Hechos 1

1'U ta Teófilo, tsom na seiljeijndya̱a̱ na seicwano̱ⁿ na m'aaⁿ' seicandiiya 'u cantyja cha'tso na tyoch'ee Jesús ndo' na tyo'mo̱o̱ⁿ hasta xuee na tjawaaⁿ cañoom'luee. Cwii tjo̱o̱cheⁿ na nncjaawaaⁿ tjeii'ñê apóstoles. Ndo' cantyja 'naaⁿ' Espíritu Santo t'mo̱o̱ⁿ nda̱a̱ naⁿ'ñeeⁿ chiuu nl'ana. 3Jnda̱ na tueeⁿ'eⁿ, tando'nnaaⁿ'aⁿ, teitquioo'ñê nda̱a̱na ñequio jndye nnom na t'mo̱ⁿna' na wando'xcoom. Wen'aaⁿ xuee tyom'aaⁿ na nty'iaana jom. Ndo' seineiiⁿ nda̱a̱na cantyja 'naaⁿ' na matsa̱'ntjom Ty'o̱o̱ts'om. 4Yocheⁿ na tyom'aaⁿ ñ'eⁿndyena sa̱'ntjoom na ticalui'na tsjoom Jerusalén. Tsoom nda̱a̱na: —Cwindo'yo' hasta xeⁿ jnda̱ seicanda̱a̱'ñena' ñ'oom na tqueⁿtyeⁿ Tsotya̱ya na tsoom na nndyo Espíritu Santo cha'xjeⁿ jnda̱ ñejndye'yo' na tsjo̱o̱ nda̱a̱'yo'. 5Ee Juan tyotseits'oomñê nn'aⁿ ñequio ndaatioo, sa̱a̱ 'o tajndye xuee ndo' njñom Ty'o̱o̱ts'om Espíritu Santo naquii' n'om'yo'. Luaa' waa na nleits'oomndyo'. 6Quia na tyom'aⁿ naⁿ'ñeeⁿ ñ'eⁿ Jesús ta'x'eena nnoom, jluena: —Ta, ¿aa je' na nntsa' na catsa̱'ntjomndyennda' nn'aⁿ Israel? 7Tsoom nda̱a̱na: —Tsotya̱ya waa najndeii na matseixmaaⁿ na matseijndaa'ñê cwaaⁿ xuee oo ljo' xjeⁿ ntyjeeⁿ na nluii cwii cwii nnom na matseijndaa'ñê. 8Sa̱a̱ quia na jnda̱ jndyo Espíritu Santo naquii' n'om'yo', quia jo' nñequiaaⁿ na nlaxmaⁿ'yo' najndeii na cwiluiiñê. Ndo' nntjei'yuu'ndyo' cantyja 'naⁿ ja naquii' tsjoom Jerusalén, ñ'eⁿ cha'waa ts'o̱ndaa Judea ñ'eⁿ ndyuaa Samaria, ndo' hasta cha'waa nnom tsjoomnancue. 9Jnda̱ na tsoom na luaa' jndoo'cheⁿna tjawaaⁿ. Ndo' jndyo cwii nchquiu, mana seicu'na' na cwinty'iaana jom. 10Nquiee cwinty'iaana jo nandye tsjo̱'luee xjeⁿ na mawjaaⁿ, ndo' mats'iaa jo' teitquioo'ndye we yonom nacañoomna na jeeⁿ canchii' liaa cwee'. 11Jlue naⁿ'ñeeⁿ nda̱a̱na: —'O nn'aⁿ Galilea, ¿chiuu na jeeⁿ cwinty'ia'yo' jo nandye tsjo̱'luee? Jesúsm'aaⁿ' na jnaaⁿ jo nda̱a̱'yo' xjeⁿ cañoom'lueecheⁿ tjaaⁿ. Ndo' cha'xjeⁿ na tjawaaⁿ maluaa' nndyonnaaⁿ'aⁿ. 12Quia jo' ty'elcwee'na Jerusalén na ñet'omna ta na jndyu Olivos. Juu ta'ñeeⁿ tquia m'aaⁿna' ñequio tsjoom Jerusalén cha'na tquia na wanaaⁿ na nntseicaañe ts'aⁿ judío xuee na cwita'jndyeena. 13Jnda̱ na ty'equie'na quii' tsjoom, tquiena yuu waa w'aa. Ty'ewana cuarto nandye w'aa yuu cwic'eeⁿyana. Ndo' ñ'eⁿ Pedro ñequio Jacobo, Juan, Andrés, Felipe, Tomás, Bartolomé, Mateo, Jacobo jnda Alfeo, Simón ts'aⁿ na cwilue nn'aⁿ cananista ndo' ñ'eⁿ Judas tyjee Jacobo. 14Cha'tsondyena ñecwii jla'jomndyena na 'io ndi 'io tyolaneiⁿna nnom Ty'o̱o̱ts'om. Mati jla'jomndye nt'om yolcu, ndo' ñ'eeⁿ ti'ntyjee Jesús ñ'eⁿ tsoñeeⁿ María. 15Cwii xuee'ñeeⁿ teicantyja Pedro quii'ntaaⁿ nn'aⁿ na cwila'yu'. Joo naⁿ'ñeeⁿ cha'na cwii siaⁿnto waljoo' ntquiuundyena. 16Matsoom nda̱a̱na: —'O nn'aⁿya na cwilayu'yo', jndei'na' na seicanda̱a̱'ñena' ñ'oom na seiljeii David cantyja 'naaⁿ' Judas cha'xjeⁿ tso Espíritu Santo nnoom cantyja 'naaⁿ' Judas'ñeeⁿ tsaⁿ na tjaca'mo̱ⁿ Jesús nda̱a̱ nn'aⁿ na t'ue jom. 17Judas'ñeeⁿ tyocañ'eeⁿ ñ'eⁿndyô̱ jâ ndo' ñeseijomñê ts'iaaⁿ na cwilaxmaaⁿyâ. 18Ñequio s'om na tantjoom cantyja natia na s'aaⁿ, tioml'uaaⁿ cwii taⁿ' tyuaa. Jo' jo' tiooñê meintyjee' xqueeⁿ, t'ioo'ñexcweeⁿ. Jlui' cha'tso tsiaⁿ'aⁿ. 19Ndo' cha'tso nn'aⁿ Jerusalén nquiuna na luaa' s'aaⁿ. Quia jo' ñequio ñ'oom na cwila'neiⁿna jla'cajndyuna tyuaa'ñeeⁿ Acéldama. Ñ'oomwaa' matsona' Tyuaa Niom'. 20Ee waa ñ'oom nacjoo' libro Salmos na matsona': Caljo waⁿ'aⁿ na ñeⁿnquiina'. Tinc'om nn'aⁿ juuna'. Mati matsona': Cwiicheⁿ ts'aⁿ coñom ts'iaaⁿ na ñeseixmaaⁿ. 21’Quia jo' cwii ts'aⁿ na maxjeⁿ ñ'eeⁿ ñ'eⁿndyô̱ cha'waati xuee na tyocañ'a̱a̱ⁿyâ ñ'eⁿ nquii Ta Jesús na tjawa tjacueeⁿ tyomanoom naquii' njoom, 22ts'aⁿ na maxjeⁿ ñ'eeⁿ ñ'eⁿndyô̱ cantyjati xuee na teits'oomñe Jesús s'aa Juan hasta xuee quia na tjawaaⁿ. Macaⁿna' na nntseijomñê tsaⁿ'ñeeⁿ ñ'eⁿndyô̱ na nntjei'yuu'ndyô̱ na jnda̱ tando'xco Jesús. 23Quia jo' tyot'mo̱o̱ⁿna we ts'aⁿ, José ñequio Matías. José'ñeeⁿ mati cwila'cajndyuna jom Barsabás, ndo' xqueⁿ xueⁿ'eⁿ Justo. 24Tyolaneiⁿna nnom Ty'o̱o̱ts'om, tyoluena: —'U Ta na mawa'naⁿ' naquii' n'om cha'tsondye nn'aⁿ, ca'mo̱ⁿ' cwaaⁿ cwii na wendye naⁿm'aⁿ' na nncwjii'ndyu' na nntseijomñe ñequio nn'aⁿ na ma'jñoom' ts'iaaⁿ 'naⁿ'. Nntseinoomñe tsaⁿ'ñeeⁿ ts'iaaⁿ na ñeseixmaⁿ Judas na jnda̱ tjei'ñe, ndo' jnda̱ tja yuu tseixmaⁿ na nncjaa cantyja 'naaⁿ' jnaaⁿ'. 26Quia jo' ty'ena x'iaa cha m'mo̱ⁿna' 'ñeeⁿ nleijnoom' ts'iaaⁿ'ñeeⁿ. Ndo' teijnoom' Matías. Jo' chii ty'oomna' jom ts'iaaⁿ cha'xjeⁿ ts'iaaⁿ na m'aⁿ canchoo'cwii apóstoles.

will be added

X\