Hechos 21

1Jnda̱ to̱ⁿ'ndyô̱ ñequio naⁿ'ñeeⁿ, tuo̱o̱yâ w'aandaa, saandyeyuuyâ, squia̱a̱yâ ndyuaaxeⁿncwe Cos. Cwiicheⁿ xuee saatya̱a̱yâ hasta tsjoom Rodas. Jluii'â jo' jo' saayâ squia̱a̱yâ tsjoom Pátara. 2Jo' jo' jliuuyâ cwii w'aandaa na ncwit'iona' na wjaana' ndyuaa Fenicia. Jo' chii tuo̱o̱yâ juuna', mana saayâ. 3Quia na jnda̱ teitquioo' ndyuaaxeⁿncwe Chipre, 'ndya̱a̱yâ ndyuaa'ñeeⁿ jo ntyja tymaaⁿ'. Saayâ, squia̱a̱yâ tsjoom Tiro ndyuaa Siria. Jo' jo' jluii'â w'aandaa ee tsjoom'ñeeⁿ tjameintyjee'na' na nlui' canchuu na ñjom ts'omna'. 4Tyol'ua̱a̱yâ nn'aⁿ na cwila'yu' tsjoom'ñeeⁿ ndo' quia jliuuyâ joona ljoo'ndyô̱ ñ'eⁿndyena cwii ntquiee' xuee. Joona jnda̱ t'mo̱ⁿ Espíritu Santo nda̱a̱na ljo' nntjom Pablo, jo' chii tyoluena nnoom na tincjaⁿ Jerusalén. 5Jnda̱ na teinom ntquiee' xuee na ljoo'ndyô̱ tsjoom'ñeeⁿ, cha'tsondye nn'aⁿ na cwila'yu' ñequio lcuuna, ndana ty'eca'ndyena jâ nnom tsjoom. Squia̱a̱yâ su ts'otei' 'ndyoo ndaaluee. Jo' jo' taa'â cantya̱a̱yâ jlana̱a̱ⁿyâ nnom Ty'o̱o̱ts'om. 6Jnda̱ jo' t'maⁿndyo̱ ntyja̱a̱yâ ndo' tyota'xcweendyô. Jnda̱ chii tuo̱o̱yâ ts'om w'aandaa. Ndo' naⁿ'ñeeⁿ ty'elcwee'na l'aana. 7Jluii'â tsjoom Tiro'ñeeⁿ, saayâ squia̱a̱yâ tsjoom Tolemaida. Jo' jo' jluii'â w'aandaa. Saanquiaayâ na xmaⁿndye nn'aⁿ na cwila'yu' tsjoom'ñeeⁿ ndo' ljoo'ndyô̱ ñ'eⁿndyena cwii xuee. 8Teincoo cwiicheⁿ xuee jluii'â tsjoom'ñeeⁿ, saayâ squia̱a̱yâ tsjoom Cesarea. Squia̱a̱yâ waa' Felipe ts'aⁿ na quijaanquiaa ñ'oom naya cantyja 'naaⁿ' Jesucristo. Jom cwii joo nn'aⁿ na ntquiee'ndye na tyoty'ioom nn'aⁿ ts'iaaⁿ joona na nndye'ntjomna naquii' tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ Jerusalén. Jo' ljoo'ndyô̱ na m'aaⁿ jom. 9M'aⁿ ñequiee yolcu ntseinaaⁿ na tyooma'co. Joona tyoñequiana ñ'oom' Ty'o̱o̱ts'om. 10Cwantindyo xuee na m'aaⁿyâ jo' jo' ndo' tyjee' cwii ts'aⁿ na jndyu Agabo na jnaⁿ ts'o̱ndaa Judea. Jom profeta. 11Na m'aaⁿ jâ tyjeeⁿ'eⁿ. Seityeeⁿ nc'eeⁿ l'o̱o̱ⁿ ñequio 'naⁿ na chu'tyeⁿ tsiaa' Pablo. Matsoom: —Luaa matso Espíritu Santo na nl'a nn'aⁿ judíos na m'aⁿ Jerusalén. Malaa'ti' nla'tyeⁿna ts'aⁿ na 'naaⁿ' 'naⁿwaa ndo' nntioona jom luee nn'aⁿ na nchii nn'aⁿ judíos. 12Quia na jndya̱a̱yâ ñ'oommeiⁿ', jâ ndo' mati nn'aⁿ na cwila'yu' tsjoom Cesarea'ñeeⁿ tyola'ty'oondyô̱ nnom Pablo na ticjaⁿ Jerusalén. 13Sa̱a̱ matsoom: —¿Chiuu na cwityuee'yo'? Na nmeiiⁿ' cwil'a'yo' yacheⁿ nñe'quia'yo' na chjoo' ts'o̱o̱ⁿya. Ee ja mañequiaandyo̱ ljo'cheⁿ na ñe'cal'a nn'aⁿ Jerusalén ñ'eⁿndyo̱. Meiiⁿ na nlatyeⁿna ja oo meiiⁿ na nlacuee'na ja cantyja 'naaⁿ' xuee' Ta Jesús maxjeⁿ ñecuaato. 14Tîcanda̱a̱ nl'aayâ nlalcwa̱a̱'â jom na wjaⁿ Jerusalén. Jo' chii 'ndya̱a̱to̱o̱yâ, ndo' l'uuyâ: —Cats'aa Ta Ty'o̱o̱ts'om yuu na l'ue ts'oom ñ'eⁿ Pablo. 15Jnda̱ jo' mana jla'jndaa'ndyô̱ saawaayâ Jerusalén. 16Ndo' cwantindye nn'aⁿ na cwila'yu' tsjoom Cesarea ty'eñ'eeⁿna ñ'eⁿndyô̱. Squia̱a̱yâ na m'aaⁿ Mnasón. Jom ts'aⁿ na jnaⁿ ndyuaaxeⁿncwe Chipre ndo' jaach'ee xuee na matseiyoom'm. Waa' jom ljoo'ndyô̱. 17Quia na jnda̱ squia̱a̱yâ Jerusalén, nn'aⁿ na cwila'yu' to'ñoomna jâ ñequio na neiiⁿna. 18Teincoo cwiicheⁿ xuee saayâ ñ'eⁿ Pablo na m'aaⁿ Jacobo. Jo' jo' jnda̱ tjomndye cha'tso nn'aⁿ na cwiluiitquiendye quii'ntaaⁿ tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ. 19Pablo tquiaaⁿ na xmaⁿndye naⁿ'ñeeⁿ. Jnda̱ chii tcuu tcuu tyotseineiiⁿ cha'tso na tyoteijndeii Ty'o̱o̱ts'om jom ts'iaaⁿ na tyoch'eeⁿ quii'ntaaⁿ nn'aⁿ na nchii judíos. 20Ndo' joona jnda̱ na jndyena na tyotseineiiⁿ tyola't'maaⁿ'ndyena Ty'o̱o̱ts'om. Tyoluena nnoom: —Mayuu' re nn'aaⁿya sa̱a̱ mantyji' cwanti meiⁿ nn'aⁿ judíos jnda̱ jla'yu'na tsjoom ñjaaⁿ, ndo' cha'tsondyena cwiluena na jndei'na' na catseicanda̱ ts'aⁿ ljeii na tqueⁿ Moisés. 21Sa̱a̱ jnda̱ jndyena cantyja 'naⁿ' na 'u xuii' ma'mo̱o̱ⁿ' nda̱a̱ cha'tso nn'aⁿ judíos na cwic'eeⁿ nt'omcheⁿ njoom naquii' ntaaⁿ nn'aⁿ na nchii judíos. Jnda̱ jndyena na matsu' na tacalan'oom'ndye naⁿ'ñeeⁿ ñ'oom na tqueⁿ Moisés. Mati jnda̱ jndyena na matseijndo̱' n'om naⁿ'ñeeⁿ na tacal'ana costumbre na cwil'aaya ñequio yo'ndaa na naⁿnom, meiⁿ tacalacanda̱a̱'ndyena nt'omcheⁿ costumbre 'naaⁿ welooya na ñet'om teiyo. 22Quia jo' ¿chiuu ya nl'aayo̱o̱ya? Ee nn'aaⁿya na cwila'yu' na m'aⁿ tsjoomwaa, maxjeⁿ nntjomndyena quia na jnda̱ jndyena na mam'aaⁿndyu'. 23Cwa sa luaa catsa' cha'xjeⁿ na nl'uuyâ njom'. Quii'ntaaⁿyâ m'aⁿ ñequiee naⁿnom na jndei'na' na cala'canda̱a̱'ndyena cwii ñ'oomtyeⁿ na jnda̱ tqueⁿna nnom Ty'o̱o̱ts'om. 24Catseijomndyu' ñ'eⁿndyena, na nlqueⁿ lju'na' 'o nnom Ty'o̱o̱ts'om. Ndo' catiom'l'ua' cantyja na macaⁿna' 'o na nlqueⁿlju'na' 'o. Quia na jnda̱ t'ioo' ñ'oom 'naaⁿna quia jo' ya nnteinqui' nqueⁿna. Luaa' catsa' cha nla'no̱ⁿ' cha'tso nn'aⁿ na tiyuu' ñ'oom na jnda̱ jndyena cantyja 'naⁿ'. Nliuna na mati 'u matseicanda̱a̱'ndyu' ljeii na tqueⁿ Moisés. 25Sa̱a̱ cantyja 'naaⁿ nn'aⁿ na cwila'yu' na nchii nn'aⁿ judíos, jnda̱ jla'cwano̱o̱ⁿyâ ljeii na m'aⁿna na tanc'oom' n'omna cantyja 'naaⁿ costumbre 'naaⁿ jâ nn'aⁿ judíos. Macanda̱ t'maaⁿyâ na tacwa'na nantquie na jnda̱ tsa̱' nn'aⁿ nda̱a̱ 'naⁿ na cwe' nn'aⁿ nl'a. Tantquiina niom' meiⁿ seii quioo' na cwe' cwi'uo̱o̱ cantyo'. Ndo' tanc'omna na cwe' nnc'omyana ñ'eⁿ nc'iaana. 26Quia jo' Pablo seijomñê ñequio ñequiee naⁿnom'ñeeⁿ. Teincoo cwiicheⁿ xuee s'aaⁿ ts'iaaⁿ na tqueⁿ lju'na' joona jo nnom Ty'o̱o̱ts'om. Jnda̱ chii tjaqueⁿ'eⁿ naquii' wats'om t'maⁿ. Tjatseicañeeⁿ ntyee cwaaⁿ xuee na nla'canda̱a̱'ndyena ñ'oom na waa nda̱a̱na ndo' na nñequiana quioo' na nncwje cwentaa' Ty'o̱o̱ts'om. 27Quia na wjaacanda̱a̱' ntquiee' xuee'ñeeⁿ cantyja na nla'canda̱a̱'ndyena, nt'om nn'aⁿ judíos na jnaⁿ ndyuaa Asia nty'iaana Pablo naquii' wats'om t'maⁿ. Jo' chii tyola'jmeiⁿ'na cha'tso nn'aⁿ ndo' t'uena Pablo. 28Jeeⁿ jndeii tyola'xuaana jluena: —'O re nn'aaⁿya Israel catei'jndei'yo' jâ ee luaa ts'aⁿ na ñetonom cha'tso njoom. Tyotseineiiⁿ ñ'oom nacjoo cha'tsondyo̱ ñequio nacjoo' ljeii na tqueⁿ Moisés, ndo' nacjoo' wats'om t'maⁿwaa. Ndo' nchii macanda̱ luaa', mati jnda̱ jndyochom nt'om nn'aⁿ na nchii judíos naquii' wats'om t'maⁿwaa. Jo' na jnda̱ seits'iaaⁿñê juuna' na matseixmaⁿna' cwentaa' Ty'o̱o̱ts'om. 29Luaa' tyoluena ee cwe' na nty'iaana Pablo naquii' tsjoom ñequio ts'aⁿ na nchii judío na jndyu Trófimo, jom ts'aⁿ Éfeso, jo' chii jla'tiuuna na tjañ'oom Pablo tsaⁿ'ñeeⁿ naquii' wats'om t'maⁿ. 30Quia jo' cha'tso nn'aⁿ quii' tsjoom jla'jmeiⁿ'ndyena. Maje' maje'ndyo jla'tjomndyena. T'uena Pablo, ty'eñ'omtsco̱o̱'ndyena jom, tjeii'na jom tach'eⁿ wats'om t'maⁿ. Jnda̱ jo' ntyja ntyja jla'cu'na ndyueel'a juuna'. 31Manla'cuee'na jom sa̱a̱ majuu xjeⁿ'ñeeⁿ tuee' ñ'oom na m'aaⁿ ts'aⁿ na cwiluiitquieñe nda̱a̱ sondaro na cha'tsondye nn'aⁿ quii' tsjoom Jerusalén cwila'jmeiⁿ'ndyena. 32Jo' chii tsaⁿ'ñeeⁿ mantyja tjachom sondaro ñequio capeitaⁿ na cwitsa̱'ntjom cwii cwii siaⁿnto sondaro'ñeeⁿ. Jndeii ty'ena yuu m'aⁿ nn'aⁿ na cwila'jmeiⁿ'ndye. Quia na nty'iaa naⁿ'ñeeⁿ ts'aⁿ na cwiluiitquieñe ñequio sondaro 'naaⁿ'aⁿ, quia jo' mañoom' 'ndyena na cwitjaa'na Pablo. 33Ndo' ts'aⁿ na cwiluiitquieñe nda̱a̱ sondaro, quia na jnda̱ tyjee'cañoom, sa̱'ntjoom sondaro na cat'uena Pablo, cala'tyeⁿna tsaⁿ'ñeeⁿ ñequio we l'uaancjo. Jnda̱ chii tax'eeⁿ 'ñeeⁿ ts'aⁿ Pablo ndo' ljo' s'aa tsaⁿ'ñeeⁿ. 34Sa̱a̱ nn'aⁿ na cwila'jmeiⁿ'ndye tiñe'cwii ñ'oom tyola'xuaana. Cwe' c'uaato ndyueena. Ndo' na luaa' tileicaljeiiⁿ ñ'oom na mayuu'. Yati sa̱'ntjoom sondaro na c'ooñ'omna Pablo w'aa yuu na cwic'eeⁿna. 35Quia na jnda̱ tquiena tioo' yuu na jaawa ts'aⁿ na wjaaquiee' naquii' w'aa'ñeeⁿ jla'wena Pablo ee manchjena' jom na cwajndii cwil'a nn'aⁿ na jndyendye. 36Ee cha'tsondye naⁿ'ñeeⁿ ty'entyjo̱na. Tacwaxua ndyueena, tyoluena: —Calacue'yo' jom. 37Mannc'ooñ'om sondaro Pablo naquii' w'aa ndo' tsoom nnom ts'aⁿ na cwiluiitquieñe nda̱a̱ sondaro: —¿Aa wanaaⁿ na nntsjo̱o̱ cwii ñ'oom njom'? Matso tsaⁿ'ñeeⁿ: —¿Aa 'naⁿ' ñ'oom griego? 38Quia jo' aa nchii ts'aⁿ egipto 'u na nmeiiⁿndyo ñeseiweñe nacjoo' gobiernom na seitjoom cwii ñequiee meiⁿ nn'aⁿ na tia nn'aⁿndye na tjachom joona ndyuaa yuu tjaa nn'aⁿ c'oom. 39Ndo' t'o̱ Pablo nnom tyo na cwiluiitquieñe: —Ja ts'aⁿ judío. Ja tuiindyo̱ tsjoom Tarso, tsjoom t'maⁿ na matsa̱'ntjom ndyuaa Cilicia. Sa̱a̱ mats'aaya ty'oo njom' quiaa' ñ'om' na nntseina̱ⁿ nda̱a̱ nn'aⁿ. 40Tquiaa tsaⁿ'ñeeⁿ ñ'oom'm. Quia jo' teintyjee' Pablo cjoo' ntioo' yuu na jaawa ts'aⁿ na wjaaquiee' naquii' w'aa'ñeeⁿ. Seiweeⁿ ts'o̱o̱ⁿ nda̱a̱ nn'aⁿ na waa na nntsoom. Quia jo' jla'cheⁿna, seineiiⁿ nda̱a̱na ñequio ñ'oomna ñ'oom hebreo.

will be added

X\