Hechos 10

1Tsjoom Cesarea tyom'aaⁿ cwii tsaⁿs'a na jndyu Cornelio. Tsaⁿ'ñeeⁿ ts'aⁿ na matsa̱'ntjom cwii tmaaⁿ' sondaro na jndyuna' Italiano. 2Tsaⁿ'ñeeⁿ jeeⁿ xcwee' ts'oom tyotseit'maaⁿ'ñê Ty'o̱o̱ts'om ñequio cha'tso nn'aⁿ waⁿ'aⁿ. M'aaⁿ na nquiaⁿ'aⁿ Ty'o̱o̱ts'om. Mati jndye waa na tyoteijneiⁿ nn'aⁿ judíos na jñeeⁿ'ndye. Ndo' ñequii'cheⁿ tyotseineiiⁿ nnom Ty'o̱o̱ts'om. 3Cwii xuee cha'na na ndyee na matmaaⁿ tco'na' ángel cwentaa' Ty'o̱o̱ts'om nnoom. Ndo'yaaⁿ na jndyoquiee' ángel'ñeeⁿ na m'aaⁿ. Matso nnoom: —Aa ndi', Cornelio. 4Ndo' jom cwe' nty'iaa'toom ángel na jeeⁿ nioom ty'ueeⁿ hasta seiqueeⁿñena' jom. Jnda̱ chii matsoom: —¿Ljo' nntsa' Ta? T'o̱ ángel nnoom matso: —Mandii Ty'o̱o̱ts'om na matsei'neiⁿ' nnoom. Ndo' maqueeⁿ cwenta na mateijndei' ndyeñeeⁿ' ndo' macañjom ts'oom 'u. 5Jo'chii cajñom' nn'aⁿ na c'oona tsjoom Jope na c'ooqueeⁿ'ndyena Simón tsaⁿ na mati jndyu Pedro. 6Tsaⁿ'ñeeⁿ nntsoom ljo' catsa'. Jom cwe' mac'eⁿyaaⁿ waa' tcayoom'm Simón ts'aⁿ na matseicato̱o̱' ntjaⁿ. Nndyoo' 'ndyoo ndaaluee waa waa' tsaⁿ'ñeeⁿ. 7Ndo' Cornelio quia na jnda̱ tja ángel na seineiⁿ ñ'eⁿñê tcwaaⁿ we mosoom'm ndo' cwii sondaro. Sondaro'ñeeⁿ matseit'maaⁿ'ñê Ty'o̱o̱ts'om ndo' mandi'ntjoom nnom Cornelio. 8Cornelio tsoñ'eeⁿ nda̱a̱ naⁿ'ñeeⁿ chiuu waa na tco'na na nty'iaaⁿ'aⁿ. Jnda̱ chii jñoom naⁿ'ñeeⁿ tsjoom Jope. 9Ndo' cwiicheⁿ xuee manjomndye naⁿ'ñeeⁿ nato. Cha'na manndyoo' quiajmeiⁿ' 'oowindyoona tsjoom Jope. Majuu xjeⁿ'ñeeⁿ tjawa Pedro xqueⁿ w'aa yuu su na nntseineiiⁿ nnom Ty'o̱o̱ts'om. 10M'aaⁿ jo' jo' ndo' tyjee' na ñe'jnoom'm, sa̱a̱ yocheⁿ na cwila'ñ'oom'ndyena na nlcwaaⁿ'aⁿ waa na tco'na' nty'iaaⁿ'aⁿ. 11Nty'iaaⁿ'aⁿ na jnaaⁿ cañoom'luee. Jndyocue cwii 'naⁿ cha'cwijom cwii liaa tsca'ndyu' tmeiⁿ na chu'tyeⁿ ñequiee nquina'. Tioona' xjeⁿ yuu na m'aaⁿcheⁿ. 12Liaa'ñeeⁿ ñjom cha'tso nnom quioo' na cwi'ooca' ñequio quioo' na cwi'ootsco̱o̱'ndye ñequio cantsaa. 13Ndo' jndii Pedro na teic'uaa, seineiⁿ, matso: —Quicantyja' Pedro. Catseicue' quioo' na nlqui'. 14Ndo' t'o̱ Pedro, matsoom: —Xoquia̱ Ta. Ee meiⁿjom tyooquia̱ cwii nnom na cwe' cwantindyo oo na tilju' tseixmaⁿna' jo njom' nncu'. 15Teic'uaannda', matso nnoom: —'Naⁿ na jnda̱ tqueⁿ Ty'o̱o̱ts'om na lju' tseixmaⁿna', 'u tintsu' na cwe' na cwantindyo juuna'. 16Ndyee ndii' teic'uaa seineiⁿ. Jnda̱ chii juu 'naⁿ'ñeeⁿ tjalcwe'nnda'na' cañoom'luee. 17Ndo' xcwe na m'aaⁿ' ts'om Pedro ljo' ñe'ca'mo̱ⁿ 'naaⁿ na tco'na' nty'iaaⁿ'aⁿ, ndo' nn'aⁿ na jñom Cornelio jnda̱ tquiena tsjoom'ñeeⁿ, na tax'eendyena yuu waa waa' Simón na cwe' mac'eⁿya Pedro. 18Jnda̱ na tquiena 'ndyoots'a w'aa'ñeeⁿ, jluena: —¿Aa ljoo m'aaⁿ Simón ts'aⁿ na mati jndyu Pedro? 19Xjeⁿ'ñeeⁿ ndicwaⁿ m'aaⁿ' ts'om Pedro cantyja na tco'na' nty'iaaⁿ'aⁿ ndo' matso Espíritu Santo nnoom: —Ndyee naⁿnom cwil'uee 'u. 20Jo' chii quicantyja', cja'cue'. Cja' ñ'eⁿndyena. Tinc'oom' ñomtiuu' ee ja jño̱o̱ⁿya joona. 21Quia jo' Pedro tjacueeⁿ na m'aⁿna. Matsoom nda̱a̱na: —Ja ts'aⁿ na cwil'ue'yo'. ¿Aa waa na nl'a'yo' ja? 22Jluena nnoom: —Jâ tquio̱o̱yâ ts'iaaⁿ 'naaⁿ' ts'aⁿ na jndyu Cornelio, ts'aⁿ na matsa̱'ntjom cwii tmaaⁿ' sondaro. Jom ts'aⁿ na mach'ee yuu na maty'iomyana' ndo' na matseit'maaⁿ'ñê Ty'o̱o̱ts'om. Cha'tsondye nn'aⁿ judíos ya ñ'oom cwilaneiⁿna cantyja 'naaⁿ'aⁿ ndo' jnda nquiuna jom. Cwii ángel cwentaa' Ty'o̱o̱ts'om tso nnoom na catseicañeeⁿ 'u na cja' waⁿ'aⁿ ndo' na nñeeⁿ ñ'oom na nntseineiⁿ'. 23Quia jo' seiñ'oom'ñe Pedro joona na caljoo'ndyena jo' jo'. Ndo' teincoo cwiicheⁿ xuee tjaaⁿ ñ'eⁿndyena. Ndo' nt'om nn'aⁿ tsjoom Jope na cwilayu' ty'ena ñ'eⁿñê. 24Cwiicheⁿ xuee tquiena tsjoom Cesarea. Mameindoo' Cornelio joona. Jnda̱ seitjoom nn'aaⁿ'aⁿ ñequio nn'aⁿ na ya ñ'oom jom ñ'eⁿndye. 25Jom jlui'noom naquii' waⁿ'aⁿ quia na ljeiiⁿ na jnda̱ tyjee'cañoom Pedro, tjacatjomñê juu. Tcoom'm xtyeeⁿ jo nnom na seit'maaⁿ'ñê juu. 26Sa̱a̱ seiwe tsaⁿ'ñeeⁿ jom. Matso nnoom: —Quicantyja' sa, ee mats'aⁿ ja cha'na 'u. 27Ndo' yocheⁿ na cwila'neiⁿna 'ooquie'na naquii' w'aa. Jo' jo' ljeii Pedro cwa jndye nn'aⁿ jnda̱ tjomndye. 28Quia jo' matsoom nda̱a̱na: —'O nquiu'yo' juu ljeii na cwileiñ'o̱o̱ⁿyâ matsona' na ticaty'iomyana' na cwii ts'aⁿ judío nncjaantyjaa' meiⁿnquia ts'aⁿ na nchii ts'aⁿ judío oo meiⁿ na nncjaaqueⁿ'eⁿ quii' waa'. Sa̱a̱ Ty'o̱o̱ts'om jnda̱ t'mo̱o̱ⁿ no̱o̱ⁿ na meiⁿcwii ts'aⁿ tantsjo̱o̱ na cwe' cwantindyo juu oo na tilju' tseixmaⁿ. 29Jo' chii quia na tqueⁿ'yo' ja tjaa na seitsaaⁿ'ndyo̱, maxjeⁿ jndyo̱o̱. Sa̱a̱ je' ñecaljeiya chiuu na tqueⁿ'yo' ja. 30Ndo' t'o̱ Cornelio matsoom: —Xuee je' jnda̱ ñequiee xuee maxjeⁿmeiiⁿ tyom'aaⁿya naquii' w'aya. Matseicwejndo'ndyo̱ ndo' matseina̱ⁿya nnom Ty'o̱o̱ts'om cha'na quil'a' 'o nn'aⁿ judíos na ticwii xuee na ndyee na matmaaⁿ. Juu xjeⁿ'ñeeⁿ teitquioo'ñe cwii ts'aⁿ no̱o̱ⁿ na jeeⁿ caxuee liaa'. 31Matso tsaⁿ'ñeeⁿ no̱o̱ⁿ: “'U re Cornelio, mandii Ty'o̱o̱ts'om ñ'oom na matsei'neiⁿ' nnoom ndo' macañjom ts'oom na mateijndei' nn'aⁿ ljo' na matseitjo̱o̱na' joona. 32Jo' chii cajñom' nn'aⁿ na c'oona tsjoom Jope na nnc'ooqueeⁿ'ndyena Simón ts'aⁿ na mati jndyu Pedro. Jom cwe' mac'eⁿyaaⁿ waa' tcayoom'm Simón ts'aⁿ na matseicato̱o̱'ñe ntjaⁿ, ts'aⁿ na waa waa' 'ndyoo ndaaluee.” 33Jo' chii mantyja jño̱o̱ⁿ nn'aⁿ na c'ooc'omna 'u. Ndo' 'u quianl'ua' na jndyo'. Je' je' cha'tsondyô̱ ljoo m'aaⁿyâ jo nnom Ty'o̱o̱ts'om na nndya̱a̱yâ cha'tso na l'ue ts'oom na nntsu' nda̱a̱yâ. 34Quia jo' to̱' Pedro na matseineiiⁿ, matsoom nda̱a̱na: —Je' quia matsei'no̱ⁿ'cha̱ⁿya, na mayuu' Ty'o̱o̱ts'om tiquich'eeⁿ na cwe' ñejndaa' nn'aⁿ na candya' ts'oom. 35Ee meiⁿquia ndyuaa na m'aⁿ nn'aⁿ na cwila't'maaⁿ'ndye jom ndo' na cwil'a yuu na maty'iomyana' maxjeⁿ macjaawee' ts'oom ñ'eⁿndyena. 36Tyoñequiaaⁿ ñ'oom'm nda̱a̱ jâ nn'aⁿ Israel. Tyotseicañeeⁿ jâ ñ'oom naya na mañequiaana' na meiⁿcwii ñ'omtiuu tic'oom naquii' n'o̱o̱ⁿyâ nc'e Jesucristo tsaⁿ na cwiluiiñe na matsa̱'ntjom cha'tsondye nn'aⁿ. 37'O manquiu'yo' ñ'oom cantyja 'naaⁿ' Jesús. Jnda̱ teinom na tyotseineiⁿ Juan ñ'oom na nleits'oomndye nn'aⁿ, to̱' Jesús tyoñequiaaⁿ ñ'oom nda̱a̱ nn'aⁿ ts'o̱ndaa Galilea ndo' t'oom'na' cha'waa ts'o̱ndaa Judea. 38Cantyja 'naaⁿ' Jesús'ñeeⁿ na jnaⁿ Nazaret, tquiaa Ty'o̱o̱ts'om na jom matseixmaaⁿ najndeii Espíritu Santo. Tyomanoom, tyoch'eeⁿ naya ndo' tyotsein'maaⁿ cha'tso nn'aⁿ na ñenchje tsaⁿjndii ee maxjeⁿ ñ'eⁿñ'eⁿ Ty'o̱o̱ts'om ñ'eⁿñê. 39Jâ cwitjei'yuundyô̱ cantyja 'naaⁿ cha'tso na tyoch'eeⁿ ts'o̱ndaa Judea, ndo' mati naquii' tsjoom Jerusalén. Jla'cuee' naⁿ'ñeeⁿ jom na ty'ioomna jom cjoo' ts'oom'naaⁿ, 40sa̱a̱ xuee jnda̱ ndyee na tueeⁿ'eⁿ s'aa Ty'o̱o̱ts'om na tando'xcoom, ndo' na teitquioo'ñennaaⁿ'aⁿ nda̱a̱ jâ. 41Ticwitquioo'ñê nda̱a̱ cha'tsondye nn'aⁿ, macanda̱ nda̱a̱ jâ. Ee jnda̱ tjeii'ñe Ty'o̱o̱ts'om jâ na cwilaxmaaⁿyâ na catjei'yuu'ndyô̱ cantyja 'naaⁿ' Jesús nda̱a̱ nn'aⁿ. Jâ tyocwaa'â ndo' tyowa̱a̱yâ ñ'eⁿñê jnda̱ na tando'xcoom. 42Sa̱'ntjom Ty'o̱o̱ts'om jâ na nñequiaayâ ñ'oom nda̱a̱ nn'aⁿ ndo' na catjei'yuu'ndyô̱ na tqueeⁿ Jesús na cu'xeⁿ nn'aⁿ na ta'ndo' ñequio nn'aⁿ na jnda̱ tja̱. 43Mati profetas tyola'neiⁿna cantyja 'naaⁿ' Jesús. Tyoluena na cha'tsondye nn'aⁿ na nlayu' ñ'eⁿñê maxjeⁿ nntseit'maⁿ ts'om Ty'o̱o̱ts'om jnaaⁿna nc'e xuee' jom. 44Ndicwaⁿ matseineiⁿ Pedro nda̱a̱na ndo' to'ñoom naⁿ'ñeeⁿ Espíritu Santo naquii' n'om. 45Ndo' nn'aⁿ judíos na cwilayu' na ñ'eeⁿ ñ'eⁿ Pedro jeeⁿ seiñ'eeⁿ'ñena' joona na mati nn'aⁿ na nchii judíos to'ñoomna Espíritu Santo naquii' n'om. 46Ee nn'aⁿ judíos'ñeeⁿ jndyena na xuii' ñ'oom jla'neiⁿ naⁿ'ñeeⁿ na lcwii'na Ty'o̱o̱ts'om. 47Jo' chii matso Pedro: —Aa tiyuu' tjaa 'ñeeⁿ nntso na ticwits'oomndye naⁿm'aⁿ ee jnda̱ to'ñoomna Espíritu Santo naquii' n'omna majo'ti cha'xjeⁿ to'ño̱o̱ⁿ jaa jom naquii' n'o̱o̱ⁿya. 48Quia jo' seijndaa'ñê na cwits'oomndye naⁿ'ñeeⁿ ñequio xuee' Jesucristo. Jnda̱ chii taⁿ naⁿ'ñeeⁿ nnoom na caljoo'ñê ñ'eⁿndyena cwantindyo xuee.

will be added

X\