Titus 1

1Paolo, jamiru pa Mungu, man jakwenda pa Yesu Kristu calku yioyic mi ju ma Mungu goyo nying’gi, man ng’eyong’ec mi lemandha ma en e calku bedo ma ayi Mungu ni i kume, 2i genogen mi kwo ma rondo ku rondo, ma Mungu, ma kucop cwayu ndra ngo, ung’olo por yang’ con; 3ento enyutho lembe pare i nindo pare gire i lemkwenda, juketho lembene i kora calku lembang’ola pa Mungu ma Jalar mwa; 4ni Tito, ma nyathin para mandha i yioyic m’uribowa: Bero ku kwiocwiny m’uai ba Mungu ma Wego ku Kristu Yesu ma Jalar mwa. 5Kum lembe nini aweki i Krete, kara iyik gin m’urem, man iketh judongo ku bang’ adhura ceke, calu ang’olo iri; 6tek ng’atu moko adote mbe i wie, en e nico ma won dhaku acel, ma won nyithindho m’uyio, ma judotogi ngo nia gi jurop kadi juco. 7Kum jalieu kobedo ma adote mbe i wie be, calu jakurpiny pa Mungu; udhuko ngo, jang’ecwiny ma vur vur de ngo, jakwakwa ma wi pigulok ungo, jagoc ungo, jamar kuloka ma rac ungo; 8ento ebed ng’atu ma gwoko welo ber, ma jamar gin ma ber, ma pidoie nger, ma pwe, ma leng’ de, ma kwere gire; 9ma cwinye cungo ki kum lembe mandha ma calku lemponji, kara ecopo juko juk ku ponji m’ulil, ecopo tuco wi jupiem bende. 10Kum dhanu ma juco gi dupa ma gi juwec mananu ku weg abombi, ju ma gi weg yaa ci dit ma kumeno, 11ma jukojumi dhoggi be; ku ju ma giredho udi kpo, ma giponjo gin ma maku ku giponji, ni kuloka ma rac. 12Ng’atu acel m’i kindgi gigi, en e jabila migine, ewacu kumae, Jukrete gi jundra thiri thiri, gi yedi ma rac, gi jumbo ma kutim tic ungo. 13Lembatuca maeni en e andha. Kum kum lembe nini jukgi ku kwinyo, kara gibed i yioyic m’ulli, 14ma gikuciko ithgi ngo kum uda mi Juyahudi, ku lembang’ola mi dhanu m’ukier kum lemandha. 15Gin ceke leng’ ni ju ma leng’: ento ni ju m’ucido ma juyic ungo re gin moko mbe ma leng’ igi; ento pidoic migi ku pidocwiny migi cido. 16Gituco nia ging’eyo Mungu; enke ku tic migi gikwere, gi ju ma judagu, man juco, man ku ba tic ma ber ceke en e gin moko ngo igi.

will be added

X\