1 Juan 1

1Cwilaljeiiyâ ñ'oom na cwilacwano̱o̱ⁿyâ nda̱a̱'yo' cantyja 'naaⁿ' nqueⁿ na maxjeⁿ m'aaⁿ cwitjo̱o̱cheⁿ na jnaⁿ cha'tso. Jnda̱ jndya̱a̱yâ na seineiiⁿ ndo' jnda̱ nty'iaa nda̱a̱yâ jom. Nty'iaayaayâ jom ndo' jnda̱ t'ua̱a̱ ntyja̱a̱yâ lua̱a̱yâ ñ'eⁿñê, nqueⁿ na cwiluiiñê Ñ'oom na mañequiaa na cwitando̱o̱'a. 2Ndo' jom na mañequiaaⁿ na wando' añmaaⁿ' ts'aⁿ, teitquioo'ñê ndo' jnda̱ nty'iaa nda̱a̱yâ jom ndo' cwitjei'yuu'ndyô̱ nda̱a̱'yo' cantyja 'naaⁿ' na matseixmaaⁿ. Cwiñequiaayâ ñ'oom nda̱a̱'yo' na mañequiaaⁿ na ticantycwii na wando' añmaaⁿ' ts'aⁿ. Tyom'aaⁿ ñequio Tsotya̱a̱ya Ty'o̱o̱ts'om ndo' tyjee'cañoom jaa. 3Ndo' cwit'mo̱o̱ⁿyâ nda̱a̱'yo' cantyja 'naaⁿ' na tyonty'iaa nda̱a̱yâ na tyoch'eeⁿ, ñequio ñ'oom na tyoñequiaaⁿ na tyondya̱a̱yâ, cha nnda̱a̱ nla'jomndyo' ñ'eⁿndyô̱ ee juu na cwilajomndyô̱ m'aaⁿna' ñequio Tsotya̱a̱ya Ty'o̱o̱ts'om ndo' ñequio Jnaaⁿ Jesucristo. 4Nc'e na luaa', cwila'ljeiiyâ ñ'oommeiiⁿ cha canda̱a̱' nnc'om'yo' na neiⁿ'yo'. 5Luaa waa ñ'oom na tyonda̱a̱yâ na tyoñequiaa Jesucristo na cwit'mo̱o̱ⁿyâ nda̱a̱'yo', cwiluiiñe Ty'o̱o̱ts'om na xueeñe meiⁿ tjaa'naⁿ na matseixmaaⁿ na jaaⁿ. 6Xeⁿ cwil'uuya na cwilajomndyo̱ ñ'eⁿ Ty'o̱o̱ts'om, ndo' mati cwitsaam'aaⁿya cantyja 'naaⁿ' na jaaⁿñe, cantu cwilana̱a̱ⁿya meiⁿ tic'o̱o̱ⁿya nacje 'naaⁿ' ñ'oom na mayuu'. 7Sa̱a̱ xeⁿ cwiljoo'ndyo̱ nacje 'naaⁿ' na cwiluiiñe naxuee cha'xjeⁿ nqueⁿ cwiluiiñê naxuee, jeeⁿ xcwe cwilajomndyo̱ ñequio nn'aaⁿya na cwila'yu', ndo' juu nioom' Jnaaⁿ Jesucristo matseilju'na' jaa cha'tso jnaⁿ na laxmaaⁿya. 8Sa̱a̱ xeⁿ cwil'uuya na tjaa jnaⁿ laxmaaⁿya, cwinquio̱'nn'aⁿndyo̱ cheⁿncjo̱o̱ya, meiⁿ tilaxmaaⁿya cantyja 'naaⁿ' na mayuu'. 9Xeⁿ cwitjei'yuu'ndyo̱ na laxmaaⁿya jnaⁿ, jom cwiluiiñê na mayoom'm. Mach'eeⁿ na maty'iomyana' na matseit'maⁿ ts'oom jnaaⁿya ndo' na matseiljoom'm jaa cha'tso na laxmaaⁿya na ticaty'iomyana'. 10Sa̱a̱ xeⁿ cwil'uuya na tyool'aaya jnaⁿ, cwil'aaya na ndoo' nquiuya cantuñe Ty'o̱o̱ts'om, meiⁿ tyooñequiaaya na nntsa̱'ntjom ñ'oom'm jaa.

will be added

X\