Juan 10

1’Ñ'oom na mayuu'cheⁿ na matsjo̱o̱ nda̱a̱'yo', juu ts'aⁿ na nchii 'ndyoots'a tiom wjaaquiee' yuu na ñjomndye canmaⁿ, sa̱a̱ cwiicheⁿ joo wjaawaaⁿ juu tiom'ñeeⁿ na nncwincjeeⁿ'eⁿ juuna', tsaⁿ'ñeeⁿ cwiluiiñê tsaⁿcanch'ue ndo' tsaⁿ na mawincje' tiom. 2Sa̱a̱ nquii ts'aⁿ na cwiluiiñe na mateix'ee canmaⁿ, xcwe 'ndyoots'a tiom nncjaaqueⁿ'eⁿ. 3Ts'aⁿ na mach'ee cwenta 'ndyoots'a tiom'ñeeⁿ, matseicanaaⁿñe na nncwinoom. Ndo' joo canmaⁿ'ñeeⁿ na mateix'eeⁿ cwita'jnaaⁿ'yo' jñeeⁿ'eⁿ. Macwjeeⁿ'eⁿ ncueeyo', wjaachom jooyo'. 4Ndo' quia na jnda̱ tjeiiⁿ'eⁿ cha'tso canmaⁿ na mach'eeⁿ cwenta, wjaajñeeⁿ jo nda̱a̱yo', 'oontyjo̱yo' naxeeⁿ'eⁿ ee cwita'jnaaⁿ'yo' jñeeⁿ'eⁿ. 5Cwii ts'aⁿ na ticata'jnaaⁿ'yo' na nchii ty'oyo', xoc'oontyjo̱yo' naxeⁿ', hasta nlei'nomyo' juu. Ee ticata'jnaaⁿ'yo' jndyee' cwiicheⁿ ts'aⁿ na nchii ty'oyo'. 6Luaa' ñ'oom na cwe' tjañoom' na seineiⁿ Jesús nda̱a̱na. Sa̱a̱ tîcala'no̱ⁿ'na ljo' ñe'catsona'. 7Ndo' seineiⁿticheⁿ Jesús nda̱a̱ naⁿ'ñeeⁿ. Tsoom: —Ñ'oom na mayuu'cheⁿ matsjo̱o̱ nda̱a̱'yo', ja cwiluiindyo̱ 'ndyoots'a tiom na cwi'ooquie' canmaⁿ. 8Cha'tso nt'omcheⁿ nn'aⁿ na jnda̱ tquiocalue na cwiluiindye na nntei'x'ee canmaⁿ cwii tjo̱o̱cheⁿ na jndyo̱o̱, joo naⁿ'ñeeⁿ la'xmaⁿna naⁿcanty'ue ndo' nn'aⁿ na cwiwincje' tiom. Sa̱a̱ joo canmaⁿ na mayuu'cheⁿ cwiluiindye cwentaya tînquiandyena cantyja 'naaⁿ naⁿ'ñeeⁿ. 9Ja 'ndyoots'a tiom cwiluiindyo̱. Meiⁿcwi'ñeeⁿcheⁿ ts'aⁿ na nncjaaquiee' cantyja 'naⁿya, tsaⁿ'ñeeⁿ nlui'n'maaⁿñê. Nntseijomna' jom cha'cwijom cwii catsmaⁿ na maljeiiyo' na nlcwa' na macalui'yo' tiom'ñeeⁿ ndo' na macwjee'nnda'yo'. 10’Tsaⁿcanch'ue ñequii'cheⁿ na macwjeeⁿ'eⁿ na nnch'ueeⁿ nntseicueⁿ'eⁿ ndo' na nntsei'naⁿ'aⁿ. Ja jndyo̱o̱ na nñequia na ticantycwii na cwita'ndo' nn'aⁿ, ndo' cha na canda̱a̱'ya na nla'xmaⁿna juu jo'. 11Ja cwiluiindyo̱ ts'aⁿ na canda̱a̱'ya mateix'ee canmaⁿ. Juu ts'aⁿ na canda̱a̱'ya na mateix'ee canmaⁿ ntsmeiⁿ', mañequiaañe na cue' cwentaayo'. 12Sa̱a̱ juu tsaⁿntjom na nchii cwiluiiñê ty'oyo' ee cwe' mach'eeⁿ cwenta jooyo', noom'm na ndyocwjee'cañoom lobo. Quia jo' ma'ñeeⁿ canmaⁿ'ñeeⁿ, maleinoom. Ndo' juu lobo'ñeeⁿ mantyjo̱ ndo' mat'uii jooyo'. 13Maleinom tsaⁿ'ñeeⁿ ee cwe' tsaⁿntjom jom, jo' chii ticajnda ntyjeeⁿ canmaⁿ'ñeeⁿ. 14’Ja cwiluiindyo̱ ts'aⁿ na canda̱a̱'ya mateix'a̱ya canmaⁿ. Ndo' cha'xjeⁿ wajnaaⁿ' Tsotya̱ ja, mati ja mawajnaⁿ'a jom. Maluaa' matseijomna' na wajnaⁿ'a canmaⁿ ntsma̱a̱ⁿ'a, ndo' quioo' ntsma̱a̱ⁿ'a cwitajnaaⁿ'yo' ja. Ndo' mañequiaandyo̱ na c'io̱ cwentaa canmaⁿ ntsma̱a̱ⁿ'a. 16Mati mam'aⁿ nt'omcheⁿ nn'aⁿ na cwiluiindyena canmaⁿ ntsma̱a̱ⁿ'a na tic'omna tmaaⁿ'waa. Mati joona cwiluiindyo̱ na cjo̱cacho̱o̱ya, ndo' nnquiontyjo̱na na nncwaⁿya joona. Ndo' nncuaa na ñe'cwii tmaaⁿ', ndo' ñe'cwii ts'aⁿ na nnteix'ee joona. 17’Nquii Tsotya̱ jeeⁿ candya' ts'oom ja, ee mañequiaandyo̱ na c'io̱ cwentaa nn'aⁿ na cwiluiindye canmaⁿ ntsma̱a̱ⁿ'a cha nñequiaaⁿ na nncwando̱'nnda'a. 18Tjaa'naⁿ 'ñeeⁿ juu na nnda̱a̱ nntseicuee' ja na nchii ñ'oomya. Mannco̱tya̱ mañequiaandyo̱ na ljo' catjo̱ⁿ. Waa najndo̱ na cwiluiindyo̱ na cats'aa na ljo', ndo' mati waa na jndo̱ na nncwando̱'xco̱. Luaa' ñ'oom na sa̱'ntjom Tsotya̱ya na catseixmaⁿya. 19Jnda̱ na jndye nn'aⁿ judíos ñ'oommeiⁿ' s'aana' na tîcatjoom'nnda' na jla'neiⁿna cantyja 'naaⁿ'aⁿ. 20Ee jndyendye joona jluena: —Tsaⁿjndii matseixmaaⁿ, ndo' jnda̱ teintjeiⁿñê. ¿Chiuu na cwindye'yo' ñ'oom na matseineiiⁿ? 21Sa̱a̱ nt'omndye joona jlue: —Nchaa l'uu ñ'oommeiⁿ' la'xmaⁿna' ñ'oom na nntseineiⁿ ts'aⁿ na m'aaⁿ nacje 'naaⁿ' tsaⁿjndii. ¿Aa nnts'aacheⁿna' cwii ts'aⁿ na m'aaⁿ nacje 'naaⁿ' tsaⁿjndii nnda̱a̱ nnts'aa na nnty'iaa' ts'aⁿ na nchjaaⁿ'? 22Tsjoom Jerusalén tuee' xuee quia cwila't'maaⁿ'ndye nn'aⁿ judíos na cwijaañjoom' n'omna xjeⁿ na tiooxconnda' weloo weloona cwenta wats'om t'maⁿ l'o̱ Ty'o̱o̱ts'om. 23Ndo' xcwe ncueesua' quia tuee' xuee'ñeeⁿ. Jesús m'aaⁿ wats'om t'maⁿ 'naaⁿna. Manoom naquii' cwii w'aa cwentaa' wats'om'ñeeⁿ na cwe' wanaaⁿ ndiocheⁿ na s'aa Salomón. 24Quia jo' nn'aⁿ na cwiluiitquiendye nda̱a̱ nn'aⁿ judíos tjaa'ndyena tsei Jesús. Ta'x'eena nnoom jluena: —¿Cwanti yo na maleichu' jâ na matseiñ'eeⁿ'ndyu' jâ? Xeⁿ na mayuu' cwiluiindyu' Cristo, ntyjayu catsu' nda̱a̱yâ. 25Matso Jesús nda̱a̱na: —Jnda̱ tsjo̱o̱ na ljo' nda̱a̱'yo', sa̱a̱ maxjeⁿ tîcalayu'yo'. Majoo ts'iaaⁿ na mats'aa ñequio najndeii na matseixmaⁿ Tsotya̱, joona' cwitjei'yuu'ndyena' cantyja 'naⁿya. 26Sa̱a̱ 'o tiñe'calayu'yo' ñ'eⁿndyo̱ cwe' nc'e nchii cwiluiindyo' canmaⁿ ntsma̱a̱ⁿ'a. 27Ee nn'aⁿ na cwiluiindye canmaⁿ ntsma̱a̱ⁿ'a cwindyena jndyeya, ndo' ja mawajnaⁿ'a joona, ndo' joona cwinquiontyjo̱na naxa̱ⁿ'a. 28Ja mañequia na ticantycwii na cwita'ndo'na, meiⁿ tajom catsuundyena. Ndo' tjaa meiⁿcwii ts'aⁿ na nnda̱a̱ nncwji' joona l'o̱o̱. 29Ee nquii Tsotya̱ na tquiaaⁿ joona l'o̱o̱, jom cwiluiit'maⁿñetyeeⁿ na cha'tso, ndo' meiⁿcwii tjaa 'ñeeⁿ juu nnda̱a̱ nncwji' joona l'o̱o̱ⁿ. 30Ja ñequio Tsotya̱ ñe'cwii cwiluiindyo̱ ñ'eⁿñê. 31Jnda̱ na jndye nn'aⁿ judíos'ñeeⁿ na luaa' ñ'oom tso Jesús, jla'xcwiinnda'na ljo̱' na nntuee'na nacjoom'm. 32Quia jo' tsoom nda̱a̱na: —Majndye ts'iaaⁿ na ya jnda̱ s'aaya jo nda̱a̱'yo' ñequio najndeii na matseixmaⁿ Tsotya̱ya. ¿Cwaaⁿ cwii juuna' na mach'eena' na ñe'cajñom'yo' ljo̱' ja? 33Ndo' t'o̱o̱ judíos'ñeeⁿ nnoom, jluena: —Nchii ñe'cajño̱o̱ⁿyâ ljo̱' 'u cwe' cwii ts'iaaⁿ na ya mache'. Nl'aayâ na luaa' 'u ee matsei'jnaⁿ' Ty'o̱o̱ts'om. Ee 'u cwe' ts'aⁿ 'u, sa̱a̱ mache' na cwiluiindyu' Ty'o̱o̱ts'om. 34Jesús t'o̱o̱ⁿ nda̱a̱na, tsoom: —Naquii' ljeii ñ'oom' Ty'o̱o̱ts'om na cwileiñ'om'yo', manquiu'yo' na nquii Ty'o̱o̱ts'om matsoom: “Nda̱a̱' 'o na cwiluiitquiendyo' jo nda̱a̱ nn'aⁿ matsjo̱o̱ na matseijomna' 'o cha'na nnco̱.” 35Matsoticheⁿ Jesús: —Tso Ty'o̱o̱ts'om nda̱a̱ nn'aⁿ na cwiluiitquiendye nda̱a̱ nn'aⁿ judíos na matseijomna' joona cha'na nqueⁿ. Ndo' manquiuuya na tixocats'aana' na cwe' cantu ñ'oom na tsoom. 36Jo' chii tixcwe na cwindu'yo' na matseijnaaⁿ'a jom nc'e na tsjo̱o̱ na cwiluiindyo̱ Jnaaⁿ. Ee nqueⁿ ty'ioom ts'iaaⁿ ja, ndo' sa̱'ntjoom ja na candyoc'o̱o̱ⁿndyo̱ quii'ntaaⁿ' 'o nn'aⁿ tsjoomnancue. 37Jo' chii xeⁿ nchii ts'iaaⁿ 'naaⁿ' Tsotya̱ mats'aa, ticalayu'yo' ñ'eⁿndyo̱. 38Sa̱a̱ nc'e na mats'aa ts'iaaⁿ 'naaⁿ'aⁿ, jo' chii calayu'yo' cantyja 'naaⁿ mañejoo ts'iaaⁿ'ñeeⁿ meiiⁿ na tiñe'calayu'yo' ñ'eⁿndyo̱ ja. Ee cantyja 'naaⁿ joona' nliu'yo' ndo' nla'no̱ⁿ'yo' na nquii Tsotya̱ ñe'cwii cwiluiiñê ñ'eⁿndyo̱, ndo' ja ñe'cwii cwiluiindyo̱ ñ'eⁿñê. 39Quia jo' cwiicheⁿ cwii ndii' jla'jndaa'ndyena na nnt'uena jom, sa̱a̱ tîcanda̱a̱ l'ana, tjaaⁿ. 40Quia jo' tei'ty'io̱o̱nndaa'â jndaa Jordán ñ'eⁿ Jesús yuu ñet'oomjndyee Juan na tyotseits'oomñê nn'aⁿ. Ndo' majndye xuee ñet'o̱o̱ⁿyâ jo' jo' ñ'eⁿ Jesús. 41Ndo' jndye nn'aⁿ tquie'cañom na m'aaⁿyâ na ñe'candyena ñ'oom na tyoñequiaaⁿ. Tyoluena nda̱a̱ nc'iaana: —Juan meiⁿcwii ts'iaaⁿ tyooch'eeⁿ na xocanda̱a̱ nluiina' na cwe' ts'aⁿ nnts'aa. Sa̱a̱ cha'tso ñ'oom na tyoñequiaaⁿ cantyja 'naaⁿ' tsaⁿm'aaⁿ', ñequii'cheⁿ na mayuu' joona'. 42Ndo' majndye nn'aⁿ tyola'yu' ñ'eⁿ Jesús jo' jo'.

will be added

X\