Romans 5

1Ka kumeno wan ma lembe m’i wiwa gonjre ni kum yioyic, wabedo ku kwiocwiny ku Mungu ni kum Rwoth mwa Yesu Kristu; 2ni kume wan bende wabedo ku mondo mwa ni kum yioyic i bero maeni ma wacungo i ie; man anyong’a negowa i genogen mi dwong’ pa Mungu. 3Man kumeni kende ngo ento anyong’a negowa i masendi mwa bende: ma wang’eyo ko ya masendi nyayu twiocwiny; 4man twiocwiny nyayu girafoya; man girafoya nyayu genogen: 5man genogen ketho lewic ungo; kum mer pa Mungu konjre hau i adunde mwa ni kum Tipo Maleng’ m’umire iwa. 6Kum kinde ma fodi wa ng’ic, i nindo m’uromo kakare Kristu tho pi ju ma ayi Mungu mbe i kumgi. 7Kum e tek ni ng’atu moko ya etho pi won bedopwe: kum kuno nyo ng’atu moko bibedo ku tegocwinye m’ebitho ko pi jabero: 8ento Mungu nyutho mer pare gire iwa, kum, kinde ma fodi wa judubo, Kristu tho piwa. 9M’ulund usagu dit, wan ma kawono lembe m’i wiwa gonjre ni kum rimbe, wabiboth ni kwinyo pa Mungu ni kume. 10Kum tek, kinde ma wa jukwor, jupoto kindwa waku Mungugi ni kum tho pa Wode, ma sagu dit, wan ma kindwa poto, wabiboth i kwo pare; 11man kumeni kende ngo, ento anyong’a negowa bende i Mungu ni kum Rwoth mwa Yesu Kristu, ma ni kume wajolo kawono pot ma cwinyjo poto ko. 12Ka kumeno, calu ni kum ng’atu acel dubo mondo i ng’om man tho ni kum dubo, e kumeno tho kadhu ba dhanu ceke, kum kagi ceke gidubo: 13kum ka fodi cik kular uwok ungo nwang’u dubo ni i ng’om; ento dubo kwandre ngo ka cik umbe. 14Ento tho bimo ugambre kum Adamu cil kum Musa, cil wi ju ma kudubo ngo ku wagi dubo p’Adamu ma en e ayi pa ng’atu ma bibino. 15Ento giramia mananu bedo calu kier ungo. Kum tek ni kum kier pa ng’atu acel dhanu dupa tho, ma sagu apila bero pa Mungu, man giramia ma ni kum bero pa ng’atu acel, en e Kristu Yesu, usagre ni dhanu dupa. 16Man calu ni kum ng’atu acel m’udubo e giramia bedo kumeni ngo: kum lembapoka bino ba ng’atu acel ni gonj ma jugonjo ko jo, ento giramia mananu wok kum kier ma dupa ni tic mi bedopwe. 17Kum tek, ni kum kier pa ng’atu acel nica, tho bimo ni kum ng’atu acel; e ju ma gijolo sagri mi bero man mi giramia mi bedopwe e ma gibibimo bim i kwo ma sagu dit ni kum ng’atu acel, en e Yesu Kristu. 18Kum kumeno calu ni kum kier acel lembapoka wok ni dhanu ceke ni gonj ma jugonjo ko jo; cil kumeno ni kum tic acel mi bedopwe giramia mananu wok ni dhanu ceke ni gony mi kwo ma jugonyo ko lembe ma wi jo. 19Kum ni kum camuco pa ng’atu acel judwoko dhanu dupa ni judubo, cil kumeno ni kum woro pa ng’atu acel jubidwoko dhanu dupa pwe. 20Man cik de bino umedo maeca, kara kier usagre; ento ka ma dubo sagre i ie, e bero sagre dit apila: 21kara, calu dubo bimo bim i tho, cil kumeno bero ubim bim ni kum bedopwe ni kwo ma rondo ku rondo ni kum Yesu Kristu Rwoth mwa.

will be added

X\