Hechos 2

1Quia na tuee' xuee Pentecostés, cha'tsondye nn'aⁿ na cwila'yu' ñe'cwii tmaaⁿ' tjomndyena. 2Mats'ia jo' jnaⁿ na teic'uaa jo nandye cañoom'luee cha'cwijom quia na jndeii mandyo jndye. Ndo' s'aana' na c'uaa cha'waa naquii' w'aa yuu na meindyuaandyena. 3Teitquioo' nty'iaana nacjoo cha'tsondyena ntyjo cha'cwijom ntsaachom. 4Ndo' cha'tsondyena t'omna na too' Espíritu Santo cha'waañ'eⁿ naquii' n'omna. Tquiaaⁿ na la'xmaⁿna cantyja najneiⁿ. Ndo' jnaⁿna' na jla'neiⁿna nt'omcheⁿ nnom ñ'oom na nchii ñ'oom na maxjeⁿ cwila'neiⁿna. 5Joo ncuee'ñeeⁿ m'aⁿya nn'aⁿ judíos naquii' tsjoom Jerusalén na jeeⁿ queeⁿ n'om ts'iaaⁿ 'naaⁿ' Ty'o̱o̱ts'om. Naⁿ'ñeeⁿ jnaⁿna cha'waa nnom tsjoomnancue. 6Quia na teic'uaa na luaa', quia jo' ty'ecanty'iaana. Meiⁿ leicala'no̱ⁿ'na ee cha'tsondyena tyondyena na tyola'neiⁿ naⁿ'ñeeⁿ cwii cwii nnom ñ'oom na cwila'neiⁿ nquieena. 7Jeeⁿ ndya' tyueneiiⁿna, ndo' tyom'aaⁿ' n'omna. Tyoluena nda̱a̱ ntyjeena: —Cha'tsondye naⁿm'aⁿ' na cwila'neiⁿna ñequii'cheⁿ nn'aⁿ ts'o̱ndaa Galilea joona, 8quia jo' ¿chiuu waayuu na cwindya̱a̱ya na ya cwila'neiⁿna cwii cwii nnom ñ'oom na cwilana̱a̱ⁿya xjeⁿ na tquiowijnda̱a̱ya? 9Ee jaa tiñe'cwii ndyuaa jnaaⁿya. Nt'omndyo̱ jnaaⁿ ndyuaa Partia, nt'omndyo̱ Media, Elam ñ'eⁿ Mesopotamia, ts'o̱ndaa Judea ñ'eⁿ Capadocia, mati Ponto ñ'eⁿ ndyuaa Asia. 10Ndo' nt'omndyo̱ jaa jnaaⁿya ndyuaa Frigia ñ'eⁿ Panfilia, Egipto ñ'eⁿ nt'omcheⁿ l'o̱ndaa África na manndyoo' Cirene. Ndo' nt'omndyo̱ jnaaⁿya tsjoom Roma, na tuiindyo̱ nn'aⁿ judíos ndo' mati ñ'eⁿ nn'aⁿ meiⁿ nchii tuiindyena nn'aⁿ tsjaaⁿ jaa, sa̱a̱ macwila't'maaⁿ'ndyena Ty'o̱o̱ts'om cha'xjeⁿ na jaa nn'aⁿ judíos cwilat'maaⁿ'ndyo̱ jom. 11Ndo' nt'omndyo̱ jaa jnaaⁿya Creta ñ'eⁿ Arabia. Sa̱a̱ cha'tsondyo̱ cwindya̱a̱ na ya cwila'neiⁿ naⁿm'aaⁿ' ñ'oomya. Cwiluena cantyja na jeeⁿ t'maⁿ mach'ee Ty'o̱o̱ts'om. 12Cha'tsondye naⁿ'ñeeⁿ na jnaⁿ cwii cwii joo, jeeⁿ ndya' tyojaawee' n'omna ndo' seiñ'eeⁿ'na' joona. Tyoluena nda̱a̱ nc'iaana: —¿Ljo' ñeca'mo̱ⁿna' na luaa' cwiluii? 13Sa̱a̱ nt'omcheⁿ cwe' tyonco, tyolue: —Naⁿm'aⁿ' jnda̱ jndyeena. 14Quia jo' Pedro teintyjeeⁿ'eⁿ ñequio canchoo'cwii apóstoles. Jndeii seineiiⁿ, tsoom nda̱a̱ nn'aⁿ: —'O nn'aⁿya ntyja̱ño̱ⁿya nn'aⁿ judíos ñequiondyo' 'o na tsjom'yo' ñjaaⁿ Jerusalén, queⁿ'yo' cwenta ndo' candye'yo' ñ'oom na nntsjo̱o̱. 15Ee naⁿm'aⁿ' nchii na candyeena cha'xjeⁿ na cwila'tiuu'yo', ee je' quia tuee'cheⁿ na ñjeeⁿ na cwitsjoom. 16Sa̱a̱ juu na cwinty'ia'yo' na cwiluii matseicanda̱a̱'ñena' ñ'oom na tyoñequiaa profeta Joel, tsoom: 17Ncuee na macanda̱, matso Ty'o̱o̱ts'om, njño̱o̱ⁿya Espíritu na cwiluiindyo̱ naquii' n'om jndye nn'aⁿ. Nda'yo' na naⁿnom ñequio nda'yo' na naⁿlcu nla'neiⁿna ñ'oom na nntsjo̱o̱ nda̱a̱na. Naⁿnom na titquiendye waa na nlco'na' nda̱a̱na na nnty'iaana. Ndo' naⁿnom na tquiendye ndaa nntsoona. 18Ncuee'ñeeⁿ njño̱o̱ⁿya Espíritu na cwiluiindyo̱ naquii' n'om nn'aⁿ na cwindye'ntjom no̱o̱ⁿ meiiⁿ naⁿnom ndo' meiiⁿ naⁿlcu. Nñequia naⁿ'ñeeⁿ ñ'oom na nntsjo̱o̱ nda̱a̱na. 19Ndo' nnts'aaya na nleitquioo' jndye nnom 'naaⁿ jo nandye tsjo̱'luee na nla'catyuendye nn'aⁿ quia na nnty'iaana. Ndo' nnts'aaya 'naaⁿ na nleitquioo' jo nacje nnom tsjoomnancue, cha'na niom' ñequio chom ñequio ndioom. 20Ñe'quioom' nntseicwaqueⁿna' na jo̱o̱ⁿñe nnom, ndo' chi' nntseicwaqueⁿna' cha'cwijom niom'. Nmeiⁿ' nluii cwii tjo̱o̱cheⁿ na nncuee' xuee cantyja 'naⁿ ja na cwiluiindyo̱ na matsa̱'ntjo̱ⁿ. Juu xuee'ñeeⁿ t'maⁿticheⁿ matseixmaⁿna' na nleitquioo' najndeii na matseixmaⁿya. 21Sa̱a̱ cwii cwii ts'aⁿ na nncwji' xueya na cwiluiindyo̱ na matsa̱'ntjo̱ⁿ, juu tsaⁿ'ñeeⁿ nluiin'maaⁿñe.” Luaa' ñ'oom na tso Ty'o̱o̱ts'om ñequio 'ndyoo Joel. 22Tsoti Pedro: —'O nn'aⁿya Israel, candyeya'yo' na nntsjo̱o̱ cantyja 'naaⁿ' Jesús tsaⁿ na jnaⁿ Nazaret. Tquioo' na nquii Ty'o̱o̱ts'om jñom jom ee jndye nnom ts'iaaⁿ t'maⁿ s'aaⁿ quii'ntaaⁿ'yo' na nchii na nnda̱a̱ nnluii na cwe' ts'aⁿ nnts'aa, meiⁿ xocjaantyjo̱o̱' n'om nn'aⁿ chiuu tuiiyuu. Ndo' 'o manquiu'yo' na ljo' ee cantyja najndeii na matseixmaⁿ nquii Ty'o̱o̱ts'om, jo' na tyoch'ee Jesús 'naaⁿ t'maⁿ quii'ntaaⁿ'yo'. 23Maxjeⁿ teiyo ntyjii Ty'o̱o̱ts'om na nnc'oom Jesús luee'yo' ee seijndaa'ñê na tuii na ljo'. Jo' na tio'yo' Jesús luee nn'aⁿ romanos. 'O l'a'yo' na ty'ioomna jom ts'oom'naaⁿ na jlacuee'na jom. 24Sa̱a̱ Ty'o̱o̱ts'om tquiaa na tando'xcoom na tueeⁿ'eⁿ. Seicandyaañe jom na ñet'omts'ooñê ee tijoom jndaa caljoo'ñê nacje 'naaⁿ' na cwiwje nn'aⁿ. 25Seineiⁿ rey David na ndoo' matseineiⁿ nquii Jesús. Matsoom: Manty'iaya Ty'o̱o̱ts'om na ñequii'cheⁿ m'aaⁿñê jo no̱o̱ⁿya. Nc'e na m'aaⁿñê ñ'eⁿndyo̱, jo' chii xocju'cjena' ja. 26Jo' na jeeⁿ neiⁿnco ts'o̱o̱ⁿya, ndo' ñequio na neiⁿya mataya. Ndo' cwe' nc'e meindo̱o̱'nty'iaandyo̱, jo' na mach'eena' na mawajndya̱ya. 27Ee xonquiaa' na nljoo'ndyo̱ tsei'tsuaa meiⁿ xonquiaa' na nnto̱'ndyo̱ ee cwiluiindyo̱ na lju' ts'o̱o̱ⁿ na mandi'ntjo̱ⁿya njom'. 28'U t'mo̱ⁿ' no̱o̱ⁿya nato cantyja na nncwando'xco ts'aⁿ. Ndo' na nnc'o̱o̱ⁿya ñ'eⁿndyu' nnts'aana' na neiⁿtya̱ya. Luaa' ñ'oom na seineiⁿ David. 29Tsoti Pedro: —'O nn'aⁿya, ndyeyu nntsjo̱o̱ nndye'yo' na tue' welooya David na ñet'oom teiyo. Ty'ecat'iuuna jom, ndo' tsei'tsuaⁿ'aⁿ ndicwaⁿ waana' tsjoom ñjaaⁿ hasta xuee je'. 30Jom tyoluiiñê profeta, ndo' ntyjiiyaaⁿ na tso Ty'o̱o̱ts'om ñ'oomtyeⁿ nnoom na nluiiñe Cristo quii'ntaaⁿ nn'aⁿ tsjaaⁿ 'naaⁿ'aⁿ na nndyowicantyjoo' ndo' juu tsaⁿ'ñeeⁿ nncjaacjoo ntio na ñetacatyeeⁿ. 31Ndo' cha'cwijom na nnty'iaa' nnoom najnda̱ tuiina', jo' na tsoom na xocaljoo'ñe añmaaⁿ' yuu na cwiljoo'ndye añmaaⁿ nn'aⁿ na jnda̱ tja̱ ndo' meiⁿ seii' xocato̱o̱'. 32Ñ'oommeiⁿ' seineiiⁿ cantyja 'naaⁿ' Jesús. Ndo' cha'tsondyô̱ cwitjei'yuu'ndyô̱ na mayuu' na tquiaa Ty'o̱o̱ts'om na tando'xco juu. 33Je' m'aaⁿ ntyjaa' ts'o̱ Ty'o̱o̱ts'om ntyjaya yuu na matseit'maaⁿ'ñena' jom. Jo' na jnda̱ jñom Tsotyeeⁿ Espíritu Santo naquii' n'om nn'aⁿ cha'xjeⁿ ñ'oomtyeⁿ na tqueⁿ ndo' na cwiluii cha'tso na cwinty'ia'yo' je' ndo' na cwindye'yo'. 34Ee nchii nquii David tja cañoom'luee. Jo' chii ma'mo̱ⁿna' cantyja 'naaⁿ' Jesús seneiiⁿ. Ee tso David: Seineiⁿ Ta Ty'o̱o̱ts'om nnom Ta na matsa̱'ntjom ja. Matsoom nnom: “Cajmaⁿ' jo ntyjaa' ts'o̱o̱ya ntyjaya 35hasta xjeⁿ na jnda̱ tsa̱'a nn'aⁿ na jndoo 'u cjee' nc'e'.” 36Tsoti Pedro: —Quia jo' cha'tsondyo' 'o nn'aⁿ Israel cala'no̱ⁿ'yo' na mayuu' na juu Jesús na ty'iom'yo' ts'oom'naaⁿ, tqueⁿ Ty'o̱o̱ts'om na Ta jom na matsa̱'ntjoom jaa ndo' na Cristo jom na macwji'n'maaⁿñê jaa. 37Ndo' quia jndye nn'aⁿ Israel na luaa', jeeⁿ sei'ndaa'na' nquiuna. Jluena nnom Pedro ñequio nda̱a̱ nt'omcheⁿ apóstoles: —'O nn'aaⁿya, ¿chiuu macaⁿna' na cal'aayâ? 38Quia jo' t'o̱ Pedro nda̱a̱na: —Ticwiindyo' 'o calcwe' n'om'yo' ndo' cwits'oomndyo' ñequio xuee' Jesucristo, cha nntseit'maⁿ ts'om Ty'o̱o̱ts'om jnaⁿ'yo'. Quia jo' nnto'ñoom'yo' Espíritu Santo naquii' n'om'yo'. 39Ee ñ'oomtyeⁿwaa' tseixmaⁿna' cwenta' 'o ñ'eⁿ nda'yo', ndo' cwentaa cha'tso nn'aⁿ na m'aⁿ na tquia, ndo' mati ticwii cwii ts'aⁿ na ma'maⁿ Ta Ty'o̱o̱ts'om cwentaaya. 40Pedro jndye nt'omcheⁿ ñ'oom tyocwji'yuu'ñetyeeⁿ nda̱a̱na. Ndo' tyotseijndo̱'tyeeⁿ n'omna. Tsoom: —Catjei'ndyo' cantyja 'naaⁿ nn'aⁿ na m'aⁿ je' na quie' n'om cha nnda̱a̱ nlui'n'maaⁿndyo'. 41Quia jo' nn'aⁿ na jla'yu' ñ'oom na tsoom teits'oomndyena. Juu xuee'ñeeⁿ, cha'na ndyee meiⁿndyena jla'yu'na. 42Tyoqueⁿndyena na tyondyena ñ'oom na tyot'mo̱o̱ⁿ apóstoles'ñeeⁿ. Tjoom' tyom'aⁿna ñequio naⁿ'ñeeⁿ. Tyotjomndyena na tyotyjena tyoo' na tyocañjom n'omna Jesús. Ndo' tyola'neiⁿna nnom Ty'o̱o̱ts'om. 43Cha'tsondye nn'aⁿ tyotseitsaⁿ'na' joona ee na tyonty'iaana jndye ts'iaaⁿ t'maⁿ na tyol'a apóstoles na xocanda̱a̱ nluii na cwe' na jnda̱ nquieena meiⁿ xocjaantyjo̱o̱' n'om nn'aⁿ 'naaⁿ na tuii. 44Cha'tsondye nn'aⁿ na jnda̱ jla'yu', ñe'cwii n'omna. Ndo' cha'tso 'naⁿ na tyowil'uee'ndyena tjom na 'naaⁿna joona'. 45Tyonda̱a̱na ndyuaana ñequio nt'omcheⁿ 'naaⁿna na waa. Ndo' s'om na tyoto'ñoomna tyoto̱ⁿ'na joona', tyoñequiana nda̱a̱ nn'aⁿ na tyotseitjo̱o̱na' joo. 46'Io ndi 'io tyotjomndyena wats'om t'maⁿ. Mati naquii' l'aana tyola'jomndyena na tyotyjena tyoo' na tyocañjom n'omna Jesús. Tyocwa'na ñequio na neiiⁿna ndo' na xcwee' n'omna. 47Tyola't'maaⁿ'ndyena Ty'o̱o̱ts'om ndo' cha'tsondye nt'omcheⁿ nn'aⁿ tyotjeii'ya joona. Ndo' 'io ndi 'io tyocwji'n'maaⁿñeticheⁿ Ty'o̱o̱ts'om nn'aⁿ. Jo' chii tjawit'maⁿti tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ.

will be added

X\