Romans 16

1Aketho Foibe ma nyamegwa i weng’wu, ma en e jatic ma dhaku mi kanisa ma eni i Kenkre: 2kara wujole i Rwoth, calu m’umaku jumaleng’, man kara wukonye i gin ceke ma cande ni i kume i beng’wu: kum en gire bende en e jakonyjo dupa, man ira an nini de. 3Wumoth Priskila man Akula ma gi jutic wada i Kristu Yesu, 4ma gipielo ng’utgi gigi piny pi kwo para; amio foyofoc igi a kenda ngo, endre kanisa mi Thekdhanumange ceke bende: 5man wumoth kanisa ma ni i ot migi. Wumoth Epaineto ma jamerna, ma en e mwoka mir Asia ni Kristu. 6Wumoth Mariamu, m’emule ku tic ma dit iwu. 7Wumoth Androniko ku Yunia, ma gi wedina, gi jukol wakugi de, ma pigi yik de kind jukwenda, ma gilar gibedo i Kristu ira. 8Wumoth Amplia ma jamerna i Rwoth. 9Wumoth Urbano ma jatic wadwa i Kristu, man Stakus ma jamerna. 10Wumoth Apele m’e ng’atu ma jufoye I Kristu. Wumoth ju ma gi juot pa Aristobulo. 11Wumoth Herodioni ma wada. Wumoth ju ma gi juot pa Narkiso, ma gini i Rwoth. 12Wumoth Trufaina ku Trufosa, ma gimuli ku tic i Rwoth. Wumoth Persi ma jamer, m’emule dit ku tic i Rwoth. 13Wumoth Rufo ma julwong’e i Rwoth, man min mire ma en e ma de. 14Wumoth Asunkrito, ku Flegoni, ku Herme, ku Patroba, ku Herma, kud umego ma gibedo gikugi de. 15Wumoth Filologo ku Yulia, man Nereu ku nyamin mire, man Olumpa ku jumaleng’ ceke ma gibedo gikugi. 16Wumothru ku cwiocwic ma leng’. Kanisa pa Kristu ceke gimothowu. 17Nie akwayuwu, umego, wunen ju ma giketho pokri man kaka ma ketho dhanu kier, ma tung’ ku ponji ma wugamu ng’eyo: man wulokru woko kud i bang’gi. 18Kum ju ma kumeno gitimo ni Rwoth mwa Kristu ngo, endre ni usauigi gigi: man giwondo adunde mi ju m’ung’eyo lembe ngo ku wec migi ma mit ma yom de. 19Kum woro mu uyik tir ba dhanu ceke. Ka kumeno anyong’a nega piwu: endre ayenyo wubed riek kum maeno m’e ber, man cobo ni maeni m’e rac. 20Man Mungu mi kwiocwiny binyono Jok the tiendwu fodi nyanok. Bero pa Rwoth mwa Yesu Kristu bed i beng’wu. 21Timoteo ma jatic wada mothowu; man Lukio ku Yason, man Sosipatro, ma wedina. 22An a Tertio, m’agoro waraga maeni, amothowu i Rwoth. 23Gayo ma jagwokna, man mi kanisa ceke de emothowu. Erasto jagwok sente mir adhura de mothowu, man Kwarto m’umego. 24Bero pa Rwoth mwa Yesu Kristu bed i beng’wu kpo. Amen. 25Nie ire m’ecopo ketho wunyang’ calku lembanyong’a para ma juboth ko ku lembayera pa Yesu Kristu, calku lembanyutha mi lembamung’a m’ukandre ling’ i nindo ma rondo ku rondo, 26ento kawono enyuthie, man ni kum lembagora pa Mungu mi jubila, calku lembang’ola pa Mungu ma nja, juketho eng’eire cil ni thek ni woro mi yioyic: 27ni Mungu ma riek e kende, ni kum Yesu Kristu, dwong’ ma rondo ku rondo ubed ire. Amen.

will be added

X\