Hechos 12

1Ncuee'ñeeⁿ nquii rey Herodes, cwajndii tyoco'weeⁿ'eⁿ nt'om nn'aⁿ na cwilaxmaⁿ tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ. 2Sa̱'ntjoom na cue' Jacobo xio Juan ñ'eⁿ xjo espada. 3Ndo' quia na nty'iaaⁿ'aⁿ na tjawee' n'om nn'aⁿ judíos na tue' Jacobo mati t'ueeⁿ Pedro. Luaa' tuii xcwe ncuee na cwicwa' nn'aⁿ judíos tyoo' na tjaa'naⁿ ndaaljo' tjaquiee'. 4Ndo' jnda̱ na t'ueeⁿ Pedro tjoom'm tsaⁿ'ñeeⁿ w'aancjo. Tquiaaⁿ cwenta tsaⁿ'ñeeⁿ luee quin'oom nchoo' cwii sondaro na jom jom ndii' ñequiee ñequieendye naⁿ'ñeeⁿ na cal'ana cwenta tsaⁿ'ñeeⁿ. Ee seitioom xeⁿ jnda̱ teinom ncuee pascua nncwjeeⁿ'eⁿ juu na nntu'xeⁿñe joo nda̱a̱ nn'aⁿ. 5Jo' chii tyol'ana cwenta tsaⁿ'ñeeⁿ naquii' w'aancjo, sa̱a̱ tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ tic'oomeintyjee'na na tyola'neiⁿna nnom Ty'o̱o̱ts'om na cateijneiⁿ tsaⁿ'ñeeⁿ. 6Ndo' Pedro, majuu tsjom'ñeeⁿ na nneiⁿncoo nncwji' Herodes jom jo nda̱a̱ nn'aⁿ, watsom quii'ntaaⁿ we sondaro na chu'tyeⁿñê we l'uaancjo. Ndo' nt'om sondaro m'aⁿ 'ndyoots'a na cwil'a cwenta. 7Mats'ia jo' tyjee' cwii ángel cwentaa' Ta Ty'o̱o̱ts'om ndo' teixueeñe naquii' w'aancjo. Ángel'ñeeⁿ tii' l'o̱o̱ⁿ tsei'ntsquiee' Pedro, seilcweeⁿ juu. Matsoom nnom: —Maje' maje'ndyo quicantyja'. Quia jo' mana tquiaa l'uaancjo na chu'tyeⁿ l'o̱ Pedro. 8Tso ángel'ñeeⁿ nnoom: —Cwe' lia' ndo' cañjom' lcom'. Jnda̱ s'aaⁿ na ljo' tso ángel nnoom: —Cwe' liaatco 'naⁿ' ndo' candyo'ntyjo̱' naxa̱ⁿ'a. 9Jlui' Pedro, tjantyjo̱o̱ⁿ naxeⁿ' ángel, sa̱a̱ ticaljeiiⁿ aa mayuu'cheⁿ na jndyaañê s'aa ángel. Ndoo' s'aana' ntyjeeⁿ na cwe' tsoom'm ndaa. 10Tei'nomna yuu m'aaⁿ sondaro najndyee. Jnda̱ chii yuu m'aaⁿ sondaro na jnda̱ we. Mana tquiena 'ndyoots'a xjo yuu na nlui' ts'aⁿ na nncuo̱o̱ⁿ nataa quii' tsjoom. 'Ndyoots'a'ñeeⁿ jnaaⁿ cheⁿnquiina'. Jo' chii tei'nomna. Ty'ena cwii nataa, mana 'ndii ángel jom na ñeⁿnqueⁿ. 11Quia jo' sei'no̱ⁿ'yaaⁿ, matsoom: —Cwa mayuu'cheⁿ na Ty'o̱o̱ts'om jñoom ángel 'naaⁿ'aⁿ na catseicandyaañe ja l'o̱ Herodes ñequio luee nn'aⁿ judíos cha'tso na cwiqueⁿ n'omna na nl'ana ñ'eⁿndyo̱. 12Jnda̱ na ljeiiyaaⁿ na mayuu' na jndyaañê, tjaaⁿ waa' María tsondyee Juan ts'aⁿ na mati jndyu Marcos. Ee jo' jo' jndye nn'aⁿ jnda̱ tjomndye na cwila'neiⁿ nnom Ty'o̱o̱ts'om cwentaaⁿ'aⁿ. 13Tjo̱' Pedro 'ndyoots'a w'aa'ñeeⁿ. Cwii yuscu na mandi'ntjom na jndyu Rode tjacanty'iaa' 'ñeeⁿ cacjo̱'. 14Tajnaⁿ'aⁿ na jndyee' Pedro, jo' na tquiaana' na jeeⁿ neiiⁿ'eⁿ. Meiⁿ na nntseicanaaⁿñê 'ndyoots'a tîcatseicanaaⁿñê. Seityuaa'toom tjaaⁿ naquii' w'aa tjatseicañeeⁿ nn'aⁿ cwa Pedro luaa' jnda̱ tyjee', macjo̱' 'ndyoots'a. 15Sa̱a̱ jluena nnoom: —Jeeⁿcheⁿ ntjeiⁿ xqueⁿ'. Sa̱a̱ jom ñe'cwii ñ'oom matsoom na mayuu'cheⁿ na Pedro luaa'. Quia jo' jluena: —Luaa' ángel na mach'ee cwenta jom. Cwe' na mach'eeyana' ntyji' na jom. 16Yocheⁿ na luaa', tîcjaameiⁿntyjee' Pedro na macjo̱o̱ⁿ'o̱ⁿ 'ndyoots'a hasta quia na jlacanaaⁿndyena. Ndo' quia nty'iaana jom jeeⁿ seicaty'ueneiiⁿ'na' joona. 17Sa̱a̱ s'o̱o̱ l'o̱o̱ⁿ na calacheⁿna. Tsoom nda̱a̱na chiuu s'aa Ta Ty'o̱o̱ts'om na tjei' jom naquii' w'aancjo. Ndo' matsoom: —Ñ'oomwaa' calacandii'yo' Jacobo ñequio nt'omcheⁿ nn'aaⁿya na cwilayu'. Jnda̱ jo' jlueeⁿ'eⁿ, tjaaⁿ cwiicheⁿ joo. 18Jnda̱ teixuee jeeⁿ ndyaa' tyolañ'eeⁿ' ndyuee sondaro ee tîleicaliuna ljo' tuii ñequio Pedro. 19Herodes tcuu tcuu tyol'ueeⁿ tsaⁿ'ñeeⁿ sa̱a̱ tîcaljeiiⁿ juu, Jnda̱ jo' chii tyowajndooñê sondaro ndo' sa̱'ntjoom na cwje naⁿ'ñeeⁿ. Jnda̱ jo' jlueeⁿ'eⁿ ndyuaa Judea. Tjaaⁿ Cesarea na nnc'oomñê jo' jo'. 20Herodes jeeⁿ lioom'm nn'aⁿ tsjoom Tiro ñequio tsjoom Sidón. Jo' chii joona jlajndaa'ndyena na nnc'oona na m'aaⁿ. Sa̱a̱ ty'ecal'ueendye jndyeena ñ'oom nnom Blasto ts'aⁿ na wjaañoom'ñe nacañom'm. Tyol'ana ty'oo nnom tsaⁿ'ñeeⁿ na cateijneiⁿ joona na cantycwii tia'ñeeⁿ na lioo' Herodes ñ'eⁿndyena ee nantquie na macaⁿna' joona cwinaⁿna' yuu na matsa̱'ntjom tsaⁿ'ñeeⁿ. 21Quia jo' tqueⁿ Herodes cwii xuee ndo' quia na tue'ntyjo̱ xuee'ñeeⁿ tcweeⁿ liaa na ya cantyja na matsa̱'ntjoom ndo' tjawacatyeeⁿ sula̱ yuu na maxjeⁿ mawacatyeeⁿ quia na matseijndaa'ñê ñ'oom. Jnda̱ jo' tyoñequiaaⁿ ñ'oom nda̱a̱ nn'aⁿ. 22Quia jo' jlat'maaⁿ'ndye nn'aⁿ jom. Jlaxuaana, jluena: —Luaa' cwii ty'o̱o̱ts'om matseineiiⁿ nchii cwe' ts'aⁿ. 23Ndo' ángel cwentaa' nquii Ty'o̱o̱ts'om mañoom' s'aa na teiwii' Herodes ee tîcatseit'maaⁿ'ñê Ty'o̱o̱ts'om. Tueeⁿ'eⁿ na tcwa' canti jom. 24Sa̱a̱ ñ'oom' Ty'o̱o̱ts'om tjanty'eetina', tjawijndyendyeti nn'aⁿ tyolayu'. 25Ndo' Bernabé ñ'eⁿ Saulo, jnda̱ na jnda̱a̱' ts'iaaⁿ na ty'ena Jerusalén, quia jo' ty'elcwee'na Antioquía. Ty'eñ'omna Juan ts'aⁿ na mati jndyu Marcos.

will be added

X\