Lucas 19

1Quia na jnda̱ tjaquiee' Jesús tsjoom Jericó, tjawinoom quii' tsjoom. 2Jo' jo' tyom'aaⁿ cwii tsaⁿtya na jndyu Zaqueo. Tsaⁿ'ñeeⁿ cwiluiitquieñê jo nda̱a̱ nn'aⁿ na cwito'ñoom s'om cwentaa' gobiernom. 3Tyoqueⁿñê na nncwajnaⁿ'aⁿ 'ñeeⁿ jo' na Jesús, sa̱a̱ tileicanda̱a̱ ee jeeⁿ jndye nn'aⁿ ndo' na cat'a̱a̱'ñê. 4Jo' chii jleinoom, tjañetyeeⁿ, tjawaaⁿ cwii ts'oom sicómoro na nnty'iaaⁿ'aⁿ Jesús ee na jo' jo' nncwinom tsaⁿ'ñeeⁿ. 5Quia na tue'cañoom Jesús jo' jo', jlunda̱a̱ñê, tsoom nnom: —Zaqueo, catseityuaa', candyo'cue' ee xuee je' macaⁿna' na caljoo'ndyo̱ wa'. 6Quia jo' seityuaaⁿ'aⁿ jndyocueeⁿ. Ñequio na neiiⁿ'eⁿ seiljoom Jesús waⁿ'aⁿ. 7Sa̱a̱ quia na nty'iaa nn'aⁿ na luaa', cha'tsondyena tyola'ncjoo'ndyena, jluena: —Cwa jndaa' tjaqueⁿ'eⁿ na nljoo'ñê waa' ts'aⁿ na matseitjo̱o̱ñe nnom Ty'o̱o̱ts'om. 8Ndo' teintyjee' Zaqueo, tsoom nnom Jesús: —Aa ndi', Ta, xcwe 'naⁿya na niom manñequiaya nda̱a̱ ndyeñeeⁿ' ndo' xeⁿ na x'ua̱ya 'naaⁿ' ts'aⁿ, je' manntseilcwa̱'a ñequiee ndii' cha'xjeⁿ na tjeii'a. 9Tso Jesús nnoom: —Xuee je' juu na macwji'n'maaⁿñe Ty'o̱o̱ts'om nn'aⁿ, jnda̱ tyjee'na' w'aawaa. Ee mati tsaⁿm'aaⁿ cwiluiiñê ts'aⁿ tsjaaⁿ Abraham. 10Ee ja na cwiluiindyo̱ ts'aⁿ na jnaⁿ cañoom'luee jndyo̱cal'ua̱ ndo' jndyo̱cwji'n'maaⁿndyo̱ nn'aⁿ na cwitsuundye añmaaⁿ. 11Nn'aⁿ na tyondye ñ'oommeiⁿ' jla'tiuuna tyuaa' nleitquioo' cantyja na matsa̱'ntjom Ty'o̱o̱ts'om, ee manndyoo' m'aaⁿ Jesús tsjoom Jerusalén. Jo' chii, tsotyeeⁿ ñ'oom na tjañoom' nda̱a̱na. 12Tsoom: —Tyom'aaⁿ cwii ts'aⁿ na t'maⁿ cwiluiiñe. Tjaaⁿ tquia cwiicheⁿ ndyuaa na nnco'ñoom ts'iaaⁿ na nntseixmaaⁿ rey, ndo' xeⁿ jnda̱ nndyolcweeⁿ'eⁿ. 13Cwii tjo̱o̱cheⁿ na nncjaⁿ, tqueeⁿ'ñê qui nn'aⁿ na cwindye'ntjomtyeⁿ nnoom. T'maⁿ s'om teijndeiiyaaⁿ nnom cwii cwii tsaⁿ'ñeeⁿ. Tsoom nda̱a̱na: “Cal'ueendyo' chiuu nl'a'yo' ts'iaaⁿ na nntantjom'yo' ñ'eⁿ joona' yocheⁿ na ja nncwja̱.” 14Sa̱a̱ nn'aⁿ ndyuaa tsjom'm, jndoona jom. Jo' jñoomna nn'aⁿ ndyuaa yuu na tjaaⁿ, ty'ecalue naⁿ'ñeeⁿ: “Jâ tical'ue n'o̱o̱ⁿyâ na tsaⁿm'aaⁿ' nluiiñê rey cwentaaya.” 15Jnda̱ na to'ñom tsaⁿ'ñeeⁿ n'iaaⁿ na nnc'oom, jndyolcweeⁿ'eⁿ. Tqueeⁿ'ñê nn'aⁿ na tquiaaⁿ s'om 'naaⁿ'aⁿ nda̱a̱. Ee ñe'caljeiiⁿ cwanti jnda̱ ta'ntjom cwii cwiindye naⁿ'ñeeⁿ. 16Tyjee' tsaⁿ najndyee, tso nnoom: “Nmeiiⁿ s'om 'naⁿ', ta, qui ndii' cha'xjeⁿ na to'ño̱ⁿ jnda̱ tantjo̱ⁿ ñ'eⁿ juuna'.” 17Quia jo' tsoom nnom: “Ya sa', 'u mosoya, meiiⁿ cachjoo na to'ñom' sa̱a̱ seicanda̱'. Jo' chii je' maqua̱ⁿya 'u nnc'oom' ts'iaaⁿ, nntsa̱'ntjom' qui tsjoom.” 18Ndo' tyjee' tsaⁿ na jnda̱ we, tso nnoom: “Nmeiiⁿ s'om 'naⁿ', ta, 'om ndii' cha'xjeⁿ na to'ño̱ⁿ jnda̱ tantjo̱ⁿya ñ'eⁿ juuna'.” 19Quia jo' majo'ti tsoom nnom: “Je' maqua̱ⁿya 'u nnc'oom' ts'iaaⁿ, nntsa̱'ntjom' 'om tsjoom t'maⁿ.” 20Tyjee' cwiicheⁿ ts'aⁿ, tso nnoom: “Luaa s'om 'naⁿ', ta, na seiwa̱ naquii' payom. 21Ee ja jeeⁿ nquiaya 'u na jeeⁿ jnda̱ ñ'oom tseineiⁿ'. Ee 'u maco'ñom' yuu na nchii cwenta', ndo' quitsei'we' yuu na nchii 'u jnom'.” 22Quia jo' tsoom nnom: “'U moso 'naⁿya na tia matseitiuu', majuuti ñ'oom 'ndyo' nnts'aaya na nncu'xeⁿna' 'u. Xeⁿ ntyji' na ja ts'aⁿ na jeeⁿ jnda̱ ñ'oom tseineiⁿ ndo' na maco'ño̱ⁿ yuu na nchii cwentaya ndo' na quitseiwa̱ya yuu na nchii nnco̱ jno̱o̱ⁿ'a, 23quia jo' ¿chiuu na tîcja'ca'ndii' s'om 'naⁿya banco yuu na nncwantjomna' cha quia na nndyo̱o̱nnda'a, nncoño̱ⁿ s'om 'naⁿya mandiñ'eeⁿ ts'iaaⁿnda̱a̱na'?” 24Ndo' tsoom nda̱a̱ nt'omcheⁿ nn'aⁿ na m'aⁿ nacañom'm: “Catjei'yo' s'om 'naⁿya l'o̱o̱ⁿ ndo' quia'yo' juuna' nnom tsaⁿm'aaⁿ' na tantjom qui ndii'.” 25T'o̱o̱ naⁿ'ñeeⁿ, jluena: “Ta, ¿chiuu ndo' mamaleiñ'oom qui ndii' na laa'ti'?” 26Candye'yo' nntsjo̱o̱, meiⁿcwi'ñeeⁿcheⁿ ts'aⁿ na maniom na maleichuu, nlo'ñomti. Sa̱a̱ ts'aⁿ na tjaa'naⁿ na cuaa l'o̱, nlui'ñ'eⁿ cwanti na maleiñ'oom. 27Mati joo nn'aⁿ na jndoo ja, na tical'ue n'om na nntsa̱'ntjo̱ⁿya joo, quiocho'yo' joona ñjaaⁿñe ndo' ñequio na ndo̱o̱'a catyje'yo' cantyo'na. 28Jnda̱ seineiⁿ Jesús ñ'oomwaa', tjatjatyeeⁿ na nncueⁿ'eⁿ Jerusalén. 29Ndo' quia na tjawiñoom'm tsjoom Betfagé ñequio tsjoom Betania nndyoo' yuu waa ta na jndyu Olivos, jñoom we nn'aⁿ na cwila'jomndye ñ'eⁿñê na c'oona l'aa. 30Tsoom nda̱a̱na: —Catsa'yo' juu tsjoom chjoo na m'aaⁿ ndyeyu jo nda̱a̱'yo', ndo' cha'na nntsaaquie'yo' jo', nliu'yo' cwii snom chjoo na ñjom. Juu quioo'ñeeⁿ meiⁿcwii ndii' tyoowa'ljoo ts'aⁿ. Calacanaⁿ'yo', nquioñ'om'yo' juuyo' ñjaaⁿ. 31Ndo' xeⁿ m'aaⁿ 'ñeeⁿ juu na nncwax'ee nda̱a̱'yo' chiuu na cwilacanaⁿ'yo' juuyo', luaa candu'yo' nnom: “Nquii Ta na matsa̱'ntjom jâ tjo̱o̱ñê juuyo'.” 32Quia jo' ty'ena l'aa na jñoom joona ndo' jliuna cha'xjeⁿ na tsoom. 33Yocheⁿ na cwila'canaⁿ'na snom, jlue nn'aⁿ na njmeiⁿ' juuyo': —¿Chiuu na cwilacanaⁿ'yo' snomm'aaⁿ'? 34Quia jo' t'o̱o̱na: —Nquii Ta tjo̱o̱ñê juuyo'. 35Mana ty'eñ'omna snom'ñeeⁿ na m'aaⁿ Jesús. Jnda̱ tioona liaana naxeⁿ'yo', tei'caljoona jom. 36Yocheⁿ na mawjaawinoom, tyotsa̱' nn'aⁿ liaateincoo 'naaⁿna ts'om nato. 37Quia na jnda̱ 'oowindyoona tsjoom Jerusalén yuu na wjaacue nato ta na jndyu Olivos, cha'tsondye nn'aⁿ na cwila'jomndye ñ'oom'm, to̱'na na jndeii tyola'xuaana. Tyola't'maaⁿ'ndyena Ty'o̱o̱ts'om cantyja cha'tso ts'iaaⁿ t'maⁿ na nty'iaana na tyoch'ee Jesús. 38Jluena: —Tsaⁿm'aaⁿ cwiluiiñê Rey na matsa̱'ntjoom jaa. Macwje'cañoom ñequio xuee' nquii na tjacantyja cwiluii t'maⁿñe. Jom catio'naaⁿñe Ty'o̱o̱ts'om na m'aaⁿ cañoom'luee. Cwiljoya ts'oom ñequio nn'aⁿ. Catseit'maaⁿ'ñena' nqueⁿ na m'aaⁿ nandyeticheⁿ. 39Nt'om nn'aⁿ fariseos na ñ'eeⁿ'ndye quii'ntaaⁿ nn'aⁿ na jndyendye jluena: —'U na ma'mo̱o̱ⁿ' ñ'oom' Ty'o̱o̱ts'om nda̱a̱ nn'aⁿ, catseitia' naⁿm'aⁿ' na cwila'jomndye ñ'om'. 40T'o̱o̱ⁿ nda̱a̱na, tsoom: —Candye'yo' nntsjo̱o̱, xeⁿ naⁿm'aⁿ nla'cheⁿna, quia jo' joo ljo̱' nla't'maaⁿ'ndyena' ja. 41Quia tueⁿ'eⁿ nnom tsjoom'ñeeⁿ, ndo' quia nty'iaaⁿ'aⁿ juuna', ty'ioom cantyja 'naaⁿ nn'aⁿ na m'aⁿ jo' jo'. 42Tyotseineiiⁿ cha'cwijom nda̱a̱ naⁿ'ñeeⁿ, tsoom: —Toom cwe' xuee je' cwila'no̱ⁿ'yo' ljo' na macaⁿna' cha nnda̱a̱ ljoya ts'om Ty'o̱o̱ts'om ñ'eⁿndyo'. Sa̱a̱ je' cwe' wanty'iuu' m'aaⁿna' jo nda̱a̱'yo'. 43Ee nncue'ntyjo̱ xuee na joo nn'aⁿ na jndoo 'o nl'ana tiomtsjo̱' ndiocheⁿ nnom tsjom'yo' na nncwañoom'na' joona. Ndo' nnta̱'na 'o meiⁿnquia ntyja. 44Nla'tyuii'ñ'eⁿna 'o ndo' nla'cwjeena nda'yo'. Ndo' nla'tyuii'na niaⁿljo̱' tsjom'yo'. Meiⁿcwii tsjo̱' taxoca'ndyena nacjoo' x'iaa'na', cwe' nc'e na ticalañ'oom'ndyo' ja na jñom Ty'o̱o̱ts'om cha nnda̱a̱ nlui'n'maaⁿndyo'. 45Jnda̱ jo' tjaquiee' Jesús wats'om t'maⁿ, to̱o̱ⁿ'o̱ⁿ tjeiiⁿ'eⁿ nn'aⁿ ch'eⁿ, joo nn'aⁿ na cwinda̱a̱ ndo' nn'aⁿ na cwila'jnda jo' jo'. 46Tsoom nda̱a̱na: —Waa ljeii 'naaⁿ' Ty'o̱o̱ts'om na matsona': “W'aya cwiluiiñena' w'aa yuu na cwila'neiⁿ nn'aⁿ nnom Ty'o̱o̱ts'om.” Sa̱a̱ 'o cwil'a'yo' juuna' cha'cwijom tsue'tsjo̱' yuu na cwicatoo'ndye naⁿcanty'ue. 47Ndo' ticwii xuee tyo'mo̱o̱ⁿ nda̱a̱ nn'aⁿ naquii' wats'om t'maⁿ. Sa̱a̱ nn'aⁿ na cwiluiitquiendye nda̱a̱ ntyee ñequio nn'aⁿ na cwit'mo̱o̱ⁿ ljeii na tqueⁿ Moisés, ñequio nn'aⁿ na cwiluiitquiendye naquii' tsjoom, tyol'uee'ndyena chiuu ya nl'ana na nla'cuee'na jom. 48Sa̱a̱ meiⁿchjoo tileicaliuna chiuu ya nl'ana ee cha'tsondye nn'aⁿ tyocantyjaa' n'om ñ'oom na tyotseineiiⁿ nda̱a̱na.

will be added

X\