1 Corintios 16

1Cantyja 'naaⁿ' ñ'oom na nla'tjom'yo' s'om na nl'a'yo' naya nn'aⁿ cwentaa' Ty'o̱o̱ts'om na wi' m'aⁿna Jerusalén, luaa matseijndo̱'a n'om'yo'. Cal'a'yo' cha'xjeⁿ na tsjo̱o̱ na cal'a ntmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ ndyuaa Galacia. 2Ticwii xueeneiⁿnco' cwii cwiindyo' 'o calat'ue'yo' cwanti na nñequia'yo' cantyja na cwitantjom'yo'. Quia jo' quia na nncua̱ya quii'ntaaⁿ'yo' nchii s'om quia nlat'ue'cheⁿ'yo'. 3Ndo' catjeii'ndyo' cwii oo we x'iaa'yo' na cwila'no̱ⁿ'yo' na joona ya na nnc'ooñ'omna s'om'ñeeⁿ Jerusalén. Quia jo' quia na nncua̱ na m'aⁿ'yo', nntseiljeiya cwii tsom na nnc'ooñ'omna. 4Ndo' xeⁿ macaⁿna' na nncjo̱ jo' jo', quia jo' nnc'oona ñ'eⁿndyo̱. 5Nncjo̱ na m'aⁿ'yo' xeⁿ jnda̱ tjo̱wino̱o̱ⁿ ts'o̱o̱ndaa Macedonia ee maxjeⁿ matseijndaa'ndyo̱ na jo' jo̱jndya̱a̱. Jnda̱ jo' nncua̱caño̱o̱ⁿya 'o. 6Nnda̱a̱ nnts'aana' na nljoo'ndyo̱ ñ'eⁿndyo' meiiⁿ ñe'cwantindyo xuee oo cha'waa ncueeteiⁿ. Quia jo' 'o nnda̱a̱ nntsalacwanom'yo' ja nato quia na nncjo̱ xeⁿ yuu cwijo̱yo̱. 7Ee ticaljoya ts'o̱o̱ⁿ na cwe' cjee cjee m'aaⁿna' nncwino̱o̱ⁿ na m'aⁿ'yo'. Ntyjaa'ya cwii ts'o̱o̱ⁿ na majndye xuee nnda̱a̱ nljoo'ndyo̱ ñ'eⁿndyo', xeⁿ Ty'o̱o̱ts'om l'ue ts'oom. 8Sa̱a̱ jnda̱ seijndaa'ndyo̱ na nljoo'ndyo̱tya̱ ñjaaⁿ tsjoom Éfeso hasta na jnda̱ teinom xuee Pentecostés. 9Ee jeeⁿ t'maⁿ maju'naaⁿñena' na mats'aa ts'iaaⁿ 'naaⁿ' Ta Jesús ndo' jeeⁿ ticwe' ts'iaaⁿ'ndyo meiiⁿ jndye nn'aⁿ m'aⁿ na jndoo ja. 10Nnda̱a̱ nnts'aana' na nncuee'cañoom Timoteo 'o. Xeⁿ na ljo', cala'lui'yo' jom cha nljeii'na' na ya nnc'oomñê ñ'eⁿndyo'. Ee mati jom mañejuu ts'iaaⁿ 'naaⁿ' Ta Jesucristo mach'eeⁿ cha'xjeⁿ ja. 11Jo' chii meiⁿcwiindyo' 'o tinc'om'yo' na tila'ñ'oom'ndyo' jom. Ñequio na xcwee' n'om'yo' cateijndei'yo' jom cha quia nlueeⁿ'eⁿ quii'ntaaⁿ'yo' quia jo' nndyolcweeⁿ'eⁿ ñequio na neiiⁿ'eⁿ. Meiⁿndo̱'a jom ñequio nt'omcheⁿ nn'aⁿ na cwila'yu'. 12Tyocaⁿ'a nnom nquii nn'aaⁿya Apolos na catseijomñê ñequio nn'aaⁿya na cwila'yu' na cwi'oocajndoo'na 'o. Sa̱a̱ na maje'ndyo ticats'aana' ts'oom na ñe'cjaⁿ. Majo' nncuee'cañoom 'o quia na nñequiaana' na wanaaⁿ. 13Queⁿ' queⁿ'yo' cwenta chiuu cwii tsam'aⁿ'ti'yo'. C'om'tyeⁿ'yo' na cwila'yu'ya n'om'yo' ñ'eⁿ Ty'o̱o̱ts'om. Catsanajnda̱'yo' cantyja na cwila'yu'yo' ñ'eⁿñê cha'na nn'aⁿ na 'ooquiendye na ñe'cwii waa na cwil'a. 14Cha'tso na cwil'a'yo', cat'mo̱ⁿ'yo' na wi' n'om' nc'iaa'yo'. 15'O nn'aⁿya, manquiu'yo' na cha'waa ts'o̱o̱ndaa Acaya, juu Estéfanas ñequio nn'aⁿ waⁿ'aⁿ jla'yu'jndyeena ñ'eⁿ Ty'o̱o̱ts'om. Joona cwijoo' n'omna na cwindye'ntjomna nda̱a̱ nn'aⁿ na cwila'yu' ñ'eⁿñê jo' jo'. 16Macwe' jo' macaⁿ'a na catue'ndyo'cje'yo' nda̱a̱ nn'aⁿ na la'xmaⁿ cha'na joona. Ndo' malaa'ti' cal'a'yo' ñequio cha'tso nn'aⁿ na cwilajomndye ñ'eⁿndyena na cwiteijndeii ts'iaaⁿ 'naaⁿ' Ty'o̱o̱ts'om. 17Jeeⁿ neiⁿya na jnda̱ tyjee'cañoom Estéfanas ja, ñequio Fortunato ñequio Acaico. Cha'cwijom manty'iaya ncjo'yo' na manty'iaya joona, ee jnda̱ jla'noomndyena cantyja 'naⁿya cwii na leicanda̱a̱ nl'a'yo' na tic'oomndyo'. 18Na jnda̱ tquiena na m'aaⁿya, ñ'oom na jla'candiina ja tquiaana' na t'maⁿ ts'o̱o̱ⁿ, majo'ti nnts'aana' ñ'eⁿndyo' 'o quia na nlquiennda'na na m'aⁿ'yo'. Nn'aⁿ na cwindye'ntjomna cha'na joona matsona' na nla't'maaⁿ'ndye nn'aⁿ joo naⁿ'ñeeⁿ. 19Ntmaaⁿ' nn'aⁿ na macwji' Ty'o̱o̱ts'om cwentaaⁿ'aⁿ na m'aⁿ ts'o̱o̱ndaa Asiawaa cwila'cwanomna na xmaⁿndyo'. Majuu nn'aaⁿya Aquila ñequio scoom'm Priscila cwiluena na xmaⁿndyo' ndo' majo'ti cwilue nn'aⁿ tmaaⁿ' na cwitjomndye w'aana ñequio xuee' nqueⁿ na cwiluiiñê na matsa̱'ntjoom jaa. 20Cha'tsondye nn'aⁿ na cwila'yu' ñjaaⁿñe cwila'cwanomna na xmaⁿndyo'. Nc'e na cwiluiindyo' ntseinda Ty'o̱o̱ts'om, quia cwitjomndyo' ñ'eⁿ nc'iaa'yo' na tjoom' cwila'yu'yo' ñ'eⁿndyena, cataⁿ'yo' lueena na cwiñe'quia'yo' na xmaⁿndyena. 21Nnco̱ Pablo na matseiljei xueya na matsjo̱o̱ya na xmaⁿndyo'. 22Meiⁿcwi'ñeeⁿcheⁿ ts'aⁿ na ticajnda ntyjii nquii Ta Jesucristo, quiaa Ty'o̱o̱ts'om na quioo ñ'oomwi' nacjoo' tsaⁿ'ñeeⁿ. Quiaaⁿ na matyuaa' cwjee'nnda' nquii Ta Jesucristo. 23Nquii Ta Jesucristo quiaaⁿ na c'oom naya na matseixmaaⁿ ñ'eⁿndyo'. 24Mañequiaana' na jeeⁿ jnda ntyjiiya 'o nc'e jom. Mantyjati luaa'ndyo. Amén.

will be added

X\