Lucas 18

1Mati seineiⁿ Jesús cwiicheⁿ ñ'oom na tjañoom'. Ma'mo̱ⁿna' na ñe'quii'cheⁿ cala'neiⁿ nn'aⁿ nnom Ty'o̱o̱ts'om, tincwintqueeⁿna. 2Tsoom nda̱a̱na: —Tyom'aaⁿ cwii jwe cwii tsjoom. Juu tsaⁿ'ñeeⁿ meiⁿ Ty'o̱o̱ts'om tinquiaⁿ'aⁿ, meiⁿ nn'aⁿ tiquitseit'maaⁿ'ñê. 3Mati tyom'aaⁿ cwii yuscu tsjoom'ñeeⁿ na jnda̱ ljoñe na tue' saa'. Juu yuscu'ñeeⁿ ñequii'cheⁿ na tyocaa na m'aaⁿ jwe'ñeeⁿ na catseijndaa'ñe ñ'oom 'naaⁿ'aⁿ. Tyotsoom nnom: “Cwañom' ja ñ'oom cantu na s'aa ts'aⁿ nacjoya.” 4Jndye xuee tîcatsein'oom'ñe jwe yuscu'ñeeⁿ, sa̱a̱ jnda̱ jo' seitioom naquii' ts'oom: “Meiiⁿ na tinquiaya Ty'o̱o̱ts'om ndo' meiiⁿ na ticatseit'maaⁿ'ndyo̱ nn'aⁿ, 5sa̱a̱ cwe' ee na jeeⁿ matseilioo' yuscum'aaⁿ' ja, nncwaño̱ⁿ'to̱ jom cwitjo̱o̱cheⁿ nntycwii na t'maⁿ ts'o̱o̱ⁿ ñ'eⁿñê.” 6Tso Ta Jesús: —Jwe'ñeeⁿ meiiⁿ na wi'ñe sa̱a̱ ¿aa cwiqueⁿ'yo' cwenta na tsoom na nncwañom'toom yuscu'ñeeⁿ? 7Majndeiiticheⁿ nquii Ty'o̱o̱ts'om, ¿aa nchii nncwañom'm nn'aⁿ na jnda̱ tjeii'ñê cwentaaⁿ'aⁿ, na cwilcwii'na jom naxuee ndo' natsjom? Xocats'aaⁿ na mayo ticatseiñ'oom'ñê joona. 8Nndye'yo' nntsjo̱o̱, jom mantyja nntseiñ'oom'ñê. Sa̱a̱ quia na nndyo̱o̱nnda'a, ja na cwiluiindyo̱ ts'aⁿ na jnaⁿ cañoom'luee, ¿aa ndya' cwii nljei na m'aⁿ nn'aⁿ na cwila'yu'ya n'om ñ'eⁿ Ty'o̱o̱ts'om? 9Mati seineiⁿ Jesús ñ'oom tjañoom'waa nda̱a̱ nn'aⁿ na cwitjeii' cheⁿnquiee cwenta na jeeⁿ ya cwil'a, sa̱a̱ m'aⁿna na ticuee' n'omna nt'omcheⁿ nn'aⁿ. Tsoom: 10—Tyom'aaⁿ cwii ts'aⁿ fariseo ndo' mati tyom'aaⁿ cwii tsaⁿquiñom s'om cwentaa' gobiernom. We naⁿ'ñeeⁿ mañejuu xjeⁿ ty'ena wats'om t'maⁿ na nla'neiⁿna nnom Ty'o̱o̱ts'om. 11Juu fariseo teintyjeeⁿ'eⁿ, luaa waa ñ'oom na tsoom nnom Ty'o̱o̱ts'om: “'U Ta Ty'o̱o̱ts'om, mañequiaya na quianl'ua' na ticatseixmaⁿya cha'na nt'omcheⁿ nn'aⁿ, cha'na nn'aⁿ na canty'uendye, nn'aⁿ na quil'a yuu na ticaty'iomyana', nn'aⁿ na cwe' m'aⁿya ñ'eⁿ nc'iaa, mati meiiⁿ nchii cha' tsaⁿm'aaⁿ', tsaⁿquiñom s'om. 12Ja we ndii' matseicwejndo'ndyo̱ na cwii smaⁿna, ndo' cha'tso na mawantjo̱ⁿ mañequiaya diezmo.” 13Sa̱a̱ juu tsaⁿquiñom s'om, tquia tjameintyjeeⁿ'eⁿ, meiⁿ na nlu'nda̱a̱ñê tsjo̱'luee. Macanda̱ tyomeiiⁿ'eⁿ nda' tsei'jñaaⁿ na tyotseinty'iaa'ñê, tsoom: “'U Ty'o̱o̱ts'om, c'oom' na wi' ts'om' ja ts'aⁿjnaⁿ.” 14Candye'yo' nntsjo̱o̱, tsaⁿquiñoom s'om tjalcweeⁿ'eⁿ waⁿ'aⁿ na jnda̱ seit'maⁿ ts'om Ty'o̱o̱ts'om jom, nchiiti cwiicheⁿ tsaⁿ'ñeeⁿ. Ee meiⁿcwi'ñeeⁿcheⁿ ts'aⁿ na matseiwendyeñe cheⁿnquii, maxjeⁿ nntseiquioo Ty'o̱o̱ts'om juu. Ndo' ts'aⁿ na maju'cjeñe, maxjeⁿ nntseit'maaⁿ'ñeⁿ Ty'o̱o̱ts'om tsaⁿ'ñeeⁿ. 15Tquiocho nn'aⁿ yocanch'u na m'aaⁿ Jesús na nntioom l'o̱o̱ⁿ nacjoona. Ndo' quia na nty'iaa nn'aⁿ na cwila'jomndye ñ'eⁿñê na luaa', jla'tia'na nn'aⁿ na tquiocho yocanch'u'ñeeⁿ. 16Quia jo' tqueeⁿ'ñe Jesús yocanch'u ndo' tsoom nda̱a̱ nn'aⁿ: —Ca'ndye'yo' na nñequio yocanch'u na m'aaⁿya, tila'ntycwi'yo' joona ee yuu na matsa̱'ntjom Ty'o̱o̱ts'om, juuna' matseixmaⁿna' cwentaa nn'aⁿ na ntyjaandye ja cha'na quil'a yosanch'um'aⁿ. 17Mayuu'cheⁿ matsjo̱o̱ nda̱a̱'yo', meiⁿcwi'ñeeⁿcheⁿ ts'aⁿ na ticantyjaa' ts'om na nntsa̱'ntjom Ty'o̱o̱ts'om juu cha'na ntyjaa' ts'om cwii yucachjoo, tsaⁿ'ñeeⁿ xocanda̱a̱ nncjaaquiee'ñe jo' jo'. 18Cwii ts'aⁿ judío na cwiluiitquieñe tax'ee nnoom: —'U Ta na ma'mo̱o̱ⁿ' ñ'oom' Ty'o̱o̱ts'om nda̱a̱ nn'aⁿ na ya ts'aⁿndyu', ¿chiuu ya nnts'aa cha nndaya na ticantycwii na nncwa'ndo̱'a? 19T'o̱ Jesús nnom: —Matsu' na ja ya ts'aⁿndyo̱, macanda̱ nquii Ty'o̱o̱ts'om cwiluiiñê na ljo'. 20'U mantyji' ñ'oom na matsa̱'ntjoom na matsona': “Tinc'oom'ya' ñ'eⁿ cwiicheⁿ ts'aⁿ. Tintseicue' ts'aⁿ. Tinch'uee' 'naaⁿ' ts'aⁿ. Tintseineiⁿ' cantu nacjoo' ts'aⁿ. Catseit'maaⁿ'ndyu' tsotye' ñ'eⁿ tso'ndyo'.” 21Tso tsaⁿ'ñeeⁿ nnoom: —Cha'tso ñ'oommeiⁿ' matseicanda̱ xjeⁿ na cachjoondyo̱. 22Quia na jndii Jesús na luaa', tsoom nnom: —Cwii waa na cwii matsei'tjo̱o̱'. Cajnda̱a̱' cha'tso na maleichu' ndo' quiaa' nda̱a̱ ndyeñeeⁿ'. Quia jo' nnc'oom' na tyandyu' cañoom'luee. Jnda̱ jo' candyotseijomndyu' ñequiondyo̱. 23Sa̱a̱ quia na jndii tsaⁿ'ñeeⁿ na luaa', seichjoo'na' ts'oom ee jeeⁿ tyañê. 24Quia na nty'iaa' Jesús na jeeⁿ chjoo' ts'oom, tso: —Jeeⁿ ndya' jndei'na' na nñe'quiandye naⁿtya na nntsa̱'ntjom Ty'o̱o̱ts'om joona. 25Tijndei'tina' na nncwicandii'ñe quioo' camello tsue' x'ee tsei'nchquia nchiiti na nncjaaquiee' cwii tsaⁿtya ntyja na matsa̱'ntjom Ty'o̱o̱ts'om. 26Ndo' nn'aⁿ na jndye ñ'oomwaa', tyolue: —¿Quia jo' 'ñeeⁿ juu nnda̱a̱ nlui'n'maaⁿñe? 27Tso Jesús nda̱a̱na: —Yuu na xocanda̱a̱ nl'a nn'aⁿ, nquii Ty'o̱o̱ts'om nnda̱a̱ nnts'aaⁿ. 28Tso Pedro: —Canty'ia', jâ jnda̱ 'ndya̱a̱yâ cha'tso 'naaⁿyâ na cwilajomndyô̱ ñ'eⁿndyu'. 29Tso Jesús nda̱a̱na: —Mayuu'cheⁿ matsjo̱o̱ nda̱a̱'yo', meiⁿcwi'ñeeⁿcheⁿ ts'aⁿ na ma'ndii waa' oo scuu', ntyjee, tsotye, tsondyee, oo ntseinda nc'e na matseijomñe cantyja 'naaⁿ' na matsa̱'ntjom Ty'o̱o̱ts'om, 30tsaⁿ'ñeeⁿ jndyeti nmeiⁿ' nnco'ñoom tiempomeiiⁿ, ndo' xuee na cwii nndyotina' nnc'oom na ticantycwii na wanoom'm. 31Quia jo' tjei'ndyo̱ Jesús nn'aⁿ canchoo'wendye. Tsoom nda̱a̱na: —Queⁿ'yo' cwenta, je' macwitsaawaaya Jerusalén. Jo' jo' nntseicanda̱a̱'ñena' cha'tso ñ'oom' Ty'o̱o̱ts'om na jla'ljeii profetas cantyja 'naⁿya na cwiluiindyo̱ ts'aⁿ na jnaⁿ cañoom'luee. 32Ee nñe'quia nn'aⁿ cwenta ja luee nn'aⁿ gentiles, nla'jnaaⁿ'na ja, cwajndii ñ'oom na nluena cjoya ndo' njñomna ndaajnaⁿ' ja. 33Mati nntjaa'na ja, ndo' xeⁿ jnda̱ nla'cuee'na ja, sa̱a̱ xuee jnda̱ ndyee nncwando̱'xco̱. 34Sa̱a̱ naⁿ'ñeeⁿ tîcala'no̱ⁿ'na ljo' cwit'mo̱o̱ⁿ ñ'oommeiⁿ' ee tyootseicano̱o̱ⁿ Ty'o̱o̱ts'om joona' nda̱a̱na. Jo' chii tîleicala'no̱ⁿ'na. 35Luaa tuii. Quia na ty'ewindyoona tsjoom Jericó, jo' wacatyeeⁿ cwii tsaⁿnchjaaⁿ' 'ndyoo nato, macaaⁿ ljo' tjo̱o̱ñê nda̱a̱ nn'aⁿ. 36Quia na jñeeⁿ na jndyendye nn'aⁿ cawi'nom, tax'eeⁿ ljo' cwiluii. 37Jluena nnoom: —Jesús na jnaⁿ Nazaret jom luaa' mawinoom. 38Quia jo' seixuaⁿ, tsoom: —Jesús, 'u na cwiluiindyu' tsjaaⁿ 'naaⁿ' David na jndyowicantyjoo', c'oom' na wi' ts'om' ja. 39Nn'aⁿ na 'oojndyee jla'tia'na jom, jluena catseicheeⁿ, sa̱a̱ jom yacheⁿ jndeii seixuaⁿ: —'U na cwiluiindyu' tsjaaⁿ 'naaⁿ' David na jndyowicantyjoo', c'oom' na wi' ts'om' ja. 40Quia jo' tjameintyjee' Jesús, sa̱'ntjoom na quioñ'omna tsaⁿ'ñeeⁿ na m'aaⁿ. Quia tuee'cañoom tsaⁿ'ñeeⁿ, tax'eeⁿ nnom, matsoom: 41—¿Ljo' l'ue ts'om' na cats'aa ñ'eⁿndyu'? T'o̱ tsaⁿ'ñeeⁿ nnoom: —Jeeⁿ 'u Ta, l'ue ts'o̱o̱ⁿ na nleitquioya. 42T'o̱ Jesús nnom: —Cwitquio'. Nc'e na matsei'yu'ya ts'om' ñ'eⁿndyo̱, jo' na jnda̱ n'maⁿ'. 43Mañoom' teitquioom'm. Tjantyjo̱o̱ⁿ naxeⁿ' Jesús, tyotseit'maaⁿ'ñê Ty'o̱o̱ts'om. Ndo' mati nn'aⁿ na jndyendye, quia nty'iaana na luaa', tyola't'maaⁿ'ndyena Ty'o̱o̱ts'om.

will be added

X\