Romans 14

1Ento ng’atu ma ng’ic i yioyic wujole, endre ku lembapoka mi piem ungo. 2Ng’atu acel yioyic pare nuti m’ecamu ko giki ceke; ento ng’atu ma ng’ic re nang’u dek. 3Dong’ ng’atu ma camu kud ecai ng’atu ma camu ngo; man ng’atu ma camu ngo kud epok lembe pa ng’atu ma camu: kum Mungu daru jole. 4In i ng’a m’ipoko lembe wi jatic pa ng’atu mange e? ni Rwoth pare gire ecungo kadi epodho. Eyo, jubiketho ecungo: kum Rwoth tego pare nuti m’eketho ecungo ko. 5Ng’atu acel ketho ceng’ acel bedo dit ma sagu wi wadi: ng’atu mange ke ketho ceng’ ceke bedo calacel. Ku ba dhanu ku ba dhanu dong’ ng’atuman ung’ei cu i pidoie gire. 6Ng’atu ma kwiro ceng’, ekwire ni Rwoth: man ng’atu ma camu, ecamu ni Rwoth, kum emio foyofoc ni Mungu; man ng’atu ma camu ngo, ecamu ngo ni Rwoth, man emio foyofoc ni Mungu. 7Kum ng’atu moko mbe i kindwa ma bedo ire gire, ng’atu moko mbe de ma tho ire gire. 8Kum kadok wabedo, wabedo ni Rwoth; kadi kadok watho de, watho ni Rwoth: ka kumeno kadok wabedo, kadi watho, wan wa pa Rwoth. 9Kum pi lembe nini Kristu tho man ecer kendo, kara ebed Rwoth mi ju m’utho ku ju ma kwo bende. 10Ento in, ipoko lembe wi umeru pirang’o? kadi in kendo, icayu umeru pirang’o? kum kawa ceke wabicungo nyim kom mi pokolembe pa Mungu. 11Kum egore kumae, Calu abedo, Rwoth uwacu, cong ceke kubang’e kubang’e birum ira, Man leb ceke kubang’e kubang’e bipaku Mungu. 12Kum kumeno ku ba dhanu ceke m’i kindwa ng’atuman biyero pire gire ni Mungu. 13Ka kumeno ku wapoku lembe kendo ma nia ng’atuman upok lembe wi wadi man wi wadi: endre ma sagu wupok lembe mae, nia ng’atu moko kud uketh gin ma redho jo i yo p’umin, kadi kaka ma jupodho i ie. 14Ang’eyo, man ang’eyo andhandha i Rwoth Yesu, ya gin moko mbe ma cido gire kende: ndhu ni ng’atu m’ukwanu gin moko ya ecido, e ire ecido. 15Kum tek can unego wedu kum cemo, meca iwotho kendo i mer ungo. Kud inyoth ng’atu ma Kristu tho pire ku cemo peri. 16Ka kumeno kud iyi juyer pi bero peri ku rac; 17kum ker pa Mungu en e camu guacama man madhu giramadha de ngo, endre bedopwe man kwiocwmy kud anyong’a i Tipo Maleng’. 18Kum ng’atu m’utimo ni Kristu i maeni enyayu mutoro ni Mungu man dhanu foye. 19Kum kumeno dong’ walubu tok gin ma ketho kwiocwiny, man gin ma watengra ko i kume. 20Kud inyoth tic pa Mungu pi giracama. Gin ceke gi leng’ andha; ento en e dubo ni ng’atu m’ucamu ku kier. 21En e ber nicamu ring’o ngo, kadi madhu pigulok, kadi timo gin moko m’umeru kier i kume. 22Yioyic m’ibedo ko, bed kude giri i wang’ Mungu. Anyong’a ni ng’atu m’upoko lembe pare gire rac ungo i gin maeno m’eyio. 23Ento ng’atu ma tek ucamu ma cwinye ni jiji lembapoka ma rac ni i wie, kum ecamu ma yioyicne mbe; man gin ma tek en e mi yioyic ungo en e dubo.

will be added

X\