Romans 6

1Wabilund wacu ang’o? Wabidong’ asu i dubo, kara bero sagre? 2Awene. Wan ma watho ni dubo, wabibedo i ie kendo nenedi? 3Kadi wung’eyo ngo nia wan ceke ma jumio baputisi iwa i Kristu Yesu jumio baputisi iwa i tho pare? 4Juyikowa kumeno wakude ni kum baputisi i tho: kara calu juting’o Kristu ku kind ju m’utho ni kum dwong’ pa Wego, e wan bende wawoth kumeno i nyen mi kwo. 5Kum tek waribra wakude i ayi mi tho pare, wabibedo bende i ayi mi cer pare; 6ma wang’eyo maeni, nia ng’atu mwa ma con jugure kude, kara kum mi dubo thum woko, kara ku wabed ng’eca kendo mi dubo; 7kum ng’atu m’utho ebedo agonya ni dubo. 8Ento tek watho ku Kristu, wayio nia wabibedo karacelo wakude bende; 9ma wang’eyo ko nia Kristu m’ucer ku kind ju m’utho etho kendo ngo; tho umbe ku kero kendo i wie. 10Kum tho m’etho, etho wang’ acel ni dubo: ento bedo m’ebedo, ebedo ni Mungu. 11Cil kumeni bende wukwan giwu ku yor i iwu nia wun avu ni dubo, endre wu kwo ni Mungu ni kum Kristu Yesu. 12Ka kumeno kud wuyi dubo bim wi kumwu ma tho, ma nia wuwor ko awanyane ma rac: 13kadi kud wuting’ wathkumwu ni dubo calu jamtic mi gondri; endre wutingru giwu ni Mungu, calu ju ma kwo m’uai ba ju m’utho, man wathkumwu calu jamtic mi bedopwe ni Mungu. 14Kum dubo mbe ku kero i wiwu: kum wun wuni the cik ungo, ento the bero. 15Ka ke ang’o? wabidubo, kum wani the cik ungo, ento the bero? Awene. 16Wung’eyo ngo, nia wun ma wu jumiru ni ng’atu ma wutingru ire ni woro, wun wu jumiru pa ng’atu ma wuworo; kadok en e mi dubo mi tho, kadi en e mi woro mi bedopwe? 17Ento foyofoc ni Mungu, nia, ma nwang’u naka wu jumiru mi dubo, wudoko wor ku i adundewu ni ayi ponji maeno ma jukethowu i ie; 18man ka wugonjru kud i dubo, wudoko jumiru mi bedopwe. 19Ayero calu dhanu yero kum ng’ic mi kumwu: kum calu wuting’o wathkumwu ubed jutic mi sasa man mi camuco ni camuco, cil kumeno kawono wuting’ wathkumwu ubed jutic mi bedopwe ni dwokrileng’. 20Kum ka wu jumiru mi dubo, wubedo agonya ni bedopwe. 21I nindo maeca wucego nyingwu manedi i gin maeno ma kawono lewic unegowu i kume? kum kajik mi gin maeno en e tho. 22Ento kawono ma dong’ jugonyowu ni dubo man wudoko jutic pa Mungu, e wubedo ku nyingwu ni dwokrileng’, man kajikne kwo ma rondo ku rondo. 23Kum sukulia mi dubo en e tho; ento giramia ma Mungu mio mananu re en e kwo ma rondo ku rondo ni kum Kristu Yesu Rwoth mwa.

will be added

X\