Lucas 11

1Tyom'aaⁿ Jesús cwii joo na matseineiiⁿ nnom Tsotyeeⁿ. Quia na jnda̱ jnda̱ seineiiⁿ, cwiindye joo nn'aⁿ na cwila'jomndye ñ'eⁿñê, tso nnoom: —Ta, ca'mo̱ⁿ' nda̱a̱yâ chiuu nlana̱a̱ⁿyâ nnom Ty'o̱o̱ts'om, cha'xjeⁿ na t'mo̱ⁿ Juan nda̱a̱ nn'aⁿ na tyola'jomndye ñ'eⁿñê. 2Tsoom nda̱a̱na: —Quia na cwilaneiⁿ'yo' nnom Ty'o̱o̱ts'om, candu'yo': Tsotya̱a̱yâ na m'aaⁿ' cañoom'luee ñequii'cheⁿ catseit'maaⁿ'ñena' xue'. Candyo cantyja na matsa̱'ntjom' naquii' n'o̱o̱ⁿyâ. Caluii cantyja na 'u l'ue ts'om' nnom tsjoomnancue cha'xjeⁿ na cwiluii cañoom'luee. 3Quiaa' na nlcwaa'â ticwii xuee. 4Ndo' catseit'maⁿ ts'om' jâ jnaaⁿyâ, ee mati cwila't'maⁿ n'o̱o̱ⁿyâ cha'tso nn'aⁿ na cwila'tjo̱o̱ndye nda̱a̱yâ. Cateijndei' na tincjaachuuñena' jâ na nl'aayâ yuu na ticatsa̱'ntjomna'. Ndo' catseicandyaandyu' jâ l'o̱ juu natia. 5Mati tsoom nda̱a̱na: —Cal'uuya xeⁿ cwiindyo' 'o ya ñ'oom ñequio cwii ts'aⁿ, ndo' xcwe tsjom nncja' na m'aaⁿ tsaⁿ'ñeeⁿ na nntsu' nnoom: “Aa ndi', cateijndei'ya' ndyee taⁿ' tyoo' ja. 6Ee je'ndyo tyjee' cwii ts'aⁿ na ya ñ'oom ja ñ'eⁿñe w'aya na cwe' mawinomyaaⁿ, tquia quia wjaatyeeⁿcheⁿ. Ndo' ja tjaa'naⁿ ljo' ya na nlcwaaⁿ'aⁿ.” 7Quia jo' naquii' w'aacheⁿ nnc'o̱o̱ⁿ, nntsoom: “Jeeⁿ sa 'u, tañe'quicantyja, ee jnda̱ seicu'tya̱ⁿ 'ndyoots'a, ndo' jnda̱ mawaya cjoo' jnduu. Mati ntseindaaya jnda̱ jndana. Jo' chii xonda̱a̱ na nnteijndei na maco̱ⁿ'.” 8Candye'yo' nntsjo̱o̱, meiiⁿ na ts'aⁿ na ya ñ'oom 'u ñ'eⁿñe, xoquintyjaaⁿ na nnteijneiⁿ 'u. Cwe' ee na jndeii' 'ndyo', jo' na nnquicantyjatoom na nñequiaaⁿ cha'tso na macaⁿna' 'u. 9Jo' chii ja matsjo̱o̱ nda̱a̱'yo': Cataⁿ'yo' nnom Ty'o̱o̱ts'om quia jo' nñequiaaⁿ. Cjoo'ya n'om'yo' na cal'uee'ndyo' chiuu ya jo nnoom, quia jo' nliu'yo'. Macwe' na ca'maⁿ'yo' ndo' nnaaⁿ cha'cwijom cwii 'ndyoots'a jo nda̱a̱'yo'. 10Ee meiⁿcwi'ñeeⁿcheⁿ ts'aⁿ na waa na macaⁿ nnom Ty'o̱o̱ts'om, maxjeⁿ nlo'ñom. Ndo' ts'aⁿ na mal'ue, maxjeⁿ nljeii. Ndo' ts'aⁿ na ma'maⁿ, maxjeⁿ nnaaⁿ jo nnom. 11Aa ndya' m'aaⁿ cwiindyo' 'o xeⁿ nlcaⁿ jnda' tyoo' njom', ¿aa cwe' tsjo̱' nñequiaa'yu' nnoom? Oo xeⁿ nlcaaⁿ catscaa njom', ¿aa catsuu nñequiaa' nnoom? 12Oo xeⁿ nlcaaⁿ tsei'caxti njom', ¿aa nñequiaa'yu' catsjo̱ nnoom? 13Jo' chii xeⁿ na 'o na tia nn'aⁿndyo' nquiu'yo' na nñequia'yo' 'naⁿ na ya nda̱a̱ nda'yo', majndeiiticheⁿ nquii Tsotye'yo' na m'aaⁿ cañoom'luee nñequiaaⁿ Espíritu Santo naquii' n'om nn'aⁿ na cwitaⁿ juu nnoom. 14Tjei' Jesús tsaⁿjndii naquii' ts'om ts'aⁿ na tileicatseineiⁿ. Jnda̱ na jlui' tsaⁿjndii, quia jo' tco'yana' tsaⁿ'ñeeⁿ, ya seineiiⁿ. Ndo' jeeⁿ tjawee' n'om nn'aⁿ. 15Sa̱a̱ cwantindye joona tyoluena: —Tsaⁿm'aaⁿ' macwjeeⁿ'eⁿ naⁿjndii naquii' n'om nn'aⁿ cwe' nc'e na matseixmaaⁿ najndeii tsaⁿjndiitquiee Beelzebú. 16Ndo' nt'omcheⁿ cwe' na ñe'cal'a xjeⁿ jom, tyotaⁿ cwii 'naaⁿ cha ca'mo̱ⁿna' na cañoom'luee cwinaⁿ najneiⁿ. 17Sa̱a̱ jom na mantyjeeⁿ ñ'omtiuu 'naaⁿna, tsoom nda̱a̱na: —Xeⁿ cwito̱ⁿ'ndye nn'aⁿ ndyuaa yuu na matsa̱'ntjom cwii gobiernom, maxjeⁿ nntyuii' cantyja na matsa̱'ntjoom. Ndo' nn'aⁿ na m'aⁿ cwii w'aa, xeⁿ titjoom' cwi'maⁿ, maxjeⁿ cwila'tyuii'ndye cheⁿnquieena. 18Mati Satanás xeⁿ mato̱ⁿ'ñe cheⁿnqueⁿ, quia jo' ¿chiuu nnts'aayuuna' na nljotyeⁿ cantyja na matsa̱'ntjoom? Luaa' matsjo̱o̱ya ee 'o cwindu'yo' na ja macwjii'a naⁿjndii naquii' n'om nn'aⁿ nc'e Beelzebú. 19Ee xeⁿ mayuu' na ja macwjii'a naⁿjndii ñequio najndeii na matseixmaⁿ Beelzebú, quia jo' mati nc'iaa'yo', ñequio najndeii jom cwitjeii'na naⁿjndii naquii' n'om nn'aⁿ. Sa̱a̱ nc'e na tiyuu' na ljo', jo' chii cantyja na cwil'a joona macwji'yuu'ñena' na tixcwe cwitjei'yo' cwenta. 20Ee xeⁿ ja ñequio najndeii na matseixmaⁿ Ty'o̱o̱ts'om macwjii'a naⁿjndii naquii' n'om nn'aⁿ, ma'mo̱ⁿna' na juu na matsa̱'ntjom Ty'o̱o̱ts'om nn'aⁿ, jnda̱ tyjee'cañoomna' 'o. 21’Manquiu'yo' ts'aⁿ na maleichuu l'o̱ ts'iaaⁿ cwentaa' tia', waa najneiⁿ. Jo' na ya mach'eeⁿ cwenta waⁿ'aⁿ. Ndo' tjaa'naⁿ ljo' nntjoom 'naaⁿ'aⁿ na niom. 22Sa̱a̱ quia nncwjee'cañoom cwiicheⁿ ts'aⁿ na jndeiiti, nchiiti jom, quia jo' taxocanaⁿjneiⁿ ñ'eⁿ tsaⁿ'ñeeⁿ. Cha'tso l'o̱ ts'iaaⁿ na quit'maⁿ ts'oom, nncwji' tsaⁿ'ñeeⁿ ndo' nleil'uee'ñe 'naaⁿ'aⁿ na niom. 23’'Ñeeⁿ juu na tic'oomñe cantyja 'naⁿya, maxjeⁿ m'aaⁿ nacjoya. Ndo' 'ñeeⁿ juu na ticatseitjom nn'aⁿ ñ'eⁿndyo̱, matseilcweeⁿ'eⁿ nn'aⁿ cha ticala'yu'na ñ'eⁿndyo̱. 24’Cwii tsaⁿjndii quia na jnda̱ tjei'na' jom naquii' ts'om cwii ts'aⁿ, cwe' manomtoom yuu na tjaa'naⁿ ndaa, mal'ueeⁿ yuu nncwajñeeⁿ. Ndo' na tîcaljeiiⁿ jo', seitioom: “Jo̱nlcwa̱'nnda'a naquii' ts'om ts'aⁿ yuu na jluii'a.” 25Quia na nncueⁿ'eⁿ jo' jo', nljeiiⁿ na jnda̱ taa ndo' jnda̱ teijndaa'ya. 26Jo' chii nncjaacachoom nt'omcheⁿ ntquiee' naⁿjndii na wi'ndyeti, nchiiti jom. Nnc'ooquie'na naquii' ts'om tsaⁿ'ñeeⁿ ndo' jo' jo' nnc'omna. Tsaⁿ'ñeeⁿ manioomti ntjoom na jnda̱ we. 27Xjeⁿ na matseineiⁿ Jesús ñ'oommeiⁿ', cwii yuscu quii'ntaaⁿ nn'aⁿ na jndyendye, seiwe jndyee' ndo' tso nnoom: —Matio'naaⁿñe Ty'o̱o̱ts'om ts'aⁿ na seincuii 'u ndo' seicatei' 'u. 28Sa̱a̱ jom t'o̱o̱ⁿ nnom, tsoom: —Mat'maⁿti matio'naaⁿñê nn'aⁿ na cwindye ñ'oom'm ndo' cwila'canda̱ joona'. 29Jnda̱ tjawijndyeti nn'aⁿ na cañoom' Jesús, to̱o̱ⁿ'o̱ⁿ na matsoom nda̱a̱na: —Nn'aⁿ na m'aⁿ je', jeeⁿ ndya' tia nn'aⁿndye. Cwitaⁿna na caluii cwii 'naaⁿ na nnty'iaana na xocanda̱a̱ nnts'aa na cwe' ts'aⁿ, sa̱a̱ taxocaluii na cwitaⁿna, macanda̱ nluii 'naaⁿ cha'xjeⁿ na tjom Jonás. 30Ee juu Jonás tyotseixmaaⁿ 'naaⁿ jo nda̱a̱ nn'aⁿ tsjoom Nínive nc'e na jlui'n'maaⁿñê ts'om tsiaa' catscaa t'maaⁿ xuee jnda̱ ndyee na tioyo' jom. Maluaa' ja na cwiluiindyo̱ ts'aⁿ na jnaⁿ cañoom'luee nntseixmaⁿya 'naaⁿ jo nda̱a̱ nn'aⁿ na m'aⁿ je'. 31Xuee quia na nncu'xeⁿ Ty'o̱o̱ts'om nn'aⁿ, nncwando'nnda' yuscu na tyotsa̱'ntjom nn'aⁿ ndyuaa jo ndo' na macalui' caxjuu ts'oom'naaⁿ. Ndo' nñequiaaⁿ jnaaⁿ nn'aⁿ na m'aaⁿ je', ee jeeⁿ ndya' tquia jnaaⁿ na ñe'cañeeⁿ ñ'oomjndo̱'ts'om na tyotseineiⁿ Salomón. Ndo' ljoo m'aaⁿya je' na t'maⁿti cwiluiindyo̱, nchiiti Salomón, sa̱a̱ tiñecandye'yo' ñ'oom na mañequia. 32Xuee na nncu'xeⁿ Ty'o̱o̱ts'om nn'aⁿ na jnda̱ tja̱, nnta'ndo'nnda' nn'aⁿ tsjoom Nínive, mandiñ'eeⁿ nn'aⁿ na m'aaⁿ je' na quia nnc'oowjee. Ndo' nnt'uiityeⁿna' joona nc'e na yati l'a nn'aⁿ Nínive. Ee joo naⁿ'ñeeⁿ lcwe' n'omna quia na tyoñequiaa Jonás ñ'oom' Ty'o̱o̱ts'om nda̱a̱na. Ndo' 'o je', ja jnda̱ tyja̱ quii'ntaaⁿ'yo' na cwiluiit'maⁿndyo̱tya̱, nchiiti Jonás, sa̱a̱ nchaa' l'uu ñe'calcwe' n'om'yo'. 33Tso Jesús: —Tjaa'naⁿ ts'aⁿ na ntseicw'aa lámpara, jnda̱ jo' nncwjaa'ñeyom juuna' yuu na wanty'iuu' oo nacjee' castom. Maxjeⁿ nntseintyjaaⁿ juuna' yuu na ndye cha xuee nnc'ooquie' nn'aⁿ. 34La'xmaⁿ n'omnnom ts'aⁿ cha'cwijom lámpara cwentaa' cha'waañe ts'aⁿ. Xeⁿ na ya n'omnjom' quia jo' cha'waandyu'ñ'eⁿ' m'aaⁿ' na xueeñe. Sa̱a̱ xeⁿ tis'a n'omnjom' quia jo' cha'waandyu'ñ'eⁿ' m'aaⁿ' na jaaⁿñe. 35Quia jo' catsa' cwenta na juu na cwiluiiñe naxuee cantyja 'naⁿ', tintseicwaqueⁿna' jo' najaaⁿñe. 36Xeⁿ cha'tso cantyja 'naⁿ' matsei'xmaⁿ' naxuee ndo' tjaa yuu candii' najaaⁿ, quia jo' nntseijomna' cantyja 'naⁿ' cha'cwijom lámpara na matseixueeñe chom nda̱a̱ nn'aⁿ. 37Quia na jnda̱ seineiⁿ Jesús, cwii ts'aⁿ fariseo tso nnoom na cjaⁿ, nlcwaaⁿ'aⁿ waa'. Jnda̱ tueⁿ'eⁿ, tjaqueⁿ'eⁿ quii' w'aa ndo' ty'ewindyuaandyena nacañoom' meiⁿsa. 38Juu fariseo'ñeeⁿ, jeeⁿ ticjaawee' ts'om quia nty'iaa' na ticandyuu' Jesús cwii tjo̱o̱cheⁿ na nlcwaaⁿ'aⁿ cha'xjeⁿ costumbre cwil'a joona. 39Tso Ta Jesús nnom: —'O nn'aⁿ fariseos, jeeⁿ cwilalju'yo' nacjoo watso ñ'eⁿ nquio sa̱a̱ n'omna' ndicwaⁿ cwajndii. Maluaa' matseijomna' naquii' n'om'yo' ee too'cheⁿ m'aaⁿ ñomtiuu chiuu nnda̱a̱ nnty'uee'yo' 'naⁿ ñequio nt'omcheⁿ natia na cwil'a'yo'. 40Ntjeiⁿndyo' 'o. Manquiu'yo' na Ty'o̱o̱ts'om seijndaa'ñê nacjoo' ts'aⁿ, mati seijndaa'ñê naquii' ts'om ts'aⁿ. 41Cal'a'yo' naya ndyeñeeⁿ', quia jo' m'mo̱ⁿna' na lju' cwiluiindyo' naquii' n'om'yo'. 42’Nnt'uiiwi'na' 'o nn'aⁿ fariseos, meiiⁿ jeeⁿ cwilacanda̱'yo' na cwiñe'quia'yo' diezmo cwentaa' Ty'o̱o̱ts'om hasta meiiⁿ cwe' ñequio tscojñom ts'oomjndya ñequio tsco na ja, ndo' cha'tso nt'omcheⁿ nnom tsco na cwicwa'yo', sa̱a̱ tquia cwi'ndye'yo' na nl'a'yo' yuu na maty'iomyana' ñequio nc'iaa'yo'. Mati meiⁿchjoo ticajnda nquiu'yo' Ty'o̱o̱ts'om. Nmeiⁿ' macaⁿna' na calacanda̱'yo' ndo' titsaawi'ntyje'yo' na cwiñe'quia'yo' diezmo cwentaa' Ty'o̱o̱ts'om. 43’Nnt'uiiwi'na' 'o nn'aⁿ fariseos, ee 'o cwilayuunda̱a̱'yo' ntsula̱ na cañoomticheⁿ naquii' lan'om. Ndo' jeeⁿ l'ue n'om'yo' na cala't'maaⁿ'ndye nn'aⁿ 'o quia cwiwincwindyo' nataa cha canty'iaa nn'aⁿ. 44’Nnt'uiiwi'na' 'o nn'aⁿ na cwit'mo̱ⁿ'yo' ljeii na tqueⁿ Moisés ñequio 'o nn'aⁿ fariseos na cwil'a'ya'yo' na jeeⁿ yann'aⁿndyo' cwe' cha queⁿ nn'aⁿ cwenta. Cantyja 'naⁿ' 'o jndye nn'aⁿ wjaachuuñena' na meiⁿchjoo ticaliuna na tis'a cwil'ana. Matseijomna' 'o cha'na ndei'luaa na jnda̱ tsu. Meiiⁿ cwico̱' nn'aⁿ nacjoona' sa̱a̱ ticaliuna na ndei'luaa jo'.” 45T'o̱ cwiindye naⁿ'ñeeⁿ na ma'mo̱ⁿ ljeii na tqueⁿ Moisés. Tso nnoom: —Jeeⁿ 'u Ta, ñ'oom na matsu' luaa', mati matseijnaaⁿ'na' jâ. 46Quia jo' tsoom nnom tsaⁿ'ñeeⁿ: —Mati 'o nn'aⁿ na cwit'mo̱o̱ⁿ ljeii na tqueⁿ Moisés nnt'uiiwi'na' 'o na cwila'jnda̱'yo' na cala'canda̱ nn'aⁿ ñ'oom na jeeⁿ jndei'na' cha'cwijom na cwity'iom'yo' xuu nn'aⁿ sa̱a̱ ncjo'yo', nchaa' l'uu nntii' luee'yo'. 47’Nnt'uiiwi'na' 'o ee cwil'a'xco'yo' ndei'luaa 'naaⁿ profetas na tyola'cwje welo'yo' tandyo xuee, cha canty'iaa nn'aⁿ na jeeⁿ cwila't'maaⁿ'ndyo' naⁿ'ñeeⁿ. Ndo' manquieeti welo'yo' na ñet'om quia ljo' jla'cwjeena naⁿ'ñeeⁿ. 48Ndo' na luaa' cwil'a'yo', cwilui'yuu' na cwilajomndyo' na luaa' l'ana. Ee joona jla'cwjeena naⁿ'ñeeⁿ ndo' 'o je' cwil'a'xco'yo' ndei'luaa naⁿ'ñeeⁿ. 49’Jo' chii cantyja na jndo̱' ts'om Ty'o̱o̱ts'om, jo' na tsoom: “Quii'ntaaⁿ nn'aⁿ njño̱o̱ⁿya profetas ñequio apóstoles. Nt'omndye joona nla'cwjee nn'aⁿ, ndo' nt'omcheⁿ nlei'ntyjo̱na.” 50Jo' chii, nn'aⁿ na m'aⁿ je' nnts'aa Ty'o̱o̱ts'om na chojnaⁿna nioom cha'tso profetas na tyola'cwjee nn'aⁿ xjeⁿ na jnaⁿcheⁿ tsjoomnancue. 51Wjaac'oomna' na tioo nioom' Abel na seiquioo Caín hasta na macanda̱ na tioo nioom' Zacarías, ts'aⁿ na jla'cuee' nn'aⁿ quii'ntaaⁿ' tio t'maⁿ ñequio ta wats'om. Nndye'yo' nntsjo̱o̱, maxjeⁿ nntioomndye nn'aⁿ na m'aⁿ je'. 52’Nnt'uiiwi'na' 'o nn'aⁿ na cwit'mo̱ⁿ'yo' ljeii na tqueⁿ Moisés. Ee jnda̱ jla'cu'yo' ñ'oom na mañequiaana' na wjaatseijndo̱'na' n'om nn'aⁿ. Mancjo'ti'yo' ticjoo' n'om'yo' na nla'no̱ⁿ'yo' ñ'oom'ñeeⁿ meiⁿ tiñe'quia'yo' na nnc'ooliu nn'aⁿna queeⁿ n'om na ñecala'no̱ⁿ'na juuna'. 53Jnda̱ na seineiⁿ Jesús ñ'oommeiⁿ' nda̱a̱na, quia jo' nn'aⁿ na cwit'mo̱o̱ⁿ ljeii na tqueⁿ Moisés ñequio nn'aⁿ fariseos, to̱'na na t'maⁿ tyola'ncjoo'ndyena ñ'eⁿñê. To̱'na na tyola'lioo'na jom na jndye ñ'oom tyota'x'eena nnoom. 54Tyoqueⁿna cwenta xeⁿ nntsoom cwii ñ'oom na nñequiaana' na nt'uiina' jom.

will be added

X\