Juan 7

1Jnda̱ tuii na nmeiiⁿ' tyoma'no̱o̱ⁿyâ ts'o̱ndaa Galilea ñ'eⁿ Jesús. Ee jnaaⁿ' na tyoqueⁿndye nn'aⁿ na cwiluiitquiendye nda̱a̱ nn'aⁿ judíos na ñe'cala'cuee'na jom, jo' chii tiñe'cjaⁿ Judea. 2Ndo' jaawindyoo' na nncuee' ncuee na cwila't'maaⁿ'ndye nn'aⁿ judíos quia na quil'ana xeⁿnquie' ncwaⁿ' na cwijaañjoom' n'omna chiuu ñet'om weloo weloona ndyu'ñeeⁿcheⁿ. 3Ndo' na manncuee' xuee'ñeeⁿ tyolue ntyjeeⁿ nnoom: —Cwa sa, calui' ñjaaⁿñe. Cja' Judea cha nn'aⁿ na m'aⁿ la'ñeⁿ na cwila'jomndye ñ'oom na mañequiaa' mati nnty'iaana ts'iaaⁿ na mache'. 4Ee ts'aⁿ na matseicantyjaa' ts'om na cala'yu' nn'aⁿ ñ'eⁿñe, ticatsona' na nljoo'ñe jo jnda̱a̱. Quiaandyu' na caliu cha'tso nn'aⁿ ts'iaaⁿ na mache'. 5Nmeiiⁿ' jluena nnoom ee meiⁿ joona tîcala'yu'na ñ'eⁿñê. 6Quia jo' matsoom nda̱a̱na: —Tyoowe'ntyjo̱ xjeⁿ na ca'mo̱o̱ⁿya nda̱a̱ nn'aⁿ na cwiluiitquiendye na cwiluiindyo̱ nquii na macwji'n'maaⁿñe nn'aⁿ. Sa̱a̱ 'o meiⁿquia xjeⁿ na ñe'conom'yo', tjaa'naⁿ na teincuu'. 7Joo nn'aⁿ tsjoomnancue tijndoona 'o. Sa̱a̱ cantyja 'naⁿ ja luaañe, ñequii'cheⁿ m'aⁿna na jndoona ja, cwe' nc'e na macwji'yuu'ndyo̱ cantyja 'naaⁿ natia na cwil'ana. 8Tsa'yo' na ñencjo'yo' xueewaa', ja tjo̱o̱cheⁿ na nncjo̱ xuee. Ee tjo̱o̱cheⁿ na nntseica'mo̱ⁿndyo̱ na cwiluiindyo̱ nquii na macwji'n'maaⁿñe nn'aⁿ. 9Ndo' jnda̱ na tsoom na luaa' nda̱a̱na, ljoo'ñetyeeⁿ we ndyee xuee Galilea. 10Ndo' jnda̱ na ty'e ntyjeeⁿ na tuee' xuee, quia jo' mati jom tjantyjo̱o̱ⁿ, sa̱a̱ tîtseica'mo̱ⁿñê nda̱a̱ nn'aⁿ. Tjaaⁿ cha'cwijom ts'aⁿ na tical'ue ts'om na caliu nn'aⁿ na m'aaⁿ. 11Ndo' nn'aⁿ judíos na ticuee' n'omna jom jeeⁿ tyol'ueena jom quii'ntaaⁿ nn'aⁿ na tquio ncuee. Tyota'x'eena, tyoluena: —¿Yuu m'aaⁿ tsaⁿ'ñeeⁿ? 12Ndo' t'maⁿ waa na ticatjoom' na jla'neiⁿ nn'aⁿ na jndyendye cantyja 'naaⁿ'aⁿ. Ee cwantindye joona tyolue: “Ya ts'aⁿñe tsaⁿm'aaⁿ'.” Sa̱a̱ nt'omcheⁿ tyolue: “Tiyuu', ee manquiu'nn'aaⁿ nn'aⁿ.” 13Sa̱a̱ cwe' nc'e na nquiaana nn'aⁿ judíos na cwiluiitquiendye nda̱a̱na, jo' na tîcala'neiⁿndyeyuna cantyja 'naaⁿ'aⁿ. 14Jnda̱ na tuee' xcwe ncuee, tjaqueⁿ'eⁿ naquii' wats'om t'maⁿ ndo' jo' jo' tyo'mo̱o̱ⁿ nda̱a̱ nn'aⁿ. 15Sa̱a̱ tileicala'no̱ⁿ' nn'aⁿ judíos na cwiluiitquiendye. Tyoluena: —Nchaa' l'uu na tja tsaⁿm'aaⁿ' scwela. Quia jo' ¿chiuu na jeeⁿ ya matseitjoom'm ñ'oom? 16T'o̱ Jesús nda̱a̱na, matsoom: —Nchii nnco̱ matseijndaa'ndyo̱ ñ'oom na ma'mo̱o̱ⁿya. Nqueⁿ na jñoom ja seijndaa'ñê chiuu catsjo̱o̱ya. 17Meiⁿcwi'ñeeⁿcheⁿ ts'aⁿ na ñe'cats'aa cantyja na matsa̱'ntjom Ty'o̱o̱ts'om, juu nntsei'no̱ⁿ' aa Ty'o̱o̱ts'om seijndaa'ñe ñ'oom na ma'mo̱o̱ⁿya, oo aa cwe' ñ'oom na seitiuu nnco̱ na mañequiaya. 18Meiⁿcwi'ñeeⁿcheⁿ ts'aⁿ na macwji' ñ'oom cantyja 'naaⁿ' nquii, matseijndeii tsaⁿ'ñeeⁿ na caluiit'maⁿñê nda̱a̱ nc'iaaⁿ'aⁿ. Sa̱a̱ ts'aⁿ na matseijndeii na catseit'maaⁿ'ñena' nquii na jñom jom, tsaⁿ'ñeeⁿ cwiluiiñê na mayom'm. Tiquinquiu'nn'aaⁿ. 19’Moisés seiljeiⁿ ñ'oom na tqueⁿ Ty'o̱o̱ts'om nda̱a̱'yo' na matsa̱'ntjomna'. Sa̱a̱ meiiⁿ na ljo', meiⁿcwiindyo' 'o tyoola'canda̱a̱'ndyo' juuna'. Ee xeⁿ cwila'canda̱'yo' juuna' xoqueⁿndyo' na nlacue'yo' ja. 20Nn'aⁿ na jndyendye t'o̱o̱na nnoom, jluena: —'U tsaⁿjndii matseixmaⁿ'. ¿'Ñeeⁿ ts'aⁿ maqueⁿñe na nntseicuee' 'u? 21T'o̱ Jesús nda̱a̱na, matsoom: —Xuee na cwita'jndya̱a̱ya sein'maⁿya ts'aⁿ na leicjacaa, ndo' s'aana' na tjoom' ticala'no̱ⁿ'yo'. 22Sa̱a̱ cala'no̱ⁿ'yo' ñ'oom na nntsjo̱o̱. Tso Moisés na cal'a'yo' costumbre yonom nda'yo' na 'ndaandye. Ndo' cwila'canda̱a̱'ndyo' ñ'oom'ñeeⁿ meiiⁿ xuee na cwita'jndya̱a̱ya. Sa̱a̱ nchii jom seicato̱o̱ⁿ'o̱ⁿ costumbre'ñeeⁿ. Nquiee weloo welooya jla'cato̱o̱'na juuna'. 23Nquiu'yo' na mañequiaa ljeii na tqueeⁿ na wanaaⁿ na cwil'a'yo' costumbre'ñeeⁿ meiⁿ xuee na cwita'jndya̱a̱ya. Ndo' na luaa' waa, chiuu na cwila'wjee'yo' ja nc'e na juu xuee na cwita'jndya̱a̱ya sein'maⁿya cwii ts'aⁿ na wii'. 24Jo' chii tintjei'yo' cwenta na cwe' tomti cantyja na cwiwitquioo'. Catjei'yo' cwenta cantyja na maty'iomyana'. 25Quia jo' nt'om nn'aⁿ Jerusalén tyota'x'eena nda̱a̱ nc'iaana: —¿Aa nchii tsaⁿs'am'aaⁿ' ts'aⁿ na cwil'uee naⁿmaⁿn'iaaⁿ na nla'cuee'na? 26Sa̱a̱ canty'ia'yo' ñequio na jndoo' jndye nn'aⁿ matseineiiⁿ, meiⁿ tjaa ljo' coluena nnoom. ¿Aa nnts'aacheⁿna' na cwila'tiuu naⁿmaⁿn'iaaⁿ cwentaaya na tsaⁿm'aaⁿ' mayuu'cheⁿ cwiluiiñê Cristo? 27Sa̱a̱ nqueⁿ quia nncwjeeⁿ'eⁿ tjaa 'ñeeⁿ juu nntsei'no̱ⁿ' yuu jnaⁿyom. Sa̱a̱ tsaⁿm'aaⁿ' manquiuuyaaya yuu jnaaⁿ. 28Jnda̱ jndii Jesús na jluena ñ'oomwaa', seiweeⁿ jñeeⁿ'eⁿ. Matsoom: —Mach'eena' na cwita'jnaⁿ'yo' ja ndo' manquiu'ya'yo' yuu ts'aⁿ ja. Sa̱a̱ nchii na jndyo̱o̱ cantyja 'naⁿ nnco̱. Nqueⁿ na jñoom ja quii'ntaaⁿ'yo' cwiluiiñê na mayom'm, sa̱a̱ jom ticata'naⁿ'yo'. 29Sa̱a̱ ja mawajnaⁿ'a jom, ee jnaaⁿya jo nnoom, ndo' manquiityeeⁿ jñoom ja quii'ntaaⁿ'yo'. 30Cwe' nc'e na tsoom ñ'oomwaa', tyoqueⁿndye naⁿmaⁿn'iaaⁿ na nnt'uena jom. Sa̱a̱ nc'e na tyoowe'ntyjo̱ na ntyjii Ty'o̱o̱ts'om na nncwinoom nawi' t'maⁿ, jo' chii meiⁿcwiindyena tîcat'uii jom. 31Ndo' jndyendye nn'aⁿ na tyom'aⁿna jo' jo', jla'yu'na ñ'eⁿñê. Ndo' tyoluena nda̱a̱ nc'iaana: —Quia nncwjee' nquii Cristo, ¿aa nnts'aacheⁿna' jndyeti ts'iaaⁿ nnts'aaⁿ na tixocanda̱a̱ na nluii na cwe' ts'aⁿ nnts'aa nchiiti na mach'ee tsaⁿm'aaⁿ'? 32Nn'aⁿ tmaaⁿ' fariseos tyondyena na nmeiiⁿ' ñ'oom tyola'neiⁿ nn'aⁿ na jndyendye cantyja 'naaⁿ' Jesús. Jo' chii jla'jomndyena ñequio ntyee na cwiluiitquiendye nda̱a̱ nc'iaana nn'aⁿ judíos. Jñoomna nn'aⁿ na cwil'a cwenta wats'om na c'oocat'ue naⁿ'ñeeⁿ jom. 33Matso Jesús nda̱a̱ nn'aⁿ na jndyendye: —Chjootindyo cwii m'aaⁿtya̱ ñ'eⁿndyo'. Ndo' nda̱nquia nncjo̱lcwa̱'nnda'a na m'aaⁿ nqueⁿ na jñoom ja na m'aⁿ'yo'. 34Quia ljo'cheⁿ nl'ue'yo' ja sa̱a̱ taxocaliu'yo' ja. Ndo' yuu na nnc'o̱o̱ⁿya, 'o xocanda̱a̱ nntsquie'cañom'yo'. 35Quia jo' nt'om nn'aaⁿya nn'aⁿ judíos tyoluena nda̱a̱ nc'iaana: —¿Yuu nncjaayuu tsaⁿm'aaⁿ' na xocanda̱a̱ nliuuya jom? ¿Aa nnc'oomñê quii'ntaaⁿ nc'iaaya nn'aⁿ judíos na jnda̱ t'oom'ndye quii'ntaaⁿ nn'aⁿ griegos, cha nnda̱a̱ m'mo̱o̱ⁿ nda̱a̱na? 36¿Ljo' ñe'catso ñ'oom na matseineiiⁿ luaa' na nl'ua̱a̱ya jom sa̱a̱ xocaliuuya jom? Ndo' na matsoom yuu na wjaⁿ jaa xocanda̱a̱ nntsquia̱caño̱o̱ⁿya jom. 37Xuee na cwintycwii ncuee cwil'ana na t'maⁿti xuee juuna' na cwila't'maaⁿ'ndyena. Juu xuee'ñeeⁿ tjameintyjee' Jesús, seiweeⁿ jñeeⁿ'eⁿ. Tsoom: —'Ñeeⁿ juu na matseiqueeⁿna' ts'om na ñec'oomñe nacje 'naaⁿ' Ty'o̱o̱ts'om, candyontyjo̱ naxa̱ⁿ'a, ndo' catseiyu' ñ'eⁿndyo̱. 38Nnts'aana' ñ'eⁿ tsaⁿ'ñeeⁿ cha'xjeⁿ matso ñ'oom' Ty'o̱o̱ts'om na jnda̱ teiljeii. Juu ts'aⁿ na matseiyu' ñ'eⁿndyo̱, nnaaⁿ' quii' ts'oom cha'cwijom candaa na cwiñe'quia na ticantycwii na wando' ts'aⁿ. 39Luaa' matsoom na ma'mo̱o̱ⁿ cantyja 'naaⁿ' Espíritu Santo na juu nnto'ñoom nn'aⁿ na cwila'yu' ñ'eⁿñê. Ee xjeⁿ'ñeeⁿ tjo̱o̱cheⁿ na nñequiaa Ty'o̱o̱ts'om juu naquii' n'om nn'aⁿ, ee tyoowe'ntyjo̱ xjeⁿ na nntseit'maaⁿ'ñê Jesús. 40Ndo' quii'ntaaⁿ nn'aⁿ na jndyendye quia tyondyena ñ'oommeiⁿ', tyoluena: —Mayuu'cheⁿ tsaⁿs'am'aaⁿ' cwiluiiñê nquii ts'aⁿ na waa ñ'oom na nncwje'cañoom tsjoomnancue na nñequiaa ñ'oom' Ty'o̱o̱ts'om nda̱a̱ya. 41Ndo' jlue nt'omcheⁿ: —Tsaⁿm'aaⁿ' cwiluiiñê Cristo. Ndo' nt'om jlue: —Chiuu sa 'o, juu Cristo ticatsona' na nnaaⁿ Galilea. 42Ee ñ'oom' Ty'o̱o̱ts'om na teiljeii matsona' na juu Cristo cwiluiiñê tsjaaⁿ David na jndyowicantyjoo'. Ndo' mati jom ts'aⁿ tsjoom chjoo Belén yuu na jnaⁿ David. 43Ñ'oomwaa' to̱ⁿ'na' nn'aⁿ cantyja 'naaⁿ' Jesús. 44Ee cwantindye joona ñe'cat'uena jom, sa̱a̱ meiⁿcwii ts'aⁿ tîcat'uii jom. 45Quia jo' nquiee nn'aⁿ na cwil'a cwenta wats'om ty'elcwee'na na m'aⁿ ntyee na cwiluiitquiendye ñequio nn'aⁿ tmaaⁿ' fariseos. Tax'ee naⁿ'ñeeⁿ nda̱a̱ nn'a na cwil'a cwenta wats'om: —¿Chiuu na tînquio'ñ'om'yo' jom? 46T'o̱o̱ naⁿ'ñeeⁿ na cwil'a cwenta wats'om, jluena: —Meiⁿjom ndii' tyoondya̱a̱yâ na nntseineiⁿ cwii ts'aⁿ cha'na na matseineiⁿ tsaⁿm'aaⁿ'. 47Quia jo' fariseos'ñeeⁿ t'o̱o̱na nda̱a̱ naⁿ'ñeeⁿ, jluena: —¿Aa cha' mati 'o manquiu'nn'aⁿna'? 48Tjaa'naⁿ cwii ts'aⁿ na matseixmaⁿ n'iaaⁿ oo cwii fariseo na matseiyu' ñ'eⁿñê. 49Sa̱a̱ naⁿm'aⁿ' na cje cwil'a, ticala'no̱ⁿ'na ljeii na matsa̱'ntjom Ty'o̱o̱ts'om. Joona la'xmaⁿna na catsuundyena. 50T'o̱ Nicodemo, tsaⁿ na tyje'cañoom na m'aaⁿ Jesús cwii teijaaⁿ. Jom macañ'eeⁿ ñ'eⁿ naⁿmaⁿn'iaaⁿ'ñeeⁿ. 51Tsoom: —Ñ'oom na matsa̱'ntjom Ty'o̱o̱ts'om na teiljeiina' na cwileiñ'o̱o̱ⁿya, manquiuuya na matsona' na ticaty'iomyana' na nntu'xa̱a̱ⁿya cwii ts'aⁿ cwii tjo̱o̱cheⁿ na nndya̱a̱ya jnaaⁿ', ndo' na nliuuya ljo' s'aa. 52T'o̱o̱ naⁿ'ñeeⁿ nnoom, jluena: —¿Aa maxjeⁿ mati 'u ts'aⁿ na jnaⁿ' Galilea? Tcuu tcuu catsei'naⁿ' ñ'oom' Ty'o̱o̱ts'om na teiljeii, quia jo' nljei' tjaa'naⁿ cwii profeta na nnaⁿ Galilea. 53Ndo' cwii ndo' cwiindyena ty'ena w'aana.

will be added

X\