3 Juan 1

1Ja na cwiluiitquiendyo̱, matseiljeiya cartawaa na wjaana' na m'aaⁿ' Gayo na mayuu'cheⁿ jeeⁿ wi' ts'o̱o̱ⁿya 'u. 2'U re nn'aⁿya na jeeⁿ jnda ntyjiiya macaⁿ'a nnom Ty'o̱o̱ts'om na cha'tso cantyja 'naⁿ' ya wja'm'aaⁿ', ndo' ya nc'oom' na tiwi' cha'xjeⁿ ya wjaaquiendyu' na m'aaⁿ' nacje 'naaⁿ' Espíritu. 3Ee tquiecañom nt'om nn'aaⁿya na cwila'yu' na m'aaⁿya, ndo' tquiaana' na jeeⁿ neiⁿya na jluena no̱o̱ⁿ na jeeⁿ xcwee' ts'om' cantyja 'naaⁿ' ñ'oom na mayuu' ndo' cantyja na wjaam'aaⁿ', mache' na juu ñ'oom naya maqueⁿna' xjeⁿ 'naaⁿ'na' 'u. 4Ee tjaa'naⁿ cwiicheⁿ nnom ñ'oom na mañequiaatina' na neiⁿya cha'xjeⁿ quia na mandiiya na joo nn'aⁿ na cwiluiindye ntseindaaya tyeⁿ cwiljoo'ndyena naquii' ñ'oom na mayuu'. 5'U re nn'aⁿya na jeeⁿ jnda ntyjiiya, jeeⁿ xcwe mache' na mateixe' nn'aaⁿya na cwe' cwiquieya na m'aaⁿ', meiiⁿ joona nn'aⁿ na ticwajnaⁿ'. 6Jo nda̱a̱ nn'aⁿ na cwila'yu' ljooñe, jluena na jeeⁿ wi' ts'om' joona. Cwii naya'ñeeⁿ cateijndei' joona 'naⁿ na macaⁿna' cha nnda̱a̱ nc'ootina ts'iaaⁿ 'naaⁿ' Ty'o̱o̱ts'om, ee jeeⁿ cjawee' ntyjeeⁿ na mache' naljo'. 7Ee joona macwi'ooñ'omna ñ'oom naya 'naaⁿ' Jesucristo jo nda̱a̱ nn'aⁿ, ndo' tîcato'ñoomna s'om nda̱a̱ nn'aⁿ na tyoolayu'. 8Nc'e na ljo', jaa nn'aⁿ na cwilayuu'a la'xmaaⁿya na cateix'a̱a̱ya joona na nnteijndeiiya na cwi'oonquiana ñ'oom na mayuu'. 9Seiljeiya cwii carta cwentaa' tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ yuu na m'aⁿ'yo' sa̱a̱ juu Diótrefes ticwancueⁿ'eⁿ na ja nntsa̱'ntjo̱ⁿ ee ñecuaa xjeⁿ 'naaⁿ'aⁿ. 10Nc'e na luaa', quia na nncua̱caño̱o̱ⁿya 'o, quia jo' ncwaⁿya jom na mach'eeⁿ na luaa' na matseineiiⁿ ñ'oom cantu nacjooyâ. Ndo' nchii macanda̱ nmeiⁿ' mach'eeⁿ, mati nn'aⁿ na cwi'oonquia ñ'oom' Ty'o̱o̱ts'om, tiñe'coñoom joona, ndo' nn'aⁿ na ñe'cala'ljo naⁿ'ñeeⁿ, macwjeeⁿ'eⁿ joona quii' tmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ. 11'U re nn'aⁿya na jeeⁿ jnda ntyjiiya, tintseijomndyu' ñequio ts'iaaⁿ natia, 'u catseijomndyu' ts'iaaⁿ na ya. Ee ts'aⁿ na matseijomñe ts'iaaⁿ na ya tseixmaaⁿ cwentaa' Ty'o̱o̱ts'om, sa̱a̱ ts'aⁿ na wjaantyjo̱ ñequio natia, tic'oomñe cwentaaⁿ'aⁿ. 12Cha'tsondye nn'aⁿ ya ñ'oom nquiuna cantyja 'naaⁿ' nn'aaⁿya Demetrio, ndo' manquiiti ñ'oom na mayuu' macwji'yuu'ñena' cantyja 'naaⁿ'aⁿ. Mati jâ cwitjei'yuu'ndyô̱ na ljo' ndo' 'o manquiu'yo' na cwilana̱a̱ⁿyâ ñ'oom na mayuu'. 13Jndye ñ'oom niom na ñe'catseiljeiya cwenta' sa̱a̱ tiñe'cats'aa naljo' ñequio tsom ñequio ndaantom, 14ee ntyjaa'ya ts'o̱o̱ⁿ na tyuaa' nnty'iaya 'u quialjo'cheⁿ nlana̱a̱ⁿ ntyja̱a̱ nda̱a̱ya. 15Quiaa Ty'o̱o̱ts'om na tjaañomtiuu c'oom'. Nn'aⁿ na m'aⁿ ñjaaⁿ na ya ñ'oom ñequiondyu' cwila'cwanomna na xmaⁿndyu', ndo' 'u je', quiaa' na xmaⁿñe cwii cwii ts'aⁿ na matseiyu' yuu na m'aaⁿ'.

will be added

X\