Hechos 8

1Ndo' tyom'aaⁿ Saulo jo' jo', seijomñê na jla'cuee' nn'aⁿ Esteban. Majuu xuee na jlacuee'na Esteban jnaⁿna' cwajndii tyontyjo̱ nn'aⁿ Jerusalén tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ jo' jo'. Jo' chii cha'tsondyena tyot'oom'ndyena cha'waa ts'o̱ndaa Judea ñequio ts'o̱ndaa Samaria. Macanda̱ nquiee apóstoles tîcat'oom'ndyena. 2Nt'om naⁿnom na jeeⁿ xcwee' n'om ñ'eⁿ Ty'o̱o̱ts'om ty'ecat'iuuna Esteban. Jeeⁿ tyotyueena na jnda nquiuna jom. 3Ndo' Saulo cwajndii tyoco'weeⁿ'eⁿ tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ. Tyojaaqueⁿ'eⁿ meiⁿ quii' l'aa ndo' ñequio na jndei'na' tyocwjeeⁿ'eⁿ naⁿnom ndo' naⁿlcu. Tyocjaachom joona. Tyotioom joona w'aancjo. 4Sa̱a̱ naⁿ'ñeeⁿ na t'oom'ndye tyoma'nomna. Meiⁿyuucheⁿ na tquiena tyola'neiⁿna ñ'oom' Ty'o̱o̱ts'om nda̱a̱ nn'aⁿ. 5Cwii joona, ts'aⁿ na jndyu Felipe, tjacueeⁿ cwii tsjoom ts'o̱ndaa Samaria. Tyotseineiiⁿ cantyja 'naaⁿ' Cristo nda̱a̱ nn'aⁿ tsjoom'ñeeⁿ. 6Cha'tsondye nn'aⁿ jeeⁿ ya tqueⁿna cwenta ñ'oom na tyotseineiiⁿ ndo' nty'iaana 'naaⁿ t'maⁿ na tyoch'eeⁿ na xocanda̱a̱ nnts'aa na cwe' najndeii nquii ts'aⁿ. 7Jndye nn'aⁿ na tyoleichuu jndyetia n'maaⁿna s'aaⁿ. Quia na jlui' jndyetia'ñeeⁿ quii' n'omna jndeii jla'xuaana'. Ndo' jndye nn'aⁿ na ntjeiⁿ nc'ee' ndo' ntjeiⁿ luee tco'yana' joona s'aa Felipe. 8Nc'e na ljo', jndye nn'aⁿ tsjoom'ñeeⁿ tyom'aⁿna na jeeⁿ neiiⁿna. 9Jnda̱ jaach'ee xuee m'aaⁿ cwii ts'aⁿ tsjoom'ñeeⁿ na calua'ñe na jndyu Simón. Tyonquiu'nn'aaⁿ nn'aⁿ ts'o̱ndaa Samaria, na tyotsoom nda̱a̱na na jom jeeⁿ t'maⁿ tseixmaaⁿ. 10Cha'tsondye nn'aⁿ meiiⁿ nn'aⁿ na t'maⁿ cwiluiindye meiiⁿ nn'aⁿ na cje laxmaⁿ jeeⁿ tyoqueⁿna cwenta ñ'oom na tyotseineiiⁿ. Tyoluena: —Simónm'aaⁿ', juu najndeii na matseixmaⁿ Ty'o̱o̱ts'om, t'maⁿ matseixmaaⁿ jo'. 11Nn'aⁿ tsjoom'ñeeⁿ tyoqueⁿna cwenta ñ'oom na tyotseineiiⁿ ee teiyo manquiu'nn'aaⁿ joona ñequio ts'iaaⁿ calua' na mach'eeⁿ. 12Sa̱a̱ quia na jnda̱ jla'yu'na ñ'oom na tyotseineiⁿ Felipe cantyja na matsa̱'ntjom Ty'o̱o̱ts'om ndo' cantyja 'naaⁿ' xuee' Jesucristo, quia jo' naⁿnom ndo' naⁿlcu teits'oomndyena. 13Ndo' manquiiti Simón seiyoom'm ndo' teits'oomñê. Ndo' ñequii'cheⁿ na ñ'eⁿñ'eeⁿ ñ'eⁿ Felipe. Jeeⁿ tyocjaawee' ts'oom 'naaⁿ t'maⁿ na tyoch'ee Felipe na xocanda̱a̱ nnts'aa na cwe' najndeii nquii ts'aⁿ meiⁿ xocjaantyjo̱o̱' ts'om ts'aⁿ chiuu tuiiyuu. 14Ndo' Jerusalén m'aⁿ apóstoles, jnda̱ na jndyena na mati nn'aⁿ ts'o̱ndaa Samaria macwila'yu'na ñ'oom' Ty'o̱o̱ts'om, jo' chii jñoomna we x'iaana, Pedro ñ'eⁿ Juan, na c'oo naⁿ'ñeeⁿ na m'aⁿ nn'aⁿ ndyuaa Samaria. 15Ndo' jnda̱ na tquie naⁿ'ñeeⁿ jo' jo', tyola'neiⁿna nnom Ty'o̱o̱ts'om. Taⁿna nnoom na quiaaⁿ Espíritu Santo naquii' n'om naⁿ'ñeeⁿ. 16Ee meiⁿcwiindye naⁿ'ñeeⁿ tyooto'ñoomna Espíritu Santo, macanda̱ na jnda̱ teits'oomndyena ñequio xuee' Ta Jesús. 17Quia jo' Pedro ñ'eⁿ Juan tioona lueena nacjoo naⁿ'ñeeⁿ. Mana to'ñoomna Espíritu Santo naquii' n'omna. 18Jnda̱ na nty'iaa' Simón na joo nn'aⁿ na jñom Ty'o̱o̱ts'om tioona lueena nacjoo naⁿ'ñeeⁿ, to'ñoomna Espíritu Santo naquii' n'omna, quia jo' seiqueeⁿna' ts'oom na mati jom ñe'cats'aaⁿ na ljo'. Jo' chii tsoom nda̱a̱na na s'om nñequiaaⁿ. 19Matsoom: —Quia'yo' na ntseixmaⁿya najndeii na cwilaxmaⁿ'yo' cha mati ja meiⁿcwi'ñeeⁿcheⁿ ts'aⁿ na nntio̱o̱ l'o̱o̱ nacjoo' maxjeⁿ nnco'ñom Espíritu Santo naquii' ts'om. 20Sa̱a̱ matso Pedro nnoom: —S'om 'naⁿ' catsuuna' ñ'eⁿndyu', 'u matsei'tiuu' na cwe' ñequio s'om nncoñom' naya na mañequiaa Ty'o̱o̱ts'om na cwicandaa nn'aⁿ na cwe'yu. 21'U ticatsona' na nntseijomndyu' ts'iaaⁿ 'naaⁿ' Ty'o̱o̱ts'om na cwil'aayâ ee tiyuu' na xcwee' ts'om' jo nnoom. 22Calcwe' ts'om' jnaⁿ' luaa', ndo' catseity'oondyu' nnom Ty'o̱o̱ts'om nts'aacheⁿndyo ndya' nntseit'maⁿ ts'oom 'u na luaa' m'aaⁿ' ts'om'. 23Ee manty'iaya juu jnaⁿ' matseijomna' cha'cwijom 'naⁿ ja na nnc'uu ts'aⁿ ndo' cha'cwijom l'uaancjo na chu'tyeⁿndyu'. 24Quia jo' tso Simón nda̱a̱na: —Cataⁿ'yo' nnom Ty'o̱o̱ts'om na meiⁿcwii ticatjo̱ⁿya cha'na cwindu'yo'. 25Pedro ñ'eⁿ Juan jla'neiⁿna ñ'oom' Ty'o̱o̱ts'om ndo' tjei'yuu'ndyena cantyja 'naaⁿ' Jesús. Jnda̱ chii jnaⁿna tsjoom'ñeeⁿ ndyuaa Samaria na nnc'oolcwee'na Jerusalén. Jndye njoom nch'u tyo'oowi'nomna ndyuaa'ñeeⁿ. Tyoñequiana ñ'oom naya nda̱a̱ nn'aⁿ. 26Ndo' seineiⁿ ángel 'naaⁿ' Ty'o̱o̱ts'om nnom Felipe. Tso: “Cja' nato Jerusalén na wjaana' tsjoom Gaza jo ntyja na macalui' caxjuu tsoom'naaⁿ.” Juu nato'ñeeⁿ mawinomna' ndyuaa yuu tjaa nn'aⁿ c'oom. 27Quia jo' teicantyjaaⁿ tjaaⁿ. Ndo' nato'ñeeⁿ teincwiñê ñ'eⁿ ts'aⁿ na jnaⁿ ndyuaa Etiopía. Tsaⁿ'ñeeⁿ tsaⁿs'a eunuco na mandi'ntjom nnom Candace tsaⁿscu na matsa̱'ntjom ndyuaa Etiopía. Tyom'aaⁿ ts'iaaⁿ na tyotseiweeⁿ s'om naquii' wats'iaaⁿ 'naaⁿ' tsaⁿscu'ñeeⁿ. Tjatseit'maaⁿ'ñê Ty'o̱o̱ts'om Jerusalén. 28Ndo' je' majaalcweeⁿ'eⁿ. Ñjoom ts'om tornom 'naaⁿ'aⁿ. Matsei'naⁿ'aⁿ tsom na chuu' ñ'oom' Ty'o̱o̱ts'om na seiljeii Isaías. 29Ndo' tso Espíritu nnom Felipe: —Catseicandyoo'ndyu' nacañoom' tornomwaa'. Catseijomndyu' ñ'eⁿ ts'aⁿ na maleiñ'oom juuna'. 30Quia jo' tjantyjaa' Felipe tsaⁿ'ñeeⁿ. Jñeeⁿ na matsei'naaⁿ' tsaⁿ'ñeeⁿ ñ'oom' Ty'o̱o̱ts'om na seiljeii Isaías. Tax'eeñê nnom, matsoom: —¿Aa matsei'no̱ⁿ' ñ'oom na matsei'naⁿ'? 31Matso tsaⁿ'ñeeⁿ nnoom: —¿Chiuu nnts'aayo̱ na nntsei'no̱ⁿ'a ee tjaa 'ñeeⁿ juu m'mo̱ⁿ no̱o̱ⁿ? Ndo' tcaⁿ tsaⁿ'ñeeⁿ na cjawa Felipe tornom 'naaⁿ'aⁿ na nncwacatyeeⁿ na cañoom'm. 32Luaa matso ñ'oom' Ty'o̱o̱ts'om na matsei'naaⁿ' tsaⁿ'ñeeⁿ: Quia na wjaañ'oom ts'aⁿ catsmaⁿ na nntseicueⁿ'eⁿ juuyo' meiⁿchjoo ticatseixuaayo'. Mati cha'na catsmaⁿ chjoo quia na matyjee ts'aⁿ som'm ñemaaⁿ' 'ñom, malaa'ti' tjaa ljo' tso ts'aⁿ na cwiluiiñe catsmaⁿ cwentaa' Ty'o̱o̱ts'om meiiⁿ na wi' tyotjoom. 33Jla'jnaaⁿ' nn'aⁿ jom meiⁿ tîcatu'xeⁿyana ñ'oom cantyja 'naaⁿ'aⁿ. Ndo' 'ñeeⁿ juu nnda̱a̱ nntseineiⁿ cantyja 'naaⁿ nn'aaⁿ'aⁿ na tjawicantyjoo', maxjeⁿ tjaa'naⁿ ee tyuaa' jla'cuee'na jom. 34Quia jo' tax'ee ts'aⁿ Etiopía nnom Felipe, matsoom: —Cwii naya'ñeeⁿ, catsu'ya' no̱o̱ⁿ, ts'aⁿ na tyoñequiaa ñ'oommeiiⁿñe ¿aa matseineiiⁿ cantyja 'naaⁿ' nqueⁿ oo aa cantyja 'naaⁿ' cwiicheⁿ? 35Quia jo' Felipe to̱o̱ⁿ'o̱ⁿ na tyotseineiiⁿ cantyja 'naaⁿ' juu ñ'oom'ñeeⁿ na teiljeii naquii' ñ'oom' Ty'o̱o̱ts'om na sei'naaⁿ' tsaⁿ'ñeeⁿ. Tyotseineiiⁿ nnom tsaⁿ'ñeeⁿ ñ'oom naya cantyja 'naaⁿ' Jesús. 36Ndo' yocheⁿ na cwi'oona nato, tquiena cwii joo yuu waa ndaatioo. Quia jo' matso ts'aⁿ Etiopía nnoom: —Canty'ia', ñjaaⁿ waa ndaatioo. ¿Aa waa na nntseicu'na' na nnleits'oomndyo̱? 37Quia jo' matso Felipe nnoom: —Xeⁿ matsei'yu' ñequio na xcwee' ts'om' nnda̱a̱ nleits'oomndyu'. T'o̱ tsaⁿ'ñeeⁿ matsoom: —Matseiyu'a na Jesucristo cwiluiiñê Jnda Ty'o̱o̱ts'om. 38Quia jo' ts'aⁿ Etiopía sa̱'ntjoom na cjaameintyjee' tornom. Jnda̱ chii wendyena tquiocuena, ty'ecuo̱na quii' ndaatioo, mana seits'oomñe Felipe jom. 39Jnda̱ na jlui'na quii' ndaatioo, nquii Espíritu na cwiluiiñe Ty'o̱o̱ts'om tjañ'oom Felipe. Ndo' ts'aⁿ Etiopía'ñeeⁿ taticanty'iaa'tyeeⁿ Felipe, sa̱a̱ tjaaⁿ nato na mawjaⁿ ñequio na neiiⁿ' ts'oom. 40Ndo' Felipe je', teitquioo'ñê tsjoom Azoto, ndo' jndye njoom tyomanoom tyoñequiaaⁿ ñ'oom naya hasta tuee'nnaaⁿ'aⁿ tsjoom Cesarea.

will be added

X\