Hebreos 12

1Jeeⁿ t'maⁿ tmaaⁿ' naⁿ'ñeeⁿ na jnda̱ t'mo̱o̱ⁿndyena na cwila'yu'ya n'omna ñ'eⁿ Ty'o̱o̱ts'om. Jo' chii catjei'ndyo̱ cantyja 'naaⁿ' cwii cwii nnom na matseitsaaⁿ'ñena' na tsantyjo̱o̱ya cantyja 'naaⁿ'aⁿ ndo' mati cantyja 'naaⁿ' jnaⁿ na maju'tya'na' jaa. Ñequio na t'maⁿya n'o̱o̱ⁿya cjoo' n'o̱o̱ⁿya na nntsantyjo̱o̱ya naxeⁿ' Jesucristo. 2Ñequii'cheⁿ canty'iaatya̱a̱ⁿya nnom Jesús ee cantyja 'naaⁿ' jom cwinaⁿ na cwila'yu'ya n'o̱o̱ⁿya ñ'eⁿ Ty'o̱o̱ts'om ndo' juu jo' nntseicanda̱a̱'ñena' cantyja 'naaⁿ' jom. Cwajndii tjoom na ty'ioom nn'aⁿ jom ts'oom'naaⁿ, sa̱a̱ ticwjaa'ñê cwenta na seijnaaⁿ'na' jom na tueeⁿ'eⁿ jo' ee ntyjiicheeⁿ xeⁿ jnda̱ teinom nawi'ñeeⁿ, nnc'oom na neiiⁿ'eⁿ. Jnda̱ jo' tjawacatyeeⁿ ntyjaa' tio 'naaⁿ' Ty'o̱o̱ts'om ntyjaya. 3Jo' chii c'oom'ya n'om'yo' cantyja 'naaⁿ' na s'aa Jesús na tyotseiquii ts'oom ñequio nn'aⁿ jnaⁿ na tyo'oo nacjoom'm cha tila'nchqueeⁿ'ndyo' meiⁿ ticantycwii na t'maⁿ n'om'yo' na wi' na cwiwinom'yo'. 4Ee meiiⁿ na cwila'jnda̱'yo' nacjoo jnaⁿ, sa̱a̱ tyootjom'yo' na nla'cwjee nn'aⁿ 'o. 5¿Aa jnda̱ tsuu' n'om'yo' ñ'oom na matseijndo̱' Ty'o̱o̱ts'om n'om'yo' na cwiluiindyo' ntseinaaⁿ? Ee naquii' n'oom'm na teiljeii matsona': 'U jndaaya, tintiom ts'om' quia macwja' Ty'o̱o̱ts'om 'u, tintycwii na t'maⁿ ts'om' quia matseitiaaⁿ'aⁿ 'u. 6Ee matseijno̱o̱ⁿ'o̱ⁿ n'om nn'aⁿ na wi' ts'oom, ndo' ts'aⁿ na macwjaa'ñê cwentaaⁿ'aⁿ na cwiluiiñe jnaaⁿ, matseiseiiⁿ'eⁿ tsaⁿ'ñeeⁿ. Luaa' ñ'oom tso Ty'o̱o̱ts'om. 7Jo' chii cala'quii n'om'yo' quia matseiseiiⁿ'eⁿ 'o ee na nl'a'yo' naljo' m'mo̱ⁿna' na macwjaa'ñê na 'o cwiluiindyo' ntseinaaⁿ, ¿aa m'aaⁿ 'ñeeⁿ tiqui'maⁿ jnda? 8Ee xeⁿ tiqui'maⁿ Ty'o̱o̱ts'om 'o cha'xjeⁿ quich'eeⁿ ñequio nt'omcheⁿ ntseinaaⁿ, ma'mo̱ⁿna' na nchii ntseinaaⁿ 'o, la'xmaⁿ'yo' nn'aⁿ na tijndaa' tsotyena. 9Ee quia ñet'o̱o̱ⁿya na nch'uundyo̱, tyo'maⁿ lotya̱a̱ya jaa sa̱a̱ tyotue'ndyo̱cja̱a̱ nda̱a̱na. Ndo' na luaa', chiuuti nntue'ndyo̱cja̱a̱ jo nnom Tsotya̱a̱ya na m'aaⁿ cañoom'luee cha nntando̱o̱'a cantyja 'naaⁿ'aⁿ. 10Nquiee lotya̱a̱ya cantyjati na jla'no̱ⁿ'na tyo'maⁿna jaa quia na tcaⁿna', ndo' mati nquii Ty'o̱o̱ts'om ma'maaⁿ jaa cha nlco'yana' jaa ndo' na nlqueⁿna' na lju' n'o̱o̱ⁿ cha'xjeⁿ nqueⁿ. 11Ñ'oom na mayuu' ticjaawee' n'o̱o̱ⁿya quia matseiseiiⁿ'eⁿ jaa, wi' nquiuuya, sa̱a̱ xeⁿ cwila'no̱o̱ⁿ'a chiuu waa na ñeca'mo̱o̱ⁿ nda̱a̱ya, nntantyjo̱o̱ⁿya na ya m'aaⁿya jo nnoom. 12Jo' chii yuu na teijndyaa luee'yo' ñequio ndei'cantye'yo', c'om'yo' na jnda̱'yo'. 13Cala'jnda̱'yo' na nnc'om'yo' nato yuu cha juu ts'aⁿ na jnda̱ t'uo̱o̱ x'ee nda̱a̱ nlco'xcwena' jom, meiⁿ ticwinioom'm. 14Cjoo' n'om'yo' na tinc'om'ndiaa'ndyo' ñequio meiⁿcwii ts'aⁿ. Mati c'om'yo' na lju' n'om'yo' jo nnom Ty'o̱o̱ts'om, ee ts'aⁿ na ticatseixmaⁿ na lju' ts'om, tixocuee' na m'aaⁿ. 15Queⁿ'ndyo'ya'yo' cwenta na tjaa 'ñeeⁿ 'o na titseijomñe cantyja 'naaⁿ' naya na matseixmaⁿ Ty'o̱o̱ts'om, tints'aana' na nntseijomna' tsaⁿ'ñeeⁿ cwii ts'o̱o̱ na jana' na matsei'ndaa'na' nn'aⁿ xeⁿ nleil'uee'ndyena juuna', hasta nnda̱a̱ nncwjena. 16Meiⁿcwiindyo' 'o tinc'oom'ñe ñequio cwiicheⁿ ts'aⁿ na cwe' luaa' meiⁿ ticats'aa ts'aⁿ na ticajnda ntyjeeⁿ joo naya na seijndaa'ñe Ty'o̱o̱ts'om cha'xjeⁿ s'aa Esaú, ee na jom tuiiñejñeeⁿ, jo' chii we ndii' 'naaⁿ' tsotyeeⁿ nnaaⁿ'aⁿ sa̱a̱ cwe' cwii nantquie ñ'eⁿ seijndyooñê juu naya'ñeeⁿ. 17Ndo' manquiu'yo' na nda̱nquia quia na tcaaⁿ na catio'naaⁿñe tsotyeeⁿ jom, tîcatseiyu' tsotyeeⁿ. Taticatseichuii' tsotyeeⁿ ñ'oom na tso meiiⁿ na jeeⁿ tyot'ioom. 18'O tyootjom'yo' cha'na tjoom nn'aⁿ Israel. Joona ty'entyjaa'na sjo̱ Sinaí quia tquiaa Ty'o̱o̱ts'om ljeii naqui nda̱a̱na. Juu sjo̱'ñeeⁿ tyowaa chom na tyo'oowandii'ndye. Quia waa cwe' na jo̱o̱ⁿñe, quia waa jaaⁿ ntom ndo' jndeii tyom'aaⁿ jndye, 19meiⁿ tyoondye'yo' jndyee' ntu na tyondye naⁿ'ñeeⁿ meiⁿ jndyee' nquii Ty'o̱o̱ts'om. Quia na jndye naⁿ'ñeeⁿ jñeeⁿ'eⁿ, l'ana ty'oo na tintseineiⁿtyeeⁿ nda̱a̱na. 20Ee tileicala'ñ'oom'ndyena ñ'oom na sa̱'ntjom Ty'o̱o̱ts'om, na tsoom: “Meiiⁿ ts'aⁿ ndo' meiiⁿ quioo', xeⁿ nnto̱' na nncjaawa sjo̱waañe, cala'cwje'yo' joo ñ'eⁿ ljo̱' oo ñ'eⁿ lantsa.” 21Juu na teitquioo' nda̱a̱na, jeeⁿ cwajndii seicaty'uena' hasta tso nquii Moisés: “Cwiteindyo̱ na jeeⁿ macaty'ua̱.” 22Sa̱a̱ 'o cwila'candyoo'ndyo' na m'aaⁿ Sjo̱ Sión, tsjoom' nquii Ty'o̱o̱ts'om na wando', juu Jerusalén na m'aaⁿna' cañoom'luee, ndo' m'aⁿ meiⁿ meiⁿcheⁿ ángeles na cwila'jomndyena na cwila't'maaⁿ'ndyena jom, 23Cwila'candyoo'ndyo' na m'aⁿ tmaaⁿ' nn'aⁿ na cwiluiindyena cwentaa' Ty'o̱o̱ts'om na jnda̱ teiljeii ncueena libro cañoom'luee. 'O cwila'candyoo'ndyo' na m'aaⁿ nqueⁿ na cwiluiiñê na macu'xeeⁿ cha'tsondye nn'aⁿ, cwila'candyoo'ndyo' na m'aⁿ espíritu na laxmaⁿ nn'aⁿ na jnda̱ tqueeⁿ na tjaa jnaⁿ la'xmaⁿna. 24'O cwila'candyoo'ndyo' na m'aaⁿ Jesús na seijndaa'ñê ñ'oomtyeⁿ xco, 'o cwila'candyoo'ndyo' na m'aaⁿ niom' na maqueⁿlju'na' jaa, na juuna' yati waa ñ'oom cantyja 'naaⁿ'na', nchiiti nioom' Abel na tcwe'. 25Jo' chii cal'andyo' cwenta na nchii na ticala'ñ'oom'ndyo' nqueⁿ na matseineiiⁿ nda̱a̱ya. Ee xeⁿ tîcandyaandye naⁿ'ñeeⁿ na jndyena na seineiⁿ Ty'o̱o̱ts'om nda̱a̱na xjeⁿ ljoocheⁿ tsjoomnancue, majndeiiticheⁿ jaa na cwindya̱a̱ na matseineiⁿ nqueⁿ na m'aaⁿ cañoom'lueecheⁿ, tixocandyaandyo̱. 26Xjeⁿ'ñeeⁿcheⁿ jndyee' Ty'o̱o̱ts'om s'aana' na teincwii' tyuaa sa̱a̱ je' matsoom: “Cwiicheⁿ cwii ndii' nchii cwe' nntseiteincwii'a tyuaa, mati tsjo̱'luee.” 27Ñ'oom'ñeeⁿ “cwiicheⁿ cwii ndii'” ma'mo̱ⁿna' na nquiño̱o̱ⁿ tsjoomnancue ñequio tsjo̱'luee na tqueeⁿ cha nljoo'ndyetyeⁿ cha'tso na maqueeⁿ na tixocateincwii'na'. 28Juu na matsa̱'ntjom Ty'o̱o̱ts'om na cwila'jomndyo̱, tjaa'naⁿ cwii nnom na nntseiteincwii'na' juuna'. Cwa quiaaya na quianl'uaaⁿ'aⁿ cantyja 'naaⁿ jo' ndo' cala't'maaⁿ'ndyo̱ jom ñequio na xcwee' n'o̱o̱ⁿya ndo' mati ñequio na jnda nquiuuya. 29Ee nquii Ty'o̱o̱ts'om na cwila't'maaⁿ'ndyo̱, cwiluiiñê chom na matseindyueeñena' cha'tso.

will be added

X\