2 Corintios 3

1Quia cwil'uuyâ na luaa', ¿aa m'aaⁿ' n'om'yo' na cwito̱o̱'nnda'â na cwila't'maaⁿ'ndyo̱ cheⁿncjo̱o̱yâ cantyja 'naaⁿ' ts'iaaⁿ na cwil'aayâ? Oo ¿aa cwila'tiuu'yo' na macaⁿna' na nntsañ'o̱o̱ⁿyâ cartas na cwilue nt'omcheⁿ nn'aⁿ na jeeⁿ canda̱a̱' ts'iaaⁿ na cwil'aayâ? Oo ¿aa nntaaⁿyâ na quia'yo' carta na nndu'yo' na jeeⁿ canda̱a̱' ts'iaaⁿ cwil'aayâ? Nt'omcheⁿ nn'aⁿ luaa' cwil'ana. 2Sa̱a̱ mancjo'ti'yo' cwiluiindyo' cha'cwijom cwii tsom na teiljeiina' naquii' n'o̱o̱ⁿyâ na ma'mo̱ⁿna' nda̱a̱ nn'aⁿ na cwijaacañjoom' ts'iaaⁿ 'naaⁿ' Ty'o̱o̱ts'om na cwiluii quii'ntaaⁿ'yo'. Nc'e cantyja 'naaⁿ' juuna' nnda̱a̱ nljeii ts'aⁿ chiuu waa ts'iaaⁿ na tyots'aa quii'ntaaⁿ'yo' ndo' nnda̱a̱ nndii na jla'ljo'yo' Jesucristo. 3Cwiwitquioo'ya na 'o laxmaⁿ'yo' cwii carta na nquii Cristo seiljeiⁿ cantyja 'naaⁿ' ts'iaaⁿ na jnda̱ macwil'aayâ quii'ntaaⁿ'yo', na nchii teiljeii juuna' ñequio ndaantom, sa̱a̱ ñequio Espíritu Santo, meiⁿ nchii nacjoo' lcaa'ljo̱' sa̱a̱ teiljeiina' naquii' n'om'yo'. 4Manquiuuyaayâ na luaa' waa ee cwicantyjaa' n'o̱o̱ⁿyâ Ty'o̱o̱ts'om nc'e Cristo. 5Meiⁿ nchii ncjo̱o̱yâ waa cwii nnom na laxmaaⁿyâ na nda̱a̱ nl'uuyâ na jeeⁿ cwijaacañjoom' ts'iaaⁿ 'naaⁿ'aⁿ na cwil'aayâ, nquii Ty'o̱o̱ts'om mañequiaaⁿ na cwijaacañjoom' cwil'aayâ juuna'. 6Nqueⁿ jnda̱ ty'ioom ts'iaaⁿ jâ na cwicanda̱a̱ cwindya̱'ntjo̱o̱ⁿyâ cantyja 'naaⁿ' ñ'oom na tijoom cachuii' na mañequiaana' na nlui'n'maaⁿndye nn'aⁿ. Juu ñ'oom'ñeeⁿ waa najndeiina' na matseijndaa'ñena' na cwita'ndo'xco añmaaⁿ nn'aⁿ nc'e Espíritu Santo. Nchii maqueⁿna' xjeⁿ nn'aⁿ cha'xjeⁿ mach'ee ljeii naqui. Ee ljeii'ñeeⁿ matseijndaa'ñena' na cwje nn'aⁿ. 7Juu ljeii na tqueⁿ Moisés, teiljeiina' cjoo' lcaa' ljo̱'. Ñeseixmaⁿna' na caxueena' hasta tyoch'eena' na caxuee nnom Moisés, meiⁿ leicanda̱a̱ nty'iaa nn'aⁿ Israel nnoom ndo' juu na caxuee nnoom cheⁿndyocheⁿ tjanduu'na'. Juu ljeii'ñeeⁿ na seijndaa'ñena' na cwiwje nn'aⁿ, tyjee'na' ñequio na caxuee na cwiluiiñe Ty'o̱o̱ts'om, 8nc'e na luaa' tyotseixmaⁿ juu na caxuee'ñeeⁿ, cwanti t'maⁿti tseixmaⁿ ñ'oom na tijoom cachuii' na cwito'ño̱o̱ⁿya na matseijndaa'ñe Espíritu Santo. 9Ee xeⁿ juu ñ'oom na seijndaa'ñena' na nnt'uiityeⁿna' nn'aⁿ tyotseixmaⁿna' na caxuee na cwiluiiñe Ty'o̱o̱ts'om, quia jo' juu ñ'oom na maqueeⁿ jaa na tjaa jnaⁿ jlaxmaaⁿya, t'maⁿti na caxuee na tseixmaⁿna', nchiiti ñ'oom na tqueeⁿjñeeⁿ. 10Meiiⁿ t'maⁿ na caxuee tyotseixmaⁿ ljeii na tqueⁿ Moisés, sa̱a̱ juu ñ'oom na maqueⁿ Ty'o̱o̱ts'om jaa na tjaa jnaⁿ laxmaaⁿya, t'maⁿticheⁿ nacaxuee na tseixmaⁿna'. 11Jo' chii xeⁿ juu ñ'oom'ñeeⁿ na ticwiyoo' meiiⁿ t'maⁿ tyotseixmaⁿna' na caxuee na cwiluiiñe Ty'o̱o̱ts'om, sa̱a̱ je' juu ñ'oom na cwiljotyeⁿ t'maⁿticheⁿ na caxuee na cwiluiiñê tseixmaⁿna'. 12Nc'e juu ñ'oomxcowaa' mañequiaana' na cwicantyjaa' n'o̱o̱ⁿyâ, jo' jo' na cwilana̱a̱ⁿyâ juuna' nda̱a̱ nn'aⁿ ñequio na t'maⁿya n'o̱o̱ⁿyâ. 13Meiⁿ tiquil'aayâ cha'na tyoch'ee Moisés na tyotseicata̱a̱ⁿ'a̱ⁿ nnoom ñequio liaa cha juu na caxuee nnoom na ñeya tjantycwiina', titquioo' juuna' nda̱a̱ nn'aⁿ Israel. 14Sa̱a̱ naⁿ'ñeeⁿ tîcala'no̱ⁿ'na na luaa' tyoch'eeⁿ ee xjeⁿ je'cheⁿ quia cwila'naaⁿna ñ'oom tquiee'ñeeⁿ na tquiaa Moisés nda̱a̱na waa cwii na cha'cwijom liaa na matseicu'na' na nla'no̱ⁿ'na na juu jo' macanda̱ maquindyo̱na' quia na matseiyu' ts'aⁿ ñequio Cristo. 15Ee xjeⁿ je'cheⁿ, quia na cwila'naaⁿna ñ'oom na tyoñequiaa Moisés, ticala'no̱ⁿ'na juuna'. Matseijomna' cha'cwijom na ta̱' na nla'no̱ⁿ'na juuna'. 16Sa̱a̱ quia cwilcwe' ts'om ts'aⁿ jnaaⁿ' na nntioñe l'o̱ nquii na cwiluiiñe na matsa̱'ntjom, matseicanaaⁿñena' na nntsei'no̱ⁿ' ñ'oom'ñeeⁿ. 17Ee manquii na cwiluiiñe na matsa̱'ntjom jaa, manquiityeeⁿ cwiluiiñê Espíritu, ndo' meiⁿquiayuucheⁿ na m'aaⁿ Espíritu na cwiluiiñê, jo' cwindyaandye nn'aⁿ. 18Jo' chii cha'tsondyo̱ jaa nc'e na ticata̱' nda̱a̱ya ñequio cwii liaa, matseijomna' jaa cha'cwijom tsjo̱'jnom na maju'na' na caxuee na cwiluiiñe Jesús na matsa̱'ntjoom jaa, ndo' 'io ndi 'io matseijomtina' jaa cha'na nqueⁿ na jaawijndyeti matseit'maaⁿ'ñena' jom na juu jo' cwinaⁿna' cantyja 'naaⁿ' nqueⁿ na matsa̱'ntjoom jaa, na cwiluiiñê Espíritu.

will be added

X\