Hebreos 9

1Juu ñ'oomtyeⁿ na tqueⁿjndyee Ty'o̱o̱ts'om ñequio nn'aⁿ Israel, jndaa' seijndaa'ñena' chiuu nla't'maaⁿ'ndyena jom ndo' na nl'ana cwii w'aaliaa. 2Juu cuarto na cwe' we'yandyo cantyja 'naaⁿ' w'aaliaa'ñeeⁿ tyomeintyjee' xjo na tyocantyjoo chom ndo' ñ'eⁿ cwii meiⁿsa yuu na tyocantyjo ntyoo'. Cuarto'ñeeⁿ jndyuna' Cuarto Lju'. 3Naxeⁿ' liaa na ntyja na jnda̱ we, tyowaa cwiicheⁿ cuarto na jndyuna' na Lju'ticheⁿ Tseixmaⁿ. 4Naquii' cuarto'ñeeⁿ tyowaa tio s'om cajaⁿ yuu tyola'co ntyee suu ndo' cwii castom na tcweeñ'eⁿna' s'om cajaⁿ. Ts'om castom'ñeeⁿ tyowaa cwii xuaa na tuiina' ñ'eⁿ s'om cajaⁿ na too'cheⁿ ñjom maná ndo' mati ñ'eⁿ ts'oom l'eii 'naaⁿ' Aarón na jndei'na' ndo' ñjom lcaa' ljo̱' na chona' ljeii ñ'oomtyeⁿ na seijndaa'ñe Ty'o̱o̱ts'om ñ'eⁿndyena. 5Nacjoo' castom'ñeeⁿ tyocantyjo we querubines na tuii ñequio s'om cajaⁿ. Joona' cwit'mo̱o̱ⁿna' na m'aaⁿ Ty'o̱o̱ts'om ñequio nn'aⁿ. Ndyeyu nacjoo' tscaa' na ta̱' 'ndyoo castom'ñeeⁿ, tjom lquii querubines'ñeeⁿ yuu cwiñequia ntyee nioom quioo' na jnda̱ jla'cwjeena cha catseit'maⁿ ts'om Ty'o̱o̱ts'om jaa nn'aⁿ Israel. Jndye ñ'oom maniom na cwit'mo̱o̱ⁿ cwii cwii nmeiⁿ', sa̱a̱ ticaⁿna' na nlana̱a̱ⁿyâ cantyja 'naaⁿ joona' na maje'ndyo. 6Quia na jnda̱ teijndaa' cha'tso nmeiⁿ', nquiee ntyee 'io ndi 'io tyo'ooquie'na cuarto na we'yandyo na tyol'ana ts'iaaⁿ na la'xmaⁿna. 7Sa̱a̱ cuarto na jnda̱ we, macanda̱ tyojaaquiee' nquii tyee na tjacantyja cwiluiit'maⁿñe, ndo' ñejom ndii' na cwii cwii chu. Tyojaachom nioom quioo' na cwila'cwjee nn'aⁿ na cwila't'maaⁿ'ndyena Ty'o̱o̱ts'om. Niom'ñeeⁿ tyoñequiaaⁿ cwentaa' jnaaⁿ' nqueⁿ ndo' mati cwentaa jnaaⁿ nn'aⁿ. 8Ndo' na luaa' tuaa, ma'mo̱ⁿ Espíritu Santo na yocheⁿ na tyowaa wats'om liaa'ñeeⁿ, ticwanaaⁿ na nncjaquiee' meiⁿquia ts'aⁿ cuarto na lju'ticheⁿ tseixmaⁿna'. 9Cha'tso nmeiⁿ' la'xmaⁿna' cwii na ma'mo̱ⁿna' nda̱a̱ya ncuee meiiⁿñe, ee 'naⁿ na tyoñequia nn'aⁿ ñequio quioo' na tyola'cwjeena na cwila't'maaⁿ'ndyena Ty'o̱o̱ts'om, ts'iaaⁿ'ñeeⁿ tîcanda̱a̱ nlqueⁿna' joona na la'xmaⁿna na canda̱a̱'ndyena jo nnom Ty'o̱o̱ts'om. 10Ñ'oom'ñeeⁿ cwe' t'uiina' cantyja 'naⁿ na cwicwa'na ndo' na cwiwena ñequio nt'omcheⁿ nnom na maqueⁿlju'na' joona. Sa̱a̱ cwe' tomti la'xmaⁿna' cwii na matsa̱'ntjomna' chiuu na nc'omna, ndo' joo ñ'oommeiⁿ' ñequii'cheⁿ tyowaa najnda̱na' hasta xjeⁿ na seichuii' Ty'o̱o̱ts'om chiuu nla't'maaⁿ'ndye nn'aⁿ jom. 11Sa̱a̱ jnda̱ jndyo Cristo na cwiluiiñê tyee na tjacantyja cantyja 'naaⁿ' cha'tso naya na maniom. Juu wats'om yuu na mandi'ntjoom, yati ndo' canda̱a̱'ti tseixmaⁿna', meiⁿ nchii nn'aⁿ l'a juuna' ee nchii tseixmaⁿna' cantyja 'naaⁿ' tsjoomnancue. 12Jnda̱ tjaqueⁿ'eⁿ yuu na lju'ticheⁿ wats'om cañoom'luee, sa̱a̱ nchii cha na nñequiaaⁿ nioom canch'ioo ñequio nioom quioo'ndyo nch'u, jom tquiaaⁿ nioom' nqueⁿ, meiⁿ ticaⁿna' na nnts'aannaaⁿ'aⁿ na ljo' ndo' nc'e jo', seijndaa'ñê na la'xmaaⁿya na ticatycwii na cwicalui'n'maaⁿndyo̱. 13Ñ'oom na mayuu' quia tyolacanda̱a̱ndye ntyee nioom quioo'ndyo ñequio nioom canch'ioo nacjoo nn'aⁿ ñequio tsjaa' na tcoñe casondyecu, tyowaa najndeii na tyola'xmaⁿ ts'iaaⁿmeiⁿ' na tqueⁿ lju'na' nn'aⁿ cha nnda̱a̱ nla't'maaⁿ'ndyena Ty'o̱o̱ts'om. 14Ndo' nc'e na luaa' waa, juu nioom' Cristo mat'maⁿti waa najndeii na matseixmaⁿna', ee cantyja 'naaⁿ' najndeii na matseixmaⁿ Espíritu Santo na ticantycwii na m'aaⁿ, Cristo tquiaañe cheⁿnqueⁿ nnom Ty'o̱o̱ts'om na seijomna' jom cha'na quioo' na canda̱a̱'ñe ndo' nioom' jom matseilju'na' na m'aaⁿ'tyeⁿ n'o̱o̱ⁿya cantyja 'naaⁿ' joo ts'iaaⁿ na wjaachuuna' jaa na nncwja̱a̱ya cha nnda̱a̱ nndya̱'ntjo̱o̱ⁿya nnom Ty'o̱o̱ts'om na wando'. 15Nc'e na luaa', tquiaañe Cristo na tueeⁿ'eⁿ cha cantyja 'naaⁿ' cwii ñ'oom xco na matseijndaa'ñê nnda̱a̱ nntseitjoom nn'aⁿ ñequio Ty'o̱o̱ts'om, ndo' na ljo' nnda̱a̱ nntseit'maⁿ ts'oom nn'aⁿ jnaaⁿna na ñel'ana quia tyom'aⁿna nacje 'naaⁿ' ñ'oomtyeⁿ na tyowaajndyee ndo' cha joo nn'aⁿ na ma'maⁿ Ty'o̱o̱ts'om nnda̱a̱ nnto'ñoomna juu naya na tijoom ntycwii na jnda̱ tsoom na nñequiaaⁿ nda̱a̱ naⁿ'ñeeⁿ. 16Quia matseiljeii ts'aⁿ tsom na matseijndaa'ñena' cwii na l'ue ts'om, ñ'oom na chuu tsom'ñeeⁿ, tjaa'naⁿ najndeiina' yocheⁿ na ndicwaⁿ wando' tsaⁿ'ñeeⁿ. 17Ee tsom na seiljeii ts'aⁿ na ma'mo̱ⁿna' chiuu waa na matseijndaa'ñe, tjaa'naⁿ najndeii tsom'ñeeⁿ yocheⁿ na wando' tsaⁿ'ñeeⁿ, xeⁿ jnda̱ tueeⁿ'eⁿ quia jo' waa najndeii na matseixmaⁿna'. 18Nc'e na ljo', ñ'oom na teijndaa' najndyee mati tqueⁿtyeⁿna' cwe' ñ'eⁿ nioom quioo'. 19Ee quia na jnda̱ sei'naaⁿ' Moisés cha'tso ljeii na matsa̱'ntjomna' nda̱a̱ nn'aⁿ Israel, quia jo' seityeeⁿ soo wee cwii ts'oom hisopo, seicanaⁿ'aⁿ soo'ñeeⁿ quii' nioom catsondyench'u ñequio nioom canch'ioo na tjoom'na' ñ'eⁿ ndaatioo, jnda̱ jo' seicanda̱a̱ñê niom'ñeeⁿ tsom na chuu ljeii'ñeeⁿ ndo' mati nn'aⁿ Israel. 20Ndo' tsoom nda̱a̱na: “Cantyja 'naaⁿ' niom'waa ma'mo̱ⁿna' na cwiljotyeⁿ ñ'oom na matsa̱'ntjomna' na matseijndaa'ñe Ty'o̱o̱ts'om ñ'eⁿndyo'.” 21Ndo' mati seicanda̱a̱ñê niom'ñeeⁿ wats'omliaa ñequio cha'tso 'naⁿ na cwiwil'ue jo' jo' na cwila't'maaⁿ'ndyena Ty'o̱o̱ts'om. 22Cantyja 'naaⁿ' ljeii na matsa̱'ntjomna', mandyo na cha'tsoti 'naⁿ maqueⁿlju'na' ñequio niom', ndo' xeⁿ ticwe' niom', ticatseit'maⁿ ts'om Ty'o̱o̱ts'om jnaaⁿ nn'aⁿ. 23Ndo' na luaa', jo' chii tcaⁿna' na cwe' nioom quioo' cha queⁿlju'na' joo 'naⁿ na teil'ue quii' wats'omliaa na joona' jlui'tsjaaⁿ'na' joo 'naⁿ na niom cañoom'luee, sa̱a̱ joo 'naⁿ'ñeeⁿ tcaⁿna' na cue' cwii na canda̱a̱'ti. 24Ee Cristo, nchii tjaqueⁿ'eⁿ wats'om na ñel'a nn'aⁿ, cwii na cwe' jlui'tsjaaⁿ'na' wats'om na mayuu'cheⁿ na waa cañoom'luee. Jom tjaqueⁿ'eⁿ cañoom'luee yuu na matioom'ñê ñ'oom 'naaⁿya jo nnom Ty'o̱o̱ts'om. 25Nchii tjaqueⁿ'eⁿ cañoom'luee na jndye ndii' na nncueeⁿ'eⁿ cwentaa nn'aⁿ, cha'xjeⁿ quich'ee tyee na cwiluiitquieñe jo nda̱a̱ nn'aⁿ judíos na chu ndo' chu mawjaaqueⁿ'eⁿ cuarto na macanda̱ na lju' tseixmaⁿna' na nñequiaaⁿ nioom quioo'. 26Ee xeⁿ na ljo' tcaⁿna', quia jo' jndye ndii' xjeⁿ na tqueⁿ Ty'o̱o̱ts'om tsjoomnancue, nlcaⁿna' na cue' Cristo. Sa̱a̱ ncueemeiiⁿ na mawjaantycwii cantyja 'naaⁿ' tsjoomnancue, ñejomndii' teitquioo'ñe Cristo, na tquiaañê na tueeⁿ'eⁿ na nntseicanoom'm jnaaⁿ nn'aⁿ. 27Ndo' cha'xjeⁿ na majndaa' na ñejom ndii' nncwja̱a̱ya na cha'tsondyo̱, ndo' jnda̱ jo' nncu'xeⁿ Ty'o̱o̱ts'om jaa, 28maluaa' ñejomndii' na tquiaañe Cristo na tueeⁿ'eⁿ cha nntseinoom'm jnaaⁿ jndyendye nn'aⁿ. Nda̱ jo' nleitquioo'ñê na nnda̱ we, nchii cwe' na nntseijndaa'ñê cantyja 'naaⁿ jnaaⁿ nn'aⁿ, sa̱a̱ na nncwji'n'maaⁿñê nn'aⁿ na cwicantyjaa' n'om jom.

will be added

X\