1 Pedro 1

1Maja Pedro na cwiluiindyo̱ apóstol, ts'aⁿ na majñom Jesucristo ts'iaaⁿ 'naaⁿ'aⁿ matseiljeiya ñ'oomwaa na matseicwano̱ⁿya juuna' nda̱a̱' 'o na jnda̱ t'oom'ndyo', na m'aⁿ'yo' l'o̱ndaa Ponto, Galacia, Capadocia, Asia ñ'eⁿ Bitinia, 2nda̱a̱' 'o na jaach'ee xuee tjeii'ñe Tsotya̱a̱ya Ty'o̱o̱ts'om 'o na laxmaⁿ'yo' cwentaaⁿ'aⁿ cha'xjeⁿ na seijndaa'ñê. Cantyja 'naaⁿ' Espíritu Santo tqueⁿño̱o̱ⁿ 'o na nlaxmaⁿ'yo' na calacanda̱'yo' jo noom ndo' na nlaxmaⁿ'yo' na lju' n'om'yo' ñequio nioom' Jesucristo. Quiaa Ty'o̱o̱ts'om na canda̱a̱'ya nnto'ñoom'yo' naya na matseixmaaⁿ ñequio na tjaa ñomtiuu c'om'yo' jo nnoom. 3Catseit'maaⁿ'ñena' nquii Ty'o̱o̱ts'om na cwiluiiñê Tsotye Ta Jesucristo cwentaaya. Jom nc'e na jeeⁿ wi' ts'oom jaa jnda̱ s'aaⁿ na cwiluiindyo̱xco̱o̱ nc'e na tando'xco Jesucristo. Cantyja 'naaⁿ' jo' m'aaⁿya na cwicantyjaa' n'o̱o̱ⁿya na nndaaya na nntando̱o̱'a. 4Cantyja 'naaⁿ' Jesucristo nnts'aa Ty'o̱o̱ts'om na nnto'ñoom'yo' juu na nnda'yo' na cwileiwe cañoom'luee na lju' tseixmaⁿna' na tijoom cwi'ndaa' meiⁿ xoc'uaana' cha'na ljaa'. 5Nc'e na cwilayu'ya n'om'yo' ñ'eⁿ Ty'o̱o̱ts'om mawañoom'm 'o ñequio najndeii na matseixmaaⁿ. Nnts'aaⁿ na ljo' hasta ncuee na macanda̱ quia na nleitquioo' na nncwji'n'maaⁿñê 'o. 6Nc'e na manquiu'yo' na macwji'n'maaⁿñê 'o, t'maⁿ cwiquioo na neiⁿ'yo', meiiⁿ mach'eena' maniom jndye nnom nawi' na cwiwinom'yo' je'. Sa̱a̱ tiyo macaⁿna' na nntjom'yo' nmeiⁿ', ntyja nncwinomna'. 7Juu na cwila'yu'ya n'om'yo' matseijomna' juuna' cha'cwijom s'om cajaⁿ, juuna' macaⁿna' na nncwinom'yo' nawi' cha nleitquioo' cwanti na jndana'. Juu na matseiyu'ya ts'om ts'aⁿ na ya nncwinomna' nawi', jndati tseixmaⁿ jo' nchiiti s'om cajaⁿ na cwintycwiina'. Ndo' naljo', juu na cwila'yu'ya n'om'yo', jnda̱ teitquioo' na ya jlui'yo', quia na nncwjee'nnda' Jesucristo, nluii't'maⁿndyo' cantyja 'naaⁿ' juu jo'. 8'O meiiⁿ tyoonty'ia'yo' jom, sa̱a̱ candya' n'om'yo' ñ'eⁿñê. Meiiⁿ na nchii cwinty'ia'nda̱a̱'yo' jom, sa̱a̱ nc'e na jom quit'maⁿ n'om'yo', mañequiaana' na t'maⁿ waa na neiⁿ'yo'. Meiⁿ tileicaliu'yo' cwaaⁿ ñ'oom na nndu'yo' na neiⁿ'yo'. Ndo' juu na neiⁿ'yo' matseit'maaⁿ'ñena' Ty'o̱o̱ts'om. 9Ee nc'e na cwila'yu'yo' ñ'eⁿ Jesucristo, cwito'ñoom'yo' na macwji'n'maaⁿñe Ty'o̱o̱ts'om añmaⁿ 'naⁿ'yo'. 10Ncuee na teinom nquiee profetas na tyoñequia ñ'oom' Ty'o̱o̱ts'om cantyja 'naaⁿ' na quia nluii, tyola'naaⁿna ñ'oom'm ndo' tcuu tcuu ñe'cala'no̱ⁿ'na cantyja 'naaⁿ' na nncwji'n'maaⁿñê nn'aⁿ, ndo' nc'e naya na matseixmaaⁿ ñejlaneiⁿna cantyja 'naaⁿ'na'. 11Nquii Espíritu na matseixmaⁿ Cristo na tyom'aaⁿ quii' n'omna, tyuaa' t'mo̱o̱ⁿ nda̱a̱ naⁿ'ñeeⁿ nawi' na ntjom Cristo ndo' na nda̱quia nntseit'maaⁿ'ñena' juu. Tcuu tcuu tyol'ueena 'ñeeⁿ ts'aⁿ tsaⁿ'ñeeⁿ na t'mo̱ⁿ Espíritu nda̱a̱na ndo' cwaaⁿ xjeⁿ nncwjee'. 12Naⁿ'ñeeⁿ t'mo̱ⁿ Ty'o̱o̱ts'om nda̱a̱na na tixocaluiiñe Cristo xjeⁿ na cwita'ndo' nquieena. T'mo̱o̱ⁿ nda̱a̱na na nnc'oom juu xjeⁿ na m'aaⁿ jaa. Jo' chii ndyumeiiⁿñe, ñequio na mateijndeii Espíritu Santo na jñom Ty'o̱o̱ts'om, cwiñe'quia nn'aⁿ ñ'oom naya nda̱a̱'yo' cantyja 'naaⁿ' Jesucristo. Jeeⁿ cajnda ñ'oom nayawaañe hasta matseiqueeⁿna' n'om ángeles na ñecala'no̱ⁿ'na juuna'. 13Queⁿ'tyeⁿ'yo' cantyja na cwila'tiuu'yo'. Cal'a' cheⁿncjo'yo' xjeⁿ na ñe'cwii n'om'yo'. C'om'yo' na ñe'cwii waa na quit'maⁿ n'om'yo' cantyja naya na nnts'aa Ty'o̱o̱ts'om 'o quia na nndyonnda' Ta Jesucristo. 14Nc'e na cwiluiindyo' ntseinda Ty'o̱o̱ts'om na cwila'canda̱a̱'ndyo', catjei'ndyo' cantyja 'naaⁿ joo ts'iaaⁿ na ñejla'jomndyo' cwitjo̱o̱cheⁿ na ta'jnaⁿ'yo' jom. 15Nquii Ty'o̱o̱ts'om na t'maaⁿ 'o cwiluiiñê na lju' ts'oom. Jo' chii mati 'o c'om'yo' na lju' n'om'yo' jo nnoom cantyja cha'tsoti na cwitsam'aⁿ'yo'. 16Ee teiyo teiljeii ñ'oom' Ty'o̱o̱ts'om na matsona': “Nc'e na ja cwiluiindyo̱ na lju' ts'o̱o̱ⁿya, mati 'o c'om'yo' na lju' n'om'yo'.” 17Nc'e na cwilcwi'yo' Tsotye'yo' na nqueⁿ xocats'aaⁿ na neiiⁿ'eⁿ cwii ts'aⁿ sa̱a̱ cwiicheⁿ tineiiⁿ'eⁿ, jo' chii c'om'yo' na nquia'yo' jom yocheⁿ na m'aⁿ'yo' ljooñe cha'cwijom nn'aⁿ na cwe' cwiqueya. 18Juu na ñet'om'yo' cwitjo̱o̱cheⁿ na jla'yu'yo' ñ'eⁿ Ty'o̱o̱ts'om na jeeⁿ cwe' ts'iaaⁿ'ndyo jo', tjei'ñ'maaⁿñê 'o cantyja 'naaⁿ'na', joo jo' t'mo̱o̱ⁿ welo'yo' nda̱a̱'yo'. Manquiu'jndaa'ndyo' na juu na tjei'n'maaⁿñê 'o, nchii ñjoml'ua juuna' ñequio 'naⁿ na cwindyue, cha'na s'om cajaⁿ oo s'om xuee, 19'o ñjoml'uandyo' ñequio nioom' Cristo na jeeⁿ ndya' jnda, na tquiaañe cheⁿnqueⁿ na jla'cuee'na jom cha'cwijom cwii catsmaⁿ na cwiñe'quia nn'aⁿ na cwila't'maaⁿ'ndyena Ty'o̱o̱ts'om, na meiⁿcwii ticatseixmaaⁿ na ticanda̱a̱'ñê, cha'cwijom catsmaⁿ na canchii'ñeñ'eⁿ. 20Cwitjo̱o̱cheⁿ na nlqueⁿ Ty'o̱o̱ts'om tsjoomnancue, sa̱a̱ jnda̱ tqueeⁿ na nntjom Cristo na ljo'. Sa̱a̱ hasta ndyumeiiⁿ tquiaa Ty'o̱o̱ts'om na teitquioo'ñê cha nnteijndeiina' 'o. 21Je' cantyja 'naaⁿ' Jesucristo m'aⁿ'yo' na cwila'yu'yo' ñ'eⁿ Ty'o̱o̱ts'om. Manquiityeeⁿ tquiaaⁿ na tando'xco juu jnda̱ na tue', ndo' seit'maaⁿ'ñê juu. Ndo' nc'e na ljo' cwila'yu'ya n'om'yo' ñ'eⁿñê, ndo' cwicantyjaa' n'om'yo' jom. 22Ndo' je', nc'e na cwito'ñoom'yo' ñ'oom na mayuu', jo' na lju' añmaaⁿ'yo' cha xcwee' n'om'yo' cwil'a'yo' na cwilawi' n'om'yo' nn'aⁿ'yo' na cwila'yu'. Ndo' matsona' na c'om'yo' na wi' n'om'yo' cwii ndo' cwiindyo' ñequio na lju' n'om'yo' ndo' ñequio cha'waa na jnda̱'yo'. 23Ee jnda̱ tuiixcondyo' cwe' nchii cantyja 'naaⁿ nn'aⁿ na cwiwje. 'O jnda̱ tuiixcondyo' cantyja 'naaⁿ' ñ'oom' Ty'o̱o̱ts'om na wando', cwii na m'aaⁿ ndo' m'aaⁿ. 24Ee ñ'oom' Ty'o̱o̱ts'om na seiljeii Isaías, matsona': Cha'tsondye nn'aⁿ matseijomna' joona cha'cwijom tsco jnda̱a̱. Ndo' juu na t'maⁿ na cwiluiindyena matseijomna' juuna' cha'cwijom ljaa' tsco jnda̱a̱. Sa̱a̱ quia na cwicaaⁿ tsco jnda̱a̱, cwiquiaa ljaa'na', 25sa̱a̱ ñ'oom' Ty'o̱o̱ts'om ticantycwii na m'aaⁿna'. Ndo' juu ñ'oom'ñeeⁿ na tyoñequia nn'aⁿ nda̱a̱'yo' tseixmaⁿna' ñ'oom na nlui'n'maaⁿndye añmaaⁿ nn'aⁿ.

will be added

X\