Romans 12

1Ka kumeno, umego, akwayuwu ku kisa pa Mungu, ya wuthier kumwu ubed ni lam ma kwo, ma leng’, ma yire ni Mungu, ma en e rwo mu mi tipo. 2Man kud wuporu ku ng’om maeni: endre wubed ma kothwu lokre ni kum dwoko pidoiwu nyen, kara wung’ei yeny ma Mungu yenyo m’e ber m’e yire de m’e cu ma ndhu de. 3Kum ayero, ni kum bero m’umire ira, ni dhanu ceke ma ni i kindwu kubang’gi kubang’gi, ng’atuman ie kud upid pire gire ma sagu ma maku ie pidi; ento ie pid kumeni calu pidoie bedo nger, calu mukero mi yioyic ma Mungu daru mio ni dhanu ceke kubang’gi kubang’gi. 4Kum cil calu wabedo ku wathkum dupa i kum acel, man wathkum ceke tic migi acel ungo: 5kumeni wan, ma wa dupa, wa kum acel i Kristu, man wan ceke wa wathkum ng’atuman pa wadi man pa wadi. 6Man ma wabedo ku giramia ma tung’ tung’ calku bero maeni m’umire iwa, tek en e lembila, dong’ waeu calku yioyic maka mwa; 7kadi timotim, dong’ wamira giwa ni timotim mwa; kadi ng’atu m’uponjo de, ni ponji pare; 8kadi ng’atu m’ujuko juk de ni jukojuk pare: ng’atu m’umio de, dong’ etime k’abamba; ng’atu m’ubimo bim de, ebim kud amora; ng’atu ma kisa nege de, enege k’anyong’a. 9Dong’ mer ubed umbe umbili. Dag hai maeno m’e rac; mok kum maeno m’e ber. 10I mer mir umego wumeru ku ber ng’atuman ku wadi man ku wadi; i lembe mi yung dong’ ng’atuman uting’ wadi ma sagu en; 11i amora i molkum ungo; i yauni mi tipo; ma wubetimo ko ni Rwoth, 12ma anyong’a benegowu i genogen; ma wutwio ko cwinywu i masendi; ma wubedo ko asu i rwo; 13ma wukony ko jumaleng’ ku canpiny m’unegogi; ma wugwok ko welo ber. 14Mi mugisa ni ju m’unyayu ragedo i kumwu; mi mugisa, man kud wukwong’ kwong’. 15Anyong’a negwu ku ju ma anyong’a negogi; wuywak ku ju m’uywak. 16Wubed ma pidoiwu ripo acel man kum wadi man kum wadi. Kud wuketh pidoiwu kum gin ma dit, endre iwu pid pi gin ma nweng’. Kud wubed riek i weng’wu giwu. 17Kud wucul wang’ gin ma rac ni ng’atu moko. Iwu pid pi gin ma ber i wang’ dhanu ceke. 18Tek ecopre, calu eni i iwu, wubed ma cwinywu kwio ku dhanu ceke. 19Jumer, kud wucul kwor mi kumwu giwu, ento wuwek kaka ni kwinyo pa Mungu: kum egore kumae, Culo kwor en e para; abiculo an, Rwoth uwacu. 20Ento tek jadegini kec ubenege, mi ire cam; tek rieu unege, mi emadhi: kum i tim m’itimo ko kumeni ibicoko cukmac i wie. 21Tic ma rac kud uloi, endre isag tic ma rac ku bero.

will be added

X\