Hechos 16

1Quia jo' Pablo ñ'eⁿ Silas tquiena tsjoom Derbe. Jnda̱ chii ty'ena tsjoom Listra. Jo' jo' tajnaaⁿ'na cwii ts'aⁿ na matseiyu' na jndyu Timoteo. Jom jnda yuscu ts'aⁿ judía na matseiyu' sa̱a̱ tsotyeeⁿ nchii ts'aⁿ judío juu. 2Nn'aⁿ na cwilayu' na m'aⁿ tsjoom Listra ñ'eⁿ tsjoom Iconio tyotjeii'yana Timoteo. 3L'ue ts'om Pablo na nncjaañ'eⁿ Timoteo ñ'eⁿñê. Jo' chii seijndaa'ñê na tuii ñ'eⁿ tsaⁿ'ñeeⁿ cha'xjeⁿ costumbre na cwil'a nn'aⁿ judíos ñequio yo'ndaa na naⁿnom. S'aaⁿ na ljo' cha nn'aⁿ judíos na m'aⁿ ndyuaa na cwi'oona til'ana na tila'ñoom'ndyena ñ'oom na cwiñequiana ee nquiu naⁿ'ñeeⁿ na Timoteo nchii ts'aⁿ judío tsotyeeⁿ. 4Pablo ñequio Silas ñ'eⁿ Timoteo tyoma'nomna. Ndo' ticwii cwii tsjoom yuu na tyoquiena tyola'candiina nn'aⁿ na cwila'yu' ñ'oom na jla'jndaa'ndye apóstoles ñequio nn'aⁿ na cwiluiitquiendye quii'ntaaⁿ tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ tsjoom Jerusalén. 5Jo' chii cwii cwii tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ tyo'oonajnda̱na na cwila'yu'ya n'omna ndo' 'io ndii 'io ty'ewijndyendyetina. 6Pablo ñequio nn'aⁿ na ñ'eeⁿ ñ'eⁿñê, seicu' Espíritu Santo na nnc'oola'neiⁿna ñ'oom' Ty'o̱o̱ts'om ndyuaa Asia. Jo' chii tei'nomna ndyuaa Frigia ñequio ndyuaa Galacia. 7Quia na tquiena tyeⁿncoo ndyuaa Misia jla'tiuuna na nnc'ooquie'na ndyuaa Bitinia sa̱a̱ tinquiaa Espíritu Santo na nnc'oona jo'. 8Jo' chii cwe' tei'nomna ndyuaa Misia. Ty'ecuena hasta tquiena tsjoom Troas, nndyoo' 'ndyoo ndaaluee. 9Jo' jo' waa na tco'na' nty'iaa' Pablo natsjom. Nty'iaaⁿ'aⁿ meintyjee' cwii tsaⁿs'a ts'aⁿ ndyuaa Macedonia. S'aa tsaⁿ'ñeeⁿ ty'oo nnoom, tso: “Cwinoom' ntyjawaa ndyuaa Macedonia. Candyo'tei'jndei' jâ.” 10Jnda̱ na nty'iaa' Pablo na tco'na' nnoom, mantyja jla'jndaa'ndyô̱ na nncwit'io̱o̱'â ndaaluee nntsaayâ ndyuaa Macedonia. Ee jla'no̱o̱ⁿ'â na majñom Ty'o̱o̱ts'om jâ na nntsaanquiaayâ ñ'oom naya nda̱a̱ nn'aⁿ ndyuaa'ñeeⁿ. 11Jo' chii tuo̱o̱yâ ts'om w'aandaa tsjoom Troas. Saandyeyuuyâ squia̱a̱yâ ndyuaaxeⁿncwe Samotracia. Teincoo cwiicheⁿ xuee saayâ squia̱a̱yâ tsjoom Neápolis. 12Jo' jluii'â ñ'eⁿ w'aandaa, saayâ squia̱a̱yâ tsjoom Filipos. Tsjoom'ñeeⁿ m'aaⁿna' nacje 'naaⁿ nn'aⁿ romanos ndo' t'maⁿti matseixmaⁿna' na cha'tso njoom cha'waa ndyuaa Macedonia. Tsjoom Filipos'ñeeⁿ ljoo'ndyo̱yaayâ cwantindyo xuee. 13Xuee na cwita'jndyee nn'aⁿ judíos jluii'â nnom tsjoom 'ndyoo jndaa. Ee jla'tiuuyâ aa nchii nliuuyâ yuu cwila'neiⁿ nn'aⁿ nnom Ty'o̱o̱ts'om, nlajomndyô̱ ñ'eⁿndyena. Jo' jo' jliuuyâ nt'om yolcu. Saacwindyuaandyô̱ jlana̱a̱ⁿyâ ñ'oom' Ty'o̱o̱ts'om nda̱a̱ naⁿ'ñeeⁿ. 14Quii'ntaaⁿ yolcu'ñeeⁿ ñ'eⁿ ts'aⁿ na jndyu Lidia. Jom ts'aⁿ na jnaⁿ tsjoom Tiatira na majnda̱a̱ liaa ya, liaa colo catsioo'. Jom ts'aⁿ na matseit'maaⁿ'ñê Ty'o̱o̱ts'om. S'aa Ta Ty'o̱o̱ts'om naquii' ts'oom na ya tqueeⁿ cwenta ñ'oom na tyoñeeⁿ na seineiⁿ Pablo. 15Ndo' teits'oomñê ñ'eⁿ nn'aⁿ waⁿ'aⁿ. Jnda̱ chii seity'ooñê nda̱a̱yâ, tsoom: —Xeⁿ cwinty'ia'yo' na matseicanda̱ya na matseiyu'a ñequio Ta Jesús cwa caljoo'ndyo' w'aya. Ndo' s'aaⁿ na caljoo'ndyô̱ waⁿ'aⁿ. 16Cwii xuee'ñeeⁿ saayâ yuu cwila'neiⁿ nn'aⁿ nnom Ty'o̱o̱ts'om ndo' tjomndyô̱ cwii yuscuchjoo na macjawee' 'ndyoo nc'e na m'aaⁿ jndyetia naquii' ts'om. Tsaⁿ'ñeeⁿ m'aaⁿtyeeⁿ luee nn'aⁿ na cwita'ntjom cantyja 'naaⁿ'aⁿ. T'maaⁿ' s'om cwiquioo luee naⁿ'ñeeⁿ nc'e na macjawee' 'ñom. 17To̱o̱ⁿ'o̱ⁿ na tyojaantyjo̱o̱ⁿ nanqua̱a̱ⁿ'â ñ'eⁿ Pablo. Tacwaxua 'ñom, tyotsoom: —Naⁿnomm'aⁿ cwindye'ntjomna nnom Ty'o̱o̱ts'om na m'aaⁿ nandyeticheⁿ. Cwila'candiina 'o cantyja nato na cwicalui'n'maaⁿndye nn'aⁿ. 18Jndye xuee tyoch'ee yuscuchjoo'ñeeⁿ na ljo'. Jo' chii seilioo'ñe Pablo, taqueeⁿ seineiiⁿ nnom jndyetia na m'aaⁿ naquii' ts'om yuscuchjoo'ñeeⁿ. Tsoom: —'U jndyetia, ñequio xuee' Jesucristo matsa̱'ntjo̱ⁿya, calui' naquii' ts'om yuscuchjoom'aaⁿ'. Ndo' mantyjacheⁿ jlui' jndyetia'ñeeⁿ. 19Ndo' nn'aⁿ na cwita'ntjom cantyja 'naaⁿ' juu, quia na nty'iaana na jnda̱ jlui' jndyetia'ñeeⁿ naquii' ts'oom jla'no̱ⁿ'na na jnda̱ tsuundyena s'om na cwiquioo lueena cantyja na macjawee' 'ñom. Jo' chii t'uena Pablo ñ'eⁿ Silas. Ty'echona naⁿ'ñeeⁿ jo nda̱a̱ naⁿmaⁿn'iaaⁿ naquii' ts'ua t'maⁿ. 20Quia na tquiena nda̱a̱ naⁿmaⁿn'iaaⁿ jluena: —Nn'aⁿ judíos m'aⁿ, cwitjaa'ndyena tia' nn'aⁿ tsjoomya. 21Ee cwit'mo̱o̱ⁿna ñ'oom na jaa na cwilaxmaaⁿya nn'aⁿ romanos, ticaty'iomna' na nnto'ño̱o̱ⁿya meiⁿ na nl'aaya chiuu na cwiluena. 22Quia jo' jla'wendye nn'aⁿ tsjoom'ñeeⁿ nacjoo' Pablo ñ'eⁿ Silas ndo' naⁿmaⁿn'iaaⁿ sa̱'ntjomna na calui' liaa naⁿ'ñeeⁿ ndo' cacho'na n'oomjneiⁿ. 23Jndye tjaa'na naⁿ'ñeeⁿ. Jnda̱ chii tioomna joo w'aancjo. Jluena nnom ts'aⁿ na mach'ee cwenta w'aancjo na ya ya cats'aaⁿ cwenta joona. 24Ndo' tsaⁿ'ñeeⁿ, jnda̱ na jñeeⁿ ñ'oomwaa' tjaa'ñê naⁿ'ñeeⁿ w'aancjo naquii'cheⁿ ndo' seityeeⁿ joona na tyeⁿ ñjoom' nc'ee'na ts'oom tscaa'. 25Ndo' Pablo ñ'eⁿ Silas, cha'na xcwe tsjom to̱'na tyola'neiⁿna nnom Ty'o̱o̱ts'om, tyotana luantsa, ndo' pra̱so na too'ndye ñ'eⁿndyena naquii' w'aancjo, tyondyeendye naⁿ'ñeeⁿ. 26Ndo' mats'ia jo' jndeii s'eii, teincwii' tsiaⁿtsjo̱' w'aancjo. Xjeⁿ'ñeeⁿ cha'tso ndyueel'a w'aancjo'ñeeⁿ jnaaⁿ cheⁿnquieena' ndo' mati l'uaancjo na ñjoom cha'tso pra̱so jnaⁿ'na'. 27Ndo' juu ts'aⁿ na mach'ee cwenta w'aancjo lcweeⁿ, nty'iaaⁿ'aⁿ na meiⁿnaaⁿ ndyueel'a w'aancjo. Jo' chii tjeii'ñê espada 'naaⁿ'aⁿ na nntseicuee'ñe cheⁿnqueⁿ ee seitioom na jnda̱ jleinom pra̱so. 28Sa̱a̱ Pablo jndeii seixuaⁿ nnom tsaⁿ'ñeeⁿ tsoom: —Aa ndi' re, tintseicuee'ndyu' ee cha'tsondyô̱ ndi m'aaⁿyâ. 29Quia jo' tcaⁿ tsaⁿ'ñeeⁿ chom. Jndeii tjaqueⁿ'eⁿ naquii' w'aancjo. Cwiteiñê na ty'ueeⁿ. Cwe' seiquiooñetoom jo nnom Pablo ñ'eⁿ Silas. 30Jnda̱ chii tjeiiⁿ'eⁿ joona ch'eⁿ. Matsoom nda̱a̱na: —'O ta, ¿ljo' macaⁿna' na cats'aaya cha nlui'n'maaⁿndyo̱? 31Jluena nnoom: —Catseiyu' ñequio Ta Jesucristo, quia jo' nlui'n'maaⁿndyu' 'u ndo' mati nn'aⁿ wa'. 32Quia jo' tyola'neiⁿna ñ'oom' Ty'o̱o̱ts'om nnom tsaⁿ'ñeeⁿ ñequio cha'tso nn'aⁿ waⁿ'aⁿ. 33Juu xjeⁿ'ñeeⁿ na ndicwaⁿ jaaⁿcheⁿ tjachom joona ndo' tmaaⁿ yuu na tquiee'ndyena na cho'na. Jnda̱ chii teits'oomñê ndo' mati cha'tso nn'aⁿ waⁿ'aⁿ. 34Jnda̱ jo' tjañ'oom Pablo ñequio Silas waⁿ'aⁿ, tquiaaⁿ na tcwa'na. Jom ndo' ñequio cha'tso nn'aⁿ waⁿ'aⁿ neiiⁿna na jnda̱ macwilayu'na ñequio Ty'o̱o̱ts'om. 35Quia na jnda̱ teixuee, naⁿmaⁿn'iaaⁿ jñoomna policía na m'aaⁿ tsaⁿ na mach'ee cwenta w'aancjo na candyaañe Pablo ñ'eⁿ Silas. 36Jo' chii ts'aⁿ na mach'ee cwenta w'aancjo seicañeeⁿ Pablo, matsoom nnom: —Naⁿmaⁿn'iaaⁿ jnda̱ jla'cwanomna ñ'oom na nndyaandyo'. Wanaaⁿ na nlui'yo'. Catsa'yo', meiⁿcwii ñomtiuu tac'om'yo'. 37Sa̱a̱ Pablo matsoom nda̱a̱ policía: —Jâ cwilaxmaaⁿyâ cantyja 'naaⁿ' tsjoom Roma. Sa̱a̱ meiiⁿ na ljo' tjaa'na jâ na jndoo' cha'tso nn'aⁿ meiiⁿ na tyoowijndaa' aa waa na jla'tjo̱o̱ndyô. Jnda̱ chii tioomna jâ w'aancjo. Nmeiiⁿ' l'ana jâ meiiⁿ na meiⁿchjoo ticatsona' na nl'ana na ljo' nn'aⁿ romanos. Ndo' je' ¿aa cwe' nt'iu nntjeii'na jâ? Xoya na ljo'. Nquieena quiocatjeii'na jâ. 38Quia jo' policía'ñeeⁿ ty'elacandiina naⁿmaⁿn'iaaⁿ'ñeeⁿ ñ'oommeiⁿ'. Ndo' naⁿ'ñeeⁿ quia jndyena na Pablo ñequio Silas cwilaxmaⁿna nn'aⁿ romanos, jeeⁿ tyuena. 39Jo' chii naⁿmaⁿn'iaaⁿ ty'ecataⁿna ñ'oom t'maⁿ ts'om nda̱a̱ naⁿ'ñeeⁿ. Jnda̱ chii tjeii'na joo w'aancjo. Jla'ty'oondyena na calui' naⁿ'ñeeⁿ tsjoomna. 40Quia jo' jlui'na w'aancjo, ty'ena waa' Lidia. Jo' jo' tyola'neiⁿna ñequio nn'aⁿ na cwila'yu'. Tyoñe'quiana na t'maⁿ n'om naⁿ'ñeeⁿ. Jnda̱ jo' jlui'na tsjoom Filipos'ñeeⁿ.

will be added

X\