Romans 4

1Ka kumeno wabiwacu nia Ibrahim, ma wegwa, unwang’u ang’o calku kumi? 2Kum tek Ibrahim lembe m’i wie gonjre ni kum tic, ebedo ku gin m’elule i kume? endre yo ba Mungu ngo. 3Kum lembagora pa Mungu wacu ang’o? Ibrahim uyio Mungu, man ekwandre ire ni bedopwe. 4Nie ni ng’atu m’utimo, sukuliane jukwanu calu mi bero ngo, endre calu mi banja. 5Ento ni ng’atu m’utimo ngo, ento m’uyio en m’ugonyo lembe ma wi ju ma ayi Mungu mbe i kumgi, yioyic pare jukwanu ni bedopwe. 6Cil calu Daudi bende yero pi mugisa wi ng’atu ma Mungu kwanu bedopwe ire nge ku tic, 7m’ewacu kumae, Mugisa ni ju ma camuco migi wekre woko, Man ju ma dubo migi umbre. 8Mugisa ni ng’atu ma Mungu bikwanu dubo ire ngo. 9Ka kumeno mugisa maeni bino wi weg yaa kendgi, kadi wi weg yaango bende? kum wawacu kumae, Ni Ibrahim yioyic pare jukwanu ni bedopwe. 10Ka kumeno ekwandre nenedi? kinde m’eni i yaa, kadi i yaango? M’eni i yaa ngo, endre m’embe i yaa: 11man ejolo giranyutha mi yaa, en e ayi mi bedopwe mi yioyic m’ebedo ko kinde m’eni i yaango: kara ebed wego mi ju m’uyio ceke, kadok gini i yaango, kara jukwan bedopwe igi; 12man ebed wego mi weg yaa ni ju ma gi weg yaa kendgi ngo, ento m’uwotho i ba tielo mi yioyic maeno ma pa wegwa Ibrahim m’ebedo ko ma fodi 13Kum lembang’ola mire ni Ibrahim ku nyikwaye de ni kum cik ungo nia ebed jacampacu m’i ng’om, endre ni kum bedopwe mi yioyic. 14Kum tek ju ma gi mi cik gi jucampacu, e nwang’u juthiro yioyic, man lembang’ola de juthiro: 15kum cik timo kwinyo; ento ka ma cik umbe i ie, e kadhukuwicik de mbe. 16Kum kumeno en e mi yioyic, kara ebed calku bero; kara lembang’ola bed andhandha ni nyikwayu ceke; ni maeno kende ngo ma en e mi cik, endre ni maeno bende ma en e mi yioyic pa Ibrahim, ma en e wegwa ceke 17(calu egore kumae, Aketho ibed wego mi thek dupa) i wang’e en m’eyio, en e Mungu, m’emio kwo ni ju m’utho, man elwong’o gin m’umbe, calu ginuti. 18M’eyio i genogen ka genogen umbe, kara edok ni wego mi thek dupa, calku maeno m’uyere kumae, Nyikwei bibedo kumeno. 19Man ma yioyic pare doko ng’ic ungo ie poro pi kume m’ubedo va etho (ma oro pare yenyo romo dak), man ke pi i Sara m’ubedo mvuuy: 20ento, m’eneno ba lembang’ola pa Mungu, cwinye bedo jiji ngo ni kum yic m’umbe, ento edoko tek ni kum yioyic, m’emio ko dwong’ ni Mungu, 21man m’eng’eyo andhandha nia gin m’eng’olo, ecopo time bende kakare. 22Kum kumeno bende jukwane ire ni bedopwe. 23Nie egore pire kende ngo, ya jukwane ire: 24ento iwa bende, m’ebikwandre, ma wayio en m’eting’o Yesu Rwoth mwa ku kind ju m’utho, 25ma juwodhe pi kier mwa, man juting’e pi gony mi lembe m’i wiwa.

will be added

X\