Efesios 1

1Ja Pablo, ee na l'ue ts'om Ty'o̱o̱ts'om, cwiluiindyo̱ apóstol, ñ'oomwaa' ma'mo̱ⁿna' ts'aⁿ na majñom Cristo Jesús ts'iaaⁿ 'naaⁿ'aⁿ. Matseicwano̱ⁿya cartawaa na m'aⁿ'yo' tsjoom Éfeso na la'xmaⁿ'yo' cwentaa' Ty'o̱o̱ts'om ndo' na cwila'yu'yo' ñ'eⁿ Cristo Jesús. 2Nquii Tsotya̱a̱ya Ty'o̱o̱ts'om na cwila't'maaⁿ'ndyo̱ ñequio Jesucristo na cwiluiiñê na matsa̱'ntjoom jaa, quiana na nnto'ñoom'yo' juu naya na laxmaⁿna ñequio juu na tjañomtiuu c'oom ts'aⁿ jo nda̱a̱na. 3Cwila't'maaⁿ'ndyo̱ nquii Ty'o̱o̱ts'om na cwiluiiñê tsotye Jesucristo na matseixmaaⁿ na matsa̱'ntjoom jaa. Nc'e na matseitjoom'na' jaa ñequio Cristo, jo' xjeⁿ cañoom'lueecheⁿ nc'e Espíritu Santo matio'naaⁿñê jaa ñequio cwii cwii nnom na matseixmaaⁿ na m'aaⁿ cañoom'luee. 4Cwitjo̱o̱cheⁿ na tqueⁿ Ty'o̱o̱ts'om tsjoomnancue, jnda̱ tjeii'ñê jaa na nntseitjoom'na' jaa ñequio Cristo. Luaa' s'aaⁿ cha nlqueⁿna' jaa na lju'ndyo̱ jo nnoom, ndo' na tjaa jnaⁿ cwicolaxmaaⁿya jo nnoom. 5Ee na wi' ts'oom jaa jo' chii xjeⁿ na jndyeecheⁿ tjeii'ñê jaa na nluiindyo̱ ntseinaaⁿ nc'e Jesucristo, ee luaa' tqueeⁿ ee na ljo' l'ue ts'oom na nluii. 6Tuii na ljo' cha' cantyja 'naaⁿ' jo' nntseit'maaⁿ'ñena' juu naya na matseixmaaⁿ, na cwe' yu tquiaaⁿ na la'xmaaⁿya nc'e nquii Jnaaⁿ na jeeⁿ candya' ts'oom. 7Cantyja 'naaⁿ' juu na jeeⁿ wi' ts'oom jaa, jo' na macwji'n'maaⁿñê jaa ee na tue' Jnaaⁿ, na matseit'maⁿ ts'oom jnaaⁿya. 8Canda̱a̱'ya ma'mo̱ⁿ Ty'o̱o̱ts'om na wi' ts'oom jaa na matseijno̱o̱ⁿ'o̱ⁿ n'o̱o̱ⁿya ndo' mañequiaaⁿ na cwila'no̱o̱ⁿ'a. 9Ndo' jnda̱ t'mo̱o̱ⁿ nda̱a̱ya juu na l'ue ts'oom na wanty'iuu' tyom'aaⁿna', majuu cantyjati na jnaⁿ cha'tso na seijndaa'ñê na nncjaacanda̱a̱'na'. 10Juu ñ'oom wanty'iuu'ñeeⁿ ma'mo̱ⁿna' na quia nncue'ntyjo̱ xjeⁿ nntseicanda̱a̱'ñeñ'eⁿna', matseijndaa'ñê na cha'tso na m'aⁿ cañoom'luee ñequio nnom tsjoomnancue nc'om joo jo' nacje 'naaⁿ' Cristo. 11Nc'e na jnda̱ seitjoom'na' jaa ñ'eⁿ Cristo, teiyo tjeii'ñe Ty'o̱o̱ts'om jaa cha na nc'oomna' jaa na nndaaya cha'na na nndaa' jom, ndo' na nncuaa na ljo' matseiljo'yuna' ñequio na jnda̱ seijndaa'ñê na nnts'aaⁿ ndo' cwiluiina' cha'xjeⁿ na cjaawee' ts'oom. 12Luaa' waa na mach'eeⁿ cha jâ nn'aⁿ judíos na ñentyjaa'jndyee n'o̱o̱ⁿya Cristo, catseit'maaⁿ'ñena' Ty'o̱o̱ts'om cantyja 'naaⁿyâ. 13Ndo' mati 'o nn'aⁿ na nchii judíos quia na jndye'yo' ñ'oom na mayuu' cantyja 'naaⁿ' Cristo, majuu ñ'oomxco naya na macwji'n'maaⁿñena' 'o, jla'yu'yo' ñ'eⁿñê, jo' na jñoom sa̱yo 'o ñequio Espíritu Santo na tsoom na nnto'ñoom'yo'. 14Manquii Espíritu Santo na tjameiⁿntyjee' nnom ñ'oom na cwiljotyeⁿ na maxjeⁿ nnto'ño̱o̱ⁿya ljo' na nñequiaa Ty'o̱o̱ts'om nda̱a̱ya quia na jnda̱ seicandyaañeñ'eeⁿ nn'aⁿ na nla'xmaⁿ cwentaaⁿ'aⁿ, cha na catseit'maaⁿ'ñena' jom na jeeⁿ t'maⁿ cwiluiiñê. 15Cantyja 'naaⁿ' nmeiⁿ' mati ja quia na mandiiya na cwila'yu'ya n'om'yo' ñequio Ta Jesús ndo' na m'aⁿ'yo' na wi' n'om'yo' cha'tso nn'aⁿ na lju' n'om, 16tyoocjo̱meiⁿntyja̱a̱'a na mañequiaya na quianl'uaaⁿ'aⁿ cantyja 'naⁿ'yo' quia na matseina̱ⁿya nnoom. 17Ty'o̱o̱ts'om caxuee cwiluiiñê, nqueⁿ na cwiluiiñê Tsotye Jesucristo na matsa̱'ntjoom jaa, macaⁿ'a nnoom na cantyja 'naaⁿ' Espíritu quiaaⁿ na nla'no̱ⁿ'yo' ñ'oom na ma'mo̱o̱ⁿ nda̱a̱ya ndo' yati ntsata'jnaⁿ'yo' jom. 18Mati catseicanaaⁿñê naquii' nqueⁿ'yo' cha na nnda̱a̱ nla'no̱ⁿ'yo' ljo' tseixmaⁿ ñ'oom na cwicantyjaa' n'om'yo' na cantyja 'naaⁿ' juuna' maqueeⁿ'ñê 'o, ndo' juu na mañequiaaⁿ na cwicandaa nn'aⁿ na laxmaⁿ cwentaaⁿ'aⁿ, jeeⁿ cajndana' ndo' jeeⁿ t'maⁿ tseixmaⁿna', 19ndo' mati quiaaⁿ na caliuuya na jeeⁿcheⁿ ndya' t'maⁿ waa na jneiⁿ. Ñequio juu najndeii na matseixmaaⁿ nnda̱a̱ nnteijneiⁿ jaa nn'aⁿ na cwila'yuu'a ñ'eⁿñê. Ndo' cantyja 'naaⁿ' juu najneiⁿ luaa', 20s'aaⁿ na tando'xco Cristo na tue', ndo' s'aaⁿ na tjacjoo ntyjaa' ts'o̱o̱ⁿ ntyjaya la'ñeⁿ cañoom'luee, 21tqueeⁿ juu na t'maⁿti cwiluiiñe nchiiti cha'tso na cwiluiitquiendye ndo' mati jo nda̱a̱ cha'tso na cwitsa̱'ntjom na m'aⁿ cañoom'luee ñequio cha'tso na waa najnda̱. Juu cwiluiit'maⁿñeti jo nda̱a̱ cha'tso na m'aⁿ je' ndo' mati 'io cha. 22Mati s'aaⁿ na cha'tso nnom c'om nacje 'naaⁿ' juu ndo' s'aaⁿ na juu cwiluiiñe xqueⁿ ñ'oom jo nnom tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ, 23ee tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ cwiluiiñena' seii' Cristo ndo' matseicanda̱a̱'ñeñ'eⁿna' jom nc'e juu tmaaⁿ'ñeeⁿ ndo' cha'tso na niom, canda̱a̱' laxmaⁿna' nc'e Cristo.

will be added

X\