2 Corintios 5

1Seii'a nmeiiⁿ la'xmaⁿna' cha'cwijom cwii w'aa na cwe' cwantindyo chu waana'. Ndo' manquiuuya xeⁿ nntyuii' juuna' jnda̱ seijndaa'ñe Ty'o̱o̱ts'om w'aa na xcona' jo cañoom'luee na ticantycwii na waana', na nchii nn'aⁿ l'a juuna'. 2Ee mayuu' yocheⁿ na cwitando̱o̱'a ñequio seii'a nmeiiⁿñe, cwila'ncjoo'ndyo̱ ee queeⁿ n'o̱o̱ⁿya na nnc'o̱o̱ⁿya w'aaxco na waana' cañoom'luee, 3ee na nla'xmaaⁿya juuna', nntseijomna' jaa cha'cwijom ts'aⁿ na cwee liaa', nchii cha'na ts'aⁿ na ñecasei'ñe. 4Seii'a nmeiiⁿ na laxmaⁿna' cha'cwijom w'aa yuu na cwic'a̱a̱ⁿya, jaawi'ndaa'na', jo' cwilancjoo'ndyo̱ ndo' matsei'ndaa'na' nquiuuya ee nchii cwe' na ñeca'ndya̱a̱ya seii'a na n'ndiina' jaa cha'cwijom ñecantsei'ndyo̱, sa̱a̱ nc'e na ñe'cwa̱a̱'a seii'a na xcona', cha juu na laxmaaⁿya na cwiwi'ndaa' ndo' na 'oowje cwitsuuñ'eⁿna' nc'e na laxmaaⁿya na ticantycwii na cwitando̱o̱'a. 5Nquii Ty'o̱o̱ts'om jnda̱ seijndaa'ñê na nluii na luaa', ndo' cha na m'mo̱ⁿna' na nntseicanda̱a̱'ñê juuna', jnda̱ tquiaaⁿ Espíritu Santo naquii' n'o̱o̱ⁿya, cwii na ma'mo̱ⁿna' na cwiljotyeⁿ ñ'oom na jnda̱ tsoom. 6Jo' chii cwiñ'omt'maaⁿ'ndyo̱ n'o̱o̱ⁿya na yocheⁿ na ndicwaⁿ tando̱o̱'a ñequio seii'a nmeiiⁿ, tyooto'ño̱o̱ⁿya w'aaya, ñecatsona' na tic'o̱o̱ⁿya ñequio nqueⁿ na cwiluiiñê na matsa̱'ntjoom jaa. 7Ee cwitsam'aaⁿtya̱a̱ya nc'e na cwila'yu'ya cwii n'o̱o̱ⁿya ñ'eⁿñê, nchii nc'e na cwinty'iaanda̱a̱ya jom. 8Sa̱a̱ m'aaⁿya na quit'maⁿ n'o̱o̱ⁿya Ta Jesús ndo' nl'ueyaya n'o̱o̱ⁿya na tacatando̱o̱'tya̱a̱ya ñequio seii'a nmeiiⁿ cha nnda̱a̱ nntando̱o̱'a yuu na m'aaⁿ. 9Jo' chii cha'tso na cha'tso na cwil'aaya, cwijoo' n'o̱o̱ⁿya na ñequii'cheⁿ cal'aaya yuu na cwijaawee'ntyjeeⁿ, meiiⁿ na cwitsam'aaⁿtya̱a̱ya ñ'eⁿ seii'a nmeiiⁿ, oo meiiⁿ na jnda̱ 'ndya̱a̱ya juuna'. 10Ee cha'tsondyo̱ nncwintyja̱a̱'a jo nnom Cristo na nncu'xeeⁿ jaa, cha cwii cwiindyo̱ nnto'ño̱o̱ⁿya cantyjati na jnda̱ ñel'aa xjeⁿ na ñet'o̱o̱ⁿya ñequio seii'a, aa na maty'iomyana' ndo' aa na tia. 11Nc'e na nntu'xeⁿndye nn'aⁿ, jo' chii cwijoo' n'o̱o̱ⁿyâ na quiandye nn'aⁿ cantyja 'naaⁿ'aⁿ. Nquii Ty'o̱o̱ts'om ntyjiijndaa'ñê chiuu n'o̱o̱ⁿyâ ndo' ntyjaa' n'o̱o̱ⁿyâ na mati 'o. 12Tinc'oom' n'om'yo' na ñe'calat'maaⁿ'ndyo̱ cheⁿncjo̱o̱yâ nda̱a̱'yo'. Jâ cwe' cwiñequiaayâ na wanaaⁿ na c'om'yo' na jnda nquiu'yo' jâ, cha nnda̱a̱ nla'lcwe'yo' ñ'oom nda̱a̱ nn'aⁿ na cwilas'andye cantyja chiuu na cwiwitquioo', nchii cantyja chiuu tseixmaⁿ ts'aⁿ naquii' ts'om. 13Ee meiiⁿ cwilue nn'aⁿ na jnda̱ teintjeiⁿndyô̱, luaa' laxmaaⁿyâ nc'e Ty'o̱o̱ts'om, ndo' xeⁿ laxmaaⁿyâ ts'aⁿ na yaa', luaa' waa cha' cateijndeiina' 'o. 14Juu na m'aaⁿ Cristo na candya' ts'oom jâ cwiluiiñena' cwii na matsa̱'ntjomna' ee nquiuuyaayâ na tueeⁿ'eⁿ cwentaa cha'tsondye nn'aⁿ, jo' chii cha'tsondyo̱ cwiluiindyo̱ l'oo. 15Tueeⁿ'eⁿ cwentaa cha'tsondye nn'aⁿ cha joo nn'aⁿ na cwitando'na tic'omtina cantyja na l'ue n'om nquieena, sa̱a̱ catando'na cantyja 'naaⁿ' nqueⁿ na tueeⁿ'eⁿ ndo' tando'xcoom cwentaana. 16Jo' chii je' tacotjeii'â cwenta chiuu tseixmaⁿ ts'aⁿ cha'xjeⁿ nn'aⁿ tsjoomnancue cwitjeii'na cwenta chiuu tseixmaⁿ cwii x'iaana. Tyowaa cwii tiempo maluaa' tyotjeii'â cwenta chiuu tseixmaⁿ Cristo sa̱a̱ je' tacol'aayâ na ljo'. 17Jo' chii ts'aⁿ na matseitjoom'na' juu ñequio Cristo, cwiluiiñe ts'aⁿ na jnda̱ tuiiñe xco. Cha'tso na tijo'ndyo na ñeseixmaaⁿ jnda̱ teinom, cha'tso cantyja 'naaⁿ'aⁿ laxmaⁿ xcona'. 18Nquii Ty'o̱o̱ts'om mach'eeⁿ ts'iaaⁿmeiⁿ', majom maqueeⁿ jaa na cwiljoya ts'oom ñ'eⁿndyo̱ nc'e Cristo ndo' maty'ioom ts'iaaⁿ jaa na quiandye nn'aⁿ na caljoya ts'oom ñ'eⁿndyena. 19Luaa matsona': Cwiljoya ts'om Ty'o̱o̱ts'om ñ'eⁿ nn'aⁿ nc'e Cristo, meiⁿ ticwjaa'ñê cwenta na la'xmaⁿna jnaⁿ, ndo' ty'ioom ts'iaaⁿ nda̱a̱yâ na nñequiaayâ ñ'oom nda̱a̱ nn'aⁿ na cwiljoya ts'oom ñ'eⁿndyena. 20Je' cwiluiindyô̱ nn'aⁿ na cwila'candii 'o ñ'oom na matseicwanom Cristo na m'aⁿ'yo'. Maty'iomna' na nquii Ty'o̱o̱ts'om matseity'ooñê nda̱a̱'yo' ñequio ñ'omndyua̱a̱yâ. Jo' chii ñequio xuee' Cristo cwila'ty'oondyô̱ nda̱a̱'yo' na caljoya n'om'yo' ñ'eⁿ Ty'o̱o̱ts'om. 21Cristo meiⁿcwii jnaⁿ tîcatseixmaaⁿ, sa̱a̱ nc'e na candya' ts'om Ty'o̱o̱ts'om jaa, jo' na s'aa na matseixmaaⁿ jnaⁿ cha jaa na matseitjoom'na' ñ'eⁿñê nnda̱a̱ nla'xmaaⁿya cantyja na maty'iomyana' cha'xjeⁿ na macaⁿna'.

will be added

X\