Juan 14

1Tiñe'quiandyo' na nntseiñ'eeⁿ'ñena' n'om'yo'. Cala'yu'yo' ñ'eⁿ Ty'o̱o̱ts'om ndo' mati cala'yu'yo' ñ'eⁿndyo̱ ja. 2Naquii' waa' Tsotya̱ya jndye joo niom yuu na ya nnc'om nn'aⁿ. Xeⁿ nchii na luaa' waa, jnda̱ tsjo̱o̱ nda̱a̱'yo'. Manncjo̱ na nntseijndaa'ndyo̱ joona' na nleil'uee'ndyo'. 3Ndo' na jo̱ na nntseijndaa'ndyo̱ yuu na nnc'om'yo', nndyo̱lcwa̱'nnda'a na nncjo̱cho̱ 'o yuu na m'aaⁿya, cha yuu na mac'a̱ⁿya, majo' nnc'om'yo'. 4Ndo' 'o manquiu'yo' yuu na majo̱ ndo' mati cwita'jnaⁿ'yo' nato. 5Matso Tomás nnoom: —'U Ta, ticaliuuyâ yuu wja', jo' chii ¿chiuu ya na nla'no̱o̱ⁿ'â yuu waa nato'ñeeⁿ? 6T'o̱ Jesús, matsoom nnom: —Ja cwiluiindyo̱ nato, ndo' ñ'oom na mayuu', ndo' na tijoom cwintycwii na wando' ts'aⁿ. Ñequii'cheⁿ cantyja 'naⁿ ja jo' na nnda̱a̱ nncuee' ts'aⁿ na m'aaⁿ Tsotya̱ya. 7Xeⁿ na cwila'no̱ⁿ'yo' 'ñeeⁿ cwiluiindyo̱, quia jo' mati nla'no̱ⁿ'yo' cantyja 'naaⁿ' Tsotya̱. Na je' na cwii wjaatina' nc'e na cwita'jnaⁿ'yo' ja, mati cwita'jnaⁿ'yo' jom, ndo' jnda̱ nty'ia'nda̱a̱'yo' jom. 8Matso Felipe nnoom: —Ta, quiaa' na nnty'iaanda̱a̱yâ Tsotye', quialjo'cheⁿ nljoya n'o̱o̱ⁿyâ. 9T'o̱ Jesús nnom: —Chiuu sa 'u Felipe, jaach'ee xuee m'aaⁿya ñ'eⁿndyo', ¿aa maxjeⁿ ticwajnaⁿ' ja? Ts'aⁿ na jnda̱ nty'iaa' ja, mati jnda̱ nty'iaaⁿ'aⁿ Tsotya̱. ¿Chiuu na matsu': “Quiaa' na nnty'iaanda̱a̱yâ Tsotye'”? 10¿Aa ticatseiyu' na ljo'yu cwiluiindyo̱ ñequio Tsotya̱ya, ndo' jom ljo'yu cwiluiiñê ñ'eⁿndyo̱ ja? Ñ'oom na matseina̱ⁿya nda̱a̱'yo', nchii matseina̱ⁿya joona' cantyja 'naaⁿ' na jndo̱' ts'o̱o̱ⁿ nnco̱. Nquii Tsotya̱ na ñequii'cheⁿ m'aaⁿñê ñ'eⁿndyo̱, nqueⁿ mach'eeⁿ ts'iaaⁿ 'naaⁿ'aⁿ cantyja 'naⁿya. 11Cala'yu'yo' na ljo'yu cwiluiindyo̱ ñequio Tsotya̱, ndo' Tsotya̱ya ljo'yu cwiluiiñê ñ'eⁿndyo̱ ja. Xeⁿ tileicala'yu'yo' na ljo', sa̱a̱ quiandyo' na nla'yu'yo' ñ'eⁿndyo̱ cantyja 'naaⁿ mañejoo ts'iaaⁿmeiiⁿ na mats'aa. 12Ñ'oom na mayuu'cheⁿ matsjo̱o̱ nda̱a̱'yo', 'ñeeⁿ juu ts'aⁿ na matseiyu' ñ'eⁿndyo̱, mañejoo ts'iaaⁿ na mats'aa nnts'aaⁿ. Hasta jndaticheⁿ ts'iaaⁿ nnts'aaⁿ, nc'e na majo̱ na m'aaⁿ Tsotya̱ya. 13Ndo' meiⁿcwi'ñeeⁿcheⁿ ñ'oom na nntaⁿ'yo' nnom Tsotya̱ ñequio xueya, jo' jo' nñequia cha na catseit'maaⁿ'ñena' jom cantyja 'naⁿ ja na cwiluiindyo̱ Jnaaⁿ. 14Cha'tso na cwitaⁿ'yo' ñequio xueya, jo' jo' nnts'aa. 15’Xeⁿ m'aⁿ'yo' na jnda nquiu'yo' ja, quia jo' cala'canda̱'yo' ñ'oom na matsa̱'ntjo̱ⁿ. 16Ndo' ja nlcaaⁿ'a nnom Tsotya̱ya na nñequiaaⁿ cwiicheⁿ na nnteijndeii 'o, nquii Espíritu na cwiluiiñe na mayuu' na ñequii'cheⁿ nnc'oomñe ñ'eⁿndyo'. 17Nn'aⁿ na m'aⁿ cantyja 'naaⁿ' tsjoomnancue xocanda̱a̱ nnto'ñoomna jom, ee tyoonty'iaana jom, meiⁿ ticata'jnaaⁿ'na jom. Sa̱a̱ 'o cwita'jnaⁿ'yo' jom, ee m'aaⁿñê naquii' n'om'yo', ndo' ñequii'cheⁿ nnc'oomñê ñ'eⁿndyo'. 18Tixoca'ndiya 'o na macanda̱, maxjeⁿ nncwja̱nnda'a na m'aⁿ'yo'. 19Mawaa xjeⁿ na nla'cuee' nn'aⁿ ja, ndo' jnda̱ jo' taxocanty'iaana ja. Sa̱a̱ ñ'eⁿndyo' 'o ñequii'cheⁿ na nnc'o̱o̱ⁿya, ee nc'e na nncwando̱'xco̱, jo' chii mati 'o nlaxmaⁿ'yo' na ticantycwii na nntando'yo'. 20Quia na jnda̱ tue'ntyjo̱ xjeⁿ'ñeeⁿ nla'no̱ⁿ'yo' na m'aaⁿya ñ'eⁿ Tsotya̱, ndo' 'o m'aⁿ'yo' ñ'eⁿndyo̱, ndo' ja m'aaⁿya ñ'eⁿndyo'. 21'Ñeeⁿ juu na matseiljo ñ'oom na matsa̱'ntjo̱ⁿ ndo' matseicanda̱ joona', tsaⁿ'ñeeⁿ jnda ntyjeeⁿ ja. Ndo' 'ñeeⁿ juu na jnda ntyjii ja, nquii Tsotya̱ya candya' ts'oom juu. Ndo' mati ja candya' ts'o̱o̱ⁿya juu, ndo' m'mo̱o̱ⁿya cantyja 'naⁿya nnom. 22Tsaⁿ na jndyu Judas, sa̱a̱ nchii Judas Iscariote, matso: —Ta, ¿chiuu na cwe' nda̱a̱ jâ m'mo̱ⁿ' cantyja 'naⁿ' sa̱a̱ nda̱a̱ nn'aⁿ tsjoomnancue xocatsa' na ljo'? 23T'o̱ Jesús nnom, matsoom: —'Ñeeⁿ juu na jnda ntyjii ja maxjeⁿ nntseiñ'oom'ñe ñ'oom na maqua̱ⁿ. Nnc'oom Tsotya̱ na candya' ts'oom tsaⁿ'ñeeⁿ, ndo' nntsquia̱caño̱o̱ⁿyâ juu. Nnc'o̱o̱ⁿyâ ñ'eⁿñe. 24'Ñeeⁿ juu na ticajnda ntyjii ja, tsaⁿ'ñeeⁿ tiñe'catseicana̱a̱ⁿ ñ'oom na mañequiaya. Ndo' ñ'oom na matseina̱ⁿ nda̱a̱'yo' nchii ñ'oom 'ndyo̱ nnco̱ya. Matseixmaⁿna' ñ'oom 'ndyoo Tsotya̱ya ee jom jñoom ja quii'ntaaⁿ'yo'. 25’Ñ'oommeiⁿ' matseina̱ⁿ nda̱a̱'yo' yocheⁿ na ndicwaⁿ m'aaⁿndyo̱ ñ'eⁿndyo'. 26Sa̱a̱ ja nlcaaⁿ'a nnom Tsotya̱ya na njñoom Espíritu Santo na nnteijndeii 'o. Juu m'mo̱ⁿti ñ'oom nda̱a̱'yo' na macaⁿna' na nliu'yo'. Ndo' nnts'aa na nncjaañjoom' n'om'yo' cha'tso ñ'oom na jnda̱ ñetsjo̱o̱ nda̱a̱'yo'. 27’Ja tjaa'naⁿ ñomtiuu tseixmaⁿya. Mañequiaya na cala'xmaⁿ'yo' juuna' naquii' n'om'yo'. Juu na mañequia na cwicanda'yo' t'maⁿti tseixmaⁿna', nchiiti juu na tjaa ñomtiuu c'om nn'aⁿ na mañequiaa tsjoomnancue. Tiñe'quiandyo' na nntseiñ'eeⁿ'ñena' n'om'yo' ljo' cwii nntjom'yo' meiⁿ tila'catyuendyo'. 28Jnda̱ jndye'yo' na tsjo̱o̱ nda̱a̱'yo', majo̱, sa̱a̱ nndyo̱nnda'a na m'aⁿ'yo'. Xeⁿ na mayuu' jnda nqiu'yo' ja, quia jo' nñequiaana' na neiⁿ'yo' meiiⁿ na tsjo̱o̱ na majo̱ ee na m'aaⁿ Tsotya̱ya jo̱. Jom t'maⁿti cwiluiiñê, nchiiti ja. 29Ndo' je' cwitjo̱o̱cheⁿ na nluii na ljo' matsjo̱o̱ya nda̱a̱'yo', cha quia na jnda̱ tue'ntyjo̱ juuna' quia jo' nla'yu'yo'. 30’Tajndye cwimatseina̱ⁿtya̱ya ñ'eⁿndyo', ee mandyo nquii na cwiluiitquieñe quii' n'om nn'aⁿ tsjoomnancuewaañe. Sa̱a̱ tjaa meiⁿcwii na matseixmaⁿya na juu jo' nnda̱a̱ nleil'uee'ñe na cat'uiina' ja. 31Sa̱a̱ cha nnc'ooliu nn'aⁿ tsjoomnancue na m'aaⁿya na candya' ts'o̱o̱ⁿya Tsotya̱, ndo' na matseicanda̱a̱'ndyo̱ cha'tso na matsa̱'ntjoom ja, mañequiaandyo̱ na nnc'io̱. Quicantyja'yo', cjaaya, caluii'a ñjaaⁿñe.

will be added

X\