Hechos 28

1Jnda̱ na jlui'n'maaⁿndyô̱ nawi'ñeeⁿ chii jliuuyâ na Malta jndyu ndyuaaxeⁿncwe yuu squia̱a̱yâ. 2Nn'aⁿ ndyuaa'ñeeⁿ l'ana na ya nn'aⁿndyena ñ'eⁿndyô̱. Jla'canaaⁿndyena chom. Jluena na calawiindyô̱, ee jeeⁿ teiⁿ ndo' jnda̱ macwiwa'. 3Pablo seixcweeⁿ cwii sa̱a̱' n'oom teincwe. Ndo' quia na tioom joona' naquii' chom jlui'nom cwii catsuu na maleinomyo' chom. Mana t'uiiyo' ts'o̱o̱ⁿ tyeⁿ. 4Ndo' nn'aⁿ ndyuaa'ñeeⁿ quia na nty'iaana na tiñe'ca'ndiiyo' ts'o̱o̱ⁿ tyola'neiⁿ cheⁿnquieena nda̱a̱ nc'iaana. Jluena: —Tsaⁿm'aaⁿ' ¿aa nchii maxjeⁿ ts'aⁿ na ñeseicwjee nn'aⁿ jom? Ee meiiⁿ na jlui'n'maaⁿñê ts'om ndaaluee sa̱a̱ je' maxjeⁿ nntioom cantyja na tis'a ñes'aaⁿ nncueeⁿ'eⁿ. 5Sa̱a̱ Pablo seitei'ncweeⁿ'eⁿ ts'o̱o̱ⁿ. Mana tiooñeyo' naquii' chom. Tjaa na teinioom'm. 6Naⁿ'ñeeⁿ tyomeindoo'na, jla'tiuuna na nncwjaa'ñena' tcoo' Pablo oo na mats'ia jo' cwe' nnquiooñetoom mana nncueeⁿ'eⁿ. Sa̱a̱ jnda̱ tjawiquiuu' na meindoo'na, cwinty'iaana na tjaa na teinioom'm, jo' chii cwiicheⁿ ljo jla'tiuuna. Jluena na jom cwii ty'o̱o̱ts'om. 7Nndyoo' yuu tyolawindyô̱ waa tyuaa cwentaa' ts'aⁿ na cwiluiitquieeñeti tyuaaxeⁿncwe'ñeeⁿ. Publio jndyu tsaⁿ'ñeeⁿ. Tsoom na caljoo'ndyo̱yaayâ waⁿ'aⁿ. Quia jo' ljoo'ndyô̱ jo' jo' cwii ndyee xuee. Seiñ'oom'ñê jâ tquiaaⁿ na tcwaa'â. 8Ndo' seijomna' na wii' tsotyeeⁿ. Matseicona' juu ndo' mateii' ndaaniom'. Tjantyjaa' Pablo tsaⁿ'ñeeⁿ. Seineiiⁿ nnom Ty'o̱o̱ts'om. Jnda̱ chii tioom l'o̱o̱ⁿ nacjoo' tsaⁿ'ñeeⁿ, sein'maaⁿ juu. 9Jnda̱ tuii na luaa', nt'omcheⁿ nn'aⁿwii ndyuaaxeⁿncwe'ñeeⁿ ty'entyjaa'na Pablo, ndo' n'maaⁿna. 10Jndye naya l'a naⁿ'ñeeⁿ jâ. Ndo' quia na saacuo̱o̱yâ w'aandaa na macwitsaayâ, tquiana cha'tso 'naⁿ na nleil'uee'ndyô̱ yocheⁿ na cwitsaayâ. 11Jnda̱ teinom ndyee chi' na squia̱a̱yâ ndyuaaxeⁿncwe'ñeeⁿ ndo' saacuo̱o̱yâ w'aandaa'ñeeⁿ. Juuna' jnaⁿna' tsjoom Alejandría, sa̱a̱ tjameintyjee'yana' ndyuaaxeⁿncwe'ñeeⁿ cha'waa ncueesua'. Juuna' ñoom 'ndyoonnom Cástor ñequio Pólux. 12Saayâ squia̱a̱yâ tsjoom Siracusa yuu na cwi'oomeintyjee' l'aandaa. Jo' jo' ljoo'ndyo̱yaayâ cwii ndyee xuee. 13Jluii'â jo' jo'. Saasaatya̱a̱yâ saawi'no̱o̱ⁿyâ cañoom'wi' ndyuaa hasta xjeⁿ na squia̱a̱yâ tsjoom Regio. Teincoo cwiicheⁿ xuee jndyo jndye na jnaⁿna' jo ndo' cantyja na macalui' caxjuu ts'oom'naaⁿ. Tjantquie jndye'ñeeⁿ w'aandaa jo cantyja na cwitsaayâ. Ndo' xuee jnda̱ we squia̱a̱yâ tsjoom Puteoli. Jo' jo' jluii'â w'aandaa na macanda̱. 14Tsjoom'ñeeⁿ jliuuyâ nt'om nn'aⁿ na cwila'yu'. Jlue naⁿ'ñeeⁿ na caljoo'ndyô̱ ñ'eⁿndyena cwii ntquiee' xuee. Jo' na ljoo'ndyô̱. Jnda̱ chii saayâ tsjoom Roma. 15Ndo' nn'aⁿ na cwila'yu' tsjoom Roma, quia na jndyena na mañjomndyô̱ nato, quia jo' nt'omndye joona tquiocatjomndyena jâ xjeⁿ tsjoom Foro de Apio ndo' nt'omndye joona tquiocatjomndye jâ cwii joo na jndyu Tres Tabernas. Jnda̱ na nty'iaa' Pablo naⁿ'ñeeⁿ tquiaaⁿ na quianl'uaa' Ty'o̱o̱ts'om ndo' ty'oomt'maaⁿ'ñê ts'oom. 16Quia na jnda̱ squia̱a̱yâ tsjoom Roma, capeitaⁿ tquiaaⁿ cwenta pra̱so l'o̱ ts'aⁿ na cwiluiitquieñe cantyja 'naaⁿ sondaro. Sa̱a̱ Pablo tquiana na wandyo̱' nnc'oom ñequio cwii sondaro na nnts'aa cwenta jom. 17Jnda̱ ndyee xuee na squia̱a̱yâ, tqueeⁿ' Pablo nn'aⁿ na cwiluiitquiendye naquii' lan'om cwentaa nn'aⁿ judíos tsjoom'ñeeⁿ. Quia na jnda̱ tjomndyena seineiiⁿ nda̱a̱na. Matsoom: —'O nn'aⁿya meiⁿchjoo tjaa ljo' s'aaya nacjoo nc'iaaya nn'aⁿ judíos, meiⁿ nacjoo' costumbre 'naaⁿ welooya na ñet'om teiyo. Sa̱a̱ meiiⁿ na ljo' t'uena ja na pra̱so tsjoom Jerusalén. Tioona ja luee nn'aⁿ romanos. 18Ndo' naⁿ'ñeeⁿ taⁿna na catsjo̱o̱ nnco̱ chiuu waa. Jnda̱ jndyena ñ'oom'ñeeⁿ ñe'cala'candyaandyena ja ee jla'no̱ⁿ'na tjaa ljo' s'aa na tseixmaⁿ na c'io̱. 19Sa̱a̱ tical'ue n'om nn'aⁿ judíos na ljo'. Jo' na jndei'na' s'aa ty'oo na nquii tsaⁿmaⁿts'iaaⁿ t'maⁿ tsjoomwaañe nncu'xeeⁿ ja. Sa̱a̱ ja nchii na maqua̱ⁿya ñ'oom nacjoo nn'aⁿ ndyuaa tsjomya na jndyo̱o̱ ñjaaⁿ. 20Tqueeⁿ'ndyo̱ 'o na nnty'iaya 'o ndo' na nntseina̱ⁿya ñ'eⁿndyo'. Ee cantyja 'naaⁿ' na matseiyu'a na jnda̱ jndyo nqueⁿ na ntyjaa' n'o̱o̱ⁿ jaa nn'aⁿ judíos na nncwji'n'maaⁿñe jaa, jo' na chu'tyeⁿndyo̱ ñequio l'uaancjomeiiⁿñe. 21Quia jo' jluena nnoom: —Jâ meiⁿcwii carta tyoocwjee' na m'aaⁿyâ na nnaⁿna' ts'o̱ndaa Judea na matseineiⁿna' cantyja 'naⁿ'. Ndo' mati nc'iaaya nn'aⁿ judíos na cwiquie ñjaaⁿ tjaa'naⁿ ñ'oom cotuee'na nacjo'. 22Sa̱a̱ ñe'candya̱a̱yaayâ chiuu waa na matsei'no̱ⁿ' cantyja 'naaⁿ' ñ'oom xco na cwilayu'yo' ee manquiuuyâ na cha'tso nn'aⁿ cwiluena na tis'a ñ'oom'ñeeⁿ. 23Jo' chii jla'jndaa'ndyena cwaaⁿ cwii xuee na nntjomndyennda'na. Quia na tue'ntyjo̱ xuee'ñeeⁿ jndyendye nn'aⁿ tjomndye yuu mac'eⁿ Pablo. Cwitsjoom to̱o̱ⁿ'o̱ⁿ tyotseineiiⁿ nda̱a̱na hasta xjeⁿ na tmaaⁿcheⁿ. Tyotseineiiⁿ cantyja na matsa̱'ntjom Ty'o̱o̱ts'om. L'ue ts'oom na nla'no̱ⁿ'na cantyja 'naaⁿ' Jesús. Jo' chii tjac'oomna' na seineiiⁿ cantyja 'naaⁿ' ljeii na tqueⁿ Moisés ndo' cantyja 'naaⁿ' ñ'oom na tyola'ljeii profetas. 24Nt'om naⁿ'ñeeⁿ jla'yu'na ñ'oom na seineiiⁿ, ndo' nt'om naⁿ'ñeeⁿ tîcala'yu'na. 25Ticatjoom' jla'tiuuna ñ'oom na jndyena. Jo' chii t'oom'ndyena. Sa̱a̱ tsojndyee Pablo cwii ñ'oom nda̱a̱na. Matsoom: —Mayuu' ñ'oom na seijndo̱' Espíritu Santo ts'om profeta Isaías. Juu ñ'oom'ñeeⁿ seineiiⁿ nda̱a̱ welooya na ñet'om teiyo. 26Matsoom: Cja' na m'aⁿ naⁿm'aⁿ'. Catsu' nda̱a̱na: Luaa matseicandii Ty'o̱o̱ts'om 'o: 'O mayuu' nndye'yo' sa̱a̱ xocala'no̱ⁿ'yo'. Ndo' mayuu' na nnty'ia'nda̱a̱'yo' sa̱a̱ xoqueⁿ'yo' cwenta. 27Ee jnda̱ teiquie' n'om'yo'. Jnda̱ s'aana' ñ'eⁿndyo' cha'cwijom na candaa'yo'. Ndo' jnda̱ s'aana' cha'cwijom na nchjaaⁿ'yo'. Jeeⁿ cachjoo cwila'no̱ⁿ'yo' cantyja 'naaⁿ' Ty'o̱o̱ts'om. Jo' na matseijomna' 'o na ndoo' nchjaaⁿ'yo' ndo' na candaa'yo'. Jo' chii xolcwe' n'om'yo' ndo' na luaa' waa xocatseit'maⁿ ts'o̱o̱ⁿya jnaⁿ'yo'. 28Tsoti Pablo: —Sa̱a̱ cala'no̱ⁿ'yo' cantyja 'naaⁿ' ñ'oom naya 'naaⁿ' Ty'o̱o̱ts'om na macwji'n'maaⁿñê nn'aⁿ. Na je' xuee na cwii wjaana', nncjaa ñ'oomwaa na m'aⁿ nn'aⁿ na nchii judíos. Joona nndyena juuna'. 29Jnda̱ na tso Pablo ñ'oomwaa' mana t'oom'ndye nn'aⁿ judíos. Jndye ñ'oom cwityola'neiⁿ cheⁿnquieena nda̱a̱ nc'iaana. 30Canda̱a̱' we chu ljoo'ñe Pablo cwii w'aa na cwe' tyotioml'uaaⁿ na tyom'aaⁿyaaⁿ. Ndo' neiiⁿ' ts'oom cha'tso nn'aⁿ na tyo'oocajndoo' jom. 31Tyoñequiaaⁿ ñ'oom cantyja 'naaⁿ' na matsa̱'ntjom Ty'o̱o̱ts'om ndo' tyo'mo̱o̱ⁿ cantyja 'naaⁿ' Ta Jesucristo. T'maⁿ waa na tju'naaⁿñena' na tyotseineiiⁿ. Meiⁿcwii tjaa 'ñeeⁿ seitsaaⁿ'ñe jom.

will be added

X\