2 Corintios 2

1Jo' chii seijndaa'ndyo̱ na maxjeⁿ tîcjo̱ na m'aⁿ'yo', tints'aa na nntseichjoo'na' n'om'yo'. 2Ee xeⁿ cantyja 'naaⁿ' na ljo', nnts'aa na nntseichjoo'na' n'om'yo' ndo' na ljo' ntjom'yo', ¿'ñeeⁿ nñequiaa na neiⁿya? Macanda̱ 'o ee xeⁿ na maxjeⁿ tjo̱ je' jnda̱ s'aa cwii nnom na seichjoo'na' n'om'yo'. 3Cwe' jo' na seiljeiya ñ'oom'ñeeⁿ na seicwano̱ⁿya na m'aⁿ'yo' ee tiñe'cjo̱nty'ia 'o na nl'a'yo' na chjoo' ts'o̱o̱ⁿ ee matsona' na 'o nñequia'yo' na neiⁿya. 4Ee sei'ndaa'na' ntyjiiya quia seiljeiya carta'ñeeⁿ, s'aana' na jeeⁿ jnda ntyjiiya hasta ty'io̱o̱ya. Nchii seiljeiya juuna' na catseichjoo'na' n'om'yo' sa̱a̱ cha cala'no̱ⁿ'yo' na juu na jeeⁿ wi' ts'o̱o̱ⁿya 'o jeeⁿ t'maⁿ tseixmaⁿna'. 5Sa̱a̱ xeⁿ m'aaⁿ ts'aⁿ na s'aa na chjoo' n'om nn'aⁿ, nchii cwe' tomti ja na tquiaaⁿ na chjoo' ts'o̱o̱ⁿ, s'aaⁿ na ljo' ñ'eⁿ cha'tsondyo' 'o, meiⁿ nchii cwe' na mawino̱ⁿ'a na matsjo̱o̱ na ljo'. 6Sa̱a̱ je' malei'tyeⁿ jnda̱ tuii chiuu na majndyendyo'ti'yo' jla'jndaa'ndyo' na catioom cantyja na seitjo̱o̱ñê. 7Je' macaⁿna' na cala't'maⁿ n'om'yo' jom ndo' quia'yo' na t'maⁿ ts'oom, tints'aana' na juu na m'aaⁿ na chjoo' ts'oom na seitjo̱o̱ñê nncjan'oomna' jom na tacantyjaa' ts'oom Ty'o̱o̱ts'om. 8Jo' chii macaⁿ'a nda̱a̱'yo' na cat'mo̱ⁿ'yo' na jnda nquiu'yo' jom. 9Seiljeiya carta'ñeeⁿ na seicwano̱ⁿya na m'aⁿ'yo' cha nleitquioo' aa nla'canda̱'yo' ñ'oom na maqua̱ⁿya nda̱a̱'yo'. 10Ee meiⁿcwi'ñeeⁿcheⁿ ts'aⁿ na cwila't'maⁿ n'om'yo' mati ja matseit'maⁿ ts'o̱o̱ⁿ tsaⁿ'ñeeⁿ, ndo' meiⁿnquia 'ñeeⁿ na jnda̱ seit'maⁿ ts'o̱o̱ⁿ, jo nnom Cristo mats'aa na ljo' na cateijndeiina' 'o, 11cha tincwantjom Satanás jaa ee manquiuuyaaya chiuu mayaaⁿ'aⁿ. 12Quia na tjo̱ tsjoom Troas na nñequiaya ñ'oom cantyja 'naaⁿ' Cristo nda̱a̱ nn'aⁿ tsjoom'ñeeⁿ, t'maⁿ tju'naaⁿñena' na nndi'ntjo̱ⁿya nnoom jo' jo', 13sa̱a̱ meiiⁿ na ljo' tîleiquiaana' na ya ntyjii ee tîc'oomñe ti'nn'aaⁿya Tito. Nc'e na ljo', tsjo̱o̱ya nda̱a̱ naⁿ'ñeeⁿ majo̱ya, jluii'a na m'aⁿna, jndyo̱o̱ndyeyuya ñjaaⁿ ts'o̱ndaa Macedonia. 14Matseit'maaⁿ'ndyo̱ Ty'o̱o̱ts'om na jeeⁿ quianl'uaaⁿ'aⁿ. Ee nc'e na m'aaⁿyâ nacje 'naaⁿ' Cristo, jo' na meiⁿyuucheⁿ na cwitsaayâ, ñequii'cheⁿ nqueⁿ wjaachom jâ na cwicanda̱a̱ na nnaⁿndyô̱ meiⁿljo'cheⁿ na cwitjo̱o̱ⁿyâ. Jo' chii ñequii'cheⁿ mawil'uee'ñê jâ na 'oondye nn'aⁿ ñ'oom naya 'naaⁿ'aⁿ. Juu ts'iaaⁿmeiiⁿ matseijomna' juuna' cha'cwijom na maju'na' jndye cachi nda̱a̱na. 15Ee jaa nn'aⁿ na cwilayuu'a ñ'eⁿ Cristo matseijomna' cha'cwijom tsioom suu na mañequiaaⁿ nnom Ty'o̱o̱ts'om na cwit'oom'na' quii'ntaaⁿ nn'aⁿ na cwicalui'n'maaⁿndye ndo' mati nn'aⁿ na 'ootsuundyena. 16Jo nda̱a̱ nn'aⁿ na 'ootsuundye laxmaaⁿya cha'cwijom cwii jndye na matseicwjeena' joona sa̱a̱ jo nda̱a̱ nn'aⁿ na cwilui'n'maaⁿndye laxmaaⁿya cha'cwijom cwii jndye na mañequiaana' na cwita'ndo' añmaaⁿna. Meiⁿ tjaa 'ñeeⁿ c'oom na cwe' cantyja 'naaⁿ' nquii na nleinaaⁿ' na nnts'aa ts'iaaⁿmeiⁿ'. 17Ee m'aⁿ nn'aⁿ na cwit'mo̱o̱ⁿ ñ'oom' Ty'o̱o̱ts'om cwe' cha nnda̱a̱ nnta'ntjomna cantyja 'naaⁿ'na'. Sa̱a̱ jâ na cwiluiindyô̱ apóstoles, ñequio na xcwee'ya n'o̱o̱ⁿyâ cwiñe'quiaayâ ñ'oom'm ndo' cwiluiindyô̱ nn'aⁿ na cwindye'ntjomtyeⁿ nnom Cristo.

will be added

X\