Romans 15

1Nie wan ma wa tek maku wayei mulima mi ju ma ng’ic, man ku wanyai mutoro i iwa giwa. 2Ku ba dhanu ceke m’i kindwa dong’ ng’atuman unyai mutoro i wadi pi maeno m’e ber, mi teng’oteng’. 3Kum Kristu bende nyayu mutoro i ie gire ngo; ento, calu egore kumae, Cac mi ju m’ucayu in upodho i wia. 4Kum gin ma yang’ ugore egore pi ponji mwa, kara ni kum twiocwiny man ni kum jukojuk mi lembagora pa Munguwabed ku genogen. 5Nie Mungu ma won twiocwiny ku jukojuk umi iwu ya wubed ku pidoic acel ng’atuman ku wadi man ku wadi calku Kristu Yesu: 6kara ku cwinywu m’ucungo acel man ku dhogwu acel wuyung Mungu ma won Rwoth mwa Yesu Kristu. 7Kum kumeno wujolu, cil calu Kristu bende jolowu, ni dwong’ pa Mungu. 8Kum ayero nia Kristu judaru dwoke ni jatim mi yaa pi lemandha pa Mungu, kara edwok lembang’ola m’umire ni wegwa tek, 9man kara Thekdhanumange yung Mungu pi kisa pare; calu egore kumae, Pi maeni abituci i kind Thekdhanu mange, Man abiwero ni nyingi. 10Man kendo ewacu kumae, Anyong’a negwu, wu Thekdhanumange, karacelo ku dhanu pare. 11Man kendo kumae, Wupak Rwoth, wu Thekdhanumange ceke; Man dong’ dhanu ceke gipake. 12Man kendo, Isaya wacu kumae, Ulag Yese bibedo nuti, Man ng’atu ma biwok nibimo wi Thekdhanumange; Thekdhanumange de bigeno i kume. 13Nie dong’ Mungu mi genogen upong’wu kud anyong’a ceke ku kwiocwiny i yic ma wuyio, kara wusegru i genogen, i tego pa Tipo Maleng’. 14Man an gira bende ang’eyo piwu andhandha, juwada, ya wun giwu wupong’ ku bero, wupong’ ku ng’eyong’ec ceke, ma wucopo jukru ko bende. 15Endre agoro iwu ku tegocwiny ma sagu i ng’ete moko, calu abeketho wupoi kendo, kum bero m’uai ba Mungu m’umire ira, 16kara abed jatic pa Kristu Yesu ni Thekdhanumange, m’abetimo tic mi lamulam mi lembanyong’a pa Mungu ma juboth ko, kara lam ma Thekdhanumange dok m’eyire, m’edoko leng’ ni kum Tipo Maleng’. 17Ka kumeno abedo ku kulula para i Kristu Yesu i gin ma pa Mungu. 18Kum abibedo ku tegocwiny ungo m’ayer ko pi gin moko ndhu maeni ma Kristu timo ni kuma, pi woro mi Thekdhanumange, ku lembe man tic bende, 19i tego mi giranyutha ku musana, i tego pa Tipo Maleng’; ketho ugambre i Yerusalem, man i ng’ete cil i Iluriko, adaru yero lembanyong’a ma juboth ko pa Kristu kot; 20eyo, m’akeco nik ayer lembanyong’a ma juboth ko, i ka ma nying’ Kristu lwongre i ie ngo, kara kud agom wi kathere pa ng’atu mange; 21ento, calu egore kumae, Gibineno, gi ju ma pire fokuwok igi ngo, Man ju ma fokuwinjo ngo gibing’eyo. 22Kum kumeno bende yo cere ira wang’ udul ma kud abin ko i beng’wu: 23ento kawono, ma kakara dong’ umbe kendo i ng’ombuni, man ava bino i beng’wu nega rundi maeni dupa, 24kinde ma tek acidho i Spania (kum ageno ya abinenowu i woth para, man wubitera de i yo para ma kuca, tek walar wabedo wakudu ma cwinya kwio ko moko), 25ento kawono awacu, acidho Yerusalem, m’atimo ko ni jumaleng’. 26Kum ebedo ber ni Makedoni kud Akaya ya gijok ajok moko pi ju ma canpiny unegogi kind jumaleng’ ma i Yerusalem. 27Eyo, ebedo igi ni mutoro; man gi jubanja migi. Kum tek juketho Thekdhanumange gidok jurib gin migi mi tipo, banja mi joca ni i bang’gi ya gitim igi bende i gin mi kum. 28Ka kumeno kan adaru maeni, man adaru mwono ayi kum nying’ maeni, abikadhu kud i beng’wu cik i Spania. 29Man ang’eyo nia, kan abino i beng’wu, abibino i pong’ mi mugisa pa Kristu. 30Nie akwayuwu, umego, ni kum Rwoth mwa Yesu Kristu, man ni kum mer mi Tipo, ya wuii karacelo wakudu i rwo mu ni Mungu pira; 31kara aboth ni ju ma gi juco i Yahudi, man kara timotim para ma pi Yerusalem uyire ni jumaleng’; 32kara abin i beng’wu kud anyong’a ni kum yeny ma Mungu yenyo, man anwang’ yom karacelo wakudu. 33Nie Mungu mi kwiocwiny ubed kudu ceke. Amen.

will be added

X\