Hechos 7

1Quia jo' tyee na cwiluiitquieñe tax'eeⁿ nnom Esteban, matsoom: —¿Aa mayuu' na ljo' tsu'? 2T'o̱ Esteban matsoom: —'O ta na cwiluiitquiendyo' ñequio 'o nn'aⁿya, candye'yo' ñ'oom na nntsjo̱o̱. Nquii Taya Ty'o̱o̱ts'om na jeeⁿ t'maⁿ cwiluiiñê, jom seica'mo̱ⁿñê nnom welooya Abraham quia na tyom'aaⁿ tsaⁿ'ñeeⁿ ndyuaa Mesopotamia cwii tjo̱o̱cheⁿ na nnc'oom tsjoom Harán. 3Tsoom nnom: “Calui' ñjaaⁿñe ndyuaa tsjom'. Ca'ndii' nn'aⁿ', cja' ndyuaa yuu na m'mo̱o̱ⁿya njom'.” 4Quia jo' jlueeⁿ'eⁿ ndyuaa tsjom'm, ndyuaa Caldea. Tjaaⁿ ndyuaa Harán, tyom'aaⁿñê jo' jo'. Ndo' jnda̱ na tue' tsotyeeⁿ, jndyoñ'oom Ty'o̱o̱ts'om jom ndyuaameiiⁿ yuu na m'aⁿ'yo' je'. 5Sa̱a̱ tînquiaa Ty'o̱o̱ts'om na nnaaⁿ'aⁿ ndyuaameiiⁿñe meiⁿ cwe' yuu na nncwintyjeeⁿ'eⁿ. Sa̱a̱ tyeⁿ 'ndii Ty'o̱o̱ts'om ñ'oom nnoom na maxjeⁿ nnaaⁿ'aⁿ ndyuaameiiⁿ. Nncuaana' cwentaa nn'aⁿ na nluiindyena tsjaaⁿ 'naaⁿ' jom xeⁿ jnda̱ tueeⁿ'eⁿ meiiⁿ xjeⁿ'ñeeⁿ tjaa'naⁿ ntseinaaⁿ. 6Tso Ty'o̱o̱ts'om na joo nn'aⁿ na nluiindyena tsjaaⁿ 'naaⁿ' Abraham cwiicheⁿ ndyuaa na nnc'omna na nchii ndyuaana. Tyeⁿ nndye'ntjomna nda̱a̱ nn'aⁿ ndyuaa'ñeeⁿ ndo' wi' nntjoomna nl'a naⁿ'ñeeⁿ cwii ñequiee siaⁿnto ntyu. 7Ndo' tso Ty'o̱o̱ts'om nnoom: “Ja nncu'xa̱ⁿ nn'aⁿ ndyuaa'ñeeⁿ yuu na nndye'ntjomtyeⁿ nn'aⁿ na nluiindyena tsjaaⁿ 'naⁿ' na wjaawicantyjoo', jnda̱ chii nlui'na jo' jo'. Tyuaawaañe nnc'omna nlat'maaⁿ'ndyena ja.” 8Tqueⁿtyeⁿ Ty'o̱o̱ts'om ñ'oom nnom Abraham na cats'aaⁿ 'naaⁿ tjaaⁿ' yu'ndaa na nluiiñe na tsaⁿs'a. Jo' chii quia na tuiiñe jnaaⁿ Isaac, s'aaⁿ na ljo' juu jnda̱ na jnda̱a̱' ñeeⁿ xuee na tuiiñe. Majo'ti s'aa Isaac ñequio jnaaⁿ Jacob. Ndo' Jacob ñecwii xjeⁿ s'aaⁿ ñequio canchoo'we ntseinaaⁿ na yonom, nn'aⁿ na cwiluiindye weloo jaa na canchoo'we ntmaaⁿ' nn'aⁿ Israel. 9’Sa̱a̱ joo ntseinda Jacob, jo' welooya na ñet'om teiyo, jeeⁿ ta̱a̱' n'omna tyjeena José. Nda̱a̱na jom nda̱a̱ nn'aⁿ na ty'eñ'om jom ndyuaa Egipto. Sa̱a̱ Ty'o̱o̱ts'om tyom'aaⁿ ñ'eⁿñê ndyuaa'ñeeⁿ. 10Seicandyaañe jom naquii' cha'tso nawi' na tyotjoom. Tquiaa na jndo̱' ts'oom ndo' s'aa na neiiⁿ' ts'om Faraón jom. Faraón'ñeeⁿ cwiluiiñê tsaⁿmaⁿts'iaaⁿ t'maⁿ ndyuaa Egipto, ndo' jom ty'ioom ts'iaaⁿ José na catsa̱'ntjom tsaⁿ'ñeeⁿ cha'waa ndyuaa Egipto hasta mati catsa̱'ntjom naquii' wats'iaaⁿ 'naaⁿ'aⁿ. 11’Xjeⁿ'ñeeⁿ jnaⁿna' na jndyo cwii jndo' t'maⁿ cha'waa ndyuaa Egipto ñequio ndyuaa Canaán. T'maⁿ nawi' tyotjoom nn'aⁿ. Ndo' welooya taticaliuna ljo' na nlcwa'na. 12Sa̱a̱ jnda̱ na jndii Jacob na niom nantquie ndyuaa Egipto, jñoom ntseinaaⁿ welooya najndyee ty'ena jo' jo'. 13Jnda̱ chii ty'ennda'na na jnda̱ we. Jo' na secaño̱o̱ⁿ José na tyjeena jom. Ndo' tsaⁿmaⁿts'iaaⁿ t'maⁿ'ñeeⁿ tajnaⁿ'aⁿ na nn'aaⁿ' José naⁿ'ñeeⁿ. 14Nda̱nquia seijndaa'ñe José na quiona ñequio tsotyena Jacob ñequio cha'tso nn'aⁿ w'aana. Joona jnda̱a̱' ndyeen'aaⁿ nchoo' qui nchoo' 'omndyena. 15Quia jo' tja Jacob ndyuaa Egipto. Jo' jo' m'aaⁿ ndo' tueeⁿ'eⁿ ndo' mati jo' jo' tja̱ ntseinaaⁿ, joo welooya na ñet'om teiyo. 16Jnda̱ chii ty'eñ'omlcwe' ntseinda Jacob sei'ts'o 'naaⁿ'aⁿ tsjoom Siquem ndyuaa yuu na jnaⁿna. Jo' jo' tjacant'iuu'ñê naquii' tsei'tsuaa na seijnda Abraham ñequio s'om xuee nda̱a̱ ntseinda Hamor. 17Tsoti Esteban: —Welooya nn'aⁿ Israel na ñet'om teiyo, tyom'aⁿtina ndyuaa Egipto. Ndo' yocheⁿ na tjatseicanda̱a̱'ñena' ñ'oom na tso Ty'o̱o̱ts'om nnom Abraham na nnts'aaⁿ, yacheⁿ tjawijndyendyena. 18Jndye nn'aⁿ ñet'om ts'iaaⁿ t'maⁿ ndyuaa Egipto. Ndo' tuee'ntyjo̱ na tjaquiee' cwii ts'aⁿ ts'iaaⁿ'ñeeⁿ na ticaljeii cantyja 'naaⁿ' ts'oo José. 19Cwajndii s'aaⁿ. Tco'weeⁿ'eⁿ welooya. Sa̱'ntjoom na ca'ndyetona yo'ndaa ndana na cwjeto. 20Joo ncuee'ñeeⁿ tuiiñe Moisés. Tjawee' ts'om Ty'o̱o̱ts'om yu'ndaa. Tyom'aaⁿñê waa' tsotyeeⁿ cha'na ndyee chi' na teix'eetina jom. 21Jnda̱ chii 'ndyena jom na cueeⁿ'eⁿ sa̱a̱ majuuto yuscu jnda tsaⁿmaⁿts'iaaⁿ t'maⁿ'ñeeⁿ ljeii jom. S'aa cha'na jnda jom. 22Jo' chii tyotsei'naⁿ'aⁿ cha'tso na jndo̱' n'om nn'aⁿ ndyuaa Egipto. T'oom na jndo̱' ts'oom na tyotseineiiⁿ ndo' na tyoch'eeⁿ. 23’Ndo' Moisés, quia na tuee' cha'na wen'aaⁿ choom'm s'aana' ts'oom na ñe'cjaacanoom'm nn'aⁿ tsjaaⁿ na tuiiñê ntseindacantyjo Israel. 24Tjaaⁿ ndo' nty'iaaⁿ'aⁿ na maco'wi' cwii ts'aⁿ Egipto cwii ts'aⁿ tsjaaⁿ na tuiiñê. Jo' chii tjacwañom'm tsaⁿ'ñeeⁿ. Tjeii'ñê juu nawi' na matjom. Seicueⁿ'eⁿ ts'aⁿ Egipto. 25Ee seitioom na nla'no̱ⁿ' nn'aaⁿ'aⁿ nn'aⁿ Israel na Ty'o̱o̱ts'om nntseicandyaañe joona ñequio l'o̱ jom, sa̱a̱ tîcala'no̱ⁿ'na. 26Ndo' cwiicheⁿ xuee ljeiiⁿ we nn'aⁿ Israel na cwilantja'ndye. Ndo' na l'ue ts'oom na caljoyaandyena, jo' chii tsoom nda̱a̱na: “'O re mann'aaⁿndyo'. ¿Chiuu na cwilantja'ndyo'?” 27Quia jo' juu ts'aⁿ na mal'ue tia' ñ'eⁿ x'iaa', ntqueeⁿ Moisés. Matsoom nnom: “¿'Ñeeⁿ juu tqueⁿ 'u na nntsa̱'ntjom' jâ, ndo' na nncu'xeⁿ' jâ? 28¿Aa ñe'catseicue' ja, cha'na seicue' ts'aⁿ Egipto wja?” 29Jnda̱ na jndii Moisés ñ'oomwaa', jleinoom. Tjaaⁿ ndyuaa Madián. Mana ljoo'ñeyaaⁿ jo' jo'. Ndo' jo' jo' tocoom, tuiindye we ntseinaaⁿ naⁿnom. 30’Quia na jnda̱ teinom wen'aaⁿ ntyu na m'aaⁿ jo' jo' seijomna' na m'aaⁿ cwii joo quii' jnda̱a̱ na nndyoo' sjo̱ Sinaí ndo' teitquioo'ñe cwii ángel nnoom naquii' ntsaachom na cwico tsa' ts'o̱o̱ n'ioom. 31T'maⁿ seitsaⁿ'na' jom na nty'iaaⁿ'aⁿ na ljo'. Ndo' seicandyoo'ñê na nnty'iaa'yaaⁿ ndo' jñeeⁿ na matseineiⁿ Ta Ty'o̱o̱ts'om. 32Matso: “Ja cwiluiindyo̱ Ty'o̱o̱ts'om cwentaa' welo' Abraham tsaⁿ na ñet'oom teiyoticheⁿ, ñ'eⁿ Isaac, ñ'eⁿ Jacob.” Quia na jndii Moisés na ljo', teiñê na macaty'ueeⁿ. Meiⁿ tîc'oomt'maaⁿ'ñê ts'oom na nnty'iaaⁿ'aⁿ. 33Ndo' matso Ty'o̱o̱ts'om nnoom: “Cwji' lcom' na ñjom' ee yujo' yuu na meintyje' matseixmaⁿna' tyuaa na lju' ee ñjaaⁿ tyje'caño̱o̱ⁿya. 34Ja jnda̱ nty'iayaya na cwita'wi' nn'aⁿ ndyuaa Egipto nn'aⁿya nn'aⁿ Israel ndo' jnda̱ jndiiya na cwitcweena. Ndo' jnda̱ jndyocua̱ya na nntseicandyaandyo̱ joona. Jo' chii majño̱o̱ⁿya 'u na cja'lcwe' ndyuaa Egipto.” 35Tsoticheⁿ Esteban: —Moisés'ñeeⁿ, ñel'a nn'aⁿ Israel na ticuee' n'omna jom. Jluena nnoom: “¿'Ñeeⁿ tqueⁿ 'u na nntsa̱'ntjom' jâ ndo' na nncu'xeⁿ' jâ?” Sa̱a̱ majuutoom ty'iom Ty'o̱o̱ts'om ts'iaaⁿ jom na catsa̱'ntjoom joona ndo' cantyja 'naaⁿ' na nndyaandyena nawi' na tyom'aⁿna. Luaa' s'aa Ty'o̱o̱ts'om xjeⁿ na teitquioo'ñe ángel nnoom naquii' tsa' ts'o̱o̱ nioom na cwico. 36Majuu Moisés'ñeeⁿ tjeiiⁿ'eⁿ welooya nn'aⁿ Israel na ñet'om ndyuaa Egipto. Jndye 'naaⁿ t'maⁿ tyoch'eeⁿ ndyuaa'ñeeⁿ na tjaa 'ñeeⁿ juu nnda̱a̱ nnts'aa na cwe' na jndeii nquii. Mati tyoch'eeⁿ ts'iaaⁿ t'maⁿ quia na tei'nomna Ndaaluee Wee ndo' quia na tyom'aⁿna ndyuaa yuu tjaa nn'aⁿ c'oom wen'aaⁿ ntyu. 37Manqueⁿ na tsoom nda̱a̱ nn'aⁿ Israel: “Ty'o̱o̱ts'om nlqueeⁿ cwii nn'aⁿ'yo' na nñequiaa ñ'oom'm nda̱a̱'yo' cha'xjeⁿ na tqueeⁿ ja.” 38Majom na tyocañ'eeⁿ ñ'eⁿndyena quia na tyotjomndyena ndyuaa yuu tjaa nn'aⁿ c'oom. Jo' jo' seineiⁿ ángel ñ'eⁿñê sjo̱ Sinaí. Jnda̱ chii jom seineiiⁿ nda̱a̱ welooya nn'aⁿ Israel. Jom to'ñoom ñ'oom na mañequiaana' na tseixmaⁿ ts'aⁿ na wando' añmaaⁿ' na jndyoteincoo' ñ'oom'ñeeⁿ nda̱a̱ jaa. 39’Sa̱a̱ welooya tiñe'calacanda̱na ñ'oom na tsoom nda̱a̱na. Tiñe'calañ'oom'ndyena jom ndo' l'ana na ñe'c'oolcwee'na ndyuaa Egipto. 40Yocheⁿ na tyom'aaⁿ xqueⁿ sjo̱ Sinaí jluena nnom Aarón: “Catsa' 'naⁿ na nlat'maaⁿ'ndyo̱ na nnc'oojndyeena' jo nda̱a̱ya na nntsaalcwa̱a̱'a Egipto ee ticaliuuya ljo' tjom Moisés ts'aⁿ na tjei' jaa jo' jo'.” 41Ndo' l'ana cwii 'naⁿ cha'cwijom quioo'jndyo chjoo. Ndo' nnom juuna' tyola'cwjeena quioo' na tyola't'maaⁿ'ndyena na l'ana xuee. Jeeⁿ neiiⁿna ñequio juuna', ndo' cwe' 'naⁿ na l'a nquieena. 42Jo' chii 'ndii Ty'o̱o̱ts'om joona. 'Ndiitoom na calat'maaⁿ'ndyetona meiiⁿ cwe' cancjuu na m'aⁿ tsjo̱'luee. Ee naquii' libro na teiljeii ñ'oom ndyuee profetas, matsona': 'O nn'aⁿ Israel, ¿aa no̱o̱ⁿya tyoñequia'yo' quioo' na tyolacwje'yo' wen'aaⁿ ntyu'ñeeⁿ na tyom'aⁿ'yo' ndyuaa yuu tjaa nn'aⁿ c'oom? 43Nchii jo' l'a'yo' ee ñejleiñ'om'yo' w'aaliaa na ndii' juu na tyolat'maaⁿ'ndyo' na jndyu Moloc. Ndo' ñejleiñ'om'yo' caxjuu cwentaa' juu na tyolat'maaⁿ'ndyo' na jndyu Renfán. Ñequii'cheⁿ 'naⁿ na ñel'a' ncjo'yo' ñejlat'maaⁿ'ndyo'. Jo' chii je' nncwjii'a 'o ndyuaa tsjom'yo', nntsa'yo' hasta cwiicheⁿ na ntyjaa' tsjoom Babilonia. 44Tsoti Esteban: —Juu ndyuaa yuu tjaa nn'aⁿ c'oom, tyoleiñ'om welooya w'aaliaa yuu tyolawena ljo̱' lcaa' na chuu' ljeii na tqueⁿ Ty'o̱o̱ts'om na matsa̱'ntjomna'. W'aaliaa'ñeeⁿ tuiina' cha'xjeⁿ na sa̱'ntjom Ty'o̱o̱ts'om Moisés na cats'aaⁿ juuna' cha'xjeⁿ na jnda̱ t'mo̱o̱ⁿ nnom. 45Juuna' tquioñ'om ndacantyjo welooya quia na jndyochuu Josué joona ndyuaameiiⁿñe, ndyuaa na seijndaa'ñe Ty'o̱o̱ts'om na nndaana. Jo' chii tjeiiⁿ'eⁿ nn'aⁿ na ñet'om ndyuaameiiⁿñe cha ljoo'ndye welooya juuna'. Ndo' ljooñe tyoleiñ'omtina w'aaliaa'ñeeⁿ hasta quia na tyom'aaⁿ David. 46Tjawee' ts'om Ty'o̱o̱ts'om ñ'eⁿ David. Ñe'cats'aaⁿ w'aa yuu na nnc'oom Ty'o̱o̱ts'om na tyotseit'maaⁿ'ñe weloom'm Jacob tsaⁿ na ñet'oom teiyocheⁿ. 47Sa̱a̱ jnaaⁿ Salomón juu s'aa w'aa'ñeeⁿ cwentaa' Ty'o̱o̱ts'om. 48Sa̱a̱ nquii Ty'o̱o̱ts'om na m'aaⁿ na ndyeticheⁿ, nchii cwe' naquii' l'aa na cwil'a nn'aⁿ mac'eeⁿ. Ee luaa' tyotso profeta. Seineiⁿ tsaⁿ'ñeeⁿ ñ'oom na seijno̱o̱ⁿ'o̱ⁿ ts'om. Matsoom: 49Cañoom'luee matseixmaⁿna' ndio 'naⁿya yuu na mawacatya̱ⁿ na matsa̱'ntjo̱ⁿya. Ndo' tsjoomnancue matseixmaⁿna' cwe' cha'na 'naⁿ yuu na cwiquie' nc'a̱. Nc'e na ljo', ¿cwaaⁿ w'aa na nl'a'yo' cwentaya? Ndo' ¿yuu waa cwii joo na ya na nncwajndya̱ya? 50¿Aa nchii nnco̱ s'aa cañoom'luee ñ'eⁿ tsjoomnancue? 51Tsoti Esteban: —'O maxjeⁿ quie' n'om'yo'. Matseijomna' 'o cha'na nn'aⁿ na tyoolat'maaⁿ'ndye Ty'o̱o̱ts'om ee tiñe'candye'yo' meiⁿ tiñe'calacanda̱'yo'. Ñequii' na cwitsa'yo' nacjoo' Espíritu Santo. Cha'na tyol'a welo'yo' na ñet'om teiyo majo'ti cwil'a' 'o. 52Welo'yo' na ñet'om teiyo, ¿Aa tyom'aaⁿ 'ñeeⁿ na tyoñequiaa ñ'oom' Ty'o̱o̱ts'om na tîcata'wi'na juu? Maxjeⁿ tjaa'naⁿ. Jla'cwjee welo'yo' nn'aⁿ na tyola'candii na nndyo nquii Cristo na cwiluiiñe na maty'iomyana'. Ndo' 'o je' jnda̱ tquia'yo' cwenta jom ndo' jnda̱ jla'cue'yo' jom. 53Mancjo'to'yo' na to'ñoom'yo' ljeii na tqueⁿ Moisés na tquia ángeles. Sa̱a̱ tîcalacanda̱'yo' juuna'. 54Jnda̱ na jndye naⁿ'ñeeⁿ ñ'oommeiⁿ' jla'jmeiⁿ'ndyena. Tyoteinquiena ndei'n'omna na jeeⁿ lioona Esteban. 55Sa̱a̱ jom na too' naquii' ts'oom m'aaⁿ Espíritu Santo, jlunda̱a̱ñê nty'iaaⁿ'aⁿ cañoom'luee. Nty'iaaⁿ'aⁿ na neiⁿcoo' caxuee yuu na m'aaⁿ nquii Ty'o̱o̱ts'om ndo' nty'iaaⁿ'aⁿ Jesús na meintyjee' jo ntyjaa' Ty'o̱o̱ts'om ntyjaya. 56Ndo' matsoom: —Canty'ia'yo'. Manty'iaya na jnda̱ jnaaⁿ cañoom'luee, ndo' nquii Jesús na jnaⁿ jo' jo', meintyjee' ntyjaa' Ty'o̱o̱ts'om ntyjaya. 57Quia jo' jndeii tyolaxuaana na jmeiⁿ'ndyena. Jlacu'na lua'quina ndo' ñejom ty'enomna nacjoom'm. 58Ndo' jndeii ty'entquieena jom nnom tsjoom. Jnda̱ chii nn'aⁿ na tyolue na waa jnaaⁿ'aⁿ tjeii'na liaa na teincoo na cwee'na. Tsa̱'na joona', ndo' cwii ts'aⁿ na titquieñe na jndyu Saulo jom s'aaⁿ cwenta joona'. Jnda̱ chii tyotmeiiⁿ'na ljo̱' Esteban. 59Ndo' yocheⁿ na cwitmeiiⁿ'na ljo̱' jom, seineiiⁿ nnom Ty'o̱o̱ts'om, matsoom: —Ta Jesús, coñom' añmaⁿ 'naⁿya. 60Jnda̱ chii tcoom'm xtyeeⁿ. Jndeii seixuaⁿ, matsoom: —Ta, tincwjaa'ndyu' cwenta jnaaⁿna na cwila'cuee'na ja. Jnda̱ tsoom na luaa' mana tueeⁿ'eⁿ.

will be added

X\