Romans 7

1Kadi wubedo cobo, umego (kum ayero ni dhanu m’ung’eyo cik), ya cik ubedo ku kero wi dhanu cil ma fodi ebedo kwo? 2Kum dhaku ma cware nuti ebedo atwia ni cware ni kum cik i nindo ma fodi cwarene bedo kwo; ento tek cwarene tho, egonjre i cik pa cware. 3Kum kumeno, tek ebedo ku nico mange, ma fodi cware bedo kwo, jubilwong’e dhaku ma giere swa: ento tek cwarene tho, ebedo agonya ni cik, kum kumeno en e dhaku ma giere swa ngo, kadok egomo nico mange. 4Kum kumeno, juwada, wun bende juketho wutho ni cik ni kum kum Kristu; kara wugom ng’atu mange, ma en e ng’atu ma juting’e ku kind ju m’utho, kara waceg nyingwa ni Mungu. 5Kum ka wani i kum, awanya mi dubo, ma nuti ni kum cik, utimbre i wathkumwa m’ecego ko nyinge mi tho. 6Ento kawono wabedo agonya ni cik, kum wadaru tho ni maeno m’ucerowa; kum kumeno watimo i nyen mi tipo, man mi nyiguta ma con ungo. 7Wabilund yero ang’o? cik en e dubo? Awene. Ento, ang’eyo dubo ngo, tek ni kum cik ungo: kum ang’eyo kethocwiny ma hai kum piny ungo, tek cik uwacu ngo kumae, Kud iketh cwinyi hai kum piny: 8ento dubo, m’unwang’u kaka, etimo i ia ni kum lembang’ola kwond kethocwiny hai kum piny ceke, kum ma cik umbe dubo en e avu. 9Man ku kwong’a abedo kwo ma cik umbe: ento ka lembang’ola wok, dubo cer, man atho; 10man lembang’ola, m’ubedo ni kwo, maeni adong’ anwang’u ebedo ni tho: 11kum dubo, m’enwang’u kaka, ni kum lembang’ola ebomba, man ni kume de enega. 12Kum kumeno cik en e leng’, lembang’ola de leng’, man e pwe, e ber de. 13Maenom’e ber elund edoko ni tho ira? Awene. Ento dubo, kara enyuthre ya en e dubo, ku timo tho ira ni kum maeno m’e ber; kara ni kum lembang’ola dubo dok ni dubo m’akeca. 14Kum wang’eyo nia cik en e mi tipo: ento an a mi kum, ma jung’iewa the dubo. 15Kum maeno m’atimo ang’eyo ngo: kum gin m’ayenyo ngo, e m’adong’ abetimo; ento gin m’adagu, e m’atimo. 16Ento tek gin m’ayenyo ngo, e m’atimo, ayio ni cik nia e ber. 17Kum kumeno kawono en e an kendo ngo m’utime, endre dubo m’ubedo i ia. 18Kum ang’eyo nia i ia, lembene kumae, i kuma, gin moko m’ubedo ber umbe: kum yeny ma ia yenyo nia atim ko ber nuti kuda, ento tim ma nia atime kudo mbe. 19Kum gin ma ber m’ayenyo nik atim atimo ngo: ento dubo m’ayenyo ngo, e m’adong’ abetimo. 20Ento tek gin m’ayenyo ngo, e m’adong’ atimo, en e an kendo ngo m’utime, ento dubo m’ubedo i ia. 21Alund anwang’u cik, nia, ira m’ayenyo atim ber, dubo nuti. 22Kum anyong’a nega kum cik pa Mungu kum ng’atu ma yor i ic: 23ento aneno cik ma tung’ i wathkuma, m’ubekiedo kum cik mi pidoia, man ebekela i kol the cik mi dubo ma ni i wathkuma. 24Ei an a ng’atu ma ng’ic ng’a ma biwodha kud i kum mi tho maeni? 25Afoyo Mungu ni kum Yesu Kristu Rwoth mwa. Kum kumeni an gira ku pidoia, atimo cik pa Mungu andha; endre ku kum atimo ni cik mi dubo.

will be added

X\