tsoom. Ndo' jla'jndaa'ndyena na nlcwa'na, nntquiina catsmaⁿ. 14Quia na jnda̱ tmaaⁿ, tue'cañoom Jesús, tjacjom nacañoom' meiⁿsa ñequio canchoo'we nn'aⁿ na cwila'jomndye ñ'eⁿñê. 15Tsoom nda̱a̱na: —Jeeⁿ ntyjaa' ts'o̱o̱ⁿya na nlcwaa'a nantquie pascuawaa ñ'eⁿndyo' cwii tjo̱o̱cheⁿ na nnc'io̱. 16Ee candye'yo' nntsjo̱o̱, taxocwa'nnda'a juuna' hasta xjeⁿ na jnda̱ seicanda̱a̱'ñena' yuu na matsa̱'ntjom Ty'o̱o̱ts'om. 17Jnda̱ jo' to'ñoom cwii waso, jnda̱ chii tquiaaⁿ na quianl'uaa' Ty'o̱o̱ts'om ndo' tsoom nda̱a̱na: —Cato'ñoom'yo' wasowaa, calui' cjaana' cwii ndo' cwiindyo', cwe'yo'. 18Ee candye'yo' nntsjo̱o̱, je' na cwii wjaatina', taxoc'ua ndaawinom hasta quia nncue'ntyjo̱ xjeⁿ na nntsa̱'ntjom Ty'o̱o̱ts'om. 19Ndo' to'ñoom tyoo', tquiaaⁿ na quianl'uaa' Ty'o̱o̱ts'om, jnda̱ chii tyjeeⁿ juuna', tquiaaⁿ nda̱a̱na. Tsoom: —Tyoo'waa cwiluiiñena' seii'a na mañequiaandyo̱ na nnc'io̱. Luaa' nntsaal'a'yo' na cwicañjom n'om'yo' ja. 20Jnda̱ na tcwa'na tyoo'ñeeⁿ, majo'ti s'aaⁿ, to'ñoom waso. Tsoom: —Juu ndaa winom na ñjom wasowaa tseixmaⁿna' ñ'oom xco na maqua̱ⁿtya̱ⁿ ñequio nioom'a na nnquioo cwenta'yo'. 21’Sa̱a̱ queⁿ'yo' cwenta, ñe'cwii meiⁿsa na cañom' meindyuaandyo̱ ñequio ts'aⁿ na mañequiaa cwenta ja. 22Ndo' ja na cwiluiindyo̱ ts'aⁿ na jnaⁿ cañoom'luee, mayuu'cheⁿ manntjo̱ⁿ cha'xjeⁿ na jnda̱ teijndaa' cantyja 'naⁿya, sa̱a̱ nnt'uiiwi'na' juu ts'aⁿ na mañequiaa cwenta ja. 23Quia jo' to̱'na na tyota'x'eendyena nda̱a̱na, 'ñeeⁿ cwiindye joona na nnts'aa na ljo'. 24Mati jla'ñ'eeⁿ' ndyueena 'ñeeⁿ cwiindye joona na nnc'oom na t'maⁿñeti. 25Sa̱a̱ jom tsoom nda̱a̱na: —Nn'aⁿ na m'aⁿ n'iaaⁿ tsjoomnancuewaa ñequio nn'aⁿ na cwitsa̱'ntjom, cwinchjeena nn'aⁿ na cwindye'ntjom nda̱a̱na, sa̱a̱ cwila'cajndyu yo'ñeeⁿ joona nn'aⁿ na ya cwil'a. 26Sa̱a̱ quii'ntaaⁿ' 'o nchii luaa' nncuaa. Ee juu ts'aⁿ na cwiluiitquieñeti c'oom cha'na ts'aⁿ na cje tseixmaⁿ. Ndo' ts'aⁿ na matsa̱'ntjom c'oom cha'na ts'aⁿ na mandi'ntjom. 27Ee ¿'ñeeⁿ cwiluiit'maⁿñeti, aa juu ts'aⁿ na wacatyeeⁿ nacañoom' meiⁿsa, oo aa juu ts'aⁿ na mandi'ntjom jo' jo'? ¿Aa nchii maxjeⁿ juu ts'aⁿ na wacatyeeⁿ nacañoom' meiⁿsa? Sa̱a̱ queⁿ'yo' cwenta, ja m'aaⁿya quii'ntaaⁿ'yo' na mandi'ntjo̱ⁿ. 28’'O ñequii'cheⁿ ñ'eⁿ'yo' ñ'eⁿndyo̱ cha'tsoti na maqueⁿna' xjeⁿ ja. 29Jo' chii cha'xjeⁿ na tqueⁿtyeⁿ Tsotya̱ya ñ'oom na ja nntsa̱'ntjo̱ⁿ, malaa'ti' maqua̱ⁿ na 'o nntsa̱'ntjom'yo'. 30Yuu na nntsa̱'ntjo̱ⁿya, jo' nñequiaya na nlcwa'yo' ndo' nncwe'yo' ñ'eⁿndyo̱ cañoom' meiⁿsa 'naⁿya. Ndo' nncwindyuaandyo' ntio yuu na nntu'xeⁿ'yo' canchoo'we ntmaaⁿ' nn'aⁿ Israel. 31Tso ta Jesús: —'U Simón, queⁿ' cwenta, jnda̱ tcaⁿ Satanás ñ'oom na nntseitei'ncweeⁿ'eⁿ 'o cha'na matseicueeñe ts'aⁿ lqueeⁿ trigo, 32sa̱a̱ ja jnda̱ ñes'aa ty'oo nnom Ty'o̱o̱ts'om cantyja 'naⁿ' cha tintseintycwiina' na matsei'yu'ya' ts'om'. Ndo' xeⁿ jnda̱ tco'ndyu'xcwe'nnda', quiaa' ñ'oom t'maⁿ ts'om nda̱a̱ nn'aⁿ' nmeiiⁿ na cwila'yu'. 33T'o̱ Simón nnoom, matso: —Ta, m'aaⁿc'eendyo̱ na nncjo̱ w'aancjo ñ'eⁿndyu'. Ndo' tints'aa meiiⁿ na nnc'io̱ ñ'eⁿndyu'. 34Tso Jesús nnoom: —Aa ndi', Pedro, njom' matsjo̱o̱, cwii tjo̱o̱cheⁿ na nntseixuaa caxtijndyo je'je'cheⁿ, sa̱a̱ 'u xjeⁿ'ñeeⁿ jnda̱ ndyee ndii' macwji'ndyu' na ticwajnaⁿ' ja. 35Tso Jesús nda̱a̱na: —Quia na jño̱o̱ⁿya 'o na saanquia'yo' ñ'oom 'naⁿya, tsjo̱o̱ na tîcatsañ'om'yo' tsjo̱'ñjeeⁿ, meiⁿ chetsja', meiⁿ lcoom, ¿aa waa na seitjo̱o̱na' 'o? Jluena nnoom: —Meiⁿcwii tjaa'naⁿ. 36Tsotyeeⁿcheⁿ nda̱a̱na: —Sa̱a̱ je', 'ñeeⁿ juu na maleiñ'oom 'naⁿ na cwicañjom s'om, cjaañ'oom juuna' ndo' mati chetsja'. Ndo' 'ñeeⁿ juu na tjaa'naⁿ xjo espada, cajnda̱a̱ liaatco 'naaⁿ', chii c'oom xjoo'. 37Ee candye'yo' nntsjo̱o̱, maxjeⁿ jndei'na' na catseicanda̱a̱'ñena' ljeii na mawaa cantyja 'naⁿya na matsona': “Tjeii'na cwenta na ljo'yu wi'ñê cha'xjeⁿ nn'aⁿ na wi'ndye.” 38Jluena nnoom: —Ta, canty'ia', luaa mawaa we xjo espadas. T'o̱o̱ⁿ nda̱a̱na, tsoom: —Malei'tyeⁿ luaa'. 39Quia jo' jlueeⁿ'eⁿ w'aa yuu na tcwa'na, tjaaⁿ ta na jndyu Olivos yuu na maxjeⁿ quicaⁿ. Ndo' nn'aⁿ na cwila'jomndye ñ'oom'm, mandi'ntyjo̱na naxeeⁿ'eⁿ. 40Quia na tquiena jo' jo', tsoom nda̱a̱na: —Calaneiⁿ'yo' nnom Ty'o̱o̱ts'om cha juu na ñequeⁿna' xjeⁿ 'o tincwantjomna' 'o. 41Ndo' teiño̱o̱ⁿ nacañoomna, tjaaⁿ cha'na tquia na nncju' ts'aⁿ cwii tsjo̱'. Tcoom'm xtyeeⁿ ndo' seineiiⁿ nnom Ty'o̱o̱ts'om. 42Tsoom: —Tsotya̱ya, xeⁿ 'u l'ue ts'om', catseicandyaandyu' ja nawi'waa. Sa̱a̱ ticaluii ljo' na l'ue ts'o̱o̱ⁿ ja, caluii ljo' na l'ue ts'om' nncu'. 43Ndo' xjeⁿ'ñeeⁿ tyje'cañoom cwii ángel nacañom'm na jnaⁿ cañoom'luee na tyoñequiaa najneiⁿ. 44Yocheⁿ na tyotsei'ndaa'na' ts'oom, tyoqueⁿñetyeeⁿ na tyotseineiiⁿ nnom Ty'o̱o̱ts'om ñequio cha'waa najneiⁿ. Ndo' ndaatmeiiⁿ'eⁿ tyotseijomna' cha'na t'maⁿ ndaateiⁿ niom', ñecwii ndii' cwi'iuuna' xjeⁿ nomtyuaacheⁿ. 45Quia na jnda̱ teicantyjaaⁿ na seineiiⁿ nnom Ty'o̱o̱ts'om, tjantyjaaⁿ'aⁿ nn'aⁿ na cwila'jomndye ñ'eⁿñê ndo' ljeiiⁿ na cwindana. Ee tîcanaⁿndyena na jeeⁿ chjoo' n'omna. 46Tsoom nda̱a̱na: —¿Chiuu na cwinda'yo'? Quicantyja'yo', calaneiⁿ'yo' nnom Ty'o̱o̱ts'om cha juu na ñe'queⁿna' xjeⁿ 'o, tincjaachuuna' 'o. 47Ndicwaⁿ matseineiⁿ Jesús ndo' tquie'cañom nn'aⁿ na jndyendye. Jo nda̱a̱ naⁿ'ñeeⁿ wjaajndyee Judas, cwii joo nn'aⁿ na canchoo'we. Seicandyoo'ñê nacañoom' Jesús na nnc'om ntsmaⁿ'. 48Tso Jesús nnoom: —'U Judas, ja na cwiluiindyo̱ ts'aⁿ na jnaⁿ cañoom'luee, ¿aa ma'tioo' cwenta ja luee nn'aⁿ ñequio na ma'ua' ntsmaaⁿ'a? 49Ndo' nn'aⁿ na ñ'eeⁿ ñ'eⁿñê, quia na nty'iaana chiuu wjaach'eena', jluena nnoom: —Ta, ¿aa mañejom nntua̱a̱'a xjo? 50Ndo' cwii joona mañoom' seiquiee'ñe mosoo' tyee na cwiluiitquieñe. Tyjee tsua'qui tsaⁿ'ñeeⁿ ntyjaya. 51Quia jo' tso Jesús nda̱a̱na: —Maya, ca'ndye'yo'. Ndo' tyenquioom'm tsua'qui tsaⁿ'ñeeⁿ, sein'maaⁿ juu. 52Ndo' nn'aⁿ na tquio nacjoom'm, joo ntyee na cwiluiitquiendye ñequio nn'aⁿ na cwijndoo' ts'iaaⁿ cwentaa' wats'om, ñequio nn'aⁿ na cwiluiitquiendye naquii' tsjoom, tsoom nda̱a̱ naⁿ'ñeeⁿ: —Jnda'jom ñequio ncjo espadas ndo' ñ'eⁿ n'oom nch'io na tquio'yo' nacjoya. Ndoo' na tquioc'om'yo' cwii tsaⁿcanch'ue. 53'Io ndii 'io tyom'aaⁿya quii'ntaaⁿ'yo' naquii' wats'om t'maⁿ meiⁿ tîcat'ue'yo' ja. Sa̱a̱ je' je' jnda̱ tue'ntyjo̱ na juu na jaaⁿñe maqueⁿna' xjeⁿ. 54Jnda̱ na t'ue naⁿ'ñeeⁿ jom, ty'eñ'omna jom waa' tyee na cwiluiitquieñe. Ndo' Pedro tjantyjo̱o̱ⁿ tquiacheⁿ tquia. 55Jo' jo' jla'ntjoomndye nn'aⁿ chom tach'eⁿ, tyomeindyuaandyena ndiocheⁿ nacañoom' chom. Ndo' mati Pedro tjacjom quii'ntaaⁿna. 56Cwii yuscu na mandi'ntjom ljeii jom na wacatyeeⁿ 'ndyoo chom, jeeⁿ nquiee nty'iaa' nnoom ndo' tso: —Mati tsaⁿm'aaⁿ ñeñ'eeⁿ ñ'eⁿ tsaⁿm'aaⁿ'. 57Sa̱a̱ jom tjei'ñê, tsoom: —Jeeⁿ 'u yuscu ticwajnaⁿ'a tsaⁿm'aaⁿ'. 58Tyoowiquiuu' ljeii cwiicheⁿ ts'aⁿ jom, tso nnoom: —'U, maxjeⁿ cwiindye joona. Sa̱a̱ t'o̱o̱ⁿ: —Nchii jo' ja. 59Jnda̱ tjawiquiuu'ticheⁿ, cha'na cwii hora, cwiicheⁿ ts'aⁿ tyotseijndeii' 'ndyoo, tso: —Tsaⁿm'aaⁿ, mayuu'cheⁿ ñeñ'eeⁿ ñ'eⁿ tsaⁿm'aaⁿ' ee ts'aⁿ ts'o̱ndaa Galilea jom. 60T'o̱ Pedro nnom: —Ja re, meiⁿchjoo ticaljeii ñ'oom na matsu'. Ndicwaⁿ matseineiiⁿ ñ'eⁿ tsaⁿ'ñeeⁿ ndo' seixuaa caxtijndyo. 61Quia jo' taqueⁿ Ta Jesús ndyeyu jo ndo' na m'aaⁿ Pedro ndo' nty'iaa' nnoom. Ndo' mañoom' tjañjoom' ts'oom ñ'oom na jnda̱ tso nnoom: “Cwii tjo̱o̱cheⁿ na nntseixuaa caxtijndyo je'je'cheⁿ sa̱a̱ xjeⁿ'ñeeⁿ 'u jnda̱ ndyee ndii' macwji'ndyu' ñ'eⁿndyo̱.” 62Quia jo' mana jlui' Pedro quii'ntaaⁿ naⁿ'ñeeⁿ. Jeeⁿcheⁿ ndya' tyoty'ioom na jnda ntyjeeⁿ. 63Nn'aⁿ na tyol'a cwenta Jesús, tyola'jnaaⁿ'na ndo' tyotjaa'na jom. 64Mati tyola'tyeⁿna liaa nnoom, tyotmeiiⁿ'na nda' nnoom ndo' tyoluena: —Cjaawee' 'ndyo' 'ñeeⁿ juu macwja' 'u. 65Ndo' jndye ñ'oom ticuee' ts'om tyoluena nacjoom'm. 66Quia na jnda̱ teixuee, tjomndye ntyee na cwiluiitquiendye nda̱a̱ ntyee ñequio nn'aⁿ na cwijndoo' ts'iaaⁿ wats'om t'maⁿ ñequio nn'aⁿ na cwit'mo̱o̱ⁿ ljeii na tqueⁿ Moisés. Ty'eñ'omna Jesús na m'aⁿ nn'aⁿ na cwiluiindyena n'iaaⁿ nda̱a̱ nn'aⁿ judíos. Jlue naⁿ'ñeeⁿ nnoom: 67—Catsu' nda̱a̱yâ, ¿aa 'u cwiluiindyu' Cristo? Jom t'o̱o̱ⁿ nda̱a̱na: —Meiiⁿ xeⁿ na nntsjo̱o̱ nda̱a̱'yo', sa̱a̱ xocala'yu'yo'. 68Ndo' meiiⁿ xeⁿ na cwax'a̱ya nda̱a̱'yo', 'o xocat'o̱'yo' 'ndyo̱, xocalacandyaandyo' ja. 69Sa̱a̱ je' xuee na cwii wjaana', ja na cwiluiindyo̱ ts'aⁿ na jnaⁿ cañoom'luee nncjo̱cajmaⁿ ntyjaa' Ty'o̱o̱ts'om ntyjaya yuu na matseit'maaⁿ'ñetina' ja. Jo' jo' nntseijomndyo̱ ñ'eⁿñê cha'tso najndeii na matseixmaaⁿ. 70Cha'tsondyena ta'x'eena: —Quia jo' ¿aa 'u cwiluiindyu' Jnda Ty'o̱o̱ts'om? T'o̱o̱ⁿ nda̱a̱na: —Mancjo'ti'yo' jnda̱ macwindu'yo'. 71Quia jo' jluena: —¿Ljo' cwii macaⁿtina' na nlui'yuu' nacjoom'm? Ee mancjo̱o̱tya̱a̱ jnda̱ jndya̱a̱ya ñ'oom 'ñom.

will be added

X\