Hechos 5

1Sa̱a̱ cwii tsaⁿs'a na jndyu Ananías ñequio scoom'm Safira nda̱a̱na cwii tyuaana. 2Ananías'ñeeⁿ seitjo̱o̱ⁿ cantyja na jna̱a̱ⁿ juuna', ndo' mati ntyjii scoom'm na ljo'. Jndyochom meiⁿ ndyee s'om'ñeeⁿ tquiaaⁿ joona' nda̱a̱ apóstoles. 3Quia jo' matso Pedro nnoom: —'U re Ananías, ¿chiuu na tquiaandyu' na seicatoo' Satanás naquii' ts'om' na tsu' cantu nnom Espíritu Santo na seitjo̱o̱' s'om cantyja na jnda̱a̱' tyua'? 4Yocheⁿ na tyoojnda̱a̱' juuna' tseixmaⁿna' cwenta'. Ndo' mati meiiⁿ na jnda̱ jnda̱a̱' juuna' wanaaⁿ na nntsa' yuu na l'ue ts'om' ñequio s'om'ñeeⁿ. 'U je' ¿chiuu na luaa' seitiuu' naquii' ts'om'? Ee nchii nda̱a̱ nn'aⁿ sa' cantu, nnom nquii Ty'o̱o̱ts'om waa jnaⁿ'. 5Jnda̱ na jndii Ananías ñ'oommeiⁿ' cwe' tiooñetoom na ts'oo jom. Quia jo' cha'tsondye nn'aⁿ na nquiuna na luaa' tuii, jeeⁿ ndya' nioom tyuena. 6Teicantyja naⁿnom na titquiendye. Jla'tyjoondyena liaa jom. Jnda̱ chii tjeii'na jom, mana ty'ecat'iuuna jom. 7Jnda̱ teinom cha'na ndyee hora na tuii na ljo' ndo' tyjee' scuu' Ananías. Meiⁿchjoo ticaljeiiⁿ aa waa ljo' tuii. 8Quia jo' Pedro matsoom nnom tsaⁿ'ñeeⁿ: —Catsu' no̱o̱ⁿ, ¿aa mayuu' na laa'ti'ndyo nda̱a̱'yo' tyuaa'yo'? Ndo' matso tsaⁿ'ñeeⁿ nnoom: —Mayuu' na laa'ti'. 9Matso Pedro nnoom: —Chiuu na jla'tjom'yo' ñ'oom na tquio'nn'aⁿ'yo' Espíritu na cwiluiiñe Ty'o̱o̱ts'om. Aa ndi', je' cwiquie nn'aⁿ na ty'ecat'iuu sa'. Mati 'u maje'ndyo nnc'oocat'iuuna 'u. 10Mantyjacheⁿ cwe' tiooñetoom jo nc'ee Pedro, mana tueeⁿ'eⁿ. Quia na ty'equie' naⁿnom na titquiendye jliuna na jnda̱ tueeⁿ'eⁿ. Mati tjeii'na jom, ty'ecat'iuuna jom nacañoom' saaⁿ'aⁿ. 11Quia jo', tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ, jeeⁿ t'maⁿ seicaty'uena' ndo' mati nt'omcheⁿ nn'aⁿ na tyondye na luaa' tuii. 12Nn'aⁿ na cwiluiindyena apóstoles jndye nnom 'naaⁿ l'ana ñequio ts'iaaⁿ t'maⁿ na xonda̱a̱ nluii na cwe' najndeii nquii ts'aⁿ. Ndo' cha'tsondye nn'aⁿ na jnda̱ cwila'yu' tjoom' t'maⁿna na tyotjomndyena wats'om t'maⁿ na jndyu leiroo'na' Salomón. 13Sa̱a̱ nt'omcheⁿ nn'aⁿ nquiaana na nla'jomndyena, meiiⁿ na ljo' tyotjeii'yana nn'aⁿ na cwila'yu'. 14Ndo' tjawijndyendyeti nn'aⁿ na tyola'yu' ñequio Ta Jesús, naⁿnom ndo' naⁿlcu. 15Tyotsa̱'na nn'aⁿwii ndyuee nantaa, cjoo' nduu ndo' cjoo' luee, cha quia na wjaawinom Pedro nnquioo ncwaaⁿ'aⁿ nacjoo cwantindye joona cha nn'maaⁿna. 16Mati nn'aⁿ na m'aⁿ njoom na nndyoo' Jerusalén tquiochona nn'aⁿwii ñ'eⁿ nn'aⁿ na tyoleichuu jndyetia. Ndo' cha'tsondye naⁿ'ñeeⁿ n'maaⁿna. 17Quia jo' tyee na cwiluiitquieñe ñequio tmaaⁿ' nn'aⁿ judíos na ñ'eeⁿ ñ'eⁿñê na jndyu saduceos, jlawendyena nacjoo apóstoles ee jeeⁿ lioona naⁿ'ñeeⁿ. 18Jo' chii t'uena naⁿ'ñeeⁿ. Tioomna joo w'aancjo. 19Sa̱a̱ teijaaⁿ tyjee' cwii ángel cwentaa' Ta Ty'o̱o̱ts'om. Seicanaaⁿñê ndyueel'a w'aancjo. Tjeiiⁿ'eⁿ naⁿ'ñeeⁿ ch'eⁿ. 20Matsoom nda̱a̱na: —Catsa'yo' wats'om t'maⁿ. Calaneiⁿ'yo' nda̱a̱ nn'aⁿ ñ'oomwaa' cantyja 'naaⁿ' na nncwando' añmaaⁿ' ts'aⁿ. 21Jnda̱ na jndyena ñ'oomwaa' ty'ena. Ndo' cwitsjoom ty'equie'na wats'om t'maⁿ. Tyot'mo̱o̱ⁿna nda̱a̱ nn'aⁿ. Quia jo' tyee na cwiluiitquieñe ñequio nn'aⁿ na ñ'eeⁿ ñ'eⁿñê, jnda̱ na tjomndyena ñequio cha'tsondye nn'aⁿ na cwiluiindye naⁿmaⁿn'iaaⁿ nda̱a̱ nn'aⁿ Israel, sa̱'ntjomna na cjaacandyoo'ndye apóstoles na tioomna w'aancjo. 22Sa̱a̱ quia na jnda̱ tquie sondaro 'ndyoots'a w'aancjo jliuna na tac'om naⁿ'ñeeⁿ jo' jo'. Jo' chii ty'elcwee'na. Ty'ela'candiina na tac'om naⁿ'ñeeⁿ. 23Jluena: —Quia na squia̱a̱yâ 'ndyoots'a w'aancjo tyeⁿ ta̱'na' ndo' m'aⁿ sondaro na cwil'a cwenta, sa̱a̱ quia na jla'canaaⁿndyô̱ jo' jliuuyâ tjaa'ñeeⁿ c'oom. 24Ndo' tyee na cwiluiitquieñe ñequio ts'aⁿ na matsa̱'ntjom nn'aⁿ na cwil'a cwenta wats'om t'maⁿ ñequio nt'omcheⁿ ntyee na cwiluiitquiendye, quia na jndyena na luaa', tyom'aaⁿ' n'omna chiuu ya nluii cha nleicheⁿ ñ'oomwaa'. 25Ndo' mañejuu xjeⁿ'ñeeⁿ tyjee'cañoom cwii ts'aⁿ, seicandii joona, matso: —Nn'aⁿ na tiom'yo' w'aancjo, naquii' wats'om t'maⁿ meintyjee'na je'. Cwit'mo̱o̱ⁿna nda̱a̱ nn'aⁿ. 26Quia jo' ts'aⁿ na matsa̱'ntjom tjaaⁿ ñ'eⁿ nn'aⁿ 'naaⁿ'aⁿ. Ty'ecachona naⁿ'ñeeⁿ sa̱a̱ nchii ñequio na jndei'na' ee nquiaana xeⁿ nn'aⁿ na cwindye ñ'oom'ñeeⁿ njñom ljo̱' joona. 27Ndo' quia na jnda̱ tquiennda'na yuu cwitjomndye naⁿman'iaaⁿ, tquiana cwenta pra̱so nda̱a̱ naⁿ'ñeeⁿ. Ndo' tyee na cwiluiitquieñe, seilcwii'ñê nda̱a̱ pra̱so'ñeeⁿ. 28Matsoom: —Mandye'yo' na tyol'uuyâ nda̱a̱'yo' ñequio ñ'oom na jndei'na' na tant'mo̱ⁿ'yo' ñ'oom cantyja 'naaⁿ' Jesús. Sa̱a̱ 'o je' cha'waa naquii' Jerusalén jnda̱ manquiu nn'aⁿ ñ'oom na cwit'mo̱ⁿ'yo' nda̱a̱na. Mati cwindu'yo' na jâ cho̱o̱yâ jnaⁿ na tue' Jesús. 29Quia jo' Pedro ñequio nt'omcheⁿ apóstoles, t'o̱o̱na, jluena: —Jndei'tina' na calacanda̱a̱yâ ñ'oom na matso Ty'o̱o̱ts'om nchiiti ñ'oom na cwilue nn'aⁿ. 30Manqueⁿ na tyola't'maaⁿ'ndye welooya na ñet'om teiyo, tquiaaⁿ na wando'xco Jesús na jla'cue'yo' na ty'iom'yo' nacjoo' ts'oom'naaⁿ. 31Seit'maaⁿ'ñê juu. Tqueeⁿ juu ntyjaa' ts'o̱o̱ⁿ ntyjaya. Tqueeⁿ juu na cwiluiit'maaⁿñe ndo' na macwji'n'maaⁿñe nn'aⁿ cha calcwe' n'om nn'aⁿ Israel ndo' na nntseit'maⁿ ts'om jnaaⁿna. 32Jâ cwitjei'yuu'ndyô̱ cantyja 'naaⁿ ñ'oommeiiⁿ, ndo' majo'ti mach'ee Espíritu Santo, nquii na mañequiaa Ty'o̱o̱ts'om naquii' n'om nn'aⁿ na cwila'canda̱ ñ'oom na matsoom. 33Jnda̱ na jndye naⁿmaⁿn'iaaⁿ ñ'oommeiⁿ' jeeⁿ ndya' lioona hasta ñe'cala'cwjeena naⁿ'ñeeⁿ. 34Sa̱a̱ teicantyja cwiindye joona, ts'aⁿ na jndyu Gamaliel. Jom ts'aⁿ tmaaⁿ' fariseos ndo' ma'mo̱o̱ⁿ chiuu matsa̱'ntjom ljeii na tqueⁿ Moisés, cha'tsondye nn'aⁿ ya ñ'oom nquiuna cantyja 'naaⁿ'aⁿ. Teintyjeeⁿ'eⁿ ndo' sa̱'ntjoom na calui'ya apóstoles ch'eⁿ chjoowi' taⁿ'ndyo. 35Tsoom nda̱a̱ nc'iaaⁿ'aⁿ: —'O ntyja̱ño̱ⁿ nn'aⁿ Israel, cal'a'yo' cwenta ljo' na cwilatiuu'yo' na ñe'cal'a'yo' ñ'eⁿ naⁿnomm'aⁿ'. 36Ee cjañjoom' n'om'yo' jaach'eeti xuee tyom'aaⁿ Teudas. Tyotsoom na jom ts'aⁿ na t'maⁿ cwiluiiñe, ndo' cha'na ñequiee siaⁿnto naⁿnom jla'jomndyena ñ'eⁿñê. Sa̱a̱ jla'cuee' nn'aⁿ jom, ndo' cha'tsondye nn'aⁿ na jla'jomndye ñ'eⁿñê t'oom'ndyena. Mana ntycwii cantyja 'naaⁿ'aⁿ. 37Jnda̱ teinom na ljo', xcwe na cwiwiljeiixco ncuee nn'aⁿ, mati seis'añe Judas ts'aⁿ Galileo. Ndo' jndye nn'aⁿ jla'jomndyena ñ'eⁿñê. Sa̱a̱ mati jla'cuee' nn'aⁿ jom, ndo' cha'tsondye nn'aⁿ na tyola'jomndye ñ'eⁿñê majo'ti t'oom'ndyena. 38Jo' chii matseijndo̱'a n'om'yo', ca'ndye'yo' ti'm'aⁿ'. Cajndoo' nquieena, ee xeⁿ ñ'oommeiⁿ' ñequio ts'iaaⁿmeiⁿ' cwila'xmaⁿna' cwe' ts'iaaⁿ 'naaⁿ nn'aⁿ quia jo' nncjaandyue cheⁿnquieena'. 39Sa̱a̱ xeⁿ cwila'xmaⁿna' ts'iaaⁿ 'naaⁿ' Ty'o̱o̱ts'om, quia jo' tijoom canda̱a̱ na nlatyui'yo' joona'. Nleitquioo'to na cwitsa'yo' nacjoo' Ty'o̱o̱ts'om. 40Ndo' jla'jomndye nc'iaa' Gamaliel ñ'oom na tsoom nda̱a̱na. Jo' chii tqueeⁿ'nnda'na apóstoles. Cwe' tyotjaa'na naⁿ'ñeeⁿ. Ndo' ñequio na jndei'na' tyoluena na tant'mo̱o̱ⁿ naⁿ'ñeeⁿ ñ'oom ñequio xuee' Jesús. Jnda̱ chii jñoomna naⁿ'ñeeⁿ. 41Ndo' naⁿ'ñeeⁿ je', jlui'na quii'ntaaⁿ naⁿmaⁿn'iaaⁿ ñequio na neiiⁿna na tquiaa Ty'o̱o̱ts'om na cwila'xmaⁿna na co'wi'na' joona nc'e na cwitjei'yuu'ndyena ñ'oom ñequio xuee' Jesús. 42Ndo' 'io ndi 'io tîc'oomeintyjee'na na tyot'mo̱o̱ⁿna naquii' wats'om t'maⁿ ndo' mati l'aa nn'aⁿ. Tyot'mo̱o̱ⁿna ndo' tyola'neiⁿna ñ'oom cantyja 'naaⁿ' Jesús na cwiluiiñe Cristo.

will be added

X\