Romans 9

1Ayero lemandha i Kristu, acwayu ndra ngo, ma pidocwinya de benyutho wakude i Tipo Maleng’, 2nia can ma dwong’ man remo ma thum ungo de ni i adundena. 3Kum acopo yenyo ya an gira abed ma kwong’ ni i wia m’ukoya ku Kristu kum utumira, ma gi wedina calku kum: 4ma gi Juisraeli; ma dwok ma judwoko ko jo ni wot en e migi, ku dwong’, man lembariba, ku mio cik, man rwo ma ba Mungu, ku lembang’ola de; 5ma kwaru en e migi, ma Kristu bende ai i bang’gi calku kum, ma ceke eni i wie, Mungu ma won mugisa ma nja. Amen. 6Endre ebedo calu lembe pa Mungu doko ni gin mananu ngo. Kum gin ceke ma gi mi Israel, gi Israel kagi ceke ngo: 7kadok, kum gi kodhi pa Ibrahim, meca kagi ceke gi nyithindho ngo: ento kodhini bilwongre ni kum Isak. 8Lembene kumae, en e nyithindho mi kum ungo ma gi nyithindho pa Mungu; endre nyithindho mi lembang’ola jukwanugi ni kodhi. 9Kum maeni en e lembe mi lembang’ola kumae, Karunyoni abibino, man nyathin ma nico bibedo nuti ni Sara. 10Man kumeni kende ngo; ento Rebeka bende m’egamu ie ku ng’atu acel, ma en e wegwa Isak, 11kum nyithindho ma fodi jukunyologi ngo, kadok ma fodi gikutimo gin moko ma ber kadi ma rac de ngo, kara yeny ma Mungu yenyo calku goyo nying’ ucungi, mi tic ungo, endre pa ng’atu m’ulwong’o, 12eyere ire kumae, Jadit bitimo ni ng’atu ma nok. 13Cil calu egore kumae, Yakobo amaru. endre Esau adagu. 14Wabilund wacu ang’o? Gondri nuti ku Mungu? Awene. 15Kum ewacu ni Musa kumae, Kisa binega kum ng’atu ma kisa nega i kume, man ngisi de binega kum ng’atu ma ngisi nega i kume. 16Ka kumeno en e pa ng’atu m’uyenyo re ngo, kadi pa ng’atu m’uringo de ngo, endre pa Mungu ma kisa nege. 17Kum lembagora pa Mungu yero ni Farao kumae, Kum lembe maeni nini ating’i malu, kara anyuth tego para i ii, man kara nyinga rweire i ng’om ceke. 18Kum kumeno kisa nege kum ng’atu m’eyenyo; man edwoko cwiny ng’atu m’eyenyo tek. 19Ibilund wacu ira kumae, Nedi ebedoto adote asu? Kum ng’a ma copo jai kum yeny ma ie yenyo? 20Ungo endre, E dhanu, in i ng’a m’idwoko wang’ lembe ni Mungu e? Gin m’ucwire biwacu ni ng’atu m’ucwie kumae, Nedi icwia kumeni? 21Kadi jacwiagulu tego pare mbe kum ulobo, ma ku lungu ulobo acel ecwio ng’ete kucel ni agulu mi yung, ku ng’ete kucel ke agulu m’umbe yungi? 22Ang’o tek Mungu, m’eyenyo enyuth kwinyo pare, man eketh tego pare ng’eire, eciro ku mwonyolembe hai agulu mi kwinyo ma juyiko ni nyoth ma junyothri ko: 23man kara eketh lonyo mi dwong’ pare wi agulu mi kisa ung’eire, m’elar eyiko mi dwong’, 24cil wan, ma julwong’owa bende, m’uai ba Juyahudi kendgi ngo, ento ba Thekdhanumange bende? 25Calu ewacu i Hoseya kumae, Abilwong’o maeno dhanu para, ma en e dhanu para ngo; Ng’atu ma jamer ungo de, ya jamer. 26Man ebitimbre, ya ka ma juwacu ie igi kumae, Wun wu dhanu para ngo, Kakeca gibilwongri wot Mungu ma kwo. 27Isaya bende ekok pir Israel kumae, Tek wel mi nyithindho pa Israel ubedo calu kwio ma dhu nam, donge e ma biboth: 28kum Rwoth bitimo lembe pare kakare wi ng’om, m’ebidare ko ku jwige bende. 29Man, calu Isaya lar uyero kumae, Dok Rwoth mir Udul kuweko iwa kodhi ngo, Kuno di wadoko va Sodom, man kuno di judwokowa calku Gomora. 30Wabilund wacu ang’o? Ya Thekdhanumange, m’ulubo bedopwe ngo, utundo kum bedopwe, cil bedopwe ma en e mi yioyic: 31ento Israel, m’ulubo tok cik mi bedopwe utundo kum cik maeno ngo. 32Pirang’o? Kum giyenye ku yioyic ungo, endre calu eyenjre ku tic. Gikier kum kidi ma redhojo; 33cil calu egore kumae, Nen, aketho i Sayuni kidi ma redhojo man cana mi kier: Man ng’atu m’uyio ire lewic binege ngo.

will be added

X\