Hechos 23

1Pablo nty'iaaⁿ'aⁿ nda̱a̱ naⁿmaⁿn'iaaⁿ 'naaⁿ nn'aⁿ judíos. Matsoom nda̱a̱na: —Ja ntyjii, 'o re nn'aⁿya, cha'tso xuee na jnda̱ jndyowana' ñequii'cheⁿ mats'aaya cantyja na matsei'no̱ⁿ'a na maty'iomna' jo nnom Ty'o̱o̱ts'om. 2Quia jo' tyee na cwiluiitquieñe, tsaⁿ na jndyu Ananías, sa̱'ntjoom nn'aⁿ na meintyjee' nacañoom' Pablo na catmeiiⁿ'na nda' 'ndyoo tsaⁿ'ñeeⁿ. 3Ndo' jo' matso Pablo nnom tyee'ñeeⁿ: —Ty'o̱o̱ts'om nlco'weeⁿ'eⁿ 'u ee 'u ts'aⁿ na we waa mache'. 'U matsei'xmaⁿ' na nncu'xeⁿ' ja cha'xjeⁿ na matso ljeii na tqueⁿ Moisés sa̱a̱ matsu' na catjaa' nn'aⁿ ja meiiⁿ ljeii'ñeeⁿ matsona' na ticwanaaⁿ. 4Ndo' nn'aⁿ na meintyjee' jo' jo' tyoluena nnom Pablo: —¿Chiuu na matsei'neiⁿ' ñ'oom na matseijnaaⁿ'na' tyee na cwiluiitquieñe na mandi'ntjom nnom Ty'o̱o̱ts'om? 5Matso Pablo: “'O re nn'aⁿya, ticaljeiiya na jom tyee na cwiluiitquieñe. Ee mayuu' ñ'oom' Ty'o̱o̱ts'om na maxjeⁿ waa na jnda̱ teiljeiina' matsona' na tintseineiⁿ ts'aⁿ ñ'oom na matseijnaaⁿ'na' ts'aⁿ na cwiluiitquieñe nda̱a̱ nn'aⁿ tsjom'm.” 6Pablo ntyjeeⁿ na we ndii' naⁿmaⁿn'iaaⁿ na matseineiiⁿ nda̱a̱. Nt'omndye joona cwilaxmaⁿna tmaaⁿ' nn'aⁿ judíos na jndyu saduceos. Ndo' nt'omndye joona cwilaxmaⁿna tmaaⁿ' fariseos. Jo' chii jndeii seineiiⁿ, tsoom: —'O re nn'aⁿya ja tseixmaⁿya fariseo. Mati tsotya̱ majo' jom. Sa̱a̱ 'o cwitu'xeⁿ'yo' ja cwe' nc'e na matseiyu'a na nnta'ndo'xco nn'aⁿ na jnda̱ tja̱. 7Quia na jnda̱ tsoom na nmeiiⁿ', jla'ntja'ndye nn'aⁿ fariseos ñ'eⁿ saduceos. Taticatjoom' jla'neiⁿna. 8Ee nn'aⁿ saduceos cwiluena xocatando'nnda' nn'aⁿ na jnda̱ tja̱, meiⁿ ángel meiⁿ espíritu, tjaa'naⁿ. Sa̱a̱ nn'aⁿ fariseos cwilayu'na na m'aⁿ ángel, ndo' na m'aaⁿ espíritu ndo' na nntando'nnda' nn'aⁿ na jnda̱ tja̱. 9Quia jo' cha'tsondye nn'aⁿ na tjomndye tacwaxua ndyueena na tyolantja'ndyena. Ndo' nt'om nn'aⁿ na cwit'mo̱o̱ⁿ ljeii na tqueⁿ Moisés na laxmaⁿ nn'aⁿ fariseos tei'cantyjana, jluena: —Tsaⁿm'aaⁿ' tjaa jnaaⁿ'aⁿ coliuuyâ. Ndo' xeⁿ mayuu' na seineiⁿ cwii espíritu oo cwii ángel nnoom, quia jo' tantsaaya nacjoo' Ty'o̱o̱ts'om. 10Jeeⁿ cwajndii tyolantja'ndyena hasta ty'ue ts'aⁿ na cwiluiitquieñe nda̱a̱ sondaro. Nty'iaaⁿ'aⁿ maxjeⁿ nla'cuee'na Pablo. Jo' chii sa̱'ntjoom na c'oocatjeii'ndye sondaro tsaⁿ'ñeeⁿ naquii' luee nn'aⁿ na cwiluiitquiendye, c'ooñ'omnnda'na jom naquii' w'aa yuu cwic'eeⁿna. 11Quia na jnda̱ teijaaⁿ teitquioo'ñe Ta Jesús nnom Pablo, matso nnoom: —C'om't'maaⁿ'ndyu' ts'om', ee cha'na jnda̱ tjei'yuu'ndyu' cantyja 'naⁿya naquii' tsjoom Jerusalénwaa, malaa'ti' nncwji'yuu'ndyu' cantyja 'naⁿya tsjoom Roma. 12Teincoo cwiicheⁿ xuee nt'om nn'aⁿ judíos jla'jomndyena. Tqueⁿtyeⁿna cwii ñ'oom na w'ii nacjoona na tacwa'na tacwena ndaa hasta xeⁿ jnda̱ jla'cuee'na Pablo. 13Teinom wen'aaⁿ ts'aⁿ na tqueⁿtyeⁿ ñ'oomwaa' cjoo'. 14Ty'e naⁿ'ñeeⁿ na m'aⁿ ntyee na cwiluiitquiendye ñequio nn'aⁿ na cwiluiitquiendye nda̱a̱ nn'aⁿ judíos. Jluena nda̱a̱ naⁿ'ñeeⁿ: —Jâ jnda̱ tqua̱ⁿtya̱a̱ⁿyâ ñ'oom na w'ii nacjooyâ na tacwaa'â hasta cue'jndyee Pablo nl'aayâ. 15Ndo' je' je' 'o ñequio cha'tso naⁿmaⁿn'iaaⁿ 'naaⁿ jaa nn'aⁿ judíos, cataⁿ'yo' nnom ts'aⁿ na cwiluiitquieñe nda̱a̱ sondaro na 'io catseicwanoom tsaⁿ'ñeeⁿ na m'aⁿ'yo'. Cal'a'yo' na ndoo' na tcuuti ñe'cata'x'eendyo' cantyja 'naaⁿ'aⁿ. Ndo' jâ m'aaⁿc'eendyô̱ na nlacua̱a̱'â jom cwii tjo̱o̱cheⁿ na nlquie'ñ'omna jom na m'aⁿ'yo'. 16Sa̱a̱ tyochjoo jnda yuscu tyjee Pablo jndii na ljo' nl'ana. Jo' chii tjaaⁿ w'aa yuu cwic'eeⁿ sondaro. Tjaqueⁿ'eⁿ seicañeeⁿ Pablo na ljo'. 17Quia jo' Pablo t'maaⁿ cwii capeitaⁿ. Matsoom nnom: —Cja'ñ'oom'ya' tyochjoom'aaⁿ na m'aaⁿ ts'aⁿ na cwiluiitquieñe nda̱a̱'yo' ee waa ñ'oom na nntsoom nnom tsaⁿ'ñeeⁿ. 18Quia jo' capeitaⁿ'ñeeⁿ tjañ'oom tyochjoo yuu na m'aaⁿ nquii ts'aⁿ na cwiluiitquieñeti nda̱a̱na. Matsoom: —Nquii pra̱so Pablo t'maaⁿ ja. Tcaaⁿ na candyo̱ñ'o̱ⁿ tyochjoom'aaⁿ na m'aaⁿ', ee waa na nntsoom njom'. 19Quia jo' ts'aⁿ na cwiluiitquieñe nda̱a̱na t'ueeⁿ ts'o̱ tyochjoo, tjañ'oom juu yuu na ñe'wendyena. Tax'eeñê nnom, matsoom: —¿Cwaaⁿ ñ'oom na ñe'catsu' no̱o̱ⁿ? 20Quia jo' matso tyochjoo'ñeeⁿ: —Nn'aⁿ judíos jnda̱ t'maⁿna na ntaⁿna njom' na 'io nntseicwanom' Pablo na m'aⁿ naⁿmaⁿn'iaaⁿ 'naaⁿna. Nl'ana na ndoo' ñe'cata'x'eeti naⁿmaⁿn'iaaⁿ cantyja 'naaⁿ'aⁿ. 21Sa̱a̱ 'u tintseiyu' na ljo' ee joona teinom wen'aaⁿndyena na m'aⁿc'eendyena na nla'cuee'na jom. Jnda̱ ta'wi'ndye cheⁿnquieena na tacwa'na ndo' tacwena hasta xjeⁿ na nla'cuee'cheⁿna jom. Je' macanda̱ cwii meindoo'na xeⁿ chiuu nntsu' 'u. 22Ndo' ts'aⁿ na cwiluiitquieñe nda̱a̱ sondaro seicoom'm 'ndyoo tyochjoo'ñeeⁿ na tintseineiⁿ nnom meiⁿcwii ts'aⁿ na jnda̱ seicandii jom ñ'oomwaa'. Jnda̱ chii jñoom tyochjoo'ñeeⁿ. 23Quia jo' ts'aⁿ na cwiluiitquieñe nda̱a̱ sondaro t'maaⁿ we capeitaⁿ. Sa̱'ntjoom na cala'jndaa'ndyena we siaⁿnto sondaro na cwi'ooca' nc'ee' ñequio ndyeen'aaⁿ nchoo' qui sondaro na ntyjondye catso ndo' we siaⁿnto sondaro na cwileicho ncjo lantsa. Sa̱'ntjoom na ñjeeⁿ na teijaaⁿ nlui' naⁿ'ñeeⁿ na nnc'oona tsjoom Cesarea. 24Mati tsoom na calajndaa'ndyena quioo' na nncjaawa'ljoo Pablo, ndo' ya ya cal'ana cwenta jom cha mati ya nncueⁿ'eⁿ na m'aaⁿ Félix ts'aⁿ na m'aaⁿ gobiernom. 25Ndo' seiljeiⁿ cwii carta na 'ooñ'omna na m'aaⁿ tsaⁿ'ñeeⁿ. 26Matsona': “Ja Claudio Lisias matseicwano̱ⁿ na xmaⁿndyu' 'u ta gobiernom Félix. 27Tsaⁿs'am'aaⁿ' t'ue nn'aⁿ judíos jom ndo' mawaa na nla'cuee'na jom. Sa̱a̱ quia na jndiiya na jom matseixmaaⁿ ts'aⁿ tsjoom Roma jo' na saayâ ñ'eⁿ sondaro 'naⁿya. Tjeii'ndyo̱ jom luee naⁿ'ñeeⁿ. 28Ee l'ue ts'o̱o̱ⁿ na nleijndaa'ya chiuu na cwiqueⁿna ñ'oom nacjoom'm. Jo' chii yati tjo̱ñ'o̱ⁿ jom jo nda̱a̱ naⁿmaⁿn'iaaⁿ 'naaⁿ naⁿ'ñeeⁿ. 29Ndo' ljeiya na cwe' cwiqueⁿtona ñ'oom nacjoom'm cantyja 'naaⁿ' ljeii na cwileiñ'om nquieena. Sa̱a̱ nchaa l'uu waa ljo' s'aaⁿ na tseixmaaⁿ na nncueeⁿ'eⁿ oo na nljoo'ñê w'aancjo. 30Sa̱a̱ jndiiya na cwindo̱o̱ nn'aⁿ jom. Jo' chii matseicwano̱ⁿya jom na m'aaⁿ'. Ndo' mati matsjo̱o̱ nda̱a̱ nn'aⁿ na cwiqueⁿ ñ'oom nacjoom'm na c'oona na m'aaⁿ' na cala'jndaa'ndyeyana ñ'oom'ñeeⁿ. Cwe' la'ti' waa na matsjo̱o̱.” 31Ndo' sondaro'ñeeⁿ jla'canda̱na ñ'oom na sa̱'ntjom ts'aⁿ na cwiluiitquieñe nda̱a̱na. Ty'eñ'omna Pablo natsjom hasta na tquiena tsjoom Antípatris. 32Teincoo cwiicheⁿ xuee sondaro na cwi'ooca' nc'ee' ty'elcwee'na w'aa yuu cwic'eeⁿna. Ndo' sondaro na ntyjondye catso ty'eca'ndyena Pablo. 33Jnda̱ na tquiena Cesarea, tquiana carta na ñ'omna nnom gobiernom ndo' tioona cwenta Pablo l'o̱o̱ⁿ. 34Quia sei'naaⁿ' gobiernom carta'ñeeⁿ, ta'x'eeⁿ 'ndyoo Pablo cwaaⁿ ts'o̱ndaa jnaⁿ. Ndo' ljeiiⁿ na jnaⁿ tsaⁿ'ñeeⁿ ts'o̱ndaa Cilicia. 35Jo' chii matsoom nnom tsaⁿ'ñeeⁿ: —Quiejndyee nn'aⁿ na cwiqueⁿ ñ'oom cjo' quia jo' nndiiya ñ'oom 'ndyo' ndo' nleijndaa'ya. Ndo' sa̱'ntjoom na cal'a sondaro cwenta tsaⁿ'ñeeⁿ naquii' wats'iaaⁿ na jndo' Herodes na tuii.

will be added

X\