Juan 5

1Jnda̱ na tuii nmeiⁿ', saayâ Jerusalén ñ'eⁿ Jesús ee tyowaa xuee na jaa nn'aⁿ judíos cwila't'maaⁿ'ndyo̱. 2Nnom tsjoom Jerusalén tyowaa cwii 'ndyoots'a t'maⁿ na jla'cajndyuna 'Ndyoots'a Canmaⁿ. Manndyoo' juuna' tyowaa cwii peila t'maⁿ na ñequio ñ'oom hebreo jndyuna' Betesda. Ndiocheⁿ peila'ñeeⁿ niom 'om l'aa na cwe' wanaaⁿto. 3Naquii' l'aa'ñeeⁿ tyomaⁿ' cwii tmaaⁿ' nn'aⁿwii, ñ'eⁿ nn'aⁿ na nchjaaⁿ, ñ'eⁿ nn'aⁿ na tileic'ooca', ñequio nn'aⁿ na jnda̱ teintjeiⁿ luee, nc'ee'. Tyomeindoo'na na nleiwo̱o̱ ndaatioo na ñjom peila'ñeeⁿ. 4Ee tquiacheⁿ tquia mandyocue cwii ángel na matseitsja̱ ndaatioo'ñeeⁿ. Ndo' quia na jnda̱ tuii na ljo', juu ts'aⁿ najndyee na nncuo̱ jo' jo', nn'maⁿ meiⁿquia tycu na matjom. 5Jo' jo' tyom'aaⁿ cwii tsaⁿs'a na jnda̱ ntquiuu nchoo' quii nchoo' ñeeⁿ chu na wii'. 6Nty'iaa' Jesús juu na waa. Ndo' nc'e na ntyjeeⁿ na jnda̱ teijndye xuee na matjom na luaa', matsoom nnom: —¿Aa ñe'can'maⁿ'? 7Ndo' t'o̱ ts'aⁿ na wii' nnoom. Matso: —Ta, tjaa 'ñeeⁿ nnchjeeñe ja quii' ndaa quia na cwitsja̱na', ee yocheⁿ na matseijndo̱, cwiicheⁿ ts'aⁿ jnda̱ teinom' ja. 8Ndo' matso Jesús nnom: —Quicantyja', catseilcwiindyu' tsue' ndo' cja'ca'. 9Mañoom' tco'yana' tsaⁿ'ñeeⁿ, n'maaⁿ. Jnda̱ jo' seilcwiiñê tsuee 'naaⁿ'aⁿ, to̱o̱ⁿ'o̱ⁿ na tjacaⁿ. Ndo' xuee'ñeeⁿ xuee na jaa nn'aⁿ judíos cwita'jndya̱a̱ya. 10Cwe' jo' nt'om nn'aⁿ judíos tyoluena nnom juu ts'aⁿ na jnda̱ n'maⁿ: —Je' xuee na cwita'jndya̱a̱ya. Ljeii na matsa̱'ntjomna' tinquiaana' na wanaaⁿ na nncja'ñ'oom' tsue'. 11T'o̱ tsaⁿ'ñeeⁿ nda̱a̱na: —Nquii ts'aⁿ na sein'maⁿ ja matso no̱o̱ⁿ na catseilcwiindyo̱ tsuee 'naⁿya ndo' cjo̱ñ'o̱ⁿya juuna'. 12Ta'x'ee naⁿ'ñeeⁿ nnoom, jluena: —¿'Ñeeⁿ juu tsaⁿ'ñeeⁿ na matso njom' na catseilcwiindyu' tsue' ndo' cja'ca'? 13Sa̱a̱ juu ts'aⁿ na jnda̱ n'maⁿ ticaljeiiⁿ 'ñeeⁿ sein'maⁿ jom. Ee nc'e jndye nn'aⁿ tyom'aⁿ jo' jo', jo' chii teindyo̱o̱ Jesús. 14Jnda̱nquia ljeii Jesús tsaⁿ'ñeeⁿ naquii' wats'om t'maⁿ 'naaⁿ nn'aⁿ judíos. Matsoom nnom: —Je' queⁿ' cwenta, jnda̱ n'maⁿ', cja'meintyje' na matsei'tjo̱o̱ndyu' nnom Ty'o̱o̱ts'om cha tintjom' cwii na cwajndiiticheⁿ. 15Ndo' tsaⁿs'a'ñeeⁿ tjacatsoom nda̱a̱ nn'aⁿ judíos na nquii Jesús sein'maⁿ jom. 16Cwe' nc'e jo' tyol'uee nn'aⁿ judíos'ñeeⁿ na cat'uiina' Jesús. Tyojoo' n'omna na nla'cuee'na jom, ee tyoch'eeⁿ ts'iaaⁿmeiⁿ' meiiⁿ xuee na cwita'jndyeena. 17Sa̱a̱ Jesús t'o̱o̱ⁿ nda̱a̱na, tsoom: —Tsotya̱ya ñequii'cheⁿ mach'eeⁿ ts'iaaⁿ, ndo' mati ja. 18Jnaaⁿ' ñ'oomwaa' nn'aⁿ judíos'ñeeⁿ tyojoo'ti n'omna na nla'cuee'na jom. Ee cantyja na cwitjeii'na cwenta nchii macanda̱ na seitjo̱o̱ñê cantyja 'naaⁿ' xuee na cwita'jndyeena, sa̱a̱ mati nquiuna na seitjo̱o̱ñê na tsoom na Ty'o̱o̱ts'om cwiluiiñe Tsotyeeⁿ, ee na laa'ti' mach'eeⁿ na ñe'cwii cwiluiiñê ñ'eⁿñe. 19Quia jo' matso Jesús nda̱a̱ naⁿ'ñeeⁿ: —Ñ'oom na mayuu'cheⁿ matseina̱ⁿya nda̱a̱'yo'. Ja na cwiluiindyo̱ Jnda Ty'o̱o̱ts'om, ticalatiuu'yo' na ñequii' cantyja na l'ue ts'o̱o̱ⁿ nnts'aa. Ja ñequii'cheⁿ cantyja na manty'ia na mach'ee Tsotya̱, jo' na mats'aa. Ee ja na cwiluiindyo̱ Jnaaⁿ, ñequii'cheⁿ mats'aa cha'xjeⁿ na manty'iaya na mach'eeⁿ. 20Ee Tsotya̱ya m'aaⁿ na candya' ts'oom ja na cwiluiindyo̱ Jnaaⁿ. Ma'mo̱o̱ⁿ no̱o̱ⁿ cha'tso na mach'eeⁿ. Ndo' m'mo̱ⁿtyeeⁿcheⁿ ts'iaaⁿ na t'maⁿti na cats'aa cha cats'aana' na cjaawee'ticheⁿ n'om'yo'. 21Ee cha'xjeⁿ nquii Tsotya̱ya mañequiaaⁿ na cwitando' l'oo, mati ja na cwiluiindyo̱ Jnaaⁿ meiⁿquia ts'aⁿ na l'ue ts'o̱o̱ⁿ mañequia na tseixmaⁿ na ticantycwii na wando'. 22Tsotya̱ya meiⁿcwii ts'aⁿ ticu'xeeⁿ. Sa̱a̱ l'o̱o̱ ja na cwiluiindyo̱ Jnaaⁿ jnda̱ tquiaaⁿ cha'waati na nntu'xeⁿndye nn'aⁿ. 23Ee l'ue ts'oom na ñecwii xjeⁿ cala't'maaⁿ'ndye nn'aⁿ ja na cwiluiindyo̱ Jnaaⁿ, cha'xjeⁿ cwila't'maaⁿ'ndyena jom. Sa̱a̱ meiⁿcwi'ñeeⁿcheⁿ ts'aⁿ na tiñe'catseit'maaⁿ'ñe ja na cwiluiindyo̱ Jnaaⁿ meiⁿ Tsotya̱ya ticatseit'maaⁿ'ñe tsaⁿ'ñeeⁿ. 24’Ñ'oom na mayuu'cheⁿ matsjo̱o̱ nda̱a̱'yo'. 'Ñeeⁿ juu na mandii ñ'oom 'ndyo̱ ndo' matseiyu' ñequio nqueⁿ na jñoom ja, juu tsaⁿ'ñeeⁿ matseixmaⁿ na ticantycwii na wando', meiⁿ ticatu'xeⁿñe cantyja jnaaⁿ'. Ñeseixmaⁿ na ts'oo juu sa̱a̱ je' matseixmaⁿ na ticantycwii na wando'. 25Ñ'oom na mayuu'cheⁿ matsjo̱o̱ nda̱a̱'yo'. Nncue'ntyjo̱ xjeⁿ ndo' je' mawe'ntyjo̱na' quia na nndye nn'aⁿ na jnda̱ tja̱ jndye ja na cwiluiindyo̱ Jnda Ty'o̱o̱ts'om. Ndo' nn'aⁿ na cwila'yu' ñ'eⁿndyo̱ nñequia na nnta'ndo'na. 26Ee cha'xjeⁿ nquii Tsotya̱ya matseixmaaⁿ na wanoom'm cantyja 'naaⁿ' nqueⁿ, malaa'ti' jnda̱ tquiaaⁿ no̱o̱ⁿ na cwiluiindyo̱ Jnaaⁿ, na matseixmaⁿya na wando̱'a cantyja 'naⁿ nnco̱. 27Ndo' jnda̱ tquiaaⁿ najndeii na matseixmaaⁿ na ja nncu'xa̱ⁿ nn'aⁿ cantyja jnaaⁿna, nc'e cwiluiindyo̱ ts'aⁿ na jnaⁿ cañoom'luee. 28Tacal'a'yo' na jeeⁿ cwijaawee' n'om'yo' na luaa' tsjo̱o̱ ee nncue'ntyjo̱ xjeⁿ na cha'tso l'oo na too'ndye ndei'luaa, nndyena jndyeya. 29Joo nn'aⁿ na jnda̱ ñel'a na maty'iomyana', nntando'xcona na ticantycwii na cwita'ndo'na. Sa̱a̱ joo nn'aⁿ na tyoolaxmaⁿ na maty'iomyana', nntando'nnda'na na nnt'uiityeⁿna' joona. 30’Tjaa na nnda̱a̱ nnts'aa cantyja na matseixmaⁿ nnco̱. Cha'xjeⁿ na matseijndo̱' Ty'o̱o̱ts'om ts'o̱o̱ⁿya, jo' na macu'xa̱ⁿ. Ndo' macu'xa̱ⁿya cha'xjeⁿ na maty'iomyana'. Ee nchii mal'uee'ndyo̱ na nluii yuu na l'ue ts'o̱o̱ⁿ nnco̱. Mal'uee'ndyo̱ na nnts'aa yuu na l'ue ts'om Tsotya̱ na jñom ja quii'ntaaⁿ'yo'. 31Xeⁿ macwji'yuu'ndyo̱ cantyja 'naⁿya, ticajnda ñ'oom'ñeeⁿ. 32Sa̱a̱ m'aaⁿ cwiicheⁿ na macwji'yuu'ñe cantyja 'naⁿya, majuu Juan. Ndo' ntyjiiyaya na juu ñ'oom'ñeeⁿ tseixmaⁿna' na mayuu'. 33Mancjo'yo' jñom'yo' nn'aⁿ na m'aaⁿ ndo' ñ'oom na tjei'yuu'ñê cantyja 'naⁿya, ñ'oom na mayuu' juuna'. 34Sa̱a̱ ja ticantyjaa' ts'o̱o̱ⁿ ñ'oom na cwitjei'yuu'ndye nn'aⁿ cantyja 'naⁿya. Luaa' matsjo̱o̱ cha nnda̱a̱ nncwji'n'maaⁿndyo̱ 'o. 35Juan'ñeeⁿ tyoseixmaaⁿ cha'cwijom lámpara na matseixueena' jo nda̱a̱ nn'aⁿ. Ndo' 'o xjeⁿ na ñet'oom t'om'yo' na neiⁿ'yo' ee nquiu'yo' ñ'oom na tyoñequiaaⁿ cha'cwijom seixueeñena' naquii' n'om'yo'. 36Sa̱a̱ waa ñ'oom na macwji'yuu'ñena' cantyja 'naⁿya na t'maⁿti cwiluiiñena', nchiiti ñ'oom na tjei'yuu'ñe Juan. Joo ts'iaaⁿ na tquiaa Tsotya̱ya na catseicanda̱a̱'ndyo̱ na mats'aa, joona' cwitjei'yuu'ndyena' cantyja 'naⁿya na nqueⁿ jñoom ja. 37Ndo' nqueⁿ na jñoom ja quii'ntaaⁿ'yo' macwji'yuu'ñê cantyja 'naⁿya naquii' ñ'oom'm. 'O meiⁿjom ndii' tyoondye'yo' jñeeⁿ'eⁿ, meiⁿ na nnty'ia'yo' chiuu waaⁿ. 38Meiⁿ ñ'oom'm tic'oomna' naquii' n'om'yo', ee 'o tiñe'cala'yu'yo' ñequio ja na jñoom. 39Tcuu tcuu cwila'naⁿ'yo' ñ'oom' Ty'o̱o̱ts'om na teiljeii teiyo ee cwila'tiuu'yo' cwe' na cwil'a'yo' na ljo', jo' na nnda'yo' na ticantycwii na cwitando'yo' jo nnoom. Ndo' joona' cwitjei'yuu'ndyena' cantyja 'naⁿya. 40Sa̱a̱ tiñe'cala'jomndyo' cantyja 'naⁿya cha nnda̱a̱ nlaxmaⁿ'yo' na ticantycwii na cwitando'yo'. 41’Ja ticantyjaa' ts'o̱o̱ⁿ na nla't'maaⁿ'ndye nn'aⁿ ja. 42Ee matsei'no̱ⁿ'a cantyja 'naⁿ'yo' na juu na m'aaⁿ Ty'o̱o̱ts'om na candya' ts'oom nn'aⁿ, ticala'xmaⁿ'yo' jo'. 43M'aaⁿya quii'ntaaⁿ'yo' ñequio xuee' Tsotya̱ya, sa̱a̱ 'o ticala'ljo'yo' ja. Sa̱a̱ xeⁿ cwiicheⁿ ts'aⁿ nncwjee' ñequio xuee' nquii, maxjeⁿ nla'ljo'yo' juu. 44'O cwil'ue'yo' na nla't'maaⁿ'ndye nc'ia'yo' 'o, sa̱a̱ tical'ue'yo' na ntseit'maaⁿ'ñe nquii Ty'o̱o̱ts'om 'o. Ndo' na luaa' cwil'a'yo', tixocanda̱a̱ nla'yu'yo' ñ'eⁿndyo̱. 45Sa̱a̱ ticala'tiuu'yo' na mannco̱tya̱ nntsjo̱o̱ jnaⁿ'yo' nnom Tsotya̱. M'aaⁿ cwiicheⁿ na mañequiaa jnaⁿ'yo', manquiiti Moisés, tsaⁿ na jeeⁿ cwicantyjaa' n'om'yo'. 46Xeⁿ cwila'yu'yo' ñequio Moisés, quia jo' mati nla'yu'yo' ñ'eⁿndyo̱, ee seiljeiⁿ cantyja 'naⁿya. 47Sa̱a̱ xeⁿ 'o tiñe'cala'yu'yo' ñ'oom na seiljeiⁿ, quia jo' ¿chiuu ya nl'a'yo' na nla'yu'yo' ñ'oom na matseina̱ⁿ?

will be added

X\