Romans 8

1Kum kumeno kawono dong’ pokolembe ma rac umbe wi ju ma gini i Kristu Yesu. 2Kum cik mi Tipo mi kwo i Kristu Yesu ugonya kud i cik mi dubo man mi tho. 3Kum gin ma copre ngo ni cik, kum ebedo ng’ic ni kum kum, Mungu, m’eoro Wode ma dhe i ayi kum mi dubo man pi dubo, epoko lembe rac kum dubo i kum: 4kara lembang’ola mi cik utimbre kakare i iwa, ma walubo tok kum ungo, endre tok Tipo. 5Kum ju ma gi mi kum igi pido pi gin mi kum; ento ju ma gi mi Tipo re igi pido pi gin mi Tipo. 6Kum pidoic mi kum en e tho; ento pidoic mi Tipo re en e kwo man kwiocwiny: 7kum pidoic mi kum en e adegi ku Mungu; kum e wor ungo ni cik pa Mungu, kadok acopa de ecopre ire ngo andha; 8man ju ma gini i kum gicopo nyayu mutoro i Mungu ngo. 9Ento wun wuni i kum ungo ento wuni i Tipo, tek Tipo pa Mungu bedo i iwu. Ento tek ng’atu moko Tipo Kristu mbe kude, meca en e pare ngo. 10Man tek Kristu ni i iwu, kum en e avu kum dubo; endre tipo en e kwo kum bedopwe. 11Ento tek Tipo pa ng’atu m’uting’o Yesu ku kind ju m’utho bedo i iwu, ng’atu m’uting’o Kristu Yesu ku kind ju m’utho ebimio kwo bende ni kumwu ma tho ni kum Tipo pare m’ubedo i iwu. 12Kum kumeno, umego, wa jubanja, ni kum ungo, ma nia wabed tok kum: 13kum tek wubedo tok kum, wubikotho be; ento tek wunego tic mi kum ku Tipo, wubibedo kwo. 14Kum ku ba dhanu ceke ma Tipo Mungu telo wigi, maeni gi wot Mungu. 15Kum wujolo tipo mi ng’eca kendo ngo ni lworo, ento wujolo tipo mi dwok ma judwoko kowu ni nyithindho, ma walwong’o ko kumae, Abba, Vwa. 16Tipo gire enyutho lembe karacelo ku tipo mwa, ya wa nyithindho pa Mungu: 17man tek nyithindho, nwang’u jucampacu; jucampacu pa Mungu, man jucampacu karacelo ku Kristu; tek wasendra wakude, kara juyungwa karacelo wakude. 18Kum akwanu ya can mi nindoma kawono maeni romo ngo ya jupore ku dwong’ ma binyuthre iwa. 19Kum genogen mi giracwia pa Mungu ma kud avane ubekuro nyuthonyuth mi wot Mungu. 20Kum juketho giracwia pa Mungu bed wor ni gin ma kite mbe, ku yeny m’eyenyo en ungo, ento ni kum ng’atu m’uketho ebed wor, i genogen, 21nia jubigonyo giracwia pa Mungu en bende kud i ng’eca mi nyoth ni gony mi dwong’ mi nyithindho pa Mungu. 22Kum wang’eyo nia giracwia pa Mungu ceke becur acura man ebesendre ku remokum karacelo cil ku kawono. 23Man kumeno kende ngo, ento wan giwa bende, ma wabedo ku landu mwoka mi Tipo, cil wan giwa wacur acura i iwa giwa, ma wakuro ko dwok ma judwoko kowa ni nyithindho, lembene kumae, war mi kumwa. 24Kum waboth ni kum genogen: ento genogen ma nen en e genogen ungo: kum ng’a ma geno gin maeno m’eneno? 25Ento tek wageno gin ma waneno ngo, e walund wakure ku twiocwiny. 26Man Tipo bende konyo ng’ic mwa kumeca: kum wang’eyo ngo ram warwo ko calu ma maku warwo: ento Tipo gire ekwayu piwa ku cur acura ma aweca ngo; 27man ng’atu ma yenyo i adunde eng’eyo karamb pidoic mi Tipo, kum ekwayu pi jumaleng’ calku yeny ma Mungu yenyo. 28Man wang’eyo nia gin ceke timbre karacelo mi bero ni ju ma gimaru Mungu, ni ju ma julwong’ogi calku yeny ma ie yenyo 29Kum ju m’elar eng’eyo, elar ekethogi ya gidok calkud ayi Wode, kara ebed kayu i kind umego dupa: 30man ju m’elar ekethogi, elwong’ogi bende: man ju m’elwong’o egonyo lembe m’i wigi bende: man ju m’egonyo lembe m’i wigi, joca e m’eyungogi bende. 31Wabilund yero ang’o kum gin maeni? Tek Mungu en e jabang’wa, ng’a ke ma goyo kore i kumwa? 32Ng’atu ma kukwero ngo nimio Wode ma dhe, ento ewodhe piwa ceke, ebimio iwa gin ceke k’abamba bende karacelo kude ngo nedi? 33Ng’a ma copo ketho lembe moko wi ju ma Mungu goyo nying’gi? Mungu e ma gonyo lembe ma wi jo; 34ng’a ma poko lembe raci? en e Kristu Yesu m’utho, eyo ma sagu, ma juting’e ku kind ju m’utho, m’eni yo ku cing’ Mungu ma yor acwic, m’ekwayu bende piwa. 35Ng’a ma bikoyowa ku mer pa Kristu? masendi, kadi ndiba, kadi ragedo, kadi ndru, kadi muneru, kadi both abotha ku tho, kadi palamularu? 36Cil calu yang’ egore kumae, Junegowa duu piri; Jukwanuwa va rombe mir athuma. 37Ento, i gin maeni ceke wasagu weg avoci ni kum ng’atu m’umaruwa. 38Kum ang’eyo andhandha, ya kadok tho, kadi kwo, kadi malaika, kadi ker, kadi gin ma nuti, kadi gin ma bibino, kadi tego, 39kadi kadongone, kadi kathuthne, kadi giracwia mange pa Mungu, bicopo koya ku mer pa Mungu ngo, ma eni i Kristu Yesu Rwoth mwa.

will be added

X\